Kyoj abʼqʼi o che ikʼ, o tzʼel kynikʼ xjal junxichaq tten kyanqʼibʼil tiʼj qa in tzaj tqʼamaʼn Tyol Dios aju axix tok. Ex toj ambʼil jaʼlo, nim millón xjal in che ok lepeʼ kyiʼj xnaqʼtzbʼil ateʼkux toj. Atzun junjuntl in tzaj kyqʼamaʼn qa ya mintiʼ tajbʼen ex qa nya ax tok aju in tzaj tqʼamaʼn. ¿Tiʼ teya t-xim tiʼj? ¿Jakupe kanet axix tok quʼn toj Xjan Uʼj?

¿Tzeʼn jaku tzʼel tnikʼa tiʼj qa jaku tzʼok qeʼ tkʼuʼja tiʼj Tyol Dios? Ximana tiʼj qa at jun tamiwa kukx o tzaj tqʼamaʼn axix tok teya, jaku tqʼamaya qa jaku tzʼok qeʼ qkʼuʼj tiʼj. Yajtzun Tyol Dios, ¿ikpe tten ik tzeʼn jun qamiw jaku tzʼok qeʼ qkʼuʼj tiʼj? ¿Kukxpe o tzaj tqʼamaʼn axix tok? Qo xnaqʼtzan tiʼj junjun techel.

Kyqʼama aj tzʼibʼil aju axix tok

Kubʼ kytzʼibʼin xjal tqanil toj Tyol Dios ikxix tzeʼn bʼaj, axpe ikx tej kyel txalpaj. Jun techel, tej tkubʼ ttzʼibʼin Jonás tuʼj, tqʼama qa mintiʼ bʼin te Dios (Jonás 1:1-3). Tej tkubʼ bʼaj txʼolbʼabʼil tuʼn, tqʼama qa tzaj kawin tuʼn Dios, pero mintiʼ ok tilil tuʼn tuʼn ttzaj tqʼamaʼn qa xi tbʼiʼn kawbʼil (Jonás 4:1, 4, 10, 11). Tuʼnju kyqʼama aj tzʼibʼil tiʼj Tyol Dios ikxix tzeʼn bʼaj, in tzaj tyekʼin qa ok kyqʼoʼn toklen axix tok.

Qe consej at kyajbʼen

¿Jakupe che ajbʼen consej tkuʼx toj Tyol Dios kyiʼj tiʼchaq toj qanqʼibʼil? Jaku. Jun techel, keʼyinka tiʼ in tzaj tqʼamaʼn Tyol Dios tiʼjju tuʼn qten bʼaʼn kyukʼil txqantl. «Tkyaqilju kyajbʼile tuʼn kybʼinchante xjal kyeye, ax ikxtzun kybʼinchame kye» (Mateo 7:12). «Aju tzaqʼwebʼl te yol tukʼil kʼujlalil, bʼiʼx in weʼ qʼoj tuʼn» (Proverbios 15:1). Toj ambʼil jaʼlo, nim kyoklen consej tkuʼx toj Tyol Dios ik tzeʼnx tej kykubʼ tzʼibʼin.

 Qe tiʼchaq axix tok e bʼaj

Kyoj nimku abʼqʼi, o kanet nim tiʼchaq kyuʼn arqueólogo aju in tzaj tyekʼin qa ax tok e ten qe xjal, qe lugar ex qe tiʼchaq in yolin Tyol Dios tiʼj. Qo xnaqʼtzan tiʼj jun techel. In tzaj tqʼamaʼn Tyol Dios qa toj ambʼil tej tten Nehemías, pon kyiʼn xjal te Tiro (qe xjal te Fenicia aʼyeju tzajniqe Tiro), aʼyeju in che anqʼintoq atz Jerusalén «kyiẍ ex tkyaqil txkaj kʼaẍjel» toj Jerusalén (Nehemías 13:16).

¿Atpe yekʼbʼil tiʼj qa ax tok bʼaj jlu? At. O che kanet tiʼchaq kye xjal te Fenicia kyuʼn arqueólogo atz Israel, aju in tzaj tyekʼin qa toj ambʼil ojtxe, kykabʼil tnam lu e kʼayin tiʼchaq kyxolx. Nya oʼkxju, ax ikx o kanet kybʼaqil pescad te mar Mediterráneo toj tnam Jerusalén. Bʼalo tzaj kyiʼn xjal qe pescad lu najchaq. Otoqxi tzʼok tkeʼyin jun xnaqʼtzal tiʼjju bʼaj ojtxe yekʼbʼil lu, tqʼama: «Bʼalo e kʼayin xjal te Tiro pescad toj tnam Jerusalén ik tzeʼn in tzaj tqʼamaʼn Nehemías 13:16».

