1, 2. a) ¿Tzeʼn tmod Jehová in kubʼ tyekʼin kyukʼil xjal? b) ¿Tiʼ qo xnaqʼtzal tiʼj toj xnaqʼtzbʼil lu?

TOJ ambʼil jaʼlo, «in che kyaj xjal tjaqʼ kykawbʼil» qeju xjal at kyipumal moqa aʼyeju at jun kyoklen (Mat. 20:25; Ecl. 8:9). Nya ik te Jehová tmod, ax tok ate Dios nimxix tipumal, pero in ximen qiʼj. In kubʼ tyekʼin tbʼanel tmod qukʼil, in ximen tiʼjju in kubʼ qximen ex tok twitz tiʼjju at tajbʼen qe. Nya oʼkxju, mintiʼ in tzaj tqanin jun tiʼ qe aju mlay bʼant quʼn, tuʼnju «bʼaʼn tuʼn tquqil txʼotxʼ qoʼ» (Sal. 103:13, 14).

² In yolin Xjan Uʼj kyiʼj nim txʼolbʼabʼil jatumel in tzaj tyekʼin qa ximen Jehová kyiʼj tmajen. Qo xnaqʼtzan kyiʼj oxe. Tnejel, tej tonin tiʼj kuʼxun Samuel tuʼn t-xi tqʼoʼn jun tqanil tiʼj kastiw te nejenel kye pal, aju Elí tbʼi. Aju tkabʼin, tej t-xi ttzaqʼweʼn tukʼil nim tpasens te Moisés tej tjyon tumel tuʼn miʼn tok te nejenel kyxol aj Israel. Ex aju toxin, tej kyetz tiʼn aj Israel toj Egipto. Akux in qo xnaqʼtzan kyiʼj txʼolbʼabʼil lu, bʼaʼn tuʼn qximen tiʼj tiʼ in tzaj tyekʼin jlu qe tiʼj Jehová ex tiʼ xnaqʼtzbʼil jaku tzʼel qiʼn tiʼj.

3. a) ¿Tiʼ bʼaj tiʼj Samuel toj jun qonikʼen? (Qʼonka twitza tiʼj tnejel tilbʼilal). b) ¿Tiʼ jaku kubʼ qxjelin?

³ Xi tzyet tuʼn tajbʼen Samuel te Jehová toj ja xbʼalun tej tzmatoq kʼwaʼlx (1 Sam. 3:1). Toj jun qonikʼen tej otoq txiʼ jtal, bʼaj jun tiʼ mintiʼ ximen tuʼn (kjawil uʼjit 1 Samuel 3:2-10). * Ok tbʼiʼn jun tqʼajqʼajel wibʼaj ex in tzajtoq tqʼamaʼn tbʼi, kubʼ t-ximen qa a Elí in txokin tiʼj. Ex tuʼnju bʼaʼntoq bʼin, jun rat xiʼ tukʼil Elí ex tqʼama: «Lu qine lu; ¿ti wile teya?». Tqʼama Elí qa nya atoq in txokin tiʼj. Ax jlu bʼaj toj tkabʼin maj. Tejtzun tpon Samuel toj toxin maj, el tnikʼ Elí tiʼj qa a Dios in txokin tiʼj Samuel. Tuʼntzunju, xi tqʼamaʼn te Samuel tiʼ tuʼn t-xi ttzaqʼweʼn ex xi tbʼiʼn. ¿Tiquʼn nya jun rat tzaj tqʼamaʼn Jehová te Samuel qa atoq in yolin? Mintiʼ in tzaj tqʼamaʼn Tyol Dios, pero aju bʼaj, in tzaj tyekʼin qa ojtzqiʼn tuʼn Jehová tiʼ jakutoq bʼant tuʼn Samuel. ¿Tiquʼn in xi qqʼamaʼn jlu?

4, 5. a) ¿Tiʼ bʼant tuʼn Samuel tej t-xi tqʼamaʼn Jehová te tuʼn t-xi tiʼn jun tqanil te Elí? b) ¿Tiʼ in tzaj t-xnaqʼtzaʼn jlu qe tiʼj Jehová?

