¿In tzajpe tbʼiʼn Dios qe qnaʼj Dios?
¿Ope kubʼ t-xjelina jun maj qa in tzaj tbʼiʼn Dios qe tnaʼj Diosa? Qa ikju, nya oʼkx teya o kubʼ xjelinte jlu. Ateʼ nim xjal o txi kyqanin onbʼil te Dios tej kyok weʼ twitz jun nya bʼaʼn. Noqtzun tuʼnj, kukx in tzaj nya bʼaʼn kyiʼj. ¿Ape t-xilen jlu qa mintiʼ in tzaj tbʼiʼn Dios qe qnaʼj Dios? Miʼn. In tzaj tqʼamaʼn Xjan Uʼj qa in qo tzaj tbʼiʼn Dios qa ma bʼant quʼn toj tumel. Qo xnaqʼtzan tiʼjju in tzaj tqʼamaʼn.
IN QO TZAJ TBʼIʼN DIOS
«Porke in tbʼiʼna aju qnaʼj Diose. Kykyaqil xjal in che ul tukʼila» (Salmo 65:2).
Ateʼ junjun xjal in che naʼn Dios noq tuʼn tkubʼ kynaʼn bʼaʼn, maske in kubʼ kyximen qa ni jun in tzaj bʼinte kye. Noqtzun tuʼnj, nya oʼkx in nonin naʼj Dios qiʼj tuʼn qex twitz nya bʼaʼn. In tzaj tqʼamaʼn Xjan Uʼj qa «niqayin taʼ Qman [Jehová] kyiʼj qeju in che kubʼsan twitz, * aqeju axix tok kyuʼn [...] ex ok t-xi kyqanin onbʼil te in che tzaj tbʼiʼn» (Salmo 145:18, 19).
Tuʼntzunju, jaku txi qqʼamaʼn qa in tzaj tbʼiʼn Jehová kynaʼj Dios qeju in che ajbʼen te. Tukʼil kʼujlabʼil in tzaj tqʼamaʼn jlu qe: «Che kubʼsaltzune nwitze ex che tzajel yoline wukʼile tuj naʼj Dios, atzun weye che tzajel nbʼiʼne» (Jeremías 29:12).
TAJ DIOS TUʼN TNAʼNA DIOS TE
«Miʼn che qʼajene tuʼn kynaʼne Dios» (Romanos 12:12).
In tzaj tqʼamaʼn Xjan Uʼj tuʼn kukx qnaʼn Dios ex tuʼn tbʼant quʼn toj tkyaqil ambʼil. Tuʼn jlu in nelxix qnikʼ tiʼj qa taj Jehová tuʼn qnaʼn Dios te (Mateo 26:41; Efesios 6:18).
¿Tiquʼn taj Dios tuʼn tnaʼna Dios te? Ximana tiʼj jlu: ¿atpe jun tatbʼaj nya tgan tuʼn t-xi tqanin tkʼwal onbʼil te? Bʼalo ya ojtzqiʼn tuʼn tatbʼaj tiʼ taj ex tiʼ in kubʼ tnaʼn tkʼwal, pero aj tok tbʼiʼn qe tyol tkʼwal in nel tnikʼ tiʼj qa qʼuqli tkʼuʼj tiʼj ex qa kʼujlaʼn tuʼn. Ax jlu in bʼaj aj qnaʼn Dios te Jehová, in kubʼ qyekʼin qa in nok qeʼ qkʼuʼj tiʼj ex qa qaj tuʼn qok laqʼeʼ ttxlaj (Proverbios 15:8; Santiago 4:8).
AT TKʼUʼJ DIOS TIʼJA
«Tkyaqilju in bʼaj kykʼuʼje tiʼj, kyqʼonxe tuj tkwent Dios» (1 Pedro 5:7).
Taj Dios tuʼn qnaʼn Dios te tuʼnju kʼujlaʼn qoʼ tuʼn ex in ximen qiʼj. In nok tqʼoʼn twitz kyiʼj nya bʼaʼn in che tzaj qiʼj ex taj tuʼn tonin qiʼj.