Tzʼaqli tukʼilju o tzʼel kynikʼ científico tiʼj

Mas in yolin Xjan Uʼj tiʼj Dios ex kyiʼj tiʼchaq o che bʼaj, pero ax ikx tzʼaqli aj tyolin tiʼjju o tzʼel kynikʼ científico tiʼj. Qo xnaqʼtzan tiʼj jun techel.

Ma tzikʼ junlo 3 mil 500 abʼqʼi, tqʼama Tyol Dios qa tkubʼ Txʼotxʼ «tibʼaj ju mintiʼ at» (Job 26:7). Junxitl jlu tukʼilju kyqʼama xjal qa tkubʼ Txʼotxʼ tibʼaj aʼ moqa iqin tuʼn jun matij tortuga. Tej otoqxi tzikʼ junlo mil 100 abʼqʼi tkubʼlen tzʼibʼin uʼj te Job, kukx xi kynimen xjal qa at jun tiʼ tzyulte Txʼotxʼ. Tzmaxi toj abʼqʼi 1687, ma tzikʼ junlo oxe syent abʼqʼi, tej kyetz xnaqʼtzbʼil tuʼn Isaac Newton tiʼj gravedad ex tej ttzaj tchikʼbʼaʼn qa tuʼn jun ipumalj mintiʼ qʼanchaʼl in ten Txʼotxʼ toj tlugar. Aju el kynikʼ científico tiʼj tzaj tyekʼin qa ax tok aju tqʼama Tyol Dios, maske otoq tzikʼ mas te oxe mil abʼqʼi ttzajlen tqʼamaʼn.

 Jaku tzʼok qeʼ qkʼuʼj kyiʼj yol e kyaj qʼamaʼn

¿Jakupe tzʼok qeʼ qkʼuʼj kyiʼj yol e kyaj qʼamaʼn toj Tyol Dios? Qo xnaqʼtzan tiʼj jun techel: aju kyaj tqʼamaʼn Isaías tiʼj xitbʼil tiʼj tnam Babilonia.

Yol kyaj qʼamaʼn. Nqayin tiʼj abʼqʼi 732 tjaqʼ ambʼil qʼiʼn quʼn jaʼlo, tej naʼmxtoq tok Babilonia te jun nimaq kawbʼil, kyaj tqʼamaʼn Isaías qa kbʼel tiʼj tnam lu ex mi jun xjal knajal toj aj tbʼet ambʼil (Isaías 13:17-20). Ax ikx tqʼama Isaías tbʼi xjal kbʼel xiten te tnam: Ciro. Ex tqʼama tiʼtoq tuʼn tbʼant tuʼn: tuʼn tkubʼ tzqij aʼ tok tiʼjele tnam. Ax ikx kyaj tqʼamaʼn qa kjeltoq jaqoʼn tlamel tnam (Isaías 44:27-45:1).

Tej tjapun twiʼ. Tej otoq tzikʼ junlo 200 abʼqʼi tkyajlen tqʼamaʼn Isaías yol lu, xiʼ jun aj kawil te Persia qʼojil tiʼj tnam Babilonia. ¿Alkye? Ciro tbʼi. Tuʼnju toktoq muro tiʼj tnam, atz ximen Ciro tiʼj aʼ Éufrates tok tiʼjele tnam. Atz jawni kubʼ kybʼinchaʼn xjal jun tbʼe aʼ tuʼn t-xiʼ toj juntl plaj. Tej tkubʼ tzqij aʼ ex oʼkx japun tiʼj kykux soldad, e ikʼx bʼet tuʼn kypon ttzi tlamel tnam, aju otoq kyaj jaqoʼn kyuʼn aj Babilonia. Okx qe tsoldad Ciro toj tnam ex kubʼ tiʼj kyuʼn.

Pero atxtoq juntl tiʼ naʼmxtoq tjapun twiʼ: ¿okpe che anqʼil xjal toj? Toj nimku syent abʼqʼi e anqʼin xjal toj tnam Babilonia. Noqtzun tuʼnj, toj ambʼil jaʼlo, ateʼ tbʼuchil tnam Babilonia nqayin tiʼj tnam Bagdad (Irak), a jlu in tzaj tyekʼin qa japun bʼaj twi tkyaqil yol kyaj qʼamaʼn tiʼj tnam lu. Tuʼntzunju, jaku tzʼok qeʼ qkʼuʼj tiʼj Tyol Dios aj tyolin tiʼjju kbʼajel toj ambʼil tzul.