Qa nya tuʼn Dios in tzaj nya bʼaʼn, ¿tiʼtzun moqa alkye at tpaj? ¿Tiquʼn at nim xjal in che kyim tuʼn weʼyaj moqa in che anqʼin toj mebʼayil? ¿Tiquʼn at nim qʼoj, yabʼil ex xitbʼil in tzaj tuʼnx twitz txʼotxʼ? In tzaj tqʼamaʼn tyol Jehová, aju Xjan Uʼj, qa at oxe tiquʼn in tzaj yajbʼil kyiʼj xjal:

1. Oʼkx in che ximen xjal kyiʼjx ex in pon kykʼuʼj tiʼj nimku. «Aju tipumal xjal at tuʼn tbʼinchante mya bʼaʼn tiʼj juntl» (Eclesiastés 8:9). Chʼixme tkyaqil maj, in tzaj nya bʼaʼn kyiʼj xjal tuʼn kybʼinchbʼen txqantl aʼyeju oʼkx in che ximen kyiʼjx.

2. Noq minabʼen in tzaj nya bʼaʼn ex aju ambʼil. In tzaj tqʼamaʼn Tyol Dios qa in tzaj yajbʼil tuʼnju «noq minabʼen in tzaj mya bʼaʼn» kyiʼj xjal (Eclesiastés 9:12). Toj juntl yol, in che tzaj aksident qiʼj noq tuʼnju atoʼ toj jun ambʼil ex toj jun tembʼil nya bʼaʼn, moqa tuʼnju mintiʼ qnabʼil ex qa tuʼnju in kubʼ qbʼinchaʼn jun nya bʼaʼn.

3. Aju nya bʼaʼn aj kawil twitz Txʼotxʼ. In tzaj tyekʼin Xjan Uʼj tiquʼnxix in tzaj nya bʼaʼn qiʼj, in tzaj tqʼamaʼn jlu: «Kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). A Satanás aju «tajaw il», tnejel jun tbʼanel anjeltoq ex jun xewbʼaj mintiʼ qʼanchaʼl, pero «el tpaʼn tibʼ tiʼj ju yol axix tok» (Juan 8:44). Ok kymojbʼan kyibʼ junjuntl anjel tukʼil Satanás tej tok meltzʼaj tiʼj Dios aʼyeju in che ximen oʼkx kyiʼjx ex iktzun tten e ok te taqʼunal Tajaw il (Génesis 6:1-5). Atxix tej tel kypan kyibʼ tiʼj Dios, in kawin Satanás kyukʼil taqʼunal ex in tzaj nya bʼaʼn kyuʼn kyiʼj xjal ex mas qʼanchaʼl jlu jaʼlo. At nim tqʼoj Tajaw il ex «in sbʼun kyiʼj kykyaqil xjal twitz txʼotxʼ», tuʼntzunju in tzaj tqʼamaʼn Tyol Dios jlu: «Bʼekʼbʼil kywitze aqeye najl twitz txʼotxʼ ex tuj mar» (Apocalipsis 12:9, 12). Puro nya bʼaʼn tmod Satanás, in sbʼun kyiʼj xjal ex in tzalaj aj ttzaj kʼixkʼoj kyiʼj. Nya a Dios at tpaj tiʼj yajbʼil, sino a Satanás.

XIMANA TIʼJ JLU: Oʼkx jun xjal nya bʼaʼn ex mintiʼ tanmi jaku che ok tkʼixbʼisaʼn xjal mintiʼ kyil. Atzunte Xjan Uʼj, in tzaj tqʼamaʼn qa «at tkʼujlalil» Dios (1 Juan 4:8). Tuʼntzunju mlayx kubʼ qximen qa in kubʼ tbʼinchaʼn Jehová jun nya bʼaʼn moqa aju nya tzʼaqli (Job 34:10).

Bʼalo in nul xjel lu toj twiʼya: «¿Jtojtzun tzʼel tiʼn Dios aju nya bʼaʼn tkawbʼil Satanás?». Ik tzeʼn ma tzʼel qnikʼ tiʼj, ikʼun yajbʼil tuʼn Dios ex in tzaj chyoʼn toj tanmi aj ttzaj kʼixkʼoj qiʼj. Ax ikx in tzaj tqʼamaʼn Tyol Dios tuʼn t-xi qqʼamaʼn te aju in bʼaj qkʼuʼj tiʼj tuʼnju in kwentin qiʼj (1 Pedro 5:7). Toj juntl xnaqʼtzbʼil kʼelel qnikʼ tiʼj junjun tten tzeʼn in kubʼ tyekʼin Dios qa kʼujlaʼn qoʼ tuʼn ex tiʼj tipumal tuʼn tel tiʼn yajbʼil ex aju nya bʼaʼn. *