Qa at jun yabʼil tiʼj t-ximbʼetz jun qamiw, at maj mintiʼ in nel qnikʼ tiʼj tiʼ jaku bʼant quʼn. Pero jaku kubʼ qyekʼin qkʼujlabʼil tiʼj aj tbʼant junjun tiʼchaq quʼn tuʼn qonin tiʼj.

«Kykyaqile bʼaʼn tuʼn t-xi kybʼiʼn naje ju yol» (SANTIAGO 1:19).

Jaku tzʼonina tiʼj tamiwa qa ma tzʼok tbʼiʼna aj tyolin. Miʼn kubʼ t-ximana qa il tiʼj tuʼn t-xi tqʼoʼna jun tzaqʼwebʼil tiʼj tkyaqilju ktzajel tqʼamaʼn. Mas nim toklen tuʼn tel tnikʼ tamiwa tiʼj qa in nok tqʼoʼn twiʼya tiʼj tyol ex qa in ximana tiʼj. Tzʼok tilil tuʼna tuʼn tel tnikʼa tiʼj, miʼn kubʼ t-ximana ex miʼn yolina nya bʼaʼn tiʼj. Bʼaʼn tuʼn ttzaj tnaʼna qa at maj ktzajel tqʼamaʼn tamiwa junjun tiʼchaq nya toj tumel ex yajxitl jakulo kubʼ tnaʼn nya bʼaʼn tiʼjju otoq tqʼama (Job 6:2, 3).

«Tuʼn t-xi kyqʼuqbʼaʼne kykʼuʼj qeju chʼin kykʼuʼj» (1 TESALONICENSES 5:14).

Bʼalo in tzaj bʼajxix tkʼuʼj tamiwa moqa in nok tilil tuʼn tuʼn miʼn tkubʼ tnaʼn qa mintiʼ tajbʼen. Tuʼntzunju, yekʼinxa te qa in ximana tiʼj. Iktzun tten, jaku txi tqʼuqbʼaʼna tkʼuʼj tamiwa ex jaku tzʼonina tiʼj maske mintiʼ in nelxix tnikʼa tiʼjju jaku txi tqʼamaʼna te.

«Aju tamiw jun xjal kukx in ten tkʼujlalil tiʼj» (PROVERBIOS 17:17).

Qʼamanxa qa jaku tzʼonina. Mas bʼaʼn tuʼn t-xi tqanina te tamiwa tzeʼn jaku tzʼonina tiʼj ex miʼn kubʼ t-ximana qa ya ojtzqiʼn tuʼna alkye  onbʼil taj. Bʼalo mintiʼ ojtzqiʼn tuʼn tamiwa alkye tten jaku txi tqanin onbʼil. Qa a jlu in bʼaj tiʼj, jaku txi tqʼamaʼna te tuʼn tbʼant junjun tiʼchaq kyuʼne, ik tzeʼn tuʼn kyxiʼye bʼetel. Ax ikx, jaku txi tqʼamaʼna te qa jaku txiʼya loqʼel tukʼil, qa jaku tzʼonina tiʼj limpieza moqa junjuntl tiʼchaq (Gálatas 6:2).

«Tenx kypasense» (1 TESALONICENSES 5:14).

Bʼalo nya taj tamiwa tuʼn tyolin tkyaqil maj. Pero naʼnxa te qa jaku tzʼok tbʼiʼna qa taj tuʼn tyolin jun rat. Tuʼnju yabʼil tok tiʼj tamiwa, atlo maj jaku tzaj tqʼamaʼn moqa jaku txi tbʼinchaʼn jun tiʼ nya bʼaʼn kʼelel toj twitza moqa jaku tzaj tqʼamaʼn qa mlay txi kybʼinchaʼne junjun tiʼchaq moqa ktzajel tqʼoj. Tuʼntzunju, aj tonina tiʼj tamiwa qʼonka tilil tuʼn tel tnikʼa tiʼj ex tuʼn tten tpasensa (Proverbios 18:24).

«In nok tilil wuʼne tuʼn woke te jun tbʼanel amiw. Ax tok, mlay txi nbʼinchaʼne tiʼj tkyaqilju in nikʼ tiʼj wamiwe, pero qa taj yolin, in nok nbʼine. At maj oʼkx tuʼn jlu, jaku kubʼ tnaʼn bʼaʼn» (Chi Farrah, a aju at jun tamiw at trastorno alimenticio tiʼj, ansiedad ex depresión clínica).

«At jun wamiwe at tbʼanel t-ximbʼetz ex kʼujlaʼn qine tuʼn. Jun qʼij, in xi txkoʼne tja ex bʼaj tbʼinchaʼn jun tbʼanelxix nwaye. Tuʼnju kubʼ nnaʼne bʼaʼn, xi nqʼamaʼne tkyaqil aju tkuʼx toj wanmiye te. ¡Tzaj tqʼuqbʼaʼnxix nkʼuʼje!» (Chi Ha-eun, aju at depresión clínica tiʼj).

«Nimxix toklen tuʼn tten qpasens. Aj tkubʼ tbʼinchaʼn nxuʼjile jun tiʼ nya bʼaʼn in nela toj nwitze, in nok tilil wuʼne tuʼn ttzaj nnane qa bʼant aju tuʼn tuʼnju yabʼil tok tiʼj. In nonin jlu wiʼje tuʼn miʼn ttzaj nqʼoje ex tuʼn kukx tkubʼ nyekʼine nkʼujlabʼile tiʼj» (Chi Jacob, aju at depresión clínica tiʼj t-xuʼjil).

«O tzaj tqʼoʼn nxuʼjile onbʼil atxix tajbʼen weye ex qʼuqbʼil nkʼuʼje. Aj tkubʼ nnaʼne nya bʼaʼn tuʼn ansiedad, mintiʼ in nok t-obligarin qine tuʼn tkubʼ nbʼinchaʼne jun tiʼ nya waje tuʼn tbʼant wuʼne. Bʼekʼbʼil twitz nxuʼjile tuʼnju at maj mintiʼ in xi tbʼinchaʼn qe tiʼchaq taj tuʼn tbʼant tuʼn. In nok nqʼoʼne toklen nxuʼjile tuʼnju bʼaʼn bʼinchaʼn xtalbʼil ex in kubʼ tbʼinchaʼn junjun tiʼchaq tuʼn tonin wiʼje» (Chi Enrico, aju at trastorno de ansiedad tiʼj).