¡JUN TBʼANELXIX QʼUQBʼIL QKʼUʼJ! O tzaj ttziyen Dios qa qo anqʼil te jumajx ax tzalu twitz Txʼotxʼ. Noqtzun tuʼnj, ateʼ nim xjal kwest tuʼn t-xi kynimen jlu. In kubʼ kyximen qa qkyaqilx qo kymel ex qa il tiʼj tuʼn tbʼaj jlu qiʼj. Atzun junjuntl in kubʼ kyximen qa jaku qo anqʼin te jumajx, pero oʼkx qa ma qo qkyim ex tuʼn qxiʼ toj kyaʼj. ¿Tiʼ teya t-ximbʼetz tiʼj?

Miʼn tzaj ttzaqʼweʼna. Tnejel xnaqʼtzankuya tzaqʼwebʼil in tzaj tqʼoʼn Tyol Dios kyiʼj xjel lu: ¿Jteʼ ambʼil tuʼn qanqʼin? ¿Alkye t-ximbʼetz Dios at tej tkubʼ tbʼinchaʼn Txʼotxʼ ex qe xjal? ¿Tiquʼn in qo kyim?

Aj tok qmojbʼan qibʼ kyukʼil junjuntl tbʼinchbʼen Dios at twitz Txʼotxʼ, in nel qnikʼ tiʼj qa junxitl qe xjal kywitz jlu. ¿Tiquʼn? In tzaj tqʼamaʼn Xjan Uʼj qa oʼkx qe xjal o che kubʼ bʼinchaʼn ik tzeʼn tilbʼilal Dios ex ik tzeʼn keʼyin (Génesis 1:26, 27). ¿Tiʼ t-xilen jlu? Qa o qo kubʼ tbʼinchaʼn Dios tuʼn kyten qmod ik tzeʼnx te tmod, ik tzeʼn tuʼn kyok qkʼujlaʼn txqantl ex tuʼn tten qximbʼetz tiʼjju tzʼaqli ik tzeʼn te.

Ax ikx, o qo kubʼ tbʼinchaʼn Dios tuʼn tbʼant qximen ex tuʼn tel qnikʼ tiʼjju bʼaʼn ex tiʼjju nya bʼaʼn, ex tuʼn tten qajbʼil tuʼn tok qojtzqiʼn ex tuʼn qok te tamiw. Tuʼntzunju, jaku qo tzalaj aj tok qqʼoʼn qwitz kyiʼj kykyaqil tbʼinchbʼen Dios, ik tzeʼn tiʼj arte, kyiʼj bʼitz ex tiʼj poema. Junxitl qoʼ kywitz txqantl tuʼnju jaku qo kʼulin teju Bʼinchal qe. Tuʼn tkyaqil jlu junxitl qe xjal kywitz txqantl tbʼinchbʼen Dios.

Ximana tiʼj jlu: noqwit kubʼ t-ximen Dios tuʼn kyanqʼin xjal noq chʼin ambʼil, ¿tiquʼntzun o qo kubʼ tbʼinchaʼn kyukʼil qmod lu ex tuʼn kukx tkubʼ qyekʼin? Tuʼnju taj tuʼn qtzalaj tiʼj qchwinqlal te jumajx tzalu twitz Txʼotxʼ.

In tzaj kyqʼamaʼn junjun xjal qa mintiʼx kubʼ t-ximen Dios tuʼn kyanqʼin xjal te jumajx twitz Txʼotxʼ. In kyqʼamaʼn qa in najbʼen Txʼotxʼ tuʼn kyten xjal jun rat jatumel in che ok toj malbʼil, tuʼntzun tel nikʼbʼaj tiʼj alkyeqe jaku cheʼx anqʼil te jumajx tukʼil Dios toj kyaʼj. Pero noqwit ax tok jlu, ¿jakupe txi qqʼamaʼn qa a Dios at tpaj tiʼj tkyaqil nya bʼaʼn at twitz Txʼotxʼ jaʼlo? Mintiʼ toklen jlu tukʼilju tzeʼnxix te Dios. In tzaj tqʼamaʼn Xjan Uʼj jlu tiʼj: «Tzʼaqlxix qe tbʼinchbʼen, tuj tumelxix tkyaqilju in tbʼinchaʼn. Ate Dios axix tok tyol, mintiʼ jun mya bʼaʼn in tbʼinchaʼn; tzʼaqlxix te ex jiqun tiʼj tmod» (Deuteronomio 32:4).

 In tzaj tqʼamaʼn Xjan Uʼj tiquʼn kubʼ tbʼinchaʼn Dios Txʼotxʼ: «Te te Qman aju kyaʼj, atzunju txʼotxʼ xi qʼoʼn kye xjal tuʼn Qman» (Salmo 115:16). Ikju, kubʼ tbʼinchaʼn Dios aju tbʼanel qnajbʼil tuʼntzun qanqʼin twitz te jumajx ex kubʼ tbʼinchaʼn tukʼil tkyaqilju at tajbʼen qe tuʼntzun qtzalaj tiʼj qchwinqlal te jumajx ex tuʼn tten ttxolil qanqʼibʼil (Génesis 2:8, 9).

«Te te Qman aju kyaʼj, atzunju txʼotxʼ xi qʼoʼn kye xjal tuʼn Qman» (Salmo 115:16).

Ax ikx in tzaj qʼamaʼn toj Xjan Uʼj tiquʼn kubʼ tbʼinchaʼn Dios qe xjal. Xi tqʼamaʼn tuʼn tbʼant jlu tuʼn tnejel mejebʼleʼn: «Kynojsame twitz txʼotxʼ ex che kawine tibʼaj. Kbʼel ten kykawbʼile kyibʼaj kyiẍ tuj mar, kyibʼaj chyuʼj ex txqantl jil in che lipan twitz kyaʼj, ex kyibʼaj kykyaqil txkup ateʼ twitz txʼotxʼ» (Génesis 1:28). ¡Jun tbʼanelxix oklenj: tuʼn kyxqʼuqin tiʼj Txʼotxʼ ex tuʼn tok te jun tbʼanel najbʼil kyuʼn! Ojtzqiʼn tuʼn Adán ex Eva qa tuʼn kyanqʼin kyukʼil kyyajil te jumajx tzalu twitz Txʼotxʼ, ex nya toj kyaʼj.

In tzaj tchikʼbʼaʼn Tyol Dios qa jun kyxol anjel kubʼ tbʼinchaʼn Dios, aju yajxitl ok tbʼi te Satanás, el tpan tibʼ tiʼj Dios ex ok tilil tuʼn tuʼn tok tbʼinchaʼn nya bʼaʼn tiʼj t-ximbʼetz Dios attoq tnejel. ¿Tzeʼn bʼant tuʼn?

Kubʼ kykʼuʼj tnejel qman, Adán ex Eva, tuʼn Satanás tuʼntzun kyonin tiʼj tej tel tpan tibʼ tiʼj Dios. Xi tqʼamaʼn kye qa mintiʼ xi tqʼoʼn Dios ambʼil tuʼn tbʼant jun tiʼ kyuʼn, aju qa kyuʼnx tuʼn tkubʼ kyximen alkyeju bʼaʼn ex alkyeju nya bʼaʼn. Kubʼ kyximen tuʼn kyok lepeʼ tiʼj Satanás ex nya tuʼn kynimen te Dios. ¿Tiʼ tzaj tuʼn jlu? Tej tbʼet ambʼil, ik tzeʼnx otoq txi tqʼamaʼn Dios kye, e kyim. Xi kynajsaʼn aju ambʼil tzaj qʼoʼn kye tuʼn kyanqʼin te jumajx toj Tbʼanel Najbʼil twitz Txʼotxʼ (Génesis 2:17; 3:1-6; 5:5).

Kukx o tzaj nya bʼaʼn kyiʼj xjal atxix tej tel tpan tibʼ Adán ex Eva tiʼj Dios. In tzaj tqʼamaʼn Xjan Uʼj jlu: «Noq tuʼn jun xinaq [Adán] okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il» (Romanos 5:12). In qo kyim tuʼnju qkyaqilx o tzʼel qiqen il ex kamik, nya tuʼnju iktoq t-ximbʼetz Dios qiʼj.

Mintiʼ chʼexpaj t-ximbʼetz Dios tiʼj Txʼotxʼ ex kyiʼj xjal tuʼnju bʼaj toj Edén. Tuʼnju at tkʼujlabʼil ex tzʼaqli, onin jlu tiʼj tuʼn tbʼant jun tiʼ tuʼn tuʼntzun qetz tkloʼn tjaqʼ il ex kamik. Tzaj tchikʼbʼaʼn apóstol Pablo jlu: «Aju chojbʼil qe in tzaj tqʼoʼn il, atzun tuʼn qkyim; atzunju oyaj in tzaj tqʼoʼn Dios qe, tuʼn tten qchwinqlal te jumajx tuʼn qmojbʼabʼl qibʼ tukʼil Jesucrist aju Qajaw» (Romanos 6:23). Tuʼnju kʼujlaʼn qoʼ tuʼn Dios, tzaj tqʼoʼn ‹oʼkxku jun Tkʼwaʼl [Jesucristo], tuʼntzun miʼn kynaj kykyaqil qeju ma che okslan tiʼj, noq oʼkx tuʼn tten kychwinqlal te jumajx› (Juan 3:16). Tuʼnju xi tqʼoʼn Jesús tchwinqlal, chjet tkyaqilju xi tnajsaʼn Adán. *

Toj chʼintl ambʼil, kjapunel twi t-ximbʼetz Dios tuʼn tok Txʼotxʼ te jun tbʼanel najbʼil. Tuʼn ttzalaja tiʼj ambʼil lu, bʼaʼn tuʼn t-xi tbʼiʼna nabʼil tqʼama Jesús: «Kyokxe ttzi pwert chʼin; porke aju ttzi pwert maʼ ex ju bʼe maʼ tuj, atzunju in pon tuj najen, ex nimku xjal in cheʼx tuj. Atzunju ttzi ja chʼin ex ju bʼe chʼin tuj, atzunju in pon tuj chwinqlal, ex nikʼxi junjun xjal in knet ttzi ja chʼin kyuʼn, ex ju bʼe chʼin tuj» (Mateo 7:13, 14). Ikju, toj tqʼabʼa taʼ tchwinqlala. ¿Tiʼ kbʼantel tuʼna?