1. Qe mejebʼleʼn

At junxichaq kyximbʼetz xjal tiʼj mejebʼleʼn ex tiʼjju alkye tten tuʼn kytzalaj qeju o che kubʼ mojeʼ.

AJU T-XILEN: A Dios kubʼ ximente tuʼn tten mejebʼleʼn ex ojtzqiʼn tuʼn tiʼ tuʼn tbʼant kyuʼn qeju o che kubʼ mojeʼ tuʼntzun kytzalaj (Marcos 10:​6-9). Jaku che tzalaj mejebʼleʼn qa ma tzʼok tilil tuʼn teyle junjun kye tuʼn tchʼiy kʼujlabʼil kyxol ex nya tuʼnju in che ayon tuʼn tbʼant jun tiʼ tuʼn juntl. In kubʼ tyekʼin jun chmilbʼaj qa kʼujlan t-xuʼjil tuʼn aj tok tkwentin ex aj kubʼ tyekʼin tbʼanel tmod tukʼil. Ax ikx te xuʼjilbʼaj in nimen te tchmil, in nonin tiʼj ex in xi yolin te toj tumel.

AJU ONBʼIL IN TZAJ TQʼOʼN BIBLIA IN ONIN QIʼJ: Te Vietnam qe Quang ex aju t-xuʼjil Thi tbʼi, mintiʼtoq in che tzalaj toj kymejebʼleʼn. Kubʼ tyekʼin Quang nim nya bʼaʼn tmod tukʼil t-xuʼjil. Tqʼama jlu: «Mintiʼ ok nqʼoʼne toklen aju kubʼ tnaʼn Thi, axpe ikx ok nbʼinchaʼne nim nya bʼaʼn tiʼj». Tuʼn jlu, kubʼ t-ximen Thi tuʼn tel pan tibʼ tiʼj. Tqʼama jlu: «Kubʼ nnaʼne qa ya mlaytoq tzʼok qeʼ nkʼuʼje tiʼj nix tuʼn t-xi nnimane».

Tej tikʼ ambʼil xi tzyet tuʼn t-xnaqʼtzan Quang ex Thi tiʼj Biblia. El kynikʼ tiʼj tzeʼn jaku japun kyuʼn aju in tzaj tqʼamaʼn Efesios 5:33. ¿Tiʼ tzʼaj tuʼn jlu? Tqʼama Quang jlu: «Onin texto lu wiʼje tuʼn tel nnikʼe tiʼj qa iltoq tiʼj tuʼn tten tbʼanel nmode tuʼntzun kubʼ tnaʼn Thi qa kʼujlan wuʼne. Ax ikx, el nnikʼe tiʼj qa iltoq tiʼj tuʼn tok nkwentine, tuʼn txi nqʼoʼne aju at tajbʼen te, ex tuʼn tok nqʼoʼne toklen qe t-ximbʼetz. O tzʼel nnikʼe tiʼj qa mas in chin ok kʼujlaʼne tuʼn ex mas in nimen weye qa in bʼant jlu wuʼne». Ax ikx te Thi in tzaj tqʼamaʼn jlu: «Mas in nok tilil wuʼne tuʼn nnimane te nchmile ik tzeʼn in tzaj tqʼamaʼn Efesios 5:33. Ex tuʼn jlu, mas in kubʼ nnaʼne qa kʼujlaʼn qine, qa xqʼuqin qine ex qa bʼaʼn atoʼye tukʼil».

 2. Aju qmod ktel kyukʼil txqantl

Nim maj in kubʼ kyyekʼin xjal nya bʼaʼn kymod kyukʼil txqantl tuʼn tpaj kyyajil, kytnam, tzeʼn che keʼyin, kyokslabʼil moqa tuʼnju homosexual qe.

