Tuʼn tel mas qnikʼ tiʼj jun xjal, nim toklen tuʼn tel qnikʼ tiʼj alkye tiʼchaq o bʼant tuʼn. Ikxtzun tten tukʼil Dios, qa taja tuʼn tel mas tnikʼa tiʼj, il tiʼj tuʼn tok tojtzqiʼna tiʼ o bʼant tuʼn. Tbʼanel kʼelel te teya aj tel tnikʼa tiʼj qa jaku tzaj tbʼanel teya tuʼnju o bʼant tuʼn Dios ex tiʼ toklen jlu tukʼilju in nayon tiʼja toj ambʼil tzul.

A Jehová Bʼinchal qe ex jaku tzʼel qnikʼ kyiʼj tmod «qa ma qo kubʼ ten ximal tiʼj tkyaqilju o tbʼincha. Kyjaʼtzun, chikʼlxix taʼ, atxix tej tbʼant twitz txʼotxʼ» (Romanos 1:20). «Tuʼn tipumal Qman o bʼant txʼotxʼ; tuʼn tnabʼl kubʼ tqʼuqbʼaʼn, ex tuʼn tojtzqibʼl xi tlikʼpuʼn kyaʼj» (Jeremías 10:12). Ax ikx in tzaj kyyekʼin tbʼinchbʼen Jehová qa at nim tkʼujlabʼil qiʼj.

Nimxix in qo jaw tzalaj tuʼnju o qo kubʼ tbʼinchaʼn «ik tzaʼnx te tilbʼilal» (Génesis 1:27). Tuʼn jlu jaku kubʼ qyekʼin qe tbʼanel tmod. Ax ikx, o tzaj tqʼoʼn qnabʼil tuʼntzun tel qnikʼ kyiʼj tkawbʼil ex kyiʼj t-ximbʼetz. Qa ma txi qnimen qe tkawbʼil Jehová, mas in qo tzalaj ex in ten ttxolil qanqʼibʼil. Axpe ikx jaku qo ok te tamiw.

Kubʼ tyekʼin Jehová tkʼujlabʼil qiʼj tuʼnju kubʼ tbʼinchaʼn Txʼotxʼ te qe. Ik tzeʼn tqʼama apóstol Pablo, «mintiʼ kyaj ten Dios mintiʼwt testiw tiʼj, porke tzaj tqʼoʼn aju bʼaʼn kye, ex in kuʼtz tqʼoʼn jbʼal qibʼaj, ex in tzaj tqʼoʼn tqʼijlalil tuʼn tchmet qawal, ex in tzaj tqʼoʼn qwa tuʼn ttzalaj qanmi» (Hechos 14:17). Tej tkubʼ tbʼinchaʼn Dios Txʼotxʼ, nya oʼkx tzaj tqʼoʼn aju at tajbʼen qe, sino tzaj tqʼoʼn tkyaqilju jaku qo tzalaj tuʼn toj qanqʼibʼil. Ex a jlu noq jun yekʼbʼil tiʼj tkyaqilju tzul tqʼoʼn qe toj ambʼil tzul.

Kubʼ tbʼinchaʼn Jehová Txʼotxʼ tuʼntzun qanqʼin twitz te jumajx. In tzaj tqʼamaʼn Tyol Dios qa o tzaj tqʼoʼn Jehová Txʼotxʼ te kye xjal ex mintiʼ o bʼant tuʼn  tuʼn tten noq kukx, «noq oʼkx o tbʼincha tuʼn kyten xjal twitz» (Salmo 115:16; Isaías 45:18). ¿Alkye knajal twitz Txʼotxʼ ex toj jteʼ ambʼil? In tzaj ttzaqʼweʼn Tyol Dios: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).

Atzun jlu kubʼ t-ximen Jehová tej tbʼant Adán ex Eva tuʼn. E kubʼ tqʼoʼn toj jun tbʼanel najbʼil tuʼntzun kyaqʼunan tiʼj ex tuʼn tok kykʼujlaʼn (Génesis 2:8, 15). Xi tqʼoʼn Dios jun tbʼanel kyaqʼun: «Che kʼwaʼline, chmet-x kybʼaje, kynojsame twitz txʼotxʼ ex che kawine tibʼaj» (Génesis 1:28). Attoq tumel tuʼn tanqʼin Adán ex Eva te jumajx toj tzalajbʼil tzalu twitz Txʼotxʼ. Pero bʼisbʼajil tuʼnju kubʼ kyximen tuʼn miʼn kynimen te Dios ex xi kynajsaʼn ambʼil tzaj qʼoʼn kye tuʼn kyten kyxol «xjal bʼaʼn» aqeju «che etzal tiʼj ju txʼotxʼ». Noqtzun tuʼnj, ik tzeʼn kʼelel qnikʼ tiʼj, mintiʼ chʼexpaj t-ximbʼetz Dios at kyiʼj xjal ex tiʼj Txʼotxʼ noq tuʼnju bʼant tuʼn Adán ex Eva. Pero tnejel qo xnaqʼtzal tiʼj juntl tiʼ o bʼant tuʼn Dios.

