¿Tzeʼn in kubʼ qyekʼin qkʼujlabʼil kyiʼj txqantl?
Qkyaqilx tzajni qoʼ tiʼj Adán, aju tnejel xinaq. A t-xilen jlu qa jun ja xjal qoʼ. Kykyaqilx qeju ateʼ toj jun ja xjal il tiʼj tuʼn tok kykʼujlan kyibʼ ex tuʼn tok kyqʼoʼn kyoklen, noqtzun tuʼnj, mintiʼxix in bʼant jlu kyuʼn xjal. Pero nya tgan Dios jlu.
¿TIʼ IN TZAJ TQʼAMAʼN TYOL DIOS TIʼJ KʼUJLABʼIL?
«Kykʼujlame qe kyukʼile ik tzaʼnx kyeye in kykʼujlan kyibʼe» (LEVÍTICO 19:18).
«Kykʼujlame qe aj qʼoj kyiʼje» (MATEO 5:44).
¿TZEʼN IN KUBʼ QYEKʼIN QA KʼUJLAʼN QE TXQANTL QUʼN?
In tzaj tchikʼbʼaʼn 1 Corintios 13:4-7 tzeʼnxix kʼujlabʼil.
«Aju xjal at tkʼujlalil at tpasens ex in tzʼeʼy tkʼuʼj tiʼj tukʼil».
Ximana tiʼj jlu: ¿Tiʼ in kubʼ tnaʼna qa in ten tpasens jun xjal tiʼja, in kubʼ tyekʼin tbʼanel tmod ex mintiʼ in tzaj tqʼoj tiʼja aj tel txalpaja?
«Aju xjal at tkʼujlalil mintiʼ in tzaj tloʼch tkʼuʼj tiʼj juntl».
Ximana tiʼj jlu: ¿Tiʼ in kubʼ tnaʼna qa mintiʼ in nok qeʼ tkʼuʼj jun xjal tiʼja moqa in tzaj loʼchj tiʼj tkʼuʼj tiʼja?
Aju xjal at tkʼujlabʼil «nya noq oʼkx tiʼjx tok tkʼuʼj».
Ximana tiʼj jlu: ¿Tiʼ in kubʼ tnaʼna qa in nok qʼoʼn toklen tyola tuʼn jun xjal ex nya aju te?
Aju xjal at tkʼujlabʼil «mintiʼ in xi tkʼuʼn qʼoj».
Ximana tiʼj jlu: In kubʼ tnajsaʼn Dios kyil xjal in najtz tiʼj kyanmi. «Mya kukx in qo ok tikʼleʼn, ex mintiʼ in ten tqʼoj te jumajx» (Salmos 103:9). In qo tzalaj tiʼj jun xjal aj tkubʼ tnajsaʼn qil, tuʼntzunju, ax ikx qe il tiʼj tuʼn tkubʼ qnajsaʼn kyil txqantl (Salmo 86:5).
Aju xjal at tkʼujlabʼil «mintiʼ in tzalaj tiʼj ju mya bʼaʼn in kybʼinchaʼn xjal».
Ximana tiʼj jlu: Nya qgan tuʼn kytzalaj txqantl aj ttzaj jun nya bʼaʼn qiʼj. Tuʼntzunju, mintiʼ tuʼn qjaw tzalaj aj ttzaj nya bʼaʼn kyiʼj txqantl, maske otoq tzʼok kybʼinchaʼn nya bʼaʼn qiʼj.
Qa qaj tuʼn qtzaj tkʼiwlaʼn Dios, il tiʼj tuʼn kyok qkʼujlaʼn txqantl noq alkyexku kyabʼqʼi, kytnam moqa kyokslabʼil. Aj qonin kyiʼj txqantl, atzun jun tten in kubʼ qyekʼin qkʼujlabʼil kyiʼj.