Toj chʼintl ambʼil, kkawil Tkawbʼil Dios tibʼaj tkyaqil Txʼotxʼ ex kykyaqil xjal che anqʼil toj tzalajbʼil, ktel mujbʼabʼil moqa nakʼbʼil kyxol ex che tzalajel tiʼj kyaqʼun. O txi tqʼoʼn Dios toklen Jesús tuʼn tkawin qibʼaj. Junxitl te Jesús tmod ik tzeʼn kye xjal in che kawin. Kukx in ximen Jesús tuʼn tonin kyiʼj txqantl. Tkyaqilju kbʼantel tuʼn Tkawbʼil, kxel tbʼinchaʼn tukʼil kʼujlabʼil, ktzajel qʼaqʼan tkʼuʼj kyiʼj txqantl ex kxel tbʼinchaʼn kyiʼj tiʼchaq toj tumel (Isaías 11:4).

Kukx ktel mujbʼabʼil kyxol xjal tuʼnju ya mlay tzʼok kyqʼoʼn kywitz tiʼj kyyajil ex kytnam (Apocalipsis 7:9, 10). Kʼokel kykʼujlan kyibʼ kykyaqilx xjal ex kʼokel kykʼujlaʼn Dios. Qkyaqilx qo anqʼil junx, mlayx ten qʼoj qxol ex qo xqʼuqil tiʼj Txʼotxʼ tuʼntzun tjapun twi t-ximbʼetz Dios (Salmo 115:16).

Aj t-xi tzyet tuʼn tkawin Tkawbʼil Dios, ya mlay tzaj nya bʼaʼn tuʼn nim jbʼal ex mlay tzaj nim cheʼw ex kyaq (Salmo 24:1, 2). Tej tten Jesús tzalu twitz Txʼotxʼ, kubʼ tyekʼin qa jaku bʼant nim tiʼchaq tuʼn tuʼn tipumal Jehová tej tweʼ jun kyqʼiqʼ jbʼal tuʼn (Marcos 4:39, 41). Aj tkawin Jesús kyibʼaj xjal, ya mlay che tzaj xitbʼil tuʼnx twitz txʼotxʼ ex mlay che xobʼ xjal. Ax ikx, che anqʼil xjal toj txubʼtxaj kyukʼil txkup ex ya mlay tzʼok kybʼinchaʼn nya bʼaʼn kyiʼj. Ex ni jun xjal kʼokel bʼinchante nya bʼaʼn tiʼj Txʼotxʼ (Oseas 2:18).

Qkyaqilx ktel jun tbʼanel qanqʼibʼil, ya mlay tzaj yabʼil qiʼj, ya mlay qo tijen ex ya mlay qo kyim (Isaías 35:5, 6). Qo anqʼil twitz jun txʼotxʼ saq ex tbʼanel keʼyin ik tzeʼn lugar jatumel e anqʼin Adán ex Eva. Ya mlay ten weʼyaj toj Paraíso ex ktzajel tqʼoʼn Txʼotxʼ nim twitz awal ik tzeʼn bʼaj toj jardín te Edén (Génesis 2:9). Kjapunel twi tyol Jehová lu aju xi tqʼamaʼn kye aj Israel toj ambʼil ojtxe: «Che waʼle okxi tnoj kykʼuʼje» (Levítico 26:4, 5).

Che anqʼil xjal toj txubʼtxaj tjaqʼ Tkawbʼil Dios tuʼnju kʼokel kykʼujlan kyibʼ kykyaqil ex ya mlay ten nya bʼaʼn. Ya mlay che ten nimaq qʼoj, kʼajbʼel kyoklen xjal kyuʼn toj tumel ex kykyaqilx ktel qe tiʼchaq at tajbʼen kye. In tzaj ttziyen Tyol Dios jlu: «Kykyaqil xjal che anqʼil mintiʼtl kyxobʼil, ex teylex te junjun kʼojlal tjaqʼ t-xlekumal tqan t-uva ex tqan t-higo» (Miqueas 4:3, 4).

Kykyaqilx xjal ktel jun kyja ex mlay che ximen tiʼj qa che elex lajoʼn toj. Tuʼntzunju, in tzaj tqʼamaʼn Tyol Dios qa «mya noqx gan che aqʼnal» (Isaías 65:21-23).

In tzaj ttziyen Tyol Dios jlu: «Kykyaqil xjal twitz txʼotxʼ kʼelel kynikʼ tiʼj Qman» (Isaías 11:9). Aj kyanqʼin xjal tjaqʼ Tkawbʼil Dios, kʼelel kynikʼ tiʼj tnabʼil Jehová, aju Bʼinchal qe. Ax ikx, kʼelel kyiʼn xnaqʼtzbʼil kyiʼj tbʼanel tiʼchaq o che bʼant tuʼn. Aju kʼelel qnikʼ tiʼj, mlay tzʼajbʼen quʼn tuʼn kybʼaj qbʼinchaʼn arma moqa tuʼn tok qbʼinchaʼn nya bʼaʼn kyiʼj txqantl, sino tuʼn qanqʼin toj txubʼtxaj ex tuʼn tok qxqʼuqin Txʼotxʼ (Salmo 37:11; Isaías 2:4).

El tpaʼn Dios ambʼil tuʼn tbʼaj tbʼinchaʼn Txʼotxʼ tuʼn tok te tbʼanel. ¿Tiquʼn? Tuʼnju taj tuʼn qanqʼin te jumajx twitz ex taj tuʼn qtzalaj tiʼj qanqʼibʼil (Salmo 37:29; Isaías 45:18). Tuʼn tjapun twi t-ximbʼetz lu, kbʼel tnajsaʼn kamik te jumajx (Isaías 25:8). Ex in tzaj ttziyen Tyol Dios jlu: «Mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apocalipsis 21:4). Aqeju xjal che kjel anqʼin aj tul xitbʼil, kxel tqʼoʼn Dios ambʼil kye tuʼn kyanqʼin te jumajx. Ax ikx kxel tqʼoʼn ambʼil kye qeju che kjawil anqʼin tuʼn kyten toj akʼaj twitz Txʼotxʼ (Juan 5:28, 29; Hechos 24:15).

 Toj ambʼil jaʼlo, in bʼaj kybʼinchaʼn kyten nim millón xjal tuʼntzun kyanqʼin tjaqʼ Tkawbʼil Dios. In nok tilil kyuʼn tuʼn kyok te tbʼanel xjal maske aj il qeʼ, iktzun tten jaku tzaj qʼoʼn ambʼil kye tuʼn kyanqʼin te jumajx. ¿Tzeʼn in bʼant jlu kyuʼn? In bʼant jlu kyuʼn aj tok kyojtzqiʼn Dios ex aj tok kyojtzqiʼn Jesús (Juan 17:3).

Chʼix tpon ambʼil tuʼn tel tiʼn Dios tkyaqil nya bʼaʼn. Qa taja tuʼn tel tnikʼa tiʼj tzeʼn jaku kyaj anqʼina ex tiʼ jaku bʼant tuʼna tuʼn tanqʼina toj jun tbʼanel najbʼil, qaninxa te jun testigo de Jehová tuʼn t-xi tqʼoʼn xnaqʼtzbʼil teya tiʼj Tyol Dios tuk’il u’j ¡Tzalaja tiʼj tanqʼibʼila te jumajx!.