Ya ma qo xnaqʼtzan tiʼj junjun tiʼ aju ma tzʼonin qiʼj tuʼn tel qnikʼ tiʼj alkye Dios. Ma tzʼel qnikʼ tiʼj qa Jehová tbʼi Dios ex qa aju tmod mas tbʼanel, aju kʼujlabʼil. Ax ikx ma tzʼel qnikʼ tiʼjju o bʼant tuʼn ex tiʼjju kbʼantel tuʼn toj ambʼil tzul kyiʼj kykyaqil xjal. Atx nim tiʼ tuʼn tel qnikʼ tiʼj Dios, pero jakulo kubʼ t-xjelina qa il tiʼj tuʼn tel tnikʼa tiʼj moqa miʼn.

In tzaj ttziyen Jehová qa ok «knetel tuʼna» qa ma jyona tiʼj (1 Crónicas 28:9). Qa ma tzʼok tilil tuʼna tuʼn tok tojtzqiʼna, ok tzul jun tbʼanel teya: jun tbʼanel tamiwbʼila tukʼil (Salmo 25:14). ¿Tiʼ tbʼanel jaku tzaj teya tuʼn amiwbʼil lu?

Ok ktzalajela. In tzaj tqʼamaʼn Xjan Uʼj qa «at-xix tzalajbʼil tukʼil» Jehová (1 Timoteo 1:11). Qa ma tzʼok laqʼeʼya ttxlaj ex qa ma tzʼok tilil tuʼna tuʼn tel tkanoʼna qe tmod, nim ktzalajela ex tzul tiʼn jlu tbʼanel tiʼj t-ximlala, tiʼj t-ximbʼetza ex tiʼjju in tnaʼna (Salmo 33:12). Ax ikx mlay tkubʼ tbʼinchaʼna jun tiʼ aju jaku tzaj nya bʼaʼn tiʼja tuʼn, ktel tbʼanel tmoda ex ktela bʼaʼn kyukʼil txqantl. Qa ma bʼant jlu tuʼna, ktel t-ximbʼetza ik tzeʼn te aj tzʼibʼil tej tqʼama jlu: «Atzun weye chin xel laqʼeʼye ttxlaj Dios, porke atzun mas bʼaʼn te weye» (Salmo 73:28).

Kxqʼuqil Dios tiʼja. In tzaj ttziyen Jehová jlu kye tamiw: «Kxel nqʼoʼne konsej bʼaʼn teya» (Salmo 32:8). A t-xilen jlu qa aku Jehová in kwentin tiʼj teyele junjun tmajen ex in xi tqʼoʼn aju at-xix tajbʼen kye (Salmo 139:1, 2). Aj tchʼiy tamiwbʼila tukʼil Jehová, kʼelel tnikʼa tiʼj qa kukx ktel ttxlaja.

Ktel jun tbʼanel tanqʼibʼila toj ambʼil tzul. Nya oʼkx ktzalajela toj ambʼil jaʼlo, sino in tzaj tqʼamaʼn Jehová qa in nayon jun tbʼanel anqʼibʼil tiʼja (Isaías 48:17, 18). In tzaj tqʼamaʼn Tyol Dios jlu: «Atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3). Aju qʼuqbʼil qkʼuʼj in tzaj tqʼoʼn Dios, ik tten ik tzeʼn tzuybʼil bark aju segurxix, mintiʼ in yukch ex in nonin qiʼj tuʼn miʼn qkubʼ numj kyoj ambʼil kwest (Hebreos 6:19).

Atzun junjun tbʼanel jaku tzaj qkʼamoʼn qa ma tzʼok qojtzqiʼnxix Jehová ex qa ma qo ok te tamiw. Qa taja tuʼn tel mas tnikʼa tiʼj, bʼaʼn tuʼn tyolina tukʼil jun testigo de Jehová moqa bʼaʼn tuʼn tokxa toj qtembʼile te Internet www.pr418.com/mam.