Kyoj xnaqʼtzbʼil ma che kyaj, ma tzʼel qnikʼ tiʼj qa chʼix tkubʼ tnajsaʼn Dios qe xjal nya bʼaʼn ex tkyaqilju in tzaj tiʼn bʼis qiʼj. ¿Tiquʼn qʼuqli qkʼuʼj tiʼj jlu? Tuʼnju a Dios in tzaj tziyente qe toj Biblia. In tzaj tqʼamaʼn jlu:

«Kbʼajel ju twitz txʼotxʼ» (1 JUAN 2:17).

Noqtzun tuʼnj, ax ikx jaku txi qqʼamaʼn qa che kjel anqʼin junjun xjal tuʼnju in tzaj tqʼamaʼntl texto jlu:

«Atzunju xjal in tbʼinchaʼn tajbʼil Dios kyjel ten te jumajx».

Tuʼntzunju, qa qaj tuʼn qkyaj anqʼin, nim toklen tuʼn qnimen te Dios. Pero tnejel, il tiʼj tuʼn tok qojtzqiʼn tuʼntzun qnimen te.

Tqʼama Jesús jlu: «Atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok» (Juan 17:3). Tuʼn miʼn qkyim aj tul xitbʼil ex tuʼn qanqʼin te jumajx, nim toklen tuʼn tok qojtzqiʼn Dios. Nya oʼkx tuʼn tel qnikʼ tiʼj qa at Dios ex tuʼn tok qojtzqiʼn junjun tqanil tiʼj, sino ax ikx nim toklen tuʼn tok qamiwen qibʼ tukʼil. Qa qaj tuʼn tok qamiwen qibʼ tukʼil jun xjal, il tiʼj tuʼn tel qpaʼn ambʼil tuʼn qten tukʼil. Ax jlu in bʼaj qa qaj tuʼn qok te tamiw Dios. Qo yolin kyiʼj junjun xnaqʼtzbʼil che onil qiʼj tuʼn tten jun tbʼanel qamiwbʼil tukʼil Dios.

Tuʼn qanqʼin, il tiʼj tuʼn qwaʼn tkyaqil qʼij. Noqtzun tuʼnj, tqʼama Jesús jlu: «Mya noq oʼkx tuʼn wabʼj kʼanqʼil xjal, ax ikx jaku tzʼanqʼin xjal tuʼn tkyaqil yol in tmaʼn Dios» (Mateo 4:4).

Toj ambʼil jaʼlo, atz in che kanet tyol Jehová quʼn toj Biblia. Aj in qo xnaqʼtzan tiʼj uʼj lu, in nel qnikʼ tiʼj tiʼ bʼant tuʼn Dios toj ambʼil ojtxe, tiʼ in bʼant tuʼn toj ambʼil jaʼlo ex tiʼ kbʼantel tuʼn toj ambʼil tzul.

¿Tiʼ jaku bʼant quʼn qa kwest in nela toj qwitz tuʼn tbʼant tajbʼil Dios quʼn? Qa a jlu in bʼaj qiʼj, bʼaʼn tuʼn tel qpaʼn ambʼil tuʼn tok qojtzqiʼn Dios ex nim jaku tzʼonin jlu qiʼj.

Qo xnaqʼtzan tiʼjju bʼaj tiʼj jun xuʼj moqa qya aju kʼokel qqʼoʼn tbʼi te Sakura. In yaẍintoq Sakura, pero tej t-xi tzyet tuʼn t-xnaqʼtzan tiʼj Biblia, el tnikʼ tiʼj qa in tzaj tqʼamaʼn Dios jlu: «Kyel oqe tiʼj ju yaẍbʼil» (1 Corintios 6:18). Xi tqanin Sakura tipumal te Dios ex chʼexpaj tanqʼibʼil. Noqtzun tuʼnj, kukx in nok tilil tuʼn tuʼn tkubʼ kyiʼj joybʼil tuʼn. In tzaj tqʼamaʼn jlu: «Aj tten nximbʼetze nya toj tumel, in xi nqʼamaʼne te Jehová tiʼ in kubʼ nnaʼne porke ojtzqiʼn wuʼne qa mlayx kubʼ tiʼj wuʼne njunalxe. O tzʼonin naʼj Dios wiʼje tuʼn wok laqʼeʼye mas ttxlaj Jehová». Ik tzeʼn bʼaj tiʼj Sakura, ateʼ nim millón xjal in nok kyojtzqiʼn Dios ex in xi tqʼoʼn kyipumal tuʼn tbʼant junjun chʼixpubʼil kyuʼn tuʼntzun kyanqʼin ik tzeʼn taj (Filipenses 4:13, TNM).

Qa mas ma tzʼok qojtzqiʼn Dios, ax ikx te mas qo okel tojtzqiʼn ex qo okel tqʼoʼn te tbʼanel tamiw (Gálatas 4:9; Salmo 25:14). Qa ma bʼant jlu quʼn, mlay qo kyim aj tul xitbʼil ex jaku qo anqʼin te jumajx toj akʼaj twitz Txʼotxʼ. ¿Tzeʼn kʼokel twitz Txʼotxʼ lu? Toj juntl xnaqʼtzbʼil kʼelel qnikʼ tiʼj.