In yolin Biblia kyiʼj xinaq moqa ichan ex kyiʼj xuʼj kubʼ kynaʼn nim tiʼ. Qa ma jaw quʼjin aju o tzikʼ kyiʼj, bʼalo jaku txi qqʼamaʼn qa axju in kubʼ qnaʼn ik tzeʼn jun kye.

Qkyaqilx qaj tuʼn tel kynikʼ txqantl qiʼj ex mas qa in nok tilil quʼn tuʼn tkubʼ tiʼj jun yabʼil tiʼj qximbʼetz. Bʼalo aj tjaw quʼjin aju kubʼ kynaʼn ex aju kubʼ kyximen junjun xjal in yolin Biblia tiʼj, jaku tzʼel qnikʼ tiʼj qa ax kyximbʼetz ex axju kubʼ kynaʼn ik tzeʼn qe. Ex jaku tzʼonin jlu qiʼj tuʼn tel qnikʼ tiʼj qa nya qjunalx in tzaj ansiedad qiʼj ex in tzaj bʼaj qkʼuʼj.

• In tzaj tqʼamaʼn Biblia tiʼ kyqʼama junjun xjal tzaj bʼaj kykʼuʼj ex kubʼ kynaʼn qa mintiʼtoq kyipun. ¿Ope kubʼ t-ximana jun maj jlu: «Mlayx tzikʼx jlu wuʼne, ya nya waje tuʼn wanqʼine»? Atzun jlu kubʼ tnaʼn Moisés, Elías ex David (Números 11:14; 1 Reyes 19:4; Salmo 55:4).

• In tzaj tqʼamaʼn Biblia aju bʼaj tiʼj Ana, jun xuʼj tzaj nimxix tbʼis tuʼnju mintiʼtoq in nul itzʼj tal ex tuʼnju in xmayintoq juntl t-xuʼjil tchmil tiʼj (1 Samuel 1:6, 10).

• Bʼalo ax in kubʼ tnaʼna ik tzeʼn te Job, jun xjal in tzaj qʼamaʼn toj Tyol Dios. Maske attoq nimxix qʼuqbʼil tkʼuʼj, tzaj nimxix tbʼis ex tqʼama jlu: «Mlay tzikʼx mastl wuʼne. Mi wajtle tuʼn wanqʼine» (Job 7:16).

Kykyaqil qe xjal lu kubʼ kychʼexpuʼn kyximbʼetz. Ax ikx qe, jaku ten qipumal tuʼn tchʼexpaj qximbʼetz qa ma tzʼel qkanoʼn techel kubʼ kyqʼoʼn.