¿OPE tzaj bʼaj tkʼuʼja jun maj ex kubʼ t-ximana tuʼn tkubʼ tbʼyon tibʼa? Qa ikju, in nel-lo tnikʼa tiʼjju bʼaj tiʼj Adriana. Tzaj bʼajxix tkʼuʼj ex tzajxix tbʼis. Yajxitl tzaj qʼamaʼn te tuʼn aj qʼanil qa at depresión tiʼj.

Qo ximen tiʼjju bʼaj tiʼj jun xinaq, moqa ichan Kaoru tbʼi te tnam Japón, aju xqʼuqin kyiʼj tman otoq che tijen ex tzaj yabʼil kyiʼj. In tzaj tqʼamaʼn jlu: «Toj ambʼil aju, kubʼ nnaʼne nim siktleʼn toj aqʼuntl. Tej tikʼ ambʼil, kyaj wabʼj wuʼne ex mintiʼtl okx watl toj nwitze. Wajtoqe tuʼn nkyime tuʼntzun tel kʼixkʼoj wiʼje».

In tzaj tqʼamaʼn Ojebode jlu te tnam Nigeria: «Kukxtoq in chin bʼisune, ex noq tuʼn alkyexku tiʼ in chin jaw oqʼe. Kubʼ nximane tuʼn tkubʼ nbʼyon wibʼe». Mintiʼ kubʼ tbʼyon tibʼ Ojebode, Kaoru ex Adriana, noqtzun tuʼnj, bʼisbʼajilxix tuʼnju chʼixme 800 mil xjal in kubʼ kybʼyon kyibʼ tkyaqil abʼqʼi.

Kyxol qeju xjal in kubʼ kybʼyon kyibʼ, chʼixme kykyaqil xinaq qe, ex in bʼaj jlu tuʼnju in tzaj kychʼixwi tuʼn t-xi kyqanin onbʼil. Tqʼama Jesús qa il tiʼj tuʼn kyxiʼ xjal yabʼ tukʼil jun aj qʼanil (Lucas 5:31). Tuʼntzunju, qa in tnaʼna ikju, miʼn tzaj chʼixwiya tuʼn tjyona onbʼil. O che qʼanit junjun xjal tzaj depresión kyiʼj tuʼnju i eʼx kyukʼil aj qʼanil. Onin tiʼj Ojebode, Kaoru ex Adriana tej kyxiʼ tukʼil jun aj qʼanil ex jaʼlo mas bʼaʼn ateʼ.

Tuʼn tel depresión tiʼj jun xjal, ateʼ junjun aj qʼanil in xi kyqʼamaʼn kye xjal tuʼn t-xi kykʼaʼn qʼanbʼil, tuʼn kyxiʼ tukʼil jun psicólogo moqa tuʼn tbʼant kykabʼil tuʼn. Ax ikx nim toklen tuʼn t-xi qʼet onbʼil kye xjal yabʼ ateʼ, tuʼn tel kynikʼ txqantl kyiʼj ex tuʼn tten kypasens toj kyja ex qe kyamiw kyiʼj. A Jehová aju mas tbʼanel qamiw ex in tzaj tqʼoʼn Xjan Uʼj tuʼn tonin qiʼj.

Aʼyeju xjal at depresión kyiʼj, chʼixme tkyaqil maj il tiʼj tuʼn kyok qʼanit toj nimku ambʼil ex il tiʼj tuʼn tbʼant chʼixpubʼil kyuʼn tuʼntzun kukx tikʼx yabʼil kyuʼn. Qa at depresión tiʼja, bʼaʼn tuʼn tok qeʼ tkʼuʼja tiʼj qa ktel jun tbʼanel tanqʼibʼila toj ambʼil tzul. In tzaj tqʼamaʼn Ojebode jlu: «Waje tuʼn tjapun kywiʼ yol tkuʼx toj Isaías 33:24, aju in yolin tiʼj qa kpol jun qʼij jatumel mi jun xjal tzul tqʼamaʼn: ‹Yabʼ qine, chiwt›». Ax ikx teya jaku tzʼok qʼuqbʼaʼn tkʼuʼja aj tel tnikʼa tiʼj qa o tzaj ttziyen Dios jun «akʼaj txʼotxʼ» jatumel «mintiʼtl kʼixkʼoj» aju in tzaj tiʼja jaʼlo (Apocalipsis [Revelación] 21:1, 4). Te jumajx knajel kʼixkʼoj in tzaj tiʼja jaʼlo. Ya miʼn kubʼ tnaʼna nya bʼaʼn nix ktzajel tnaʼna (Isaías 65:17).