Xi tqanin aj kawil David onbʼil te Jehová ex xi tqʼamaʼn te tkyaqilju kubʼ t-ximen ex kubʼ tnaʼn (Salmo 23:1-6). ¿Tiʼ t-ximbʼetz Dios ten tiʼj David? Ok tkʼujlaʼn ex tzaj tbʼiʼn kykyaqil qe tnaʼj Dios (Hechos 13:22). Toj ambʼil jaʼlo, ax ikx in tzaj tbʼiʼn Dios qe qnaʼj Dios tuʼnju at tkʼuʼj qiʼj.
«AT NKʼUJLALILE TIʼJ QMAN TUʼNJU MA TZAJ TBʼIʼN NYOLE»
In che kanet yol lu quʼn toj jun bʼitz tkuʼx toj Xjan Uʼj. Qʼuqlitoq tkʼuʼj aj tzʼibʼil tiʼj qa in tzaj tbʼiʼn Jehová qe tnaʼj Dios ex nim onin jlu tiʼj. Kubʼ tnaʼn qa ok laqʼeʼ mas ttxlaj Dios ex ten tipumal tuʼn tex kywitz nya bʼaʼn tzaj tiʼj (Salmo 116:1-9).
Qa qʼuqli qkʼuʼj tiʼj qa in qo tzaj tbʼiʼn Dios, kukx qo naʼl Dios te. Qo yolin tiʼjju bʼaj tiʼj Pedro aju in nanqʼin atz España. Kyim tkʼwal te 19 abʼqʼi toj jun aksident. Tej tbʼaj jlu, xi tqʼamaʼn Pedro te Dios tiʼ kubʼ tnaʼn ex kukx xi tqanin onbʼil te tuʼntzun ttzaj tqʼuqbʼaʼn tkʼuʼj ex tuʼn tonin tiʼj. ¿Tiʼ bʼaj? In tzaj tqʼamaʼn Pedro jlu: «Tzaj ttzaqʼweʼn Jehová qe nnaʼj Diose. E ajbʼen junjun xjal tuʼn tuʼntzun ttzaj tqʼuqbʼaʼn nkʼuʼje tukʼil nxuʼjile ex tuʼn kyonin qiʼje».
Nim maj in che ajbʼen qe qamiw tuʼn Dios tuʼn ttzaj ttzaqʼweʼn qe qnaʼj Dios.
Maske mintiʼ jaw anqʼin kykʼwal, nim onin naʼj Dios tiʼj Pedro ex kyiʼj toj tja. In tzaj tqʼamaʼn María del Carmen jlu, aju t-xuʼjil Pedro: «Onin naʼj Dios wiʼje tuʼn tikʼx kʼixkʼoj wuʼne. Bʼiʼn wuʼne qa el tnikʼ Jehová tiʼjju bʼaj wiʼje ex chewix wanmiye tej nyoline tukʼil».
Aju ma tzʼel qnikʼ tiʼj toj Xjan Uʼj ex aju o tzikʼ kyiʼj txqantl, in tzaj tyekʼin qa in tzaj tbʼiʼn Dios qe naʼj Dios. Noqtzun tuʼnj, mintiʼ in che tzaj ttzaqʼweʼn Dios kykyaqil qe naʼj Dios. ¿Tiquʼn?
^ taqik' 5 In tzaj t-xnaqʼtzaʼn Xjan Uʼj moqa Biblia qa Jehová tbʼi Dios (Isaías 42:8).
Bʼalo ax ikx tgana jlu
QE XNAQʼTZBʼIL NIM KYOKLEN TOJ TYOL DIOS
¿Tkyaqilpe naʼj Dios in che tzaj tbʼiʼn Jehová?
¿Tiʼ in bʼaj qa at jun xjal in naʼn Dios noq tuʼn ttzaj qʼoʼn tiʼchaq te? ¿Yajtzun qa in nok tbʼinchaʼn chmilbʼaj nya bʼaʼn tiʼj t-xuʼjil ex yajxitl in xi tqanin tuʼn ttzaj kʼiwlaʼn tuʼn Dios?
QE XNAQʼTZBʼIL TOJ TYOL DIOS
Qaninxa jun t-xnaqʼtzbʼila tiʼj Biblia
Kʼamonxa jun t-xnaqʼtzbʼila tiʼj Tyol Dios noq kukx tukʼil jun testigo de Jehová.
