¿Alkyeqe tiʼchaq in nok qeʼ kykʼuʼj xjal tiʼj?
In tzaj kyqʼamaʼn junjun xjal qa ateʼ junjun tiʼchaq jaku che onin kyiʼj tuʼn tel kynikʼ tiʼj ambʼil tzul. Tuʼntzunju, in nok qeʼ kykʼuʼj kyiʼj.
AJU NIMEN KYUʼN JUNJUN XJAL
AJU HORÓSCOPO. In kubʼ kyximen junjun xjal qa jaku tzaj nya bʼaʼn moqa tbʼanel toj kyanqʼibʼil aj tok kykeʼyin tzeʼn kyfigura cheʼw toj xjaw tej kyul itzʼj. Tuʼntzunju, in jaw kyuʼjin horóscopo tuʼn tel kynikʼ tiʼj qa il tiʼj tuʼn tok kyxqʼuqin kyibʼ moqa tuʼn tten jun tbʼanel kyanqʼibʼil.
QE CHMAN. In kubʼ kyximen junjun xjal qa jaku tzaj kyqʼamaʼn chman kye tiquʼn in bʼaj junjun tiʼchaq toj kyanqʼibʼil ex in tzaj qʼamaʼn kye tiʼ tuʼn tbʼant kyuʼn. Aj tel kynikʼ tiʼj, in nok tilil kyuʼn tuʼn miʼn ttzaj nya bʼaʼn kyiʼj ex tuʼn kyex twitz.
AJU KʼULBʼIL KYWITZ KYIMNI. In tzaj kyqʼamaʼn junjuntl qa il tiʼj tuʼn t-xi qbʼinchaʼn junjun tiʼchaq kyiʼj xjal o che kyim moqa tuʼn qkʼulin kywitz junjuntl dios tuʼntzun kyxqʼuqin qiʼj ex tuʼn qtzaj kʼiwlaʼn. In tzaj tqʼamaʼn Van jlu, * jun xuʼj in nanqʼin atz Vietnam: «Kubʼ nximane qa kteltoq jun tbʼanel wanqʼibʼile toj ambʼil tzul kyukʼil wale qa ma bʼant junjun tiʼ wuʼne kyiʼj toj njaye o che kyim».
AJ KYUL ITZʼJ JUNTL MAJ. Ateʼ nim xjal in kubʼ kyximen qa aj kykyim, in che ul itzʼj juntl maj. Tuʼntzunju, in kubʼ kyximen qa in tzaj nya bʼaʼn kyiʼj tuʼn tpaj qe tiʼchaq bʼant kyuʼn toj ambʼil ojtxe.
Maske ojtzqiʼn kyuʼn qa nya ax tok jlu, in nok kyqʼoʼn kywitz tiʼj horóscopo, in najbʼen tabla ouija® kyuʼn, in che ajbʼen cartas kyuʼn moqa in jaw uʼjin toj kyqʼabʼ tuʼn juntl xjal. In kubʼ kyximen qa jakulo tzʼonin jun kyxol qe jlu kyiʼj tuʼn kytzalaj toj ambʼil tzul.
¿TIʼ O TZAJ TUʼN JLU?
¿Maspe tbʼanel kyanqʼibʼil xjal at tuʼnju in nok qeʼ kykʼuʼj kyiʼj tiʼchaq ik tzeʼn jlu?
Qo yolin tiʼjju bʼaj tiʼj Hào, aju in nanqʼin atz Vietnam. Kʼulin kywitz qe kyimni ex jaw tuʼjin horóscopo tuʼnju kubʼ t-ximen qa jaku che onin tiʼj toj tanqʼibʼil. ¿Pero axpe tok onin tiʼj? In tzaj tqʼamaʼn Hào jlu: «Tzaj nya bʼaʼn tiʼj nkʼaẍjele, in kyaje tjaqʼ kʼas, tzaj nya bʼaʼn qxole kyukʼil nfamiliare ex nimxix tzaj bʼaj nkʼuʼje».
Ax ikx te Qiuming aju in nanqʼin Taiwán, xi tnimen xnaqʼtzbʼil tiʼj horóscopo, tiʼj destino, qa in che ul itzʼj xjal juntl maj ex kʼulin kywitz kyimni. Tej t-ximen tiʼj teyele junjun xnaqʼtzbʼil lu, tqʼama jlu: «El nnikʼe tiʼj qa mintiʼ ttxolil aju nimen kyuʼn xjal ex qeju kykostumbr. Nim maj mintiʼ in bʼaj ik tzeʼn in tzaj tqʼamaʼn horóscopo. Ex qa ma qo ximen tiʼjju qa in qo ul itzʼj juntl maj, qa mintiʼ naʼn tuʼna tiʼ bʼaj tiʼja toj tnejel tanqʼibʼila, ¿tzeʼn jaku tzʼok juntl tanqʼibʼila te mas tbʼanel?».
«El nnikʼe tiʼj qa mintiʼ ttxolil aju nimen kyuʼn xjal ex qeju kykostumbr» (QIUMING, TAIWÁN).
Ateʼ nim xjal o tzʼel kynikʼ tiʼj qa mintiʼ in tzaj tqʼamaʼn destino, qe cheʼw, qe kyimni ex reencarnación aju kbʼajel qiʼj toj ambʼil tzul. Ex atzun jlu o tzʼel tnikʼ Hào ex Qiuming tiʼj. Qa ikju, ¿mlaype tzʼel qnikʼ tiʼjju kbʼajel toj ambʼil tzul?
Ateʼ nim xjal in kubʼ kyximen qa il tiʼj tuʼn kyxiʼ toj universidad moqa tuʼn kyok te qʼinun tuʼntzun tten jun tbʼanel kyanqʼibʼil toj ambʼil tzul. Pero ¿tiʼ in kubʼ kynaʼn xjal aj tbʼant jlu kyuʼn?
^ Ma che kubʼ chʼixpet junjun bʼibʼaj toj uʼj lu.
^ Atz kykuʼx qe yol lu toj Tyol Dios toj Gálatas 6:7. Chʼixme ax ximbʼetz lu in tzaj kyqʼamaʼn xjal kyukʼil yol lu: «Qa ma tzʼok qbʼinchaʼn nya bʼaʼn tiʼj juntl, tzul meltzʼaj qiʼj».
Bʼalo ax ikx tgana jlu
AJU XQʼUQIL
Aju xnaqʼtzbʼil kyiʼj cheʼw ex adivinación: ¿jakupe tzaj kyqʼamaʼn tiʼ kbʼajel?
¿Jakupe tzʼok qeʼ qkʼuʼj tiʼjju in tzaj qʼamaʼn?
AJU XQʼUQIL
Aju tzaqʼwebʼil in tzaj tqʼoʼn Tyol Dios
¿Atpe jun piẍ qxmilal mintiʼ in kyim? ¿Atpe jun tiʼ qʼiʼn quʼn kukx itzʼ aj qkyim? ¿Jatumel ateʼqe kyimni?