AJU T-XILEN: In tzaj tqʼamaʼn Biblia qa nya bʼaʼn tuʼn kyel qikʼun qe xjal te junxitl kyyajil, junxitl kyximbʼetz qwitz ex qa in che kubʼ ten tukʼil alkyexku. Sino in tzaj tqʼamaʼn qe tuʼn qrespetarin kye kykyaqil xjal noq alkyexku kyyajil, alkyexku kytnam ex alkyexku kyoklen (Hechos 10:34). Axpe ikx qa mintiʼ in mojeʼ qximbʼetz kyukʼil tiʼj jun xnaqʼtzbʼil moqa tiʼj jun mod, il tiʼj tuʼn tten tbʼanel qmod kyukʼil ex tuʼn qrespetarin kye (Mateo 7:12).

AJU ONBʼIL IN TZAJ TQʼOʼN BIBLIA IN NONIN QIʼJ: Xi xnaqʼtzaʼn te Daniel qa aqeju xjal ateʼ toj piẍ Txʼotxʼ Asia, jaku tzʼok kybʼinchaʼn nya bʼaʼn tiʼj ttnam. Tuʼntzunju, el tikʼun kywitz xjal tzajni kyyajil toj Asia, axpe ikx in noktoq ten yasil kyiʼj kywitz xjal. Ex tqʼama jlu: «Kubʼ nximane qa tuʼn jlu in chin onine tiʼj ntname. Kubʼ nximane qa bʼaʼn aju in bʼanttoq wuʼne».

Tej tbʼet ambʼil, el tnikʼ Daniel tiʼjju in tzaj t-xnaqʼtzaʼn Biblia. Ex tqʼama jlu: «Kubʼ nchʼexpuʼne nximbʼetze. Kykyaqil xjal ex noq alkyexku kytnam junx kyxilen toj twitz Dios. Ok tilil wuʼne tuʼn tten ximbʼetze kyiʼj ik tzeʼn te Dios». ¿Tiʼ in tqʼamaʼn Daniel jaʼlo aj tok tojtzqiʼn jun xjal te juntl tnam? Tqʼama jlu: «Mintiʼtl in nok nqʼoʼne nwitze tiʼj te jatumel jun xjal jaʼlo. Kʼujlaʼn qe kykyaqil xjal wuʼne ex ateʼ wamiwe te twitz tkyaqil Txʼotxʼ».

 3. Aju pwaq

Ateʼ nim xjal in nok tilil kyuʼn tuʼn kytzalaj ex tuʼn kyok te qʼinun.

AJU T-XILEN: At tajbʼen pwaq, pero nya t-xilen qa jaku tzaj tqʼoʼn tzalajbʼil qe toj ambʼil tzul (Proverbios 18:11; 23:​4, 5). Qa qaj tuʼn qtzalaj ex tuʼn qten bʼaʼn toj ambʼil tzul, il tiʼj tuʼn t-xi qbʼiʼn qe consej in tzaj tqʼoʼn Dios qe toj Tyol aju Biblia (1 Timoteo 6:​17-19).

AJU ONBʼIL IN TZAJ TQʼOʼN BIBLIA IN NONIN QIʼJ: Ok tilil tuʼn jun xjal Cardo tbʼi tuʼn tok te qʼinin ex ok te qʼinin. «Jakutoq chinxe viajaril jaxku tumel, jakutoq che tzaj nlaqʼoʼne qe nkare, qe njaye ex junjuntl tiʼchaq nim kywiʼ. Ten tkyaqil weye aju kyajbʼil xjal tuʼn tten kye», chi Cardo. Pero tkyaqilju ten te Cardo, noq minabʼen kubʼ naj. Tzaj tqʼamaʼntl jlu: «In kubʼ sbʼuʼne kyuʼn nya bʼaʼn xjal ex jun rat naj xi naj tkyaqilju otoq tzʼok tilil wuʼne tuʼn tkambʼet toj nimku ambʼil. Otoq tzʼokxix tilil wuʼne tuʼn woke te qʼinin, pero kubʼ naj tkyaqil, tzaj nim nbʼise ex kubʼ nnaʼne nim nya bʼaʼn tuʼnju kubʼ nnaʼne qa mintiʼx wajbʼene».

