¿Tiʼ in tzaj kyqʼamaʼn profeta tiʼj Dios?
Ma tzikʼ nim ambʼil tej kyajbʼen profeta tuʼn Dios tuʼn ttzaj tqʼoʼn tqanil nim toklen kye xjal. ¿In tzajpe kyqʼamaʼn tqanil tiʼ kbʼantel quʼn tuʼn qtzaj tkʼiwlaʼn Dios? Ikju. Qo xnaqʼtzan tiʼj tiʼ kyqʼama oxe profeta.
AJU PROFETA ABRAHÁN (IBRAHIM)
Mintiʼ in nok tqʼoʼn Dios twitz tiʼj kyyajil xjal ex taj tuʼn ttzaj tkʼiwlaʼn kykyaqilx.
Xi ttziyen Dios jlu te profeta Abrahán: «Tiʼja che kyʼiwlanjtzel kykyaqil xjal twitz txʼotxʼ» (Génesis 12:3).
¿Tiʼ xnaqʼtzbʼil in nel qiʼn tiʼj? Qa kʼujlaʼn qoʼ tuʼn Dios ex taj tuʼn ttzaj tkʼiwlaʼn kykyaqil xjal in che bʼin te, ik tzeʼn qe xinaq moqa ichan, qe xuʼj moqa qya ex qe kʼwal.
AJU PROFETA MOISÉS (MUSA)
In tzaj qʼaqʼin tkʼuʼj Dios ex in che tzaj tkʼiwlaʼn qeju in nok tilil kyuʼn tuʼn tel kynikʼ tiʼj.
Xi tqʼoʼn Dios tipumal Moisés tuʼn kybʼant milagr tuʼn. Maske ikju, xi tqanin Moisés jlu te Dios: «In chin kubʼsane twitza tuʼn ttzaj tyekʼuna tbʼeya weye, tuʼntzun tel nnikʼe tiʼja ex tuʼn tknet t-xtalbʼila wuʼne» (Éxodo 33:13). Tbʼanel ela toj twitz Dios aju xi tqanin Moisés te ex tzaj tkʼiwlaʼn tej ttzaj tqʼoʼn tnabʼil ex tej tonin tiʼj tuʼn tel tnikʼ tiʼj ex kyiʼj tmod. Jun techel, el tnikʼ Moisés tiʼj qa in tzaj qʼaqʼin tkʼuʼj Dios kyiʼj xjal (Éxodo 34:6, 7).
¿Tiʼ xnaqʼtzbʼil in nel qiʼn tiʼj? Taj Dios tuʼn qtzaj tkʼiwlaʼn qkyaqilx, qe xinaq, qe xuʼj ex qe kʼwal qa ma tzʼok tilil quʼn tuʼn tok qojtzqiʼn. In tzaj qʼamaʼn toj Xjan Uʼj tzeʼn tuʼn qkʼulin te, ax ikx in tzaj tqʼamaʼn qa taj tuʼn qtzaj tkʼiwlaʼn.
AJU PROFETA JESÚS (ISA)
Tzaj qʼaqʼin tkʼuʼj Jesús kyiʼj xjal ex kubʼ tqʼanin alkyexku yabʼil tok kyiʼj.
Qo tzajel tkʼiwlaʼn Dios te jumajx qa ma kubʼ qbʼinchaʼn aju bʼant tuʼn Jesús ex aju kyaj t-xnaqʼtzaʼn.
In yolin Tyol Dios tiʼj tanqʼibʼil Jesús ex tiʼj xnaqʼtzbʼil xi tqʼoʼn kye xjal. Xi tqʼoʼn Dios tipumal Jesús tuʼn kybʼant milagr tuʼn, ik tzeʼn tuʼn tjaqet kywitz moẍ, tuʼn tbʼant kybʼin qeju tẍkyin kywiʼ ex tuʼn tbʼant kybʼet kox. Axpe ikx e jaw anqʼin junjun xjal tuʼn. Iktzun tten kubʼ tyekʼin aju kbʼantel tuʼn Dios qiʼj toj ambʼil tzul. Kyaj tqʼamaʼn Jesús tiʼ il tiʼj tuʼn tbʼant quʼn tuʼntzun qtzalaj kyiʼj kʼiwlabʼil: «Atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).
Tzaj qʼaqʼin tkʼuʼj Jesús kyiʼj xjal ex kubʼ tyekʼin tkʼujlabʼil kyiʼj. Xi kykʼamoʼn xjal txokbʼil xi tqʼoʼn kye, ik tzeʼn qe xinaq ex qe xuʼj, ex junxichaq kyabʼqʼi: «Kyxnaqʼtzam kyibʼe wiʼje, porke mans qine ex mans wanmiye; oktzun knetel jun ojlabʼl kyuʼne te kyanmiye» (Mateo 11:29). Junxitl tmod Jesús kubʼ tyekʼin kywitz xjal tuʼnju ok tqʼoʼn kyoklen xuʼj ex kubʼ tyekʼin tkʼujlabʼil kyiʼj.
¿Tiʼ xnaqʼtzbʼil in nel qiʼn tiʼj? Qa ok tkʼujlaʼn Jesús qe xjal ex kyaj tqʼoʼn tbʼanel techel qwitz tiʼj alkye qmod tuʼn tten kyukʼil txqantl.
NYA DIOS TE JESÚS
In tzaj tqʼamaʼn Xjan Uʼj qa «noq junx Qdios at» ex in tzaj tqʼamaʼn qa tzaj tsamaʼn Jesús (1 Corintios 8:6). Tqʼama Jesús qa mas nim toklen Dios twitz ex qa a tzaj samante te tuʼn tul twitz Txʼotxʼ (Juan 11:41, 42; 14:28). *
^ taqik' 17 Qa taja tuʼn tel mas tnikʼa tiʼj Jesús, keʼyinka xnaqʼtzbʼil 4 toj uʼj Tbʼanel tqanil tzajni tukʼil Dios, aju at toj www.pr418.com/mam.
Bʼalo ax ikx tgana jlu
QE XJEL TIʼJ TYOL DIOS
¿Ape Jesús in nok te Dios at nimxix tipumal?
¿Tiʼ tqʼama Jesús tiʼjju toklen at ex tiʼj toklen Dios?
