1 In nonin tuʼn miʼn ttzaj nya bʼaʼn qiʼj
Ax Tyol Dios in tzaj qʼamante qa aʼyeju nabʼil ateʼkux toj atz tzajniqe tukʼil Dios ex qa «at tajbʼen te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl» (2 Timoteo 3:16). ¿Axpe tok jlu? Qo xnaqʼtzan tiʼj tzeʼn o tzʼonin nabʼil tkuʼx toj Tyol Dios kyiʼj xjal tuʼn miʼn t-xiʼ toj il junjun nya bʼaʼn in che tzaj kyiʼj.
AJU TUʼN T-XI QKʼAʼN NIM QʼEʼN
Kubʼ tnaʼn Diana, aju ma qo yolin tiʼj toj xnaqʼtzbʼil ma kyaj, qa ten tajbʼil tuʼn tkʼan qʼeʼn tuʼnju tzaj bʼaj tkʼuʼj. Mintiʼ in tzaj tqʼamaʼn Tyol Dios tuʼn miʼn t-xi qkʼaʼn chʼin qʼeʼn, noqtzun tuʼnj in tzaj tqʼamaʼn jlu: «Miʼn tzʼok tukʼin tibʼa kyukʼil qe xjal kʼal qʼeʼn» (Proverbios 23:20). In tzaj yabʼil kyiʼj xjal tuʼn kʼaj qʼeʼn, in kubʼ kypan kyibʼ, ex kyoj kykyaqil abʼqʼi in che kyim nim millón neʼẍ, moqa neʼ, naʼmxtoq tjapun ambʼil tuʼn kyul itzʼj. Noqwit in xi kybʼiʼn xjal aʼyeju tbʼanel nabʼil ateʼkux toj Tyol Dios, mlaylo che tzaj nya bʼaʼn lu kyiʼj.
Bʼant jlu tuʼn Diana, ex jaʼlo in tqʼamaʼn jlu: «El nnikʼe qa mintiʼ el nbʼise tuʼn kʼaj qʼeʼn. Xi nbʼiʼne tbʼanel nabʼil tkuʼx toj Filipenses 4:6, 7: ‹Mi jun tuʼn tbʼaj kykʼuʼje tiʼj; tkyaqil kymanxe te Dios tuj kynaʼj Diose›. Toj junjun qonikʼan, aj wok tene ximel tiʼj nim tiʼchaq, in chin naʼne Dios te Jehová ex xi nqʼamaʼne te tiʼ in kubʼ nnaʼne: aju nqʼoje, aju kʼixkʼoj ex aju in bʼaj nkʼuʼje tiʼj... ex in xi nqanine te tuʼn tonin wiʼje tuʼn tten nximbʼetze toj tumel. Toj juntl qʼij, in nok tilil wuʼne tuʼn miʼn kyul ximbʼetz nya bʼaʼn toj nwiʼye. Tej nnaʼne Dios te Jehová onin wiʼje tuʼn tok nqʼoʼn nwiʼye tiʼjju attoq weye ex nya tiʼjju mintiʼtoq at weye. Kubʼ nximane tuʼn miʼn nkʼantle qʼeʼn tuʼnju ok nqʼoʼne toklen aju mujbʼabʼil otoq kanet wuʼne ex nyatoq waje tuʼn t-xi naj».
AJU YAẌBʼIL
At junjun tiʼchaq in tzaj qʼinte mas bʼis qiʼj ex kʼixkʼoj ik tzeʼn in tzaj tuʼn yaẍbʼil. Noqtzun tuʼnj, in qo tzaj kyonin nabʼil in tzaj tqʼoʼn Tyol Dios tuʼn miʼn qikʼ toj jlu, tuʼnju in yolin kyiʼj junjun nya bʼaʼn in che tzaj, ik tzeʼn aj tkubʼ tyekʼin jun xjal tgan tiʼj juntl ex nya ax tok tuʼn moqa tuʼn tok tqʼoʼn twitz tiʼj kyilbʼilal xjal mintiʼ kyxbʼalun tok. Tqʼama jun kuʼxun Samuel tbʼi jlu: «Jun rat jaku qo ok ten yaqil... At maj nya ngane jun xjal, pero in nok nkeʼyine qa tgan qine, ex tuʼn jlu kubʼ nyekʼine wajbʼile tiʼj». In kyqʼamaʼntoq xjal qa tgan Samuel tuʼn tyaqin, axpe ikx qa nyatoq ximen tuʼn tuʼn tbʼant, tuʼn jlu kubʼ t-ximen tuʼn tok ten bʼinchalte jlu, noqtzun tuʼnj yajxitl kubʼ tnaʼn nya bʼaʼn. Jaʼlo in tzaj tqʼamaʼn jlu: «Nya bʼaʼn qa ma txi qyekʼin jun tiʼ nya ax tok quʼn, tuʼn jlu oʼkx qiʼjx in qo ximen».
Jaw tuʼjin Samuel jun xnaqʼtzbʼil kye kuʼxun toj Internet toj jw.org. Ax ikx ximen tiʼj Proverbios 20:11, in tqʼamaʼn jlu: «Kyuʼn qe tbʼinchbʼen jun kuʼxun nneʼl nikʼbʼaj tiʼj qa bʼaʼn tmod ex qa tuj tumel in bʼet». ¿Tzeʼn onin nabʼil lu tiʼj? El tnikʼ Samuel tiʼj qa nya toj tumel tuʼn tok ten yaqil ex nya ax tok tuʼn. Ax ikx tqʼama jlu: «El nnikʼe tiʼj qa in bʼant jlu tuʼn jun xjal, mlay tzʼok te jun tbʼanel chmilbʼaj. Kubʼ nximane tiʼ jaku kubʼ tnaʼn nxuʼjile kkanetel toj ambʼil tzul aj tok tkeʼyin in chin yaqine tukʼil juntl xuʼj. Tuʼn jlu el nnikʼe tiʼj qa jaku tzaj nya bʼaʼn tuʼn jlu. Nya tuʼnju nya kwest in qo ok ten yaqil in nok te bʼaʼn». Kubʼ tchʼexpun Samuel tmod, ex onin jlu tiʼj tuʼn miʼn tkubʼ tzʼaq toj yaẍbʼil.
Aju ikʼ tiʼj Antonio, jakutoq tzaj tiʼn mas nya bʼaʼn: tgantoq keʼyin tiʼj kyilbʼilal xjal mintiʼ kyxbʼalun tok. Maske kʼujlaʼnxix t-xuʼjil tuʼn, kukxtoq in bʼant jlu tuʼn. In tzaj tqʼamaʼn qa nim onin tiʼj aju nabʼil tkuʼx toj 1 Pedro 5:8: «Tenx kynabʼle ex che xqʼuqine porke ate tajaw il aj qʼoj kyiʼje, ex in bʼet kyiʼjele, in tzanun ik tzaʼn jun bʼalun, in jyon tiʼj alkye jun tuʼn t-xi tchyoʼn». In tzaj tchikʼbʼaʼn Antonio jlu: «Noq jaxku tumel at nim kyilbʼilal xjal mintiʼ kyxbʼalun tok ex jaku che kyaj toj qwiʼ. Onin taqikʼ Tyol Dios lu wiʼje tuʼn nximane tiʼj jatumel tzajni qeju tiʼchaq lu. Iltoq tiʼj tuʼn tkubʼ nximane qa aʼyeju nya bʼaʼn tilbʼilal atz tzajniqe tukʼil Tajaw il. Jaʼlo in nel nnikʼe tiʼj qa oʼkx Jehová jaku tzʼonin wiʼje tuʼn tten nnabʼile ex tuʼn tok nxqʼuqin nximbʼetze, wanmiye ex nmejebʼleʼne». Tzaj tkʼamoʼn Antonio onbʼil ex bʼant tuʼn tkyaj ttzaqpiʼn aju nya bʼaʼn bʼinchbʼen. Tuʼn jlu, mintiʼ tzaj matij nya bʼaʼn tiʼj.
In nel qnikʼ tiʼj qa ateʼ tbʼanel nabʼil toj Tyol Dios aʼyeju jaku che onin qiʼj tuʼn miʼn kytzaj matij nya bʼaʼn qiʼj. ¿Yajtzun qa ma cheʼx qeju nya bʼaʼn toj il ex mintiʼ in kanet tumel quʼn tuʼn qex kywitz? Qo xnaqʼtzan tiʼj tzeʼn jaku tzʼonin Tyol Dios qiʼj.
Jaku che onin tbʼanel nabʼil ateʼkux toj Tyol Dios qiʼj tuʼn miʼn ttzaj junjun nya bʼaʼn qiʼj