¿Tiquʼn o tzaj tqʼoʼn Jehová Tyol qe? Tnejel, tuʼn tok qojtzqiʼn Jehová (Proverbios 2:1-5). Qʼuqli qkʼuʼj tiʼj qa mlay tzaj ttzaqʼweʼn Tyol Dios tkyaqilju qaj tuʼn t-xi qqanin te Jehová ex mi jun uʼj jaku bʼant jlu tuʼn (Eclesiastés 3:11). Noqtzun tuʼnj, tkyaqilju in tzaj tqʼamaʼn Xjan Uʼj in nonin qiʼj tuʼn tok qojtzqiʼn Dios. Jaku tzʼel qnikʼ tiʼj tuʼnju alkye tmod in kubʼ tyekʼin kyukʼil xjal ex in nel qnikʼ tiʼj alkyeqe xjal in chex tkʼamoʼn (Salmo 15:1-5). In nel qnikʼ tiʼj alkye kʼulbʼil in xi tkʼamoʼn, alkyeqe tbʼanel tkawbʼil ex tiʼj alkye t-ximbʼetz at tiʼj qʼinumabʼil. Ax ikx in nonin Tyol Dios qiʼj tuʼn tel mas qnikʼ tiʼjju Bʼinchal qe noq kyuʼn tyol ex tbʼinchbʼen Jesucristo, aju Tkʼwaʼl (Juan 14:9).

Ax ikx, o tzaj tqʼoʼn Jehová Tyol qe tuʼntzun tel qnikʼ tiʼj tzeʼn jaku qo tzalaj ex tuʼn tten ttxolil qanqʼibʼil. Tojx Tyol in tzaj tqʼamaʼn tzeʼn jaku qo tzalaj kyukʼil toj qja, tuʼn qnaʼn bʼaʼn ex tuʼn kyikʼx nya bʼaʼn quʼn. Ik tzeʼn kʼelel qnikʼ tiʼj, in tzaj ttzaqʼweʼn junjun xjel nim kyoklen, ik tzeʼn tiquʼn at nim yajbʼil ex tiʼ kbʼajel toj ambʼil tzul. Nya oʼkxju, ax ikx in tzaj tqʼamaʼn tiʼ o bʼant tuʼn Dios tuʼntzun tjapun twi t-ximbʼetz.

Ateʼ junjuntl tiʼ in tzaj kyyekʼin qa jun tbʼanel uʼj te Tyol Dios ex qa atz tzajni tukʼil Jehová. Ax tok, kubʼ tzʼibʼin kyuʼn junlo 40 xinaq tojlo 1,600 abʼqʼi, pero at ttxolil aju tkuʼx toj tuʼnju a Dios kubʼ bʼinchante (2 Timoteo 3:16). Junxitl Tyol Dios kywitz txqantl uʼj tuʼnju ma tzʼel nim ambʼil tuʼn ex tzʼaqli taʼ, ik in tzaj kyyekʼin nim ojtxe uʼj tiʼj Tyol Dios. Maske ateʼ junjun nya kyaj tuʼn tkubʼ traducirit, tuʼn t-xi sipet ex tuʼn kyuʼjin xjal tiʼj pero mintiʼ o kubʼ naj Xjan Uʼj. Ex toj ambʼil jaʼlo, a uʼj mas in kubʼ traducirit ex mas in xi kʼayin twitz tkyaqil Txʼotxʼ. Tuʼnju atx Tyol Dios toj qqʼijlalil jaʼlo, in tzaj tyekʼin qa «kukx ktel te jumajx» (Isaías 40:8).

Juntl tiʼ o bʼant tuʼn Dios aju o tzaj ttziyen qa kjapunel twi t-ximbʼetz noq tuʼnju tzaj tqʼoʼn jun oyaj nim toklen. Ik tzeʼn xqo yolin tiʼj tnejel, tajtoq Dios tuʼn kyanqʼin xjal te jumajx tzalu twitz Txʼotxʼ. Noqtzun tuʼnj, tej tkubʼ t-ximen Adán tuʼn miʼn tnimen te Dios ex tej tbʼinchan il, xi tnajsaʼn ambʼil otoq tzaj qʼoʼn te tuʼn tanqʼin te jumajx. Nya oʼkxju, ax ikx xi tnajsaʼn ambʼil kye tkʼwaʼl che ul te tibʼajxi. «Ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12). Jakulo kubʼ qximen qa ya mlay japun twi t-ximbʼetz Jehová tuʼnju mintiʼ e nimen xjal te. Pero ¿tiʼ bʼant tuʼn?