⁴ (Kjawil uʼjit 1 Samuel 3:11-18). In tzaj tqʼamaʼntoq Ley qa iltoq tiʼj tuʼn tok kyqʼoʼn kʼwaʼl kyoklen tij xjal, mas qa at toklen «te kawil», moqa te nejenel toj jun tnam (Éx. 22:28; Lev. 19:32). Tuʼntzunju, mlaytoq bʼant tuʼn t-xiʼ Samuel tukʼil Elí te prim tuʼn t-xi tqʼamaʼn qeju tqanil te kastiw ex mintiʼtoq bʼiʼn jlu tuʼn. Nya oʼkxju, in tzaj tqʼamaʼn txʼolbʼabʼil qa «in xobʼtoq Samuel tuʼn t-xi tmaʼn te Elí aju otoq til mer ik tzaʼn tuj witzikʼ». Pero kyaj tchikʼbʼaʼn Jehová te Elí qa atoq in txokin tiʼj Samuel. Tuʼntzunju ax Elí xi qʼamante te Samuel tuʼn miʼn tkubʼ tewin jun tqanil. Xi tbʼiʼn Samuel jlu ex xi tqʼamaʼn «tkyaqil ex mintiʼ jun yol kubʼ tewan».

⁵ Mintiʼ jaw labʼin Elí tiʼjju tqʼama Samuel te tuʼnju otoq txi qʼoʼn jun tqanil chʼixmi ik tzeʼn jlu te tuʼn «jun t-sanjel Dios» (1 Sam. 2:27-36). In tzaj tyekʼin txʼolbʼabʼil lu qe qa at nim tnabʼil Jehová ex qa in ximen kyiʼj tiʼchaq.

6. ¿Tiʼ xnaqʼtzbʼil in nel qiʼn tiʼjju alkye tten onin Jehová tiʼj Samuel?

⁶ Aju txʼolbʼabʼil tiʼj Samuel, ax ikx in tzaj tyekʼin qa in nel tnikʼ Jehová tiʼjju in che ok weʼ kuʼxun twitz ex tiʼ in kubʼ kynaʼn. ¿Atpe teya kyxol kuʼxun in che xobʼ tuʼn kyyolin ex kwest tuʼn kypakbʼan kye xjal mas matij ex tuʼn miʼn kyok ik tzeʼn qe txqantl? Bʼaʼn tuʼn tok qeʼ tkʼuʼja tiʼj qa taj Jehová tuʼn tonin tiʼja, tuʼntzunju, bʼaʼn tuʼn t-xi tqʼamaʼna te tkyaqilju tkuʼx toj tanmiya ex aju in kubʼ tnaʼna (Sal. 62:8). Ximana kyiʼj kuʼxun in yolin Tyol Dios kyiʼj ik tzeʼn Samuel ex yolina kyukʼil erman ax kyabʼqʼi ik tzeʼn teya ex qeju ma che tijen, aqeju o che ex twitz jun nya bʼaʼn ik tzeʼn in nok weʼya twitz. Jakulo tzaj kyqʼamaʼn toj alkye ambʼil onin Jehová kyiʼj ex mintiʼlo ximen kyuʼn qa ik tuʼn tbʼaj.

7, 8. ¿Tzeʼn kubʼ tyekʼin Jehová qa ximen tiʼjju kubʼ tnaʼn Moisés?

⁷ Tej qʼiʼntoq 80 abʼqʼi tuʼn Moisés, xi tqʼoʼn Jehová toklen tuʼn kyetz tiʼn aj Israel toj Egipto ex kwesttoq tuʼn tbʼant tuʼn (Éx. 3:10). Jawlo labʼin Moisés tiʼj oklenj lu tuʼnju otoq xqʼuqin kyiʼj ẍneʼl toj 40 abʼqʼi atz Madián. Tuʼntzunju, xi tqʼamaʼn jlu te Jehová: «¿Ti woklene  tuʼn nxiʼye twitz Faraón ex tuʼn kyetz wiʼne aj Israel tuj Ejipt?». Xitzun tqʼuqbʼaʼn Jehová tkʼuʼj kyuʼn yol lu: «Txiʼya, porke chin tele tukʼila» (Éx. 3:11, 12). Ax ikx tqʼama Jehová te qa kʼokeltoq bʼiʼn tyol kyuʼn ansyan kyxol aj Israel. Maske ikju, tqʼama Moisés jlu: «Yajtzun qa miʼn ẍinx kyniman, [ex] qa miʼn ẍinx kybʼiʼn» (Éx. 3:18; 4:1). Junxitl jyon Moisés tiʼj ex nya aju tqʼama Jehová. Nya oʼkx kubʼ tyekʼin Jehová tpasens tiʼj, ax ikx xi tqʼoʼn tipumal tuʼn kybʼant milagr tuʼn. Tbʼanel aj tel qnikʼ tiʼj qa atzun tnejel xjal in yolin Tyol Dios tiʼj qa xi qʼoʼn tipumal tuʼn kybʼant milagr tuʼn (Éx. 4:2-9, 21).

