¿Tiʼ jaku bʼant tuʼna qa taja tuʼn t-xiʼya toj jun lugar aju mintiʼ ojtzqiʼn tuʼna?

1. 1. Jakupe t-xiʼya jatumel in kubʼ t-ximana qa bʼaʼn.

2. 2. Jakupe txi lepeʼye kyiʼj txqantl tuʼnju in kubʼ t-ximana qa ojtzqiʼn bʼe kyuʼn.

3. 3. Moqa kxel tjyoʼna jun onbʼil ik tzeʼn jun GPS, jun mapa moqa jun tamiwa aju ojtzqiʼn bʼe tuʼn.

Qa ma jaw qjyoʼn aju tnejel moqa aju tkabʼin opción, oklo qo pol toj jun lugar pero nyalo atz jatumel qaj. Atzunte qa ma jaw qjyoʼn aju toxin opción, jaku qo pon jatumel qaj tuʼn qpon.

Ik tten qchwinqlal ik tzeʼn jun bʼe ma txi tzyet tuʼn qbʼet toj. Ex qaj tuʼn ttzaj tiʼn tzalajbʼil qe tukʼilju bʼe kjawil qskʼoʼn. Qa ma qo pon moqa miʼn, at toklen tukʼilju jatumel qo xeʼl jyol qconsej aj tkubʼ qximen tiʼ kbʼantel quʼn. Tuʼntzunju nim toklen tuʼn tkanet jun consej aju jaku tzʼok qe qkʼuʼj tiʼj.

Chʼixme tkyaqil aju in jaw qskʼoʼn mlay chʼexpaj qanqʼibʼil tuʼn toj ambʼil tzul, pero ateʼ junjun jaku. Ex at kyxilen tukʼilju nimen quʼn moqa aju in kubʼ qximen qa bʼaʼn moqa nya bʼaʼn. Aju kjawil qskʼoʼn jaku tzaj tiʼn bʼaʼn moqa nya bʼaʼn qiʼj ex kyiʼj qeju toj qja toj ambʼil tzul. Aʼyeju at kyxilen tukʼil:

• Aj tkubʼ ten jun xjal tukʼil juntl moqa aj kykubʼ mojeʼ

• Qa ksbʼul jun xjal moqa miʼn, tukʼil aqʼuntl, ex tukʼil pwaq

• Alkye tten tuʼn kyxi xnaqʼtzet kʼwal

• Ex tzeʼn qmod ktel kyukʼil txqantl

¿Tiʼ jaku bʼant tuʼna tuʼntzun ttzalaja kyukʼil toj tjaya tiʼj aju kbʼel t-ximana tuʼn tbʼant tuʼna jaʼlo?

Teyle te junjun bʼaʼn tuʼn t-ximen tiʼj xjel lu: «¿Tiʼ kʼonil wiʼje tuʼn tjaw nskʼoʼne aju mas bʼaʼn?».

Tzul qʼamaʼn toj revista lu tiquʼn in nok Biblia te jun tbʼanel onbʼil tuʼn tel qnikʼ tiʼj alkye bʼaʼn ex alkye nya bʼaʼn ex alkye tten jaku tzʼonin tiʼja.