Nim toklen aju tnejel or tanqʼibʼil jun tal neʼ moqa neʼẍ. ¿Tiquʼn? Tuʼnju aju tkʼujlabʼil txubʼaj kbʼel tyekʼin tukʼil tal aj tul itzʼj, kʼonil jlu tiʼj tzeʼn kjawil chʼiy tal neʼ. *

¿Tiʼ in nonin tiʼj jun txubʼaj tuʼn tok tkwentin tal tukʼil kʼujlabʼil aju tzma sul itzʼj? In tzaj tqʼamaʼn aj xnaqʼtzal Jeannette Crenshaw toj The Journal of Perinatal Education, qa otoqxi tzul itzʼj tal neʼ, noq tuʼn jun hormona tok tbʼi oxitocina «in tzaj tajbʼil jun txubʼaj tiʼj tal aj tok tkeʼyin, aj tjaw tchleʼn ex aj t-xi tqʼoʼn tchʼuʼ, moqa tmiʼẍ». Tojtzun ambʼil aju, in nel juntl hormona tiʼj t-xmilal txubʼaj aju «in nonin tiʼj tuʼn tyolin tukʼil tal» ex tuʼn tchʼiy kʼujlabʼil kyxolx. ¿Tiquʼn nim toklen tuʼn tel qnikʼ tiʼj jlu?

Aju kʼujlabʼil in ten t-xol txubʼaj tukʼil tal, a Jehová bʼaj bʼinchante jlu quʼn ate Bʼinchal qe ex at tkʼujlabʼil. * Xi tqʼoʼn aj kawil David chjonte te Dios tuʼnju etz qʼiʼn toj talbʼil ttxuʼ ex tuʼn tten toj tqʼabʼ ttxuʼ toj tbʼanel. El tnikʼ tiʼj qa otoq tzʼok xqʼuqin tuʼn Jehová atxix tej tul itzʼj. Xi tqʼamaʼn te toj jun naʼj Dios: «Ex axa Ndiosa tej atinxtoqe tuj talbʼil ntxuʼye» (Salmo 22:9, 10).

XIMANA TIʼJ JLU: Kubʼ tbʼinchaʼn Dios txubʼaj tuʼntzun tok tkwentin tal ex tuʼn tok t-xqʼuqin tukʼil kʼujlabʼil, ¿nyapetzulo ax ikx at tkʼujlabʼil Dios tiʼj teyele junjun qe, aqoʼ tkʼwaʼl? (Hechos 17:29).

Tqʼama Jesucristo aju ojtzqiʼnxix Dios tuʼn: «¿Mintiʼpe in che kʼayinjtz kabʼe tal chyuʼj tuʼn jun sentav? Maske ikju, pero mintiʼ jun tal chyuʼj in kubʼ tzʼaq twitz txʼotxʼ mintiʼwt bʼiʼn tuʼn Kymane. Ax ikx kyeye, tkyaqil ttzmal kywiʼye ajlaʼmaj. Kyjaʼtzun miʼn che xobʼe, porke mas maʼ kyxilene kywitz nimku tal chyuʼj» (Mateo 10:29-31).

Qa mintiʼ in nok kyqʼoʼn kywitz xjal kyiʼj tal chyuʼj in che lipen twitz kyaʼj, mas mintiʼ in nok kyqʼoʼn kywitz kyiʼj qeju in che kyim. Atzunte Qtat toj kyaʼj in nok tqʼoʼn twitz tiʼj teyele junjun kye. Maske at nimxix chyuʼj, mlayx kanin kyoklen toj twitz Dios ik tzeʼn qe xjal. Tuʼn jlu in nel qnikʼ tiʼj: qa in nok tqʼoʼn twitz Dios tiʼja. Axpe ikx mas nim toklena toj twitz.

 In tzaj ttziyen Tyol Dios jlu qe:

• «Porke ate Qman in keʼyin tiʼj tkyaqilju in bʼaj twitz txʼotxʼ ex in xi tqʼoʼn kyipun qeju axix tok nnoʼk qeʼ kykʼuʼj tiʼj» (2 CRÓNICAS 16:9).

• «Kwentin qe xjal tzʼaqlxix tuʼn Qman ex in tzaj tbʼiʼn kynaʼj Dios» (SALMO 34:15).

• «Chin tzalajele nim tuʼnju at tkʼujlalila wiʼje. Ma tila qe nbʼise, ojtzqiʼn tuʼna aju kʼixkʼoj in tzaj wiʼje» (SALMO 31:7).

¿In noninpe qiʼj qa ma tzʼel qnikʼ tiʼj qa in ximen Dios tiʼj teyele junjun qe ex qa in qo ok tkwentin tukʼil kʼujlabʼil? Ax tok, in nonin. In tzaj tqʼamaʼn Hannah, * te Inglaterra jlu:

«Nim maj kubʼ nximane qa nya kʼujlaʼn qine tuʼn Jehová ex qa mintiʼ in tzaj tbʼiʼn nnaʼj Diose tuʼnju mintiʼ qʼuqbʼil nkʼuʼje. Ax ikx, kubʼ nximane qa kubʼ tqʼoʼn nkastiwe moqa mintiʼ in tzaj tqʼoʼn twiʼ wiʼje tuʼnju mintiʼx chʼin woklene. O nnaʼye qa mintiʼ in ximen wiʼje».

Atzun jaʼlo qʼuqli tkʼuʼj Hannah qa kʼujlaʼn tuʼn Jehová ex qa in ximen tiʼj. ¿Tiʼ onin tiʼj tuʼn tchʼexpaj t-ximbʼetz? In tzaj tqʼamaʼn jlu: «Ma txi tiʼn ambʼil. Ma tzikʼ nim abʼqʼi tej tok nbʼiʼne jun chikʼbʼabʼil tiʼj Tyol Dios aju yolin tiʼj chojbʼil bʼant tuʼn Jesús, onin jlu wiʼje ex tzaj tqʼuqbʼaʼn qkʼuʼje qa kʼujlaʼn qine tuʼn Jehová. Ex el nnikʼe tiʼj qa kʼujlaʼn qine tuʼn tej ttzaj ttzaqʼweʼn nnaʼj Diose, tuʼntzunju nim