«¿Jteʼ maj chin qanile onbʼil teya ex mintiʼ in chin tzaj tbʼiʼna? ¿Jteʼ maj chin kubʼsale twitza tuʼn tlaj kytxʼuʼjil xjal ex mintiʼ in tzaja kolpil qeye?» (Habacuc 1:2, 3). Atzun jlu xi tqanin Habacuc, jun tbʼanel xjal tzalaj Dios tiʼj. ¿Mintiʼpe qʼuqbʼil tkʼuʼj tej t-xi tqʼamaʼn jlu? Nya ikju. Xi tqʼamaʼn Dios te qa ya otoq kubʼ t-ximen alkye qʼij tuʼn tel tiʼn kʼixkʼoj (Habacuc 2:2, 3).

Aj ttzaj yajbʼil qiʼj ex qa tiʼj jun xjal at qxilen tukʼil, nya kwest tuʼn tkubʼ qximen qa mintiʼ in bʼant naj jun tiʼ tuʼn Dios, aju owtlo bʼant-xi tuʼn. Noqtzun tuʼnj, in tzaj tqʼamaʼn Xjan Uʼj jlu: «Mlay tzikʼx tiʼj tyol [Dios] aju tziyimaj tuʼn ik tzaʼn in kymaʼn junjun: Ma tzikʼx tiʼj tyol, che chitzun. Mya ma tzikʼx tiʼj tuʼn, noq oʼkx tuʼnju at tpasens qiʼj, porke miʼn tajbʼil Qajaw tuʼn tnaj jun xjal, noq oʼkx tajbʼil tuʼn tajtz tiʼj kyanmi kykyaqil» (2 Pedro 3:9).

Ya chʼixtl tbʼant jun tiʼ tuʼn Dios. Kyaj tqʼamaʼn Jesús junjun tiʼ che ikʼel aju tzul tyekʼin qa chʼixtl «tjapun bʼaj tqʼijlalil» ex qa kʼokel kyqʼoʼn kywitz xjal tiʼj aʼyeju in che anqʼin toj ambʼil jaʼlo (Mateo 24:3-42). In japun twiʼ yol lu toj ambʼil jaʼlo, aju in tzaj tyekʼin qa toj chʼintl ambʼil kbʼantel jun tiʼ tuʼn Dios kyiʼj xjal. *

Noqtzun tuʼnj, ¿jakupe kubʼ tnajsaʼn Dios yajbʼil? Tej tten Jesús twitz Txʼotxʼ, kubʼ tyekʼin qa jaku tzʼel tiʼn Dios yajbʼil in tzaj kyiʼj xjal. Qo xnaqʼtzan kyiʼj junjun techel.

Aju xitbʼil tuʼnx twitz txʼotxʼ. Jun maj, tej in bʼettoq Jesús kyukʼil qeju lepchiqeʼk tiʼj tibʼaj mar te Galilea, jaw pulin aʼ tuʼn kyqʼiqʼ. Toj ambʼil lu kubʼ tyekʼin Jesús qa at tipumal ik tzeʼn te Tman, tuʼn tweʼ kyqʼiqʼ jbʼal tuʼn (Colosenses 1:15, 16). Oʼkx xi tqʼamaʼn jlu: «Miʼn qʼajta. Numekuya. Weʼtzun kyqʼiqʼ, bʼiʼxtzun takeʼ tkyaqil» (Marcos 4:35-39).

Qe yabʼil. Nim xjal ojtzqiʼn kyuʼn qa attoq tipumal Jesús tuʼn kyqʼanet moẍ, qe kox, qeju tok tyabʼ kywiʼ, qeju at txʼaʼk kyiʼj ex txqantl yabʼ. In tzaj tqʼamaʼn Tyol Dios qa «kykyaqil yabʼ e bʼanix tuʼn» Jesús (Mateo 4:23, 24; 8:16; 11:2-5).

Weʼyaj. Tej tpakbʼan Jesús, ajbʼen kabʼe maj tipumal xi tqʼoʼn Jehová tuʼn tchmet nimxix wabʼj tuʼn tiʼj chʼin wabʼj at ex tuʼn kywaʼn nimku mil xjal (Mateo 14:14-21; 15:32-38).

Kamik. Jaw anqʼin oxe xjal tuʼn Jesús tej tten twitz Txʼotxʼ, jun kyxol jlu otoq tzʼel kyaje qʼij tkyimlen. A jlu in tzaj tyekʼin qa jaku che jaw anqʼin kyimni tuʼn Jehová (Marcos 5:35-42; Lucas 7:11-16; Juan 11:3-44).