Tuʼn qbʼinchante aju bʼaʼn: Aya kbʼel ximente alkye kbʼantel tuʼna
Alkyexku consej in xi qbʼiʼn, jaku tzaj tiʼn bʼaʼn moqa nya bʼaʼn toj qchwinqlal. Bʼaʼn jlu tuʼn Jehová, tuʼntzunju tajbʼil tuʼn t-xi qbʼiʼn qe consej aju in che tzaj tqʼamaʼn toj Biblia.
Taj Jehová tuʼn tkubʼ qnaʼn bʼaʼn ex tzalajbʼil toj qanqʼibʼil.
«Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne. Noqwit xi kynimane aju xi nmaʼne kyeye, mawtlo che tene tuj txubʼtxaj nimxix ik tzaʼn jun nima nojni tuʼn aʼ, ex aju in kybʼinchaʼne, bʼaʼnwtlo ma tzʼel kyeye ik tzaʼn ju aʼ in jaw xtulqʼin tibʼaj mar» (Isaías 48:17, 18).
At nim tiʼ jaku jaw qskʼoʼn toj qchwinqlal. Pero tuʼnju a Jehová Bʼinchal qe, ojtzqiʼn tuʼn alkye aju mas bʼaʼn te qe. Tajbʼil tuʼn qok lepeʼ kyiʼj qe tconsej tuʼnju ojtzqiʼn tuʼn qa atzun mas tbʼanel te qe. Qa ma txi qnimen qe tkawbʼil Jehová, jaku tzʼok qe qkʼuʼj tiʼj qa bʼaʼn qo tel kyuʼn ex tzul tiʼn tzalajbʼil qe tiʼj tkyaqil kbʼantel quʼn.
Mintiʼ in tzaj tqanin Jehová qe aju mlay bʼant quʼn.
«Aju mandamyent in xi nmaʼne kyeye jaʼlo mya kyuw te kyeye, ex mya mlay bʼant kyuʼne» (Deuteronomio 30:11).
Tuʼn qanqʼin ik tzeʼn tajbʼil Jehová, il-lo tiʼj tuʼn kybʼant junjun chʼixpubʼil quʼn ik tzeʼn tiʼj alkye tumel in qo ximen ex aju in bʼant quʼn. Pero mintiʼ in tzaj tqanin Jehová aju mlay bʼant quʼn. Ex tuʼnju a Bʼinchal qe, ojtzqiʼn tuʼn alkye jaku bʼant quʼn ex alkye mlay. Aj tok qojtzqiʼnxix, in nel qnikʼ tiʼj qa tkyaqil «qe tmandamyent mya kyuw qe» (1 Juan 5:3).
In tzaj ttziyen Jehová qa kʼonil kyiʼj qeju kyajbʼil tuʼn txi kybʼin tconsej.
«Aqine Dios aju Kymane, tzyuʼn qeye wuʼne ex o nmaye kyeye kyjaʼ: Miʼn che xobʼe, chin onile kyiʼje» (Isaías 41:13).
Tuʼn onbʼil in tzaj tqʼoʼn Jehová, jaku txi qbʼiʼn qe tkawbʼil tiʼj bʼaʼn ex tiʼj nya bʼaʼn. In najbʼen Biblia tuʼn tuʼn tonin qiʼj ex tuʼn ttzaj tqʼoʼn qʼuqbʼil qkʼuʼj.
Twitz tkyaqil Txʼotxʼ, ateʼ nim millón xjal o tzʼel kynikʼ tiʼj qa in nonin Biblia kyiʼj toj kyanqʼibʼil qa ma che ok lepeʼ kyiʼj kawbʼil in tzaj tqʼoʼn. ¿Yajtzun qa ma txi tqʼoʼna ambʼil tuʼn tel tnikʼa tiʼjju in tzaj tqʼamaʼn Biblia? ¿Ex tuʼn tel tnikʼa tiʼj alkyeqe consej in tzaj tqʼoʼn? Jaku bʼant lu tuʼna qa ma xnaqʼtzana tiʼj folleto Tzalaja tiʼj tanqʼibʼila. Noq kukx, ex jaku kanet tuʼna toj jw.org. Qʼiʼn oxe xnaqʼtzbʼil tuʼn:
-
¿Tzeʼn jaku tzʼonin Biblia tiʼja?
-
In tzaj tqʼoʼn Tyol Dios jun qʼuqbʼil qkʼuʼj
-
¿Jakupe tzʼok qeʼ qkʼuʼj tiʼj Tyol Dios?
Aj t-xnaqʼtzana tiʼj Tyol Dios, kʼelel tnikʼa tiʼj qa tkyaqil qe consej ateʼkux toj, «kukx che tel te jumajx tuj tkyaqil tabʼqʼiyil; axix tok qe ex tzʼaqlxix» qe (Salmo 111:8). Qa ma txi qbʼiʼn consej in tzaj tqʼoʼn Biblia, atzun aju mas tbʼanel tuʼn tbʼant quʼn. Pero mintiʼ in qo ok t-obligarin Dios tuʼn qbʼiʼn te (Deuteronomio 30:19, 20; Josué 24:15). Teyelex te junjun qe kbʼel t-ximen tiʼ kbʼantel tuʼn, qa aju bʼaʼn moqa aju nya bʼaʼn.
