1. 1. SATANÁS, AJU TAJAW IL. At nim ikʼbʼil toj ambʼil jaʼlo tuʼnju el tpan tibʼ Satanás tiʼj Dios. Kbʼel tnajsaʼn Dios te Satanás ex qe xjal in kubʼ kyyekʼin ikʼbʼil kyiʼj txqantl (Salmo 37:38; Romanos 16:20).

2. 2. QE XJAL ATEʼ TJAQʼ TKAWBʼIL SATANÁS. Kbʼel tnajsaʼn Dios kykyaqil qeju in kubʼ kyyekʼin ikʼbʼil, ik tzeʼn qe aj kawil ex qe nejenel kye okslabʼil nya ax tok. Ax ikx, kbʼel tnajsaʼn Dios qe nimaq kʼaẍjel in che elqʼan kyiʼj xjal (2 Pedro 3:13).

3. 3. AJU IL O TZʼEL QIQEN. In tzaj tqʼamaʼn Tyol Dios qa tuʼnju aj il xjal qoʼ, in kubʼ qximen ex qaj tuʼn tkubʼ qbʼinchaʼn qe tiʼchaq nya bʼaʼn (Romanos 5:12). Ax ikx tuʼn jlu in kubʼ qnaʼn ikʼbʼil kyiʼj txqantl. Noqtzun tuʼnj, tuʼn tonbʼil Dios kbʼel naj il ex ya miʼn ten ikʼbʼil toj qanmi (Isaías 54:13).

1. 1. KXEL BʼINCHAʼN KYIʼJ TIʼCHAQ TOJ TUMEL. A Tkawbʼil Dios ok kykawil twitz Txʼotxʼ tzmax toj kyaʼj, jun kawbʼil tzʼaqli ex kukx ktel te jumajx (Daniel 2:44). Ya mlay tten ikʼbʼil kyxol xjal ex kxel tbʼinchaʼn Dios tiʼj nya bʼaʼn in nok bʼinchaʼn kyiʼj xjal toj ambʼil jaʼlo (Lucas 18:7).

2. 2. QKYAQIL QO ANQʼIL TOJ MUJBʼABʼIL. Ni jun xjal ktzajel nya bʼaʼn tiʼj tuʼn qʼoj ex tuʼn bʼiybʼel (Salmo 46:9). Kʼokel Txʼotxʼ te jun lugar segur ex oʼkx qe xjal in che onin tuʼn tten mujbʼabʼil che anqʼil twitz (Salmo 72:7).

3. 3. QKYAQIL QO ANQʼIL TOJ TBʼANEL. Kykyaqil qe xjal ok kbʼel kyyekʼin kykʼujlabʼil kyxolx (Mateo 22:39). Ya mlay tzaj qnaʼn qe nya bʼaʼn otoq tzʼok bʼinchaʼn qiʼj ex qe nya bʼaʼn ximbʼetz (Isaías 65:17). Aj tkubʼ naj ikʼbʼil «puro tuj txubʼtxaj che tel» xjal (Salmo 37:11).

¿Taj teya tuʼn tanqʼina twitz jun txʼotxʼ ik tzeʼn jlu? Toj ambʼil jaʼlo, ateʼ nim millón testigos de Jehová in kubʼ tiʼj ikʼbʼil kyuʼn. ¿Tzeʼn in bʼant jlu kyuʼn? In nok tilil kyuʼn tuʼn t-xi kybʼinchaʼn aju in tzaj tqʼamaʼn Biblia (Salmo 37:8). Maske junxitl kyyajil ex kytnam, in nonin kʼujlabʼil kyiʼj tuʼn tten mujbʼabʼil kyxolx ik tzeʼn jun familia (Isaías 2:2-4).

Che tzalajel testigos de Jehová tuʼn kyonin tiʼja tuʼn tel tnikʼa tiʼj tzeʼn jaku tzikʼx ikʼbʼil tuʼna ex aju nya bʼaʼn in nok bʼinchaʼn tiʼja. Ex kʼonil xnaqʼtzbʼil tiʼja tuʼn miʼn tkubʼ tnaʼna ikʼbʼil ex tuʼn tkubʼ tyekʼina tkʼujlabʼila. Ax ikx, kʼokel tojtzqiʼna alkyeqe tmoda kbʼel tyekʼina kyukʼil txqantl, maske nya tbʼanel kymod ex in nel ikʼuna kyuʼn. Qa ma bʼant jlu tuʼna, ok ktzalajela jaʼlo ex ktel tbʼanel tamiwbʼila kyukʼil txqantl. Ex aju mas nim toklen, kʼelel tnikʼa tiʼj tiʼ il tiʼj tuʼn tbʼant tuʼna tuʼntzun tanqʼina tjaqʼ Tkawbʼil Dios aj tkubʼ tnajsaʼn ikʼbʼil te jumajx (Salmo 37:29).