In kubʼ t-ximen María, Raúl, Arne ex junjuntl xjal qa jun tbʼanel oyaj naʼj Dios te kye. Aj kynaʼn Dios jaku bʼant tuʼn kyyolin tukʼil, tuʼn t-xi kyqʼoʼn chjonte te ex tuʼn kyjyon onbʼil tukʼil. Ax kyximbʼetz at tiʼj naʼj Dios ik tzeʼn in tzaj tqʼamaʼn Xjan Uʼj: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn, kyjaʼtzun tten in qeʼxix qkʼuʼj tiʼj» (1 Juan 5:14).

Noqtzun tuʼnj, ateʼ nim xjal kwest tuʼn t-xi kynimen aju in tzaj tqʼamaʼn Xjan Uʼj tiʼj naʼj Dios. In tzaj tqʼamaʼn Steve jlu: «Tej qʼiʼntoq 17 abʼqʼi wuʼne e kyim oxe wamiwe, jun toj jun aksident ex kabʼetl e jaw jiqʼwi toj mar». ¿Tiʼ bʼant tuʼn Steve? «Xi nqanine te Dios tiquʼn otoq bʼaj jlu, pero mintiʼ in tzaj tbʼiʼne. Tuʼntzunju kubʼ nxjeline: ‹¿Tiquʼn in qo naʼn Dios qa ni jun  in tzaj bʼin qe?›». Ax jlu in kubʼ kynaʼn nim xjal ex in kubʼ kyxjelin qa in che tzaj bʼiʼn tuʼn Dios.

Pero at junjuntl tiquʼn in kubʼ kyximen xjal qa noqx gan in qo naʼn Dios. Ateʼ junjun in kubʼ kyximen qa ya ojtzqiʼn tkyaqil tuʼn Dios, qa ya bʼiʼn tuʼn alkyeqe nya bʼaʼn in qo ok weʼ twitz ex tiʼ at tajbʼen qe. Tuʼntzunju in kubʼ kyximen qa nya il tiʼj tuʼn qnaʼn Dios.

Ateʼ junjuntl in kubʼ kyximen qa nya taj Dios tuʼn ttzaj tbʼiʼn kynaʼj Dios tuʼnju o kubʼ kybʼinchaʼn jun nya bʼaʼn toj ambʼil ojtxe. In tzaj tqʼamaʼn Jenny jlu: «In kubʼ nximane qa mintiʼ wajbʼene. O bʼant junjun tiʼchaq wuʼne aju in tzaj nbʼise tiʼj, tuʼntzunju in kubʼ nximane qa mintiʼ woklene tuʼn ntzaj bʼiʼne tuʼn Dios».

¿Tiʼ teya t-xim? ¿Ope kubʼ t-ximana jun maj qa mintiʼ in tzaj tbʼiʼn Dios qe qnaʼj Dios? Qa ikju, ktzalajela aj tel tnikʼa tiʼjju in tzaj tqʼamaʼn Xjan Uʼj tiʼj naʼj Dios * ex jaku tzʼok qeʼ tkʼuʼja tiʼj. Ax ikx kʼonil Xjan Uʼj tiʼja tuʼn kyxi tzaqʼwet xjel lu:

• ¿In tzajpe tbʼiʼn Dios qe qnaʼj Dios?

• ¿Tiquʼn mintiʼ in tzaj ttzaqʼweʼn Dios junjun naʼj Dios?

• ¿Alkye tten tuʼn qnaʼn Dios tuʼntzun qtzaj tbʼiʼn?

• ¿Tzeʼn jaku tzʼonin naʼj Dios tiʼja?