QA O kyim jun xjal kʼujlaʼnxix tuʼna, kubʼlo tnaʼna nim bʼis, kubʼ t-ximana qa tjunalxa at ex qa mintiʼ tipuna moqa tjwersa. Axpe ikx tzajlo tqʼoja, kubʼlo tnaʼna qa aya at tpaj, tzaj xobʼa ex kubʼlo t-xjelina qa atpe jun tiquʼn tuʼn kukx tanqʼina.

Miʼn kubʼ t-ximana qa mintiʼ tipumala tuʼnju in noqʼa tiʼjju xjal otoq kyim, sino jun yekʼbʼil jlu tiʼj qa nim toklen xjal te teya. Noqtzun tuʼnj, ¿jakupe tzʼel bʼis qiʼj?

Bʼalo jaku che onin tqanil lu tiʼja, maske in kubʼ tnaʼna qa mi jun xjal jaku tzʼel qʼinte tbʼisa.

XI KYQʼOʼN AMBʼIL TUʼN KYOQʼ

Nya ax ambʼil in xi tiʼn tuʼn tel kybʼis xjal aj tkyim jun tok kyja ex nya ax kʼixkʼoj in kubʼ kynaʼn. Noqtzun tuʼnj, qa ma tzʼoqa, jaku tzʼonin tiʼja. In tzaj tqʼamaʼn Vanessa jlu, aju ma qo yolin tiʼj: «Oʼkx bʼant tuʼn woqʼe. Wajtoqe tuʼn tel bʼis wiʼje». In tzaj tqʼamaʼn Sofía jlu, aju noq minabʼen kyim terman: «Kwest kubʼ tiʼj nximbʼetze wuʼne ex aju kubʼ nnaʼne. Ik tten jlu ik tzeʼn aj tkubʼ jaqet jun iẍil tuʼn tbʼaj txʼjoʼn. Kwest tuʼn tikʼx kʼixkʼoj quʼn, pero il tiʼj tuʼntzun tbʼanix iẍil».

XI KYQʼAMAʼN AJU KUBʼ KYXIMEN EX AJU KUBʼ KYNAʼN

Atlo maj nya taja tuʼn ttena kyukʼil txqantl, noqtzun tuʼnj, kwest tuʼn tikʼx bʼis tuʼna tjunalxa. In tzaj  tnaʼn Jared jlu, jun kuʼxun te 17 abʼqʼi aju kyim ttat: «Bʼalo mintiʼtoq ttxolil aju xi nqʼamaʼne, pero nim onin wiʼje tuʼnju in yoline kyukʼil txqantl tiʼjju kubʼ nnaʼne». In tzaj tqʼamaʼn Janice, aju ma qo yolin tiʼj toj tnejel xnaqʼtzbʼil, juntl tbʼanel jaku tzaj aj tbʼant jlu quʼn: «Tzaj qʼuqbʼaʼnxix nkʼuʼje tej nyoline tukʼil jun xjal. Kubʼ nnaʼne qa nya njunalxe atine ex el tnikʼ tiʼjju bʼaj wiʼje».

XI KYKʼAMOʼN ONBʼIL

In tzaj tqʼamaʼn jun Doctora jlu: «Qa tzma in kyim toj tja jun xjal ex in xi tqʼoʼn ambʼil tuʼn kyonin toj tja ex tamiw tiʼj, kʼonil tuʼn tikʼx bʼis tuʼn yajxitl». Qʼamanxa kye tamiwa tiʼ jaku bʼant kyuʼn tuʼn kyonin tiʼja. Bʼalo kyaj tuʼn kyonin, noqtzun tuʼnj, mintiʼ ojtzqiʼn kyuʼn alkye tten jaku bʼant (Proverbios 17:17).

E OK LAQʼEʼ TTXLAJ DIOS

In tzaj tqʼamaʼn Tina jlu: «Tej tkyim naj nchmile tuʼn cáncer, kyim aju xjal qʼuqli nkʼuʼje tiʼj ex xi nqʼamaʼne te Dios tkyaqilju kubʼ nnaʼne. Aj tel nwatle xi nqanine tuʼn ttzaj tqʼoʼn wipumale ajxi tex bʼaj qʼij. Toj nimku tten onin Dios wiʼje...». In tzaj tnaʼn Tarsha jlu, aju qʼiʼntoq 22 abʼqʼi tuʼn tej tkyim tnan: «Nim tzaj qʼuqbʼaʼn nkʼuʼje tej tjaw wuʼjine Tyol Dios tkyaqil qʼij. Onin wiʼje tuʼn nximane kyiʼj tbʼanel tiʼchaq».

E XIMEN TIʼJ AMBʼIL AJ KYJAW ANQʼIN KYIMNI

In tzaj tqʼamaʼn Tina jlu: «Tnejel, mintiʼ tzaj qʼuqbʼaʼn nkʼuʼje tej tok nbʼiʼne qa che jawil anqʼin kyimni. Wajtoqe tuʼn tten nchmile toj ambʼil aju ex kyajtoq wale tuʼn kyten tukʼil kytat. Atzun jaʼlo ma tzikʼ kyaje abʼqʼi tkyimlen nchmile, qʼuqlixix nkʼuʼje qa che jawil anqʼin kyimni. A jlu in nonin wiʼje tuʼn tikʼx bʼis wuʼne. Nim in chin tzalaje aj nximane tiʼj ambʼil aj tok nkeʼyine nchmile juntl maj».

Ax tok, mlaylo tzʼel naj bʼis tiʼja, noqtzun tuʼnj, bʼalo jaku tzaj qʼuqbʼaʼn tkʼuʼja kyuʼn tyol Vanessa. In tzaj tqʼamaʼn jlu: «In kubʼ t-ximana qa mlay tzʼexa twitz, pero chebʼe chebʼe in nel bʼis tiʼja».

Naʼntza jlu: maske kukx in ximana tiʼjju xjal o kyim, pero at nim tiquʼn tuʼn kukx tanqʼina. Noq tuʼn tonbʼil Dios, kukx jaku tzalaja tuʼn ttena kyukʼil tamiwa ex tiʼjju qʼuqbʼil tkʼuʼja at. Toj chʼintl ambʼil, ok che jawil anqʼin kyimni tuʼn Dios. Taj Dios tuʼn ttzaj tchleʼna qe xjal kʼujlaʼnxix qe tuʼna ex tuʼn tel tiʼn kʼixkʼoj te jumajx aju in kubʼ tnaʼna jaʼlo.