Taj Dios tuʼn t-xqʼuqin tiʼja
IN CHE kanet tbʼanel consej quʼn toj Biblia tuʼnju atz tzajni tukʼil Dios. Ax tok, nya jun libro te qʼanbʼil Biblia, pero in tzaj tqʼamaʼn tiʼ jaku bʼant quʼn qa in tzaj bʼaj qkʼuʼj, qa ma qo naqʼet tuʼn qximen tiʼj nya bʼaʼn, qa in kubʼ qnaʼn bʼis ex qa at jun yabʼil tiʼj qximlal moqa tiʼj qximbʼetz.
Ax ikx in tzaj t-xnaqʼtzaʼn Biblia qa mas in nel tnikʼ Jehová, aju Bʼinchal qe, tiʼ in kubʼ qnaʼn ex tiʼ in kubʼ qximen. a Taj tuʼn t-xqʼuqin qiʼj ex tuʼn tten qtxlaj kyoj ambʼil kwest. Jun techel, ximana kyiʼj kabʼe texto ateʼ tzalu. Tzul qʼuqbʼaʼn tkʼuʼja kyuʼn.
«Niqayin taʼ Qman tuʼn kyklet qe xjal ma tzʼok taʼw bʼis tiʼj kykʼuʼj ex mintiʼtl jatum tuʼn tok qeʼ kykʼuʼj» (SALMO 34:18).
«Aqine Dios aju Kymane, tzyuʼn qeye wuʼne ex o nmaye kyeye kyjaʼ: Miʼn che xobʼe, chin onile kyiʼje» (ISAÍAS 41:13).
Qa ikju, ¿tzeʼn in nonin Jehová qiʼj qa at jun yabʼil tiʼj qximbʼetz? Kyoj xnaqʼtzbʼil che ul, kʼelel tnikʼa tiʼj qa ax tok taj Jehová tuʼn t-xqʼuqin qiʼj ex in tzaj tqʼoʼn nim onbʼil qe.
a Jehová tbʼi Dios (Salmo 83:18, TNM).
