«Ok ktzajil tqʼoʼn tkyaqiljo ok kxel kyqaniʼn toj tumil nbʼiʼy» (Juan 16:23, Akʼaj Tuʼjil Tyol qMan).

Kyuʼn tyol Jesús in nel qnikʼ tiʼj qa taj Jehová tuʼn qnaʼn Dios tekuxix ex nya kywitz qe sant, kye anjel nix kye toj qja o che kyim. Ax ikx taj tuʼn qnaʼn Dios toj tbʼi Jesús. Aj tbʼant jlu quʼn, in kubʼ qyekʼin qa oʼkx in tzaj tbʼiʼn Jehová qnaʼj Dios noq tuʼn chojbʼil bʼant tuʼn Jesús. Tqʼama Jesús jlu: «Mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6).

«Che yoline tukʼil tuj naʼj Dios tuʼn tkyaqil kykʼuʼje» (Salmo 62:8).

Aj qnaʼn Dios te Jehová, bʼaʼn tuʼn tbʼant quʼn ik tzeʼn aj qyolin tukʼil qtat. Bʼaʼn tuʼn tok qqʼoʼn toklen Dios aj qyolin tukʼil ex tuʼn t-xi qqʼamaʼn aju tkuʼx toj qanmi te, ex nya tuʼn t-xi qqʼamaʼn aju o kyaj toj qwiʼ nix tuʼn tjaw quʼjin toj jun libro.

«Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14).

Toj Xjan Uʼj in tzaj tqʼamaʼn Dios tiʼ kbʼantel tuʼn qiʼj ex tiʼ taj tuʼn tbʼant quʼn tiʼj. Tuʼn qtzaj tbʼiʼn, il tiʼj tuʼn qnaʼn Dios te «ik tzaʼnx ju tajbʼil». Tuʼn tbʼant jlu quʼn, nim toklen tuʼn qxnaqʼtzan tiʼj Xjan Uʼj tuʼntzun tok qojtzqiʼnxix Dios. Iktzun tten jaku qo tzaj tbʼiʼn.

Qo naʼn Dios tiʼjju at tajbʼen qe. Jaku txi qqanin te Dios tuʼn tonin qiʼj tuʼn tkanet qwa, qxbʼalun moqa jun lugar jatumel tuʼn qanqʼin. Ax ikx, jaku txi qqanin onbʼil te tuʼn tonin qiʼj tuʼn tjaw qjyoʼn aju mas bʼaʼn ex tuʼn ttzaj tqʼoʼn qipumal tuʼn qex kywitz nya bʼaʼn. Ex jaku txi qqanin te tuʼn tkubʼ tnajsaʼn qil, tuʼn tonin qiʼj tuʼn tchʼiy qʼuqbʼil qkʼuʼj ex tuʼn t-xqʼuqin qiʼj (Lucas 11:3, 4, 13; Santiago 1:5, 17).

Qo naʼn Dios kyiʼj txqantl. Kyaj tatbʼaj tuʼn tok kykʼujlan kyibʼ kykʼwal kyxolx. Ex tuʼnju a Jehová Qtat, tajbʼil tuʼn tok qxqʼuqin qibʼ qxolx. Tbʼanel tuʼn qnaʼn Dios tiʼj qchmil moqa tiʼj qxuʼjil, kyiʼj qkʼwal, kyiʼj toj qja ex kyiʼj qe qamiw. In tzaj tqʼamaʼn discípulo Santiago jlu: «Che naʼne Dios kyiʼje kyxolxe» (Santiago 5:16).

Qqʼonx chjonte te Dios. In tzaj tqʼamaʼn Xjan Uʼj qa o tzaj tqʼoʼn Dios nim tbʼanel tiʼchaq qe. «In kuʼtz tqʼoʼn jbʼal qibʼaj, ex in tzaj tqʼoʼn tqʼijlalil tuʼn tchmet qawal, ex in tzaj tqʼoʼn qwa tuʼn ttzalaj qanmi» (Hechos 14:17). Qa ma qo ximen tiʼj tkyaqilju o tzaj tqʼoʼn Dios qe, kxel qqʼoʼn chjonte te. Ax ikx aj t-xi qbʼiʼn qe tkawbʼil, kbʼel qyekʼin qa in xi qqʼoʼn chjonte te (Colosenses 3:15).

At maj jaku tzʼaj bʼaj qkʼuʼj qa nya jun rat in che tzaj tzaqʼweʼn qnaʼj Dios. Pero, ¿ape t-xilen jlu qa mintiʼ tkʼuʼj Dios qiʼj? Miʼn. Qo yolin kyiʼj junjun techel aju in tzaj kyyekʼin qa at maj il tiʼj tuʼn kukx qnaʼn Dios.

Toj tnejel xnaqʼtzbʼil o yolin tiʼj Steve. In tzaj tqʼamaʼntl jlu: «Noqwit mintiʼ in naʼne Dios, ya mintiʼwtlo in tzalaje juntl maj». ¿Tiʼ onin tiʼj? Xi tzyet tuʼn t-xnaqʼtzan tiʼj Xjan Uʼj ex el tnikʼ tiʼj qa iltoq tiʼj tuʼn tnaʼn Dios nimku maj. Tqʼama Steve jlu: «In xi nqʼoʼne chjonte te Dios tiʼj tkyaqil onbʼil tzaj kyqʼoʼn wamiwe weye ex tuʼn kykʼujlabʼil kubʼ kyyekʼin wiʼje. Mas in chin tzalaje jaʼlo».

¿Tiʼtzun bʼaj tiʼj Jenny aju kubʼ t-ximen qa mintiʼtoq toklen tuʼn ttzaj bʼiʼn tuʼn Dios? Tqʼama jlu: «Kyoj ambʼil mas kwest, xi nqanine te Dios tuʼn tonin wiʼje tuʼn tel nnikʼe tiʼj tiquʼn kubʼ nximane qa mintiʼ wajbʼene». ¿Tzeʼn onin naʼj Dios tiʼj? «Tej nnaʼne Dios, onin wiʼje tuʼn tok nqʼoʼne woklene ik tzeʼn in bʼant tuʼn Dios. El nnikʼe tiʼj qa aj tkubʼ nximane qa mintiʼ wajbʼene, mintiʼ in bʼant jlu tuʼn Dios. Ax ikx onin naʼj Dios wiʼje tuʼn miʼn nsikte». ¿Tiʼ tbʼanel tzaj tuʼn jlu? «O tzʼonin naʼj Dios wiʼje tuʼn tok nqʼoʼne Jehová te Wamiwe, ten Nmane ex te Ndiose. Kukx ktel wukʼile ex kʼonil wiʼje qa kukx ma kubʼ nbʼinchaʼne tajbʼil».

Atzun jaʼlo qo yolin tiʼjju bʼaj tiʼj Isabel. Tej chʼixtoq tul itzʼj tal, xi kyqʼamaʼn aj qanil te qa nya tzʼaqlitoq t-xmilal tal aj tul itzʼj. Tzaj nim tbʼis tuʼn jlu. Axpe ikx ateʼ junjun xi kyqʼamaʼn te tuʼn tel tiʼn tal. Tqʼama Isabel jlu: «Toj ambʼil aju kubʼ nximane qa oktoq chin kyimele tuʼn bʼis». ¿Tiʼ bʼant tuʼn? «In naʼne Dios nimku maj tuʼntzun tonin Dios wiʼje». Tej tbʼet ambʼil nya tzʼaqli t-xmilal tal tej tul itzʼj ex ok kyqʼoʼn tbʼi te Gerard. ¿Kubʼpe tnaʼn Isabel qa tzaj bʼiʼn tuʼn Dios? Ikju. ¿Alkye tten onin Dios tiʼj? «Ma tzikʼ 14 abʼqʼi ex a wale Gerard atzun mas tbʼanel oyaj o tzaj nkʼamoʼne. Aj tok nkeʼyine in tzalaj tiʼj tanqʼibʼil maske nya tzʼaqli t-xmilal, in nel nnikʼe tiʼj qa atzun mas tbʼanel tzaqʼwebʼil tiʼj nnaʼj Diose».

Kyuʼn yol lu in tzaj qnaʼn aju tqʼama salmista: «Nman, in tzaj tbʼiʼna kynaʼj Dios qe xjal mans, in xi tkyuwsaʼna kykʼuʼj ex in che tzaj tbʼiʼna» (Salmo 10:17). At nim tiquʼn tuʼn kukx qnaʼn Dios.

Toj Xjan Uʼj in che kanet nim naʼj Dios bʼant tuʼn Jesús. Aju mas ojtzqiʼn quʼn, aju xi tyekʼin kye t-xnaqʼtzbʼen. ¿Tiʼ xnaqʼtzbʼil jaku tzʼel qiʼn tiʼj jlu?