Ax in tzaj qʼamante: «Aqine Jehová porke atzun nbʼiye» (Isaías 42:8). In jatz kanet junlo siete mil maj tbʼi Dios toj Xjan Uʼj. Noqtzun tuʼnj, kyoj nimku traducción tiʼj Tyol Dios o kubʼ chʼexpuʼn ex o che kux qʼoʼn título te t-xel ik tzeʼn Qajaw. Taj Dios tuʼn toka te tamiw, tuʼntzunju taj tuʼn tajbʼen tbʼi tuʼna (Salmo 105:1).

Qe título. In che ajbʼen título toj Xjan Uʼj tiʼj Jehová ik tzeʼn Dios, Nimxix Tipumal, Bʼinchal tkyaqil, Qman, Qajaw ex aj Kawil tibʼaj tkyaqil. Ax ikx in che kanet nim naʼj Dios toj Xjan Uʼj jatumel ajbʼen jun título ex tbʼi Jehová kyuʼn xjal (Daniel 9:4).

 Tzeʼn te Dios. Jun xewbʼaj te Dios (Juan 4:24). In tzaj tqʼamaʼn Xjan Uʼj qa «mi aʼl jun xjal o til jun maj twitz Dios» (Juan 1:18). Ax ikx in tzaj tqʼamaʼn qa in tnaʼn Dios jun tiʼ. Jaku tzaj tbʼis moqa jaku tzalaj tanmi tuʼnju qbʼinchbʼen (Salmo 78:40, 41; Proverbios 27:11).

Aʼyeju tbʼanel tmod. Mintiʼ in nok tqʼoʼn Dios twitz tiʼj kyyajil xjal, tiʼj kytnam nix tiʼjju o tzikʼ toj kyanqʼibʼil (Hechos 10:34, 35). Ax ikx in kubʼ tyekʼin qʼaqʼbʼil tkʼuʼj, tpasens, tkʼujlabʼil mlayx bʼaj ex kukx in yolin axix tok (Éxodo 34:6, 7). Noqtzun tuʼnj, kyxol kykyaqil tmod at kyaje mas qʼanchaʼlxix.

Aju ipumalj. At nimxix tipumal Dios. Tuʼntzunju jaku tzʼok qeʼ qkʼuʼj tiʼj qa jaku japun twiʼ tkyaqilju in tzaj ttziyen (Génesis 17:1).

Aju nabʼil. Mintiʼ juntl ik tnabʼil ik tzeʼn te Dios. Tuʼntzunju in tzaj tqʼamaʼn Xjan Uʼj qa «oʼkx te Dios at tnabʼl» (Romanos 16:27).

Aju tzʼaqlixix. Toj tkyaqil ambʼil in xi tbʼinchaʼn Dios aju tzʼaqlixix. «Tzʼaqlxix qe tbʼinchbʼen» ex «mintiʼ jun mya bʼaʼn in tbʼinchaʼn» (Deuteronomio 32:4).

Aju kʼujlabʼil. In tzaj tqʼamaʼn Xjan Uʼj qa «ate Dios at tkʼujlalil» (1 Juan 4:8). Nya oʼkx in kubʼ tyekʼin Dios tkʼujlabʼil, sino kʼujlabʼil te. Qʼanchaʼl tkʼujlabʼil tiʼj tkyaqilju in tbʼinchaʼn ex in tzaj tiʼn jlu nim tbʼanel qe.

Aju tamiwbʼil kyukʼil xjal. A Dios Qtat at toj kyaʼj (Mateo 6:9). Qa ma tzʼok qeʼ qkʼuʼj tiʼj jaku qo ok te tamiw (Salmo 25:14). In ximen Dios qiʼj, tuʼntzunju taj tuʼn qok laqʼeʼ ttxlaj toj naʼj Dios ex tuʼn t-xi qqʼamaʼn te tkyaqilju in bʼaj qkʼuʼj tiʼj (Santiago 4:8; 1 Pedro 5:7).

Nya Dios te Jesús. Junxitl te Jesús tuʼnju a Dios kubʼ bʼinchante. Tuʼntzunju toj Xjan Uʼj in nok qʼoʼn tbʼi te Tkʼwal Dios (Juan 20:31). Kubʼ tbʼinchaʼn Jehová Jesús, aju tnejel Tkʼwal, yajxitl xi tqʼoʼn toklen tuʼn tonin tuʼn tbʼant tkyaqilju at twitz kyaʼj, twitz Txʼotxʼ ex qeju at kychwinqlal (Proverbios 8:30, 31; Colosenses 1:15, 16).

 Mintiʼ tqʼama Jesús qa Dios te. Tqʼama jlu: «Tukʼil ẍin tzaje ex ate tzaj samante weye» (Juan 7:29). Tej in yolintoq Jesús tukʼil jun xuʼj moqa qya aju ok te t-xnaqʼtzbʼen, tqʼama jlu tiʼj Jehová: a «Nmane ex Kymane», «Ndiose ex Kydiose» (Juan 20:17). Tej tkyim Jesús, jaw anqʼin tuʼn Jehová tuʼn tanqʼin toj kyaʼj, kubʼ tqʼuqbʼaʼn toj tbʼanqʼabʼ ex xi tqʼoʼn nim toklen (Mateo 28:18; Hechos 2:32, 33).

Jaku tzʼonin Jesús tiʼja tuʼn tok laqʼeʼya ttxlaj Dios

Ul Jesús twitz Txʼotxʼ tuʼn ttzaj tyekʼin qe tzeʼn Tman. Ax Jehová tzaj qʼamante jlu tiʼj Jesús: «Atzun Nkʼwaʼle jlu kʼujlaʼnxix wuʼne; kybʼinxe tyol» (Marcos 9:7). Oʼkx Jesús ojtzqiʼnxix Dios tuʼn. Tuʼntzunju tqʼama jlu: «Mintiʼ jun xjal ojtzqilte alkye Nmane, oʼkx aqine ojtzqilte, porke aqine Tkʼwaʼl; ex alkye jun xjal waje tuʼn t-xi nyekʼune Nmane te kʼeleltzun tnikʼ xjal tiʼj» (Lucas 10:22).

Kubʼ tyekʼin qe tmod Dios tojxix tumel. Tuʼnju el tkanoʼnxix Jesús qe tmod Dios, tqʼama jlu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Onin Jesús tukʼil tyol ex tukʼil tbʼinchbʼen kyiʼj xjal tuʼn kyok laqʼeʼ ttxlaj Dios, tuʼnju kubʼ tyekʼin tkʼujlabʼil Tman at kyiʼj. Tqʼama Jesús jlu: «Aqine ju bʼe, aqine ju yol axix tok, ex aqine qʼol chwinqlal; mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). Ex tqʼamatl jlu: «Qeju in che kʼulun axix tok, ok che kʼulul twitz Dios Mambʼaj tuj kyanmi ex axix tok kyuʼn; porke ate Dios Mambʼaj taj tuʼn kykʼulun xjal twitz ex axix tok kyuʼn» (Juan 4:23). ¡Nokpe ximana tiʼj! In jyon Jehová kyiʼj xjal ik tzeʼn teya, aʼyeju kyaj tuʼn tel kynikʼ tiʼj axix tok tiʼj.