In tzaj tkʼiwlaʼn Dios qeju bʼaʼn che nimen
Tqʼama profeta Moisés qa qo tzajel tkʼiwlaʼn Dios qa ma qo nimen te (Deuteronomio 10:13; 11:27). In qo nimen te Dios nya tuʼnju in qo xobʼ tuʼn tkubʼ tqʼoʼn qkastiw. In nok qkʼujlaʼn tuʼnju ateʼ tbʼanel tmod ex tuʼntzunju in qo nimen te, ex nya qaj tuʼn tkubʼ qbʼinchaʼn jun tiʼ jaku tzaj tbʼis tuʼn. «Qa kʼujlaʼn Dios quʼn, che japunel qe tmandamyent quʼn» (1 Juan 5:3).
Noqtzun tuʼnj, ¿tiʼ kʼiwlabʼil in tzaj qkʼamoʼn qa ma qo nimen te Dios? Qo xnaqʼtzan tiʼj kabʼe.
1. IN NOK QNABʼIL
«Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne» (ISAÍAS 48:17).
Ojtzqiʼn qoʼ tuʼn Jehová, aju Bʼinchal qe, ex in tzaj tyekʼin qbʼe. Qa qaj tuʼn kyonin nabʼil in tzaj tqʼoʼn qe tuʼn tjaw qjyoʼn aju mas tbʼanel, il tiʼj tuʼn qxnaqʼtzan tiʼj Xjan Uʼj tuʼntzun tel qnikʼ tiʼj tiʼ taj Dios tuʼn tbʼant quʼn ex tuʼn tkubʼ qbʼinchaʼn.
2. IN QO TZALAJ
«At tzalajbʼil kye qeju in xi kybʼiʼn tyol Dios ex in xi kyniman» (LUCAS 11:28).
Toj ambʼil jaʼlo, in che tzalaj nim millón xjal tuʼnju in xi kynimen aju in tzaj tqʼamaʼn Tyol Dios. Qo xnaqʼtzan tiʼj jun techel. At jun xjal te España jurattoq in tzaj tqʼoj ex in nok tbʼinchaʼn nya bʼaʼn kyiʼj txqantl, axpe ikx tiʼj t-xuʼjil. Jun qʼij, jaw tuʼjin aju kubʼ ttzʼibʼin profeta Moisés tiʼj tbʼanel tmod José, aju tkʼwal Jacob. Xi kʼayin José te majen ex okx qʼoʼn toj cárcel maske mintiʼtoq til. Maske ok bʼinchaʼn jlu tiʼj, kukx kubʼ tyekʼin tbʼanel tmod, ten tpasens ex qʼaqʼbʼil tkʼuʼj (Génesis, capítulo 37 a 45). Tqʼama xjal te España jlu: «Tej nximane tiʼjju bʼant tuʼn José, onin wiʼje tuʼn tten nkʼujlabʼile, tbʼanel nmode ex tuʼn njukʼunte wibʼe. Atzun jaʼlo, in chin tzalaje kyukʼil toj njaye».
In tzaj tqʼamaʼn Xjan Uʼj tzeʼn qmod tuʼn tten kyukʼil txqantl. Kʼelel qnikʼ tiʼj jlu toj juntl xnaqʼtzbʼil.
