Jaku tzʼonin jun tbʼanel qamiw aj ttzaj junjun nya bʼaʼn qiʼj. Tuʼntzun jlu, in tzaj kyqʼamaʼn junjun xjal qa mlay tzʼok Dios te qamiw tuʼnju in kubʼ kyximen qa mintiʼ in bʼant jun tiʼ tuʼn qiʼj. Noqtzun tuʼnj, o bʼant nim tiʼchaq tuʼn ex toj chʼintl ambʼil kxel tbʼinchaʼn tiʼj tkyaqil nya bʼaʼn ex kʼelel tiʼn yajbʼil in tzaj qiʼj. ¿Tiʼ kbʼantel tuʼn Dios?

Kʼelel tiʼn Dios nya bʼaʼn aj tkubʼ tnajsaʼn aju in tzaj qʼinte nya bʼaʼn. In tzaj tyekʼin Tyol Dios alquʼn in tzaj nya bʼaʼn: «Kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). Ax ikx ok tqʼoʼn Jesús tbʼi Tajaw il te «nejenel at twitz txʼotxʼ» (Juan 12:31). Tkyaqilju nya bʼaʼn in tzaj kyiʼj xjal atz tzajni tukʼil Satanás. ¿Tiʼtzun kbʼantel tuʼn Dios?

Chʼix tpon ambʼil tuʼn tajbʼen Jesús tuʼn Jehová «tuʼntzun tnaj tipumal tajaw kamik, aju tajaw il» (Hebreos 2:14; 1 Juan 3:8). Ax ikx in tzaj tqʼamaʼn Tyol Dios qa bʼiʼn tuʼn Tajaw il qa nya «nim qʼij tuʼn ttentl» tuʼn tkubʼ najsaʼn (Apocalipsis 12:12). Ax ikx che bʼel tnajsaʼn Dios qe xjal nya bʼaʼn (Salmo 37:9; Proverbios 2:22).

Tej otoqxi tzʼel qʼiʼn nya bʼaʼn, kjapunel twi t-ximbʼetz Dios at kyiʼj xjal ex tiʼj Txʼotxʼ. ¿Tzeʼntzun qchwinqlal ktel?

Te jumajx ktel mujbʼabʼil ex txubʼtxaj. «Atzun qe xjal mans che okel etzal teju txʼotxʼ, ex puro tuj txubʼtxaj che tel» (Salmo 37:11).

Ktel nimxix ex tbʼanel wabʼj. «Kchmetel nim twitz triw tuj txʼotxʼ lu ex ktzajel chʼiy nimxix tuj tiwitz txʼotxʼ. Ik kʼokel twitz ik tzaʼn qe tzeʼ twi witz Líbano, ex che chmetel nim xjal tuj tnam ik tzaʼn kʼul in poqʼchaj tuj kojbʼil» (Salmo 72:16).

Ktel tbʼanel kyja xjal ex tbʼanel kyaqʼun. «Kjawil kybʼinchaʼn xjal kyja ex ax qe che najal tuj, ex kbʼelex kyawaʼn tqan uva ex ax qe che loʼl tiʼj twitz. [...] Qe xjal skʼoʼmaj wuʼne che tzalajel tiʼj taqʼunbʼen kyqʼabʼ» (Isaías 65:21, 22).

¿Taja tuʼn tanqʼina ik tzeʼn jlu? Toj chʼintl ambʼil kbʼantel jlu.

Toj ambʼil jaʼlo in qo yabʼti ex in qo kyim, pero nya te jumajx ktel jlu. Noq tuʼn chojbʼil bʼant tuʼn Jesús, toj chʼintl ambʼil kxel tqʼoʼn Jehová kychwinqlal xjal te jumajx aʼyeju ma che okslan tiʼj Jesús (Juan 3:16). ¿Tzeʼntzun qanqʼibʼil ktel?

Kʼelel qʼiʼn yabʼil. «Mi jun xjal najl tuj tnam ok tmaʼ kyjaʼ: Yabʼ qine, chiwt, porke kbʼel tnajsaʼn Dios aju kyil aj Sión» (Isaías 33:24).

Ya miʼn tentl kamik. «Te jumajx knajel kamik tuʼn Qman, kʼelel t-suʼn taʼl kywitz kykyaqil» (Isaías 25:8).

Che anqʼil kykyaqil xjal te jumajx. «Atzunju oyaj in tzaj tqʼoʼn Dios qe, tuʼn tten qchwinqlal te jumajx tuʼn qmojbʼabʼl qibʼ tukʼil Jesucrist aju Qajaw» (Romanos 6:23).

Che jawil anqʼin kyimni. «Ok che jawil anqʼin qe kyimni, tzaʼnx qeju tzʼaqlxix, ax ikx qeju mya tzʼaqlxix» (Hechos 24:15). Ax ikx tzul tbʼanel kye tuʼn oyaj tzaj tqʼoʼn Dios, aju chojbʼil.

¿Tiʼ kbʼantel tuʼn Dios tuʼn tbʼant jlu?

Kjapunel twi t-ximbʼetz Dios at kyiʼj xjal ex tiʼj Txʼotxʼ noq tuʼn jun Kawbʼil o txi qʼoʼn te Jesús (Salmo 110:1, 2). Ax kawbʼil lu xi tqʼamaʼn Jesús kye t-xnaqʼtzbʼen tuʼn t-xi kyqanin toj kynaʼj Dios kyukʼil yol lu: «A Qman ata tuj kyaʼj, [...] e ttzaj ju tkawbʼila» (Mateo 6:9, 10).

Kkawil Tkawbʼil Dios tibʼaj Txʼotxʼ ex kʼelel tiʼn kʼixkʼoj ex yajbʼil at jaʼlo. Atzun tbʼanel kawbʼil lu jaku ten kyibʼaj xjal. Tuʼntzunju ok tilil tuʼn Jesús tej tten twitz Txʼotxʼ tuʼn t-xi tpakbʼaʼn «tqanil bʼaʼn tiʼj tkawbʼil Dios» ex xi tqʼamaʼn kye t-xnaqʼtzbʼen tuʼn tbʼant axju kyuʼn (Mateo 4:23; 24:14).

O tzaj ttziyen Jehová jlu qe tuʼnju kʼujlaʼn qoʼ tuʼn. ¿Mintiʼpe in nonin jlu tiʼja tuʼn tok tojtzqiʼna mas ex tuʼn tok tilil tuʼna tuʼn toka te tamiw? ¿Tiʼ tbʼanel tzul teya qa ma bʼant tuʼna? Kʼelel qnikʼ kyiʼj toj juntl xnaqʼtzbʼil.