¿Tiquʼn mintiʼ in tzaj ttzaqʼweʼn Dios kykyaqil qe naʼj Dios?
Tgan Jehová, aju qtat at toj kyaʼj, tuʼn ttzaj tbʼiʼn qe qnaʼj Dios in che jatz toj qanmi. Pero mintiʼ in che tzaj ttzaqʼweʼn kykyaqil naʼj Dios. ¿Tiquʼn? ¿Tiʼ il tiʼj tuʼn tbʼant quʼn aj qnaʼn Dios? Qo xnaqʼtzan tiʼjju in tzaj tqʼamaʼn Xjan Uʼj.
«Ok kynaʼne Dios, miʼn txi kymaʼne elaʼ maj axju yol» (Mateo 6:7).
Nya taj Jehová tuʼn t-xi qqʼamaʼn aʼyex yol te toj qnaʼj Dios nix tuʼn tjaw quʼjin toj jun libro. Taj tuʼn qyolin tukʼil tuʼn tkyaqil qkʼuʼj. Ximana tiʼj qa at jun tamiwa in tzaj tqʼamaʼn aʼyex yol teya tkyaqil maj, jakulo sikta tuʼn tbʼina tiʼj. Aʼyeju tbʼanel amiw in che yolin tiʼj tkyaqilju in kubʼ kynaʼn. Qqʼamanx tkyaqilju tkuʼx toj qanmi te Dios aj qnaʼn Dios te, iktzun tten kbʼel qyekʼin qa in nok qqʼoʼn te jun qamiw.
«Qa ma txi kyqanine, mlay tzaj qʼoʼn kyeye, porke mya tuj tumel in xi kyqanine» (Santiago 4:3).
Mlay qo ayon tuʼn ttzaj ttzaqʼweʼn Dios qe qnaʼj Dios qa ma txi qqanin jun tiʼ te aju nya tgan. Jun techel, qa at jun xjal in napostarin pwaq ex in xi tqanin onbʼil te Dios tuʼn ttzaj tqʼoʼn tswert tuʼn tkambʼan pwaq, ¿tzulpe ttzaqʼweʼn Jehová tnaʼj Dios? (Isaías 65:11; Lucas 12:15). Mlay qo ayon tuʼn ttzaj ttzaqʼweʼn Dios qe naʼj Dios ik tzeʼn jlu. Tuʼn ttzaj ttzaqʼweʼn Dios qe qnaʼj Dios, il tiʼj tuʼn tbʼant quʼn ik tzeʼn in tzaj tqʼamaʼn qe toj Xjan Uʼj.
«Aju xjal tkʼiʼ txi tbʼiʼn tley Dios, ax ikx te mlay tzaj tbʼiʼn Dios aju tnaʼj Dios» (Proverbios 28:9).
Toj ambʼil ojtxe, mintiʼ xi tbʼiʼn Dios kynaʼj Dios qeju mintiʼ xi kynimen tley ex ax jlu in bʼant tuʼn toj ambʼil jaʼlo (Isaías 1:15, 16; Malaquías 3:6). Qa qaj tuʼn ttzaj tbʼiʼn Dios qe qnaʼj Dios, il tiʼj tuʼn t-xi qbʼiʼn qe tley. Pero ¿yajtzun qa kubʼ qbʼinchaʼn jun nya bʼaʼn toj ambʼil ojtxe? ¿Ape t-xilen jlu qa ya mlay qo tzaj tbʼiʼn? Miʼn. Jaku kubʼ tnajsaʼn Dios qil qa ma tzʼajtz tiʼj qanmi ex qa ma txi qbʼinchaʼn aju tajbʼil (Hechos 3:19).
