Ximana chʼin tiʼjju kʼujlabʼil at kyxol qeju yoʼẍ, moqa yuẍ aʼyeju junx che keʼyin. At jun tiʼ in nonin kyiʼj tuʼn tel tnikʼ jun tiʼj juntl. Tqʼama jun xuʼj at toklen tiʼj xnaqʼtzbʼil kyiʼj yuẍ, aju Nancy Segal tbʼi, ax ikx te at jun termana yuẍ, qa ateʼ junjun yuẍ «in nelxix kynikʼ kyiʼj ex nya il tiʼj tuʼn t-xi qʼamet jun tiʼ kye». Ex tqʼama juntl xuʼj aju ax ikx at jun termana yuẍ tiʼjju mujbʼabʼil at kyxol: «Qojtzqiʼnxix qibʼe wen».

¿Tiquʼn kyojtzqiʼnxix kyibʼ? Ax tok, junx in che jaw chʼiy ex ax chʼiysabʼil kye in xi qʼoʼn, noqtzun tuʼnj, ateʼ junjun xnaqʼtzbʼil in tzaj kyqʼamaʼn qa in nelxix kynikʼ yuẍ kyiʼjx tuʼnju chʼixme junx ky-ADN.

XIMANA TIʼJ JLU: Kubʼ tbʼinchaʼn Dios tbʼanelxix AND at toj kyxmilal xjal, tuʼntzunju toj tumel aj tkubʼ qximen qa mi al juntl in nel tnikʼ qiʼj ik tzeʼn te. At toklen jlu tukʼilju kubʼ ttzʼibʼin David: «Tuʼna in bʼante tuj talbʼil ntxuʼye. Mintiʼ ewat nximlale twitza tej twiniqax ex tej nbʼante tuj ewaj tuj talbʼil ntxuʼye [...]. O chin tila tej matoq in chin winiqaxe; tkyaqil jlu tzʼibʼamaj tuj tuʼja» (Salmo 139:13, 15, 16). Nya oʼkx ojtzqiʼn tuʼn Dios ex in nel tnikʼ tiʼj tzeʼn tten bʼinchaʼn qoʼ, sino ax ikx aju o tzikʼ toj qanqʼibʼil noq tuʼnju o bʼaj tchʼexpun qmod. Tuʼn jlu in nok qeʼ qkʼuʼj tiʼj qa mi al juntl in nel tnikʼ qiʼj ik tzeʼn te.

Naʼn Dios David kyjalu: «Nman Dios, aya xpichʼul weye ex ojtzqiʼntl qine tuʼna; ojtzqiʼn tuʼna tkyaqilju in bʼant wuʼne; maske najchaq taʼya, pero bʼaʼntl nximbʼetze tuʼna. Ok naʼnxtoq tetz jun yol tuj ntziʼye, lu ojtzqiʼntl tkyaqil tuʼna, Nman» (Salmo 139:1, 2, 4). In nelxix tnikʼ Jehová tiʼjju in qnaʼn ex tiʼjju qaj tuʼn tbʼant quʼn (1 Crónicas 28:9; 1 Samuel 16:6, 7). ¿Tiʼ in tzaj t-xnaqʼtzaʼn jlu qe tiʼj Dios?

In tzaj t-xnaqʼtzaʼn qe qa aj qnaʼn Dios atlo maj mintiʼ in che kanet yol quʼn tuʼn t-xi qqʼamaʼn aju in kubʼ qximen ex aju in qnaʼn, noqtzun tuʼnj, ya ojtzqiʼn jlu tuʼn Bʼinchal qe. In nok tqʼoʼn twitz tiʼjju in bʼant quʼn, ex in nel tnikʼ tiʼj tiquʼn in bʼant quʼn. Ax ikx in nel tnikʼ Dios tiʼjju jaku bʼant quʼn qa junxitl tiʼ in nikʼ toj qanqʼibʼil. Tuʼnju o qo kubʼ tbʼinchaʼn Dios tuʼn tten qkʼujlabʼil kyiʼj txqantl, jaku tzʼok qeʼ qkʼuʼj tiʼj qa tajxix tuʼn tel tnikʼ kyiʼj tbʼanel qximbʼetz ex tiʼjju tiquʼn in che bʼant quʼn (1 Juan 4:7-10).

 In tzaj ttziyen Tyol Dios jlu qe:

• «Porke kwentin qe xjal tzʼaqlxix tuʼn Qman, ex in tzaj tbʼiʼn kynaʼj Dios» (1 PEDRO 3:12).

• In tzaj ttziyen Dios jlu: «Kʼokel nkwentina, kxel nqʼoʼne xnaqʼtzbʼil teya, kxel nqʼoʼne konsej bʼaʼn teya, kxel nyekʼune teya alkye bʼe tuʼn t-xi tiʼna» (SALMO 32:8).

¿Jakupe tzʼonin tuʼn qex kywitz nya bʼaʼn tuʼnju ojtzqiʼn quʼn qa in nel tnikʼ Dios qiʼj? Ximana tiʼjju ikʼ tiʼj Anna, te Nigeria. Tqʼama jlu: «Tzaj nimxix nbʼise ex kubʼ nximane nim maj qa ilpe tiʼj tuʼn kukx wanqʼine. Tej ttzaj qʼamaʼn weʼye qa at cáncer tiʼj wime, moqa tiʼj nmiʼẍe, ya otoq kyim nchmile, atzun wale tokxtoq toj spital tuʼn yabʼil hidrocefalia (xi mal twiʼ tuʼn aʼ, moqa tuʼn líquido). Kwest-xix ela te weye tej atinkxe toj spital junx tukʼil wale ex tuʼn tok operación wiʼje, quimioterapia ex radioterapia».

¿Tiʼ onin tiʼj Anna tuʼn tex kywitz nya bʼaʼn? «Ngantoqe tuʼn nximane kyiʼj taqikʼ Tyol Dios ik tzeʼn Filipenses 4:6, 7, jatumel in tzaj tqʼamaʼn qa ‹kqebʼil qkʼuʼj tuʼn Dios; mas maʼ t-xilen jlu twitz tkyaqil kynabʼl xjal, tuʼn jlu kʼokel kwentin qanmi ex qximbʼetz›. Aj kytzaj nnaʼne yol lu, in nnaʼne qa niqayin atine ttxlaj Jehová, ojtzqiʼn wuʼne qa mas in nel tnikʼ wiʼje ik tzeʼnx weye. Ax ikx e onin qe wermane wiʼje toj wokslabʼile.

»Kukx in tzaj yabʼil wiʼje, noqtzun tuʼnj, mas bʼaʼn atoʼye jaʼlo. O txi qxnaqʼtzan qibʼe tuʼn ten jun tbʼanel qximbʼetze tuʼnju kukx o ten Jehová qtxlaje maske in qo ok weʼye kywitz nya bʼaʼn. In tzaj tqʼamaʼn Santiago 5:11 jlu: ‹At tzalajbʼil kye qeju nnikʼx kyuʼn. O kybʼiye tiʼj Job, o ten nim tpasens, ex o kybʼiye aju tbʼincha Qman te te mankbʼilxi; porke ate Qman nim in qʼaqʼan tkʼuʼj ex in tzʼeʼy tkʼuʼj qiʼj›». Elxix tnikʼ Jehová kyiʼj nya bʼaʼn e tzaj tiʼj Job ex jaku tzʼok qeʼ qkʼuʼj tiʼj qa ax ikx in nel tnikʼ tiʼjju nya bʼaʼn in qo ok weʼ kywitz.