Aju bʼant tuʼn Jehová in tzaj tyekʼin tzeʼnxix te. Toj tumel xi tbʼinchaʼn tiʼj nya bʼaʼn ex kubʼ tqʼoʼn tkastiw Adán ex Eva tuʼnju mintiʼ e nimen. Pero tuʼnju at tkʼujlabʼil onin jlu tiʼj tuʼn ttzaj ttziyen jun tiʼ kye kykyaqil xjal. Ajbʼen tnabʼil Jehová tuʼntzun tel tnikʼ tiʼj tzeʼn kxel tbʼinchaʼn tiʼj nya bʼaʼn ex jun rat naj tzaj tqʼamaʼn tzeʼn kxel bʼinchet tiʼj (Génesis 3:15). Oktoq qo eletz tiʼn tjaqʼ il ex kamik noq tuʼn Jesucristo aju Tkʼwaʼl. ¿Tiʼ at toklen tukʼil jlu?

Tuʼn t-xi tbʼinchaʼn Jehová tiʼjju bʼant tuʼn Adán,  tzaj samaʼn Jesús tuʼn tzalu twitz Txʼotxʼ tuʼntzun t-xi t-xnaqʼtzaʼn aju bʼe te chwinqlal kye xjal ex tuʼn t-xi tqʼon tibʼ tuʼn tkyim «tuʼn kykolpet nimku xjal» a (Mateo 20:28; Juan 14:6). Xi tqʼoʼn Jesús chojbʼil tuʼnju tzʼaqli ik tzeʼn te Adán, pero junxitl te Jesús twitz Adán tuʼnju nimen te Dios, axpe ikx tejxi tkyim. Tuʼnju mintiʼ tiquʼn tuʼn tkyim Jesús, jaw anqʼin tuʼn Jehová ex xi tqʼoʼn ambʼil te tuʼn tmeltzʼaj toj kyaʼj. Iktzun tten xi tqʼoʼn ambʼil kye xjal bʼaʼn che niman te Dios tuʼn tten kychwinqlal te jumajx aju mintiʼ xi tqʼoʼn Adán. «Porke ik tzaʼn e ok nimku xjal aj il noq tuʼn tlaj jun xinaq mintiʼ xi tniman tyol Dios, ax ikxtzun nimku xjal ok che okel te tzʼaqlxix tuʼn Dios noq tuʼn jun xinaq xi tniman tyol Dios» (Romanos 5:19). Noq tuʼn chojbʼil xi tqʼoʼn Jesús kjapunel aju ttziybʼil Jehová: ok che anqʼil kykyaqil xjal te jumajx tzalu twitz Txʼotxʼ.

Aju alkye tten xi tbʼinchaʼn Jehová tiʼj nya bʼaʼn kubʼ tbʼinchaʼn Adán, in nonin qiʼj tuʼn tel mas qnikʼ tiʼj Dios. In nel qnikʼ tiʼj qa mi jun tiʼ jaku tzʼel tiʼn ambʼil te tuʼn tjapun twi t-ximbʼetz, tuʼnju kukx «in japun» twi tyol (Isaías 55:11). Ax ikx in tzaj tyekʼin qa at nim tkʼujlabʼil qiʼj. «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn. Tuʼntzun jlu nneʼl qnikʼ tiʼj ju tkʼujlalil: Mya aqeqoʼ ma qo kʼujlante Dios, noq oʼkx ate Dios ma qo tkʼujla ex tzaj t-samaʼn aju Tkʼwaʼl tuʼn tok te chojbʼil qil» (1 Juan 4:9, 10).

Tuʼn tkyaqil tkʼuʼj Dios tzaj tqʼoʼn Tkʼwaʼl tuʼn tchjet qil, «¿tzaʼntzun tten tuʼn miʼn ttzaj tqʼoʼn tkyaqil qe junx tukʼil Tkʼwaʼl?», jaku tzʼok qeʼ qkʼuʼj tiʼj qa tzul tqʼoʼn tkyaqilju o tzaj ttziyen (Romanos 8:32). ¿Alkye junjuntl tiʼ o tzaj ttziyen qe? Qo xnaqʼtzan tiʼj.