Tuʼn qbʼinchante aju bʼaʼn: Aju in bʼant kyuʼn txqantl xjal
Chʼixmi kykyaqil xjal ojtzqiʼn kyuʼn alkyeqe tiʼchaq bʼaʼn tuʼn tbʼant kyuʼn ex alkyeqe nya bʼaʼn. Jun techel, in nel kyikʼun xjal aju bʼiybʼel, aju violación ex aju aj tok ten jun xjal tiʼj jun tal kʼwal. Noqtzun tuʼnj, tbʼanel in nela toj kywitz xjal aj kybʼant qe tiʼchaq toj tumel, ik tzeʼn aj ttzaj qʼaqʼin tkʼuʼj jun xjal tiʼj juntl, aj t-xi bʼinchet jun tiʼ toj tumel ex ik tzeʼn qa in nel tnikʼ jun xjal tiʼj juntl. Pero ax ikx, at maj, nya ax kyximbʼetz xjal in ten tiʼjju tuʼn tkubʼ ten jun xjal tukʼil juntl, tzeʼnxix jun bʼinchbʼen bʼaʼn, alkyexix xnaqʼtzbʼil bʼaʼn tuʼn t-xi qʼet kye kʼwal ex ateʼ xjal in kyqʼamaʼn qa at maj nyaxix qʼanchaʼl qa at jun puro bʼaʼn moqa jun puro nya bʼaʼn ex in kubʼ kyximen qa jaku bʼant noq alkyexku tiʼ kyuʼn. Ex nimku maj in cheʼx kybʼinchaʼn qe tiʼchaq tuʼnju atzun in kubʼ kyximen qa bʼaʼn taʼ toj ambʼil aju moqa tuʼnju atzun in bʼant kyuʼn txqantl. ¿Pero tkyaqilpe maj bʼaʼn jlu?
AJU IN KUBʼ QXIMEN QA BʼAʼN TAʼ
Chʼixmi tkyaqil maj, in chex qbʼinchaʼn qe tiʼchaq tuʼnju in kubʼ qnaʼn qa bʼaʼn tten (Romanos 2:14, 15). Aj ttzaj chʼiy jun kʼwal, jaku tzʼel tnikʼ tiʼj alkye bʼaʼn ex alkye nya bʼaʼn tuʼn tbʼant tuʼn. Ex qa at jun tiʼ nya toj tumel xbʼant tuʼn, jaku kubʼ tnaʼn qa at til. Noqtzun tuʼnj, aj tbʼet ambʼil ex aj tchʼiy jun kʼwal, in kubʼ tnaʼn ex in kubʼ tbʼinchaʼn aju in tzaj yekʼin te kyuʼn toj tja, kyuʼn tukʼil, kyuʼn aj xnaqʼtzal, kyuʼn xjal, tuʼn tokslabʼil moqa tuʼn jatumel tzajni. Tuʼntzunju, aj tjaw qskʼoʼn tiʼ kbʼantel quʼn in tzaj tqʼamaʼn qnabʼil qa bʼaʼn tten moqa nya bʼaʼn aju otoq tjaw qskʼoʼn.
Aju qximbʼetz in ten tiʼjju bʼaʼn ex tiʼjju nya bʼaʼn in nonin qiʼj tuʼn tel qnikʼ kyiʼj txqantl, tuʼn txi qqʼoʼn chjonte, tuʼn kubʼ qbʼinchaʼn aju bʼaʼn ex tuʼn ttzaj qʼaqʼen qkʼuʼj kyiʼj txqantl. Ax ikx jaku tzʼonin qiʼj tuʼn miʼn tok qbʼinchaʼn nya bʼaʼn kyiʼj xjal kʼujlaʼn quʼn ex tuʼn miʼn tkubʼ qbʼinchaʼn jun tiʼ jaku tzaj qchʼixwi tuʼn moqa jaku kubʼ qnaʼn jun nya bʼaʼn tuʼn.