Kubʼ t-ximen Cardo qa mas bʼaʼn tuʼn t-xi tnimen qe consej in tzaj qʼamaʼn toj Biblia tiʼj pwaq. Toj ambʼil jaʼlo, mintiʼtl in nok tilil tuʼn Cardo tuʼn tok te qʼinun, sino in nok tilil tuʼn tuʼn tanqʼin tukʼil nya nim tiʼchaq. «El nnikʼe tiʼj qa mas bʼaʼn tuʼn tok qqʼoʼn qwiʼ tiʼjju at toklen tukʼil Dios. Ya mintiʼ juntl tiʼ in nel tiʼn watl wiʼje jaʼlo ex ax tok in chin tzalaje», chi Cardo.

 4. Aju tuʼn tkubʼ ten jun xjal tukʼil juntl

Nya junx kyximbʼetz xjal at tiʼjju tuʼn tkubʼ ten jun xjal tukʼil juntl, tiʼj alkye bʼaʼn ex alkye nya bʼaʼn.

AJU T-XILEN: In yolin Biblia tiʼj alkye tten tuʼn tkubʼ tyekʼin jun xjal tajbʼil tiʼj juntl. Ex aj ttzaj tqʼamaʼn txol yol: «Tuʼn miʼn kybʼinchanteye aj pajil», nya oʼkx in yolin tiʼj tuʼn miʼn tkubʼ tjyoʼn jun xjal juntl t-xuʼjil moqa juntl tchmil, sino, ax ikx in yolin tiʼj tuʼn miʼn t-xi tkʼayin jun xjal t-xmilal, tuʼn miʼn kykubʼ ten qa naʼmx kykubʼ mojeʼ, qa mintiʼ tuʼn tok ten jun xinaq, moqa ichan, tiʼjx juntl xinaq, ex tuʼn miʼn tok ten jun xjal tiʼj jun txkup (1 Corintios 6:​9, 10). Aju tuʼn tkubʼ ten jun tukʼil juntl, jun oyaj jlu o tzaj tqʼoʼn Dios, pero oʼkx te jun xinaq tukʼil t-xuʼjil, ex ax ikx oʼkx qa o che kubʼ mojeʼ qe (Proverbios 5:​18, 19).

AJU ONBʼIL IN TZAJ TQʼOʼN BIBLIA IN NONIN QIʼJ: In nanqʼin jun xuʼj, moqa qya Kylie tbʼi atz Australia ex tzaj tmaʼn jlu: «Tej naʼmxtoq nkubʼ mojeʼye, kubʼ nximane qa mastoq kbʼel nnaʼne qa kʼujlaʼn qiʼne ex qa xqʼuqin qine qa ma chin kubʼ tene tukʼil juntl. Pero nya ik ttenju. Junxitl bʼaj, mas kwest ela toj nwitze tuʼnju nyatoq ojtzqiʼn wuʼne tiʼ kbʼajel toj wanqʼibʼile, nya oʼkxju, ax ikx ok kʼixbʼisaʼn wanmiye».

Tej tbʼet ambʼil, xi tzyet tuʼn t-xnaqʼtzan Kylie tiʼj Tyol Dios ex kubʼ t-ximen tuʼn t-xi tbʼiʼn qeju nabʼil ateʼkux toj Biblia. «In nel nnikʼe tiʼj jaʼlo qa aqeju nabʼil in tzaj tqʼoʼn Dios qe, in che onin tuʼn miʼn ttzaj nim nya bʼaʼn qiʼj. Mas in kubʼ nnaʼne qa xqʼuqin atine jaʼlo ex qa kʼujlaʼn qiʼne tuʼnju in xi nbʼinchaʼne qe tiʼchaq in tzaj tqʼamaʼn Qman Jehová weye. Ya mintiʼ in nok kʼixbʼisaʼntl wanmiye jaʼlo tuʼnju in xi nnimane aju in tzaj tqʼamaʼn Biblia», chi Kylie.