⁸ Maske xi qʼoʼn tkyaqil onbʼil lu te Moisés, kukx jyon tumel tuʼn miʼn txi tkʼamoʼn toklen ex tqʼama qa kwest tuʼn tbʼant tyolin. Xi ttzaqʼweʼn Jehová te: «Aqine chin onil teya ok tyolina, ex kxel nxnaqʼtzaʼne alkye yol kxel tmaʼna». ¿Kubʼpe tkʼuʼj tuʼn jlu? Mintiʼ, tuʼnju xi tqʼamaʼn te Jehová tuʼn t-xi tsamaʼn juntl xjal. Tzajtzun tqʼoj Jehová tiʼj. Ax tok, tzaj tqʼoj tiʼj pero mintiʼ ok tanmi te kyuw tukʼil, sino ximen tiʼj ex xi tqʼamaʼn te qa kxeltoq tsamaʼn Aarón te tukʼil tuʼntzun tyolin te t-xel (Éx. 4:10-16).

9. ¿Alkye tten onin tiʼj Moisés tej tten tpasens Jehová tukʼil ex tej t-ximen tiʼj?

⁹ ¿Tiʼ xnaqʼtzbʼil in tzaj tyekʼin txʼolbʼabʼil lu qe tiʼj Jehová? Tuʼnju at nimxix tipumal Jehová, jakutoq tzʼok t-xobʼsaʼn Moisés ex jakutoq tzʼok tchqʼoʼn tuʼn tnimen te. Pero mintiʼ bʼant jlu tuʼn Jehová, aju bʼant tuʼn, ten tpasens tiʼj, ten tkʼujlabʼil ex ok tilil tuʼn tuʼn tqeʼ tkʼuʼj Moisés, aju mintiʼ jaw tnimsan tibʼ ex ok te mans. ¿Oninpe jlu tiʼj Moisés? Onin. Ok Moisés te jun tbʼanel nejenel ex ok tilil tuʼn tuʼn tten tpasens kyiʼj txqantl ex ximen kyiʼj ik tzeʼn tmod Jehová kubʼ tyekʼin tukʼil (Núm. 12:3).

10. ¿Tiʼ tbʼanel jaku tzaj qa ma tzʼel qkanoʼn tmod Jehová ex qa ma qo ximen kyiʼj txqantl?

¹⁰ Aju txʼolbʼabʼil lu in tzaj tyekʼin junjun xnaqʼtzbʼil qe. Qa chmilbʼaj qoʼ, qa  mambʼaj qoʼ, qa txubʼaj qoʼ moqa at qoklen te ansyan toj jun kʼloj okslal, tuʼn jlu at chʼin qoklen. Pero nim toklen tuʼn tkubʼ qyekʼin tbʼanel qmod kyiʼj txqantl ex tuʼn qximen kyiʼj, ax ikx bʼaʼn tuʼn tten qkʼujlabʼil ex qpasens kyiʼj ik tzeʼn te Jehová (Col. 3:19-21; 1 Ped. 5:1-3). Qa ma tzʼok tilil quʼn tuʼn qok ik tzeʼn te Jehová ex Jesús, tuʼn jlu nya kwest tuʼn kytzaj yolin txqantl qukʼil ex qo okel te qʼuqbʼal kykʼuʼj (Mat. 11:28, 29). Nya oʼkxju, ax ikx kʼelel kykanoʼn txqantl qiʼj (Heb. 13:7).

11, 12. Tej kyetz tiʼn Jehová qe aj Israel toj Egipto, ¿tiʼ bʼant tuʼn tuʼntzun miʼn kytzaj xobʼ?

¹¹ Tej kyetz aj Israel toj Egipto toj abʼqʼi 1513 tjaqʼxi ambʼil qʼiʼn quʼn jaʼlo, i etzlo mas te oxe millón kybʼet. Ateʼtoq xjal junxichaq kyabʼqʼi, ik tzeʼn qe kʼwaʼl ex qe bisabuelo, axlo ikx i etz yabʼ ex qeju nya tzʼaqli kyxmilal. Tuʼn tbʼant aqʼuntl kyxol nim xjal tuʼnju nejenel kywitz, iltoq tiʼj tuʼn t-ximen kyiʼj. Bʼant jlu tuʼn Jehová tej tajbʼen Moisés tuʼn. Noq tuʼn jlu, mintiʼ kubʼ kynaʼn aj Israel qa nyatoq xqʼuqin ateʼ tej kyetz kyja ex mintiʼ otoq che ten toj juntl tnam (Sal. 78:52, 53).

¹² ¿Tiʼ bʼant tuʼn Jehová tuʼn miʼn kytzaj xobʼ? Jun, i etz tiʼn «tuj kʼlojin kyten» (Éx. 6:26). Tuʼn jlu kubʼ kynaʼn qa xqʼuqintoq ateʼ ex qa at tkyaqil toj tqʼabʼ Jehová. Ax ikx, kubʼ tyekʼin tibʼ Jehová kywitz tej tajbʼen «jun muj» tuʼn te qʼij ex aju «t-spikʼumal tqan qʼaqʼ» te qonikʼan (Sal. 78:14). Ok jlu ik tzeʼn xi tqʼamaʼn Jehová kye: «Miʼn che xobʼe. Atine te yekʼil kybʼeye ex te xqʼuqil kyeye». Toj chʼintl ambʼil, iltoq tiʼj tuʼn tok qeʼ kykʼuʼj tiʼj jlu.

13, 14. a) ¿Tiʼ bʼant tuʼn Jehová kyiʼj Israel toj mar Rojo? b) ¿Alkye tten kubʼ tyekʼin Jehová tipumal kywitz aj Egipto?

¹³ (Kjawil uʼjit Éxodo 14:19-22). Bʼaʼn tuʼn qximen tiʼj qa ax ikx qe atoʼ kyxol aj Israel ex ma qo pon ttzi mar Rojo, atzun ttzel qiʼj ateʼ tsoldad faraón. Noq minabʼen in netz Jehová onil qiʼj ex in kubʼ ten jun muj kywitz aj Egipto, in maqset kybʼe ex in che kyaj ten toj qlolj, atzun qe spikʼun toj qbʼe tuʼn Jehová. In xitzun qkeʼyin Moisés aj in xi tnuqpiʼn tqʼabʼ tibʼaj mar ex in jaqet bʼe toj tmij mar tuʼn nim kyqʼiqʼ ma tzaj toj tjawitz Qʼij. In xi tzyet tuʼn qbʼet toj ttxolil kyukʼil toj qja, kyukʼil qe qalun ex qe txqantl xjal toj tmij mar. Ex jun rat in nel qnikʼ tiʼj jun tiʼ: mintiʼ xoqʼil toj bʼe, mlay qo jaw tzʼaq ex tzqij toj bʼe, tuʼntzunju nya kwest tuʼn qbʼet toj. Axpe ikx jaku che pon qeju chebʼe che bʼet toj juntl plaj tuʼntzun kyklet.

¹⁴ (Kjawil uʼjit Éxodo 14:23, 26-30). Akux in bʼaj tkyaqil jlu, in nok lepeʼ faraón qiʼj tuʼnju in qʼojin ex in jaw tnimsan tibʼ. In xitzun tnuqpiʼn Moisés juntl maj tqʼabʼ tibʼaj mar. In tzajtzun qojl qe kabʼe muro aʼ, in che ok te kabʼe ola matijxix ex in pon poqʼch jun tiʼj juntl tuʼn tkyaqil kyipumal. Mintiʼx jun tumel tuʼn kyklet faraón kyukʼil qe tsoldad (Éx. 15:8-10).

15. ¿Tiʼ xnaqʼtzbʼil in nel tiʼna tiʼj Jehová aj t-ximana tiʼjju txʼolbʼabʼil ma qo xnaqʼtzan tiʼj?

¹⁵ In tzaj tyekʼin txʼolbʼabʼil lu qa toj ttxolil in naqʼunan Jehová ex in nonin jlu qiʼj tuʼn miʼn qtzaj xobʼ (1 Cor. 14:33). Ax ikx in tzaj tyekʼin qe qa in xqʼuqin qiʼj tukʼil kʼujlabʼil ex in nonin qiʼj tzeʼn tuʼn qklet. Xqʼuqin qoʼ tuʼn Jehová ex in kolin qiʼj kywitz aj qʼoj. Aj tel qnikʼ tiʼj jlu, in tzaj tqʼuqbʼaʼn qkʼuʼj toj ambʼil jaʼlo, mas tuʼnju ya chʼix tul xitbʼil (Prov. 1:33).

16. ¿Alkye tten jaku tzʼonin qiʼj aj qximen tiʼj alkye tten e klet aj Israel tuʼn Jehová?

 ¹⁶ Ax ikx toj ambʼil jaʼlo in xqʼuqin Jehová kyiʼj tmajen, ik tzeʼn tiʼj kyamiwbʼil at tukʼil ex tiʼjju at tajbʼen kye. Ex kukx kbʼantel jlu tuʼn aj t-xi tzyet nimxix yajbʼil, aju chʼix t-xi tzyet (Apoc. 7:9, 10). Tuʼntzunju, qa ma qo tijen ex qa tzma kuʼxun qoʼ, qa yabʼ qoʼ ex qa nya tzʼaqli qxmilal, mlay qo tzaj xobʼ aj tul nimxix yajbʼil. * Tzul qnaʼn qeju tyol Jesús lu: «Kykeʼyinktze jawni, porke aju kolpibʼl kyeye in laqʼex ttzaj» (Luc. 21:28). Mlayx naj qʼuqbʼil qkʼuʼj, axpe ikx aj t-xi tzyet tuʼn tqʼojin Gog, aju kʼloj tnam kʼokel lipen tiʼj ttnam Dios, ex mas nim tipumal twitz faraón (Ezeq. 38:2, 14-16). ¿Tiquʼn mlayx tzaj bʼaj qkʼuʼj? Tuʼnju ojtzqiʼn quʼn qa mintiʼ in chʼexpaj Jehová. Kʼokel ten kolil qiʼj juntl maj tukʼil kʼujlabʼil ex kximel qiʼj (Is. 26:3, 20).

17. a) ¿Alkye tten jaku che onin txʼolbʼabʼil qiʼj, aqeju in che yolin Tyol Dios tiʼj tzeʼn in xqʼuqin Jehová kyiʼj tmajen? b) ¿Tiʼ qo xnaqʼtzal tiʼj toj juntl xnaqʼtzbʼil?

¹⁷ Toj xnaqʼtzbʼil lu, oʼkx ma qo xnaqʼtzan kyiʼj oxe techel jatumel kubʼ tyekʼin Jehová qa in xqʼuqin qiʼj tukʼil kʼujlabʼil, qa in ximen qiʼj, qa in tzaj tyekʼin qbʼe ex qa in kolin qiʼj. Bʼaʼn tuʼn qximen tiʼj jlu. Aj tbʼant quʼn, ax ikx bʼaʼn tuʼn qximen kyiʼj junjun tmod Jehová nyaxix qʼanchaʼl. Kʼonil jlu qiʼj tuʼn miʼn kyikʼ tnaʼl qe tbʼanel tmod quʼn ex kʼonil qiʼj tuʼn tchʼiy qkʼujlabʼil ex qʼuqbʼil qkʼuʼj tiʼj. Toj juntl xnaqʼtzbʼil qo xnaqʼtzal tiʼj tzeʼn jaku tzʼel qkanoʼn tiʼj Jehová ex tuʼn qximen kyiʼj txqantl toj oxe tten: kyukʼil toj qja, kyukʼil erman ex toj pakbʼabʼil.