Qa bʼaʼn in kubʼ qnaʼn aj tbʼant jun tiʼ quʼn, ¿ape t-xilen qa bʼaʼn aju in tbʼant quʼn? Tej tzma kuʼxun Garrick ax kubʼ ximente alkye mas bʼaʼn tuʼn tbʼant tuʼn. Noqtzun tuʼnj, tej kubʼ tbʼinchan aju bʼaʼn tten toj twitz tzaj tiʼn nya bʼaʼn tiʼj. Naqʼet tiʼj jun tten tanqʼibʼil aju yajxitl tqʼama qa «mintiʼ tzalajbʼil toj
tuʼnju at nim nya bʼaʼn; yaẍbʼil, droga, kʼaj qʼeʼn ex nim bʼiybʼil».AJU IN KUBʼ KYXIMEN TXQANTL QA BʼAʼN TAʼ
Aj tkubʼ qbʼinchaʼn jun tiʼ, at maj nya oʼkx in nok qqʼoʼn tajlal aju qe in kubʼ qnaʼn, sino ax ikx aju in kubʼ kynaʼn txqantl. Jaku tzʼonin aju bʼaj toj kyanqʼibʼil txqantl qiʼj ex aju kynabʼl qa ma tzʼok qqʼoʼn toklen. Ex jaku ten tbʼanel kyximbʼetz qe toj qja qiʼj, qe qamiw ex qe xjal jatumel najli qoʼ qa ma kubʼ qbʼinchaʼn aju bʼaʼn toj kywitz.
¿Tbʼanelpe tuʼn tkubʼ qbʼinchan tkyaqil maj aju bʼaʼn in nela toj kywitz txqantl? Tej tokx Priscila toj tkuʼxumal, kubʼ tbʼinchan aju in bʼant kyuʼn txqantl tukʼil ik tzeʼn tuʼn kubʼ ten tukʼil jun xjal ex naʼmxtoq tmojeʼ. Pero el tnikʼ tiʼj qa mintiʼtoq in tzalaj maske in kubʼ tbʼinchan aju bʼaʼn toj kywitz txqantl. Tzaj tqʼamaʼn jlu: «Mintiʼ kubʼ nnane bʼaʼn tej tkubʼ nbʼinchaʼne aju in bʼant kyuʼn txqantl, mintiʼ ten nnabʼile ex mintiʼ ok nkwentin wibʼe».
¿ATPE JUN TUMEL MAS BʼAʼN?
Aj tjaw qskʼoʼn kyxol bʼaʼn ex aju nya bʼaʼn, at nim toklen aju qe in kubʼ qnaʼn ex aju in kubʼ kynaʼn txqantl. Noqtzun tuʼnj, qa oʼkx ma qo ok lepeʼ tiʼj jlu, at maj jaku tzaj tiʼn nya bʼaʼn qiʼj ex jaku tzʼok jlu ik tzeʼn jun yabʼil tiʼj qwitz aju miopía tbʼi tuʼnju mintiʼ in qil aju nya bʼaʼn in tzaj tiʼn qiʼj ex kyiʼj txqantl (Proverbios 14:12). Ex juntl bʼaʼn tuʼn ttzaj qnaʼn aju qa nya toj tkyaqil ambʼil bʼaʼn kʼokel jun tiʼ o tzaj yekʼin qe moqa aju o tzaj yekʼin kye txqantl tuʼnju at maj in che chʼexpaj qe tiʼchaq aj tbʼet ambʼil. Toj ambʼil jaʼlo, ateʼ nim tiʼchaq o che chʼexpaj tuʼnju ateʼ junjun kybʼinchbʼen xjal nya bʼaʼn toj ambʼil ojtxe, atzun jaʼlo in nok qʼoʼn te bʼaʼn, ex ateʼ junjun kybʼinchbʼen xjal bʼaʼn toj ambʼil ojtxe, atzun jaʼlo in nok qʼon te nya bʼaʼn.
Qa ma qo ok lepeʼ tiʼjju in kubʼ kyximen txqantl xjal, ¿apetzulo mas tbʼanel tuʼn tbʼant quʼn?
¿Atpe jun tiʼ jaku tzʼonin qiʼj tuʼn tel qnikʼ tiʼj alkyexix bʼaʼn ex alkyexix nya bʼaʼn? ¿Atpe jun kawbʼil jaku qo ok lepeʼ tiʼj toj ambʼil jaʼlo aju mlay tzaj tiʼn nya bʼaʼn qiʼj aj tbʼet ambʼil?
At jun tbʼanel onbʼil ex toj juntl xnaqʼtzbʼil kʼelel qnikʼ tiʼj alkye tten jaku tzʼonin qiʼj toj alkyexku tten qanqʼibʼil. Ax ikx tzul qʼamaʼn qe jatumel jaku kanet onbʼil lu quʼn tuʼn tel qnikʼ tiʼj bʼaʼn ex tiʼj nya bʼaʼn.