IN KOʼXIN LUCÍA TUʼN TQAN. Tzaj poliomielitis tiʼj tej tzmatoq tal txin, jun yabʼil jlu aju jaku tzʼel kyiqen txqantl ex nnok tbʼinchaʼn nya bʼaʼn tiʼj sistema nervioso. Tej qʼiʼntoq 16 abʼqʼi tuʼn, tzaj qʼamaʼn te tuʼn xuʼj jatumel in naqʼunantoq: «Jun tkastiwa aju mintiʼ in yukch tqana tuʼnju mintiʼ xi tbʼiʼna ttxuʼya ex mintiʼ xi tnimana». Tej tikʼ junjun abʼqʼi, kukx tzaj tnaʼn Lucía qa nimxix kux chyoʼn qe yol lu toj tanmi.

TEJ TOK TBʼIʼN DÁMARIS QA AT JUN TUMOR TOJ TWIʼ, xi qʼamaʼn jlu te tuʼn ttat: «Malo kubʼ tbʼinchaʼna jun matij il tuʼntzun ttzaj jlu tiʼja, ex ma kubʼ tqʼoʼn Dios tkastiwa». Tzaj nimxix tbʼis Dámaris tuʼn jlu.

Kyoj nimku mil abʼqʼi, o txi kynimen xjal qa aju yabʼil jun kastiw jlu tuʼn Dios. In tzaj tqʼamaʼn uʼj Usos y costumbres de las tierras bíblicas qa toj ambʼil tej tten Jesús, kubʼ kyximen xjal qa «in tzaj yabʼil tuʼn il, moqa tuʼn kyil kyxeʼchel, ex qa tuʼn tpaj kyil in tzaj jun kastiw kyibʼaj». Ax ikx in tzaj tqʼamaʼn uʼj Medieval Medicine and the Plague (La medicina medieval y la peste) qa toj Edad Media, «kubʼ kyximen junjun xjal qa tzaj tqʼoʼn Dios txʼuʼj yabʼil kyiʼj tuʼn tpaj kyil». Qa ikju, ¿junpe kastiw tuʼn Dios tej kykyim nim xjal tuʼn txʼuʼj yabʼil toj Europa kyoj abʼqʼi 1300? ¿Moqa bʼaj jlu tuʼn infección tzaj kyiʼj xjal tuʼn bacteria, ik tzeʼn tzaj kyqʼamaʼn xjal at kynabʼil tej tbʼet ambʼil? Bʼalo in kubʼ t-xjelina qa axpe tok in najbʼen yabʼil tuʼn Dios tuʼn tkubʼ tqʼoʼn kykastiw xjal tuʼn tpaj kyil. *

XIMANA TIʼJ JLU: Noqwit ajbʼen yabʼil ex kʼixkʼoj tuʼn Dios tuʼn tkubʼ tqʼoʼn kykastiw xjal, ¿tiʼ toklen jlu tukʼilju tej kykubʼ tqʼanin Jesús qe yabʼ? Qa ikju, jakulo kubʼ qximen qa nya tzʼaqli Dios (Mateo 4:23, 24). Mlay tzʼok meltzʼaj Jesús tiʼj Tman. Tqʼama jlu: «Kukx in nbʼinchaʼne aju bʼaʼn nneʼla tuj twitz» ex «in nbʼinchaʼne ik tzaʼnx tzaj tmaʼn Nmane weye» (Juan 8:29; 14:31).

In tzaj tqʼamaʼn Xjan Uʼj qa «tzʼaqlxix ex jiqun» te Jehová (Deuteronomio 32:4). Jun techel, mlay tzaj tqʼoʼn Dios ambʼil tuʼn kykyim txqan xjal toj jun aksident toj jun avión noq tuʼn tpaj jun xjal tjax toj. Ojtzqiʼntoq tuʼn Abrahán, jun tmajen Dios ten tzʼaqli, qa mlayx bʼant jlu tuʼn Dios. Tuʼntzunju tqʼama qa «mya tuj tumel» moqa mlayx tzul toj twiʼ Dios tuʼn tkubʼ tbʼyoʼn «qe xjal tzʼaqlxix junx kyukʼil qe bʼinchal mya bʼaʼn» (Génesis 18:25). Ax ikx, in tzaj tqʼamaʼn Xjan Uʼj qa «mintiʼ in tbʼinchaʼn [Dios] jun mya bʼaʼn ex qa aju mya tzʼaqlxix» (Job 34:10-12).

Aj ttzaj yajbʼil qiʼj, nya jun kastiw jlu tuʼn Dios tuʼnju o kubʼ qbʼinchaʼn jun il. Kyaj tyekʼin Jesús jlu tej tok noj jun xjal twitz kyukʼil t-xnaqʼtzbʼen aju moẍ tej tul itzʼj. Xi kyqanin te: «Xnaqʼtzal, ¿alkye o bʼinchan il tuʼnju itzʼj xjal lu moẍ? ¿Axpelo o bʼinchan il, ex qa aqe tman?». Xi ttzaqʼweʼn Jesús: «Aju xjal lu moẍ tej titzʼj pero mya tuʼnju o bʼinchan il ex mya tuʼnju aqe tman e bʼinchan il» (Juan 9:1-3).

Tuʼnju otoqxi tzʼok kybʼiʼn t-xnaqʼtzbʼen Jesús nim nya ax tok yol, e jawlo labʼin tej t-xi tqʼamaʼn Jesús kye qa mintiʼ jun il otoq kubʼ tbʼinchaʼn xjal moẍ nix qe tman tuʼntzun tkubʼ qʼoʼn tkastiw lu. Nya oʼkx jaqet twitz tuʼn Jesús, ax ikx kubʼ tyekʼin qa nya ax tok aju in kyqʼamaʼn xjal (Juan 9:6, 7). Aj tel qnikʼ qa nya tuʼn Dios in tzaj yajbʼil, in tzaj tqʼuqbʼaʼn jlu kykʼuʼj qeju in che yajlanjtz tuʼn yabʼil.

In tzaj ttziyen Tyol Dios jlu qe:

• «Mlay bʼant tuʼn tok Dios tuj joybʼil tiʼj tuʼn tbʼinchante aju mya bʼaʼn, ex mi jun nnoʼk tuj joybʼil tiʼj tuʼn Dios» (SANTIAGO 1:13). Nya oʼkxju, ax ikx toj chʼintl ambʼil kbʼel tnajsaʼn Dios «aju mya bʼaʼn» o tzaj kyiʼj xjal toj nim ambʼil, ik tzeʼn yabʼil, kʼixkʼoj ex kamik.

• «Kykyaqil yabʼ e bʼanix tuʼn» Jesús (MATEO 8:16). Tej kyqʼanit xjal tuʼn Jesús, noq jun yekʼbʼil tiʼjju kbʼantel tuʼn Tkawbʼil Dios twitz tkyaqil Txʼotxʼ.

• «Ex kʼelel t-suʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj; porke aqeju at tnejel ma che naj» (APOCALIPSIS 21:3-5).

¿Tiquʼn at nim kʼixkʼoj ex yajbʼil twitz Txʼotxʼ? Qa nya a Dios at tpaj, ¿alkyetzun at tpaj? Toj nimku ambʼil, kukx in kubʼ kyxjelin xjal jlu. Toj juntl xnaqʼtzbʼil kkanetel tzaqʼwebʼil tuʼna.