Ik tzeʼn tqʼama Jesús, ¿jtoj tzul xitbʼil?
Ik tzeʼn ma tzʼel qnikʼ tiʼj, aj tyolin Tyol Dios tiʼj xitbʼil, mintiʼ in yolin tiʼj qa kbʼel xiten Txʼotxʼ moqa ya mlay che anqʼin xjal twitz, sino atz in yolin tiʼj qa kbʼel xiten tkyaqil nya bʼaʼn at toj ambʼil jaʼlo ex qe xjal mintiʼ in che nimen te Dios. Noqtzun tuʼnj, ¿in tzajpe tqʼamaʼn Tyol Dios alkye qʼij tzul xitbʼil tiʼj tkyaqil nya bʼaʼn?
XIMANA KYIʼJ TYOL JESÚS TEJ TQʼAMA JLU:
«Che xqʼuqine, porke mintiʼ bʼiʼn kyuʼne alkye or chin ule, aqine skʼoʼmaj qine tuʼn Dios tuʼn ntene kyukʼil xjal» (MATEO 25:13).
«Ten kykwente kyiʼje, che xqʼuqine ex che naʼne Dios; porke mintiʼ bʼiʼn kyuʼne jtoj bʼan tjapun tqʼijlalil» (MARCOS 13:33).
Tuʼn jlu in nel qnikʼ tiʼj qa ni jun xjal ojtzqilte alkyexix qʼij tzul xitbʼil. Noqtzun tuʼnj, ya o kubʼ t-ximen Dios «alkye qʼij ex alkye or» tzul tiʼn xitbʼil (Mateo 24:36). Pero, ¿ape t-xilen jlu qa mlayx tzʼel qnikʼ tiʼj qa chʼix tul xitbʼil? Miʼn. Xi tqʼamaʼn Jesús kye t-xnaqʼtzbʼen qa kʼokel kyqʼoʼn kywitz tiʼj nim señ tuʼn tel kynikʼ tiʼj qa chʼix tul xitbʼil.
QE SEÑ
Aqeju tiʼchaq lu, aʼyetzun yekʼbʼil at tiʼj qa chʼix «tjapun bʼaj tqʼijlalil». Tqʼama Jesús jlu: «Porke qe xjal tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam; ex noq jachaq tzul txʼuʼj yabʼil ex weʼyaj ex kyaqnajnabʼ» (Mateo 24:3, 7). Ax ikx tqʼama qa tzul «txʼuʼj yabʼil» (Lucas 21:11). ¿In nokpe tkeʼyina tzeʼn in japun kywi yol tqʼama Jesús?
Toj ambʼil jaʼlo, in che ikʼ nim xjal toj yajbʼil tuʼn tpaj nimaq qʼoj, weʼyaj, terremoto ex qe yabʼil. Jun techel, toj abʼqʼi 2004 e kyim junlo 225 mil xjal tuʼn jun tsunami tzaj tuʼn jun terremoto atz océano Índico. Ex tej tikʼ oxe abʼqʼi ttzajlen COVID-19, otoq che kyim mas te 6.9 millón xjal twitz tkyaqil Txʼotxʼ tuʼn. Tqʼama Jesús qa tuʼn jlu kʼelel nikʼbʼaj tiʼj qa chʼix tul xitbʼil tiʼj tkyaqil nya bʼaʼn.
«MANKBʼIL TQʼIJLALIL»
Naʼmxtoq tel qʼiʼn tkyaqil nya bʼaʼn, in tzaj tqʼamaʼn Tyol Dios qa ktel jun ambʼil aju in nok qʼoʼn tbʼi te «mankbʼil tqʼijlalil» (2 Pedro 3:3, 4). In tzaj tqʼamaʼn 2 Timoteo 3:1 a 5 qa nya bʼaʼn kymod xjal ktel kyoj bʼajsbʼil tqʼijlalil. (Qʼonka twitza tiʼj recuadro « Aju kbʼajel chʼixtoq tul xitbʼil»). ¿In nokpe tkeʼyin teya qa oʼkx in che ximen xjal kyiʼjx toj ambʼil jaʼlo, qa kygan tuʼn kybʼiyen, qa oʼkx in che ximen tiʼj pwaq moqa medi ex qa in nok kybʼinchaʼn nya bʼaʼn kyiʼj txqantl? Atzun junjuntl yekʼbʼil at tiʼj qa in qo anqʼin kyoj mankbʼil tqʼijlalil ex qa chʼix tul xitbʼil.
¿Jteʼ ambʼil ktel mankbʼil tqʼijlalil? In tzaj tqʼamaʼn Tyol Dios qa noq chʼin ambʼil. Aj tbʼaj ambʼil lu, kbʼel t-xiten Dios kykyaqil «qeju ma naj twitz txʼotxʼ kyuʼn» (Apocalipsis 11:15-18; 12:12).
CHʼIX TOK TXʼOTXʼ TE JUN PARAÍSO
Ya o kubʼ t-ximen Dios alkye qʼij ex alkye or tzul tiʼn xitbʼil tiʼj tkyaqil nya bʼaʼn (Mateo 24:36). Noqtzun tuʼnj, nya «tajbʼil [...] tuʼn tnaj jun xjal» (2 Pedro 3:9). Tuʼntzunju, in tzaj tqʼoʼn ambʼil kye xjal tuʼn tok kyojtzqiʼn ex tuʼn kynimen te. ¿Tiquʼn? Tuʼnju nya taj tuʼn kykyim aj tul xitbʼil tiʼj tkyaqil nya bʼaʼn ex taj tuʼn kyanqʼin te jumajx aj tok Txʼotxʼ te jun Paraíso.
O bʼaj tnukʼuʼn Dios qe xnaqʼtzbʼil tiʼj Tyol tuʼntzun tel kynikʼ xjal tiʼj tiʼ tuʼn tbʼant kyuʼn tuʼntzun kyanqʼin tjaqʼ Tkawbʼil. Tqʼama Jesús qa «aju tqanil bʼaʼn [...] tiʼj tkawbʼil Dios kxel pakbʼet tuj tkyaqil twitz txʼotxʼ» (Mateo 24:14). In che pakbʼan testigos de Jehová nim mil millón or twitz tkyaqil Txʼotxʼ ex in xi kyqʼoʼn xnaqʼtzbʼil kye xjal tuʼn t-xi qʼuqbʼet kykʼuʼj tuʼn Biblia. Tqʼama Jesús qa kxel pakbʼet tbʼanel tqanil twitz tkyaqil Txʼotxʼ naʼmxtoq tul xitbʼil.
Ya chʼix tbʼaj ambʼil tuʼn kykawin xjal. Pero in qo tzalaj aj tok qbʼiʼn qa jaku qo kyaj anqʼin aj tul xitbʼil ex qa jaku qo anqʼin toj Paraíso o tzaj ttziyen Dios. Toj juntl xnaqʼtzbʼil, tzul chikʼbʼaʼn tiʼ jaku bʼant quʼn tuʼntzun tten jun tbʼanel qanqʼibʼil.
In tzaj qʼuqbʼaʼn qkʼuʼj tuʼn profecía kyaj tqʼamaʼn Jesús kyiʼj «mankbʼil tqʼijlalil».
Bʼalo ax ikx tgana jlu
AJU XQʼUQIL
¿Jtoj kkawil Tkawbʼil Dios tibʼaj Txʼotxʼ?
Ateʼ junjun t-xnaqʼtzbʼen Jesús xi kyqanin xjel lu te. ¿Tiʼ xi ttzaqʼweʼn kye?
QE XJEL TIʼJ TYOL DIOS
¿Tiʼ yekʼbʼil at tiʼj qa atoʼ kyoj «mankbʼil tqʼijlalil» moqa kyoj «bʼajsbʼil tqʼijlalil»?
Kyaj qʼamaʼn toj Biblia alkyeqe tiʼchaq tuʼn kybʼaj kyoj mankbʼil tqʼijlalil.
