In kubʼ kyxjelin junjun xjal qa o kubʼ chʼexpuʼn tqanil tkuʼx toj Tyol Dios. Kyaj tqʼamaʼn profeta Isaías qa aju «tyol Qman Dios kukx ktel te jumajx» (Isaías 40:8). ¿Tzeʼn jaku tzʼok qeʼ qkʼuʼj tiʼj qa mintiʼ o bʼaj chʼexpuʼn tqanil kyiʼj ttziybʼil Dios?

At tipumal Dios tuʼn kukx tten Tyol ex tuʼn miʼn tbʼaj chʼexpuʼn. Toj ambʼil ojtxe, tej ttzaj kycopiarin xjal Tyol Dios tukʼil kyqʼabʼ, kubʼ kyajlaʼn qe letra tuʼntzun tel kynikʼ tiʼj qa mintiʼ otoq tzʼel kyiʼn moqa otoq tzʼok kyqʼoʼn junjuntl letra tiʼj. Tuʼnju aj il qe xjal tzaj copiarin te, at maj chʼexpaj junjun yol kyuʼn pero mintiʼ chʼexpaj aju t-xilen.

At nim copia kyiʼj ojtxe uʼj tiʼj Tyol Dios. Qa junxitl jun copia, jaku tzʼok mojbʼet kyukʼil txqantl tuʼntzun tel nikʼbʼaj tiʼj qa i el tzpet xjal e tzaj copiarin te. Tuʼn tel tnikʼa tiʼj mas tqanil, jaku tzʼokxa toj jw.org ex uʼjinktza xnaqʼtzbʼil «¿Se ha cambiado o manipulado la Biblia?».

Jun techel, qo ximen kyiʼj uʼj tok kybʼi Rollos del mar Muerto, aʼyeju e kanet toj abʼqʼi 1947 kyoj junjun jul nqayin tiʼj mar Muerto. Ex e kanet uʼj lu kyuʼn xjal árabe in che bʼet toj tzqij txʼotxʼ. At junjun plaj Tyol Dios tkuʼx kyoj ojtxe uʼj e kanet ex ma tzikʼ mas te kabʼe mil abʼqʼi kykubʼlen tzʼibʼin. Ok kymojbʼaʼn xjal at kyojtzqibʼil qe rollo tukʼil Tyol Dios at jaʼlo. ¿Tiʼtzun el kynikʼ tiʼj?

Qa tzʼaqli tqanil tkuʼx toj Tyol Dios at jaʼlo ik tzeʼn tkuʼx kyoj ojtxe uʼj, tuʼntzunju jaku tzʼok qeʼ qkʼuʼj tiʼj qa t-ximbʼetz Dios tkuʼx toj. * O tzʼok tilil tuʼn Dios tuʼn miʼn tkubʼ chʼexpuʼn tqanil tkuʼx toj Tyol.

Jaku tzʼok qeʼ qkʼuʼj tiʼj qa tzʼaqli tqanil in jaw quʼjin toj Tyol Dios. Atzun jaʼlo, qo xnaqʼtzan tiʼ in tzaj kyqʼamaʼn profeta tiʼj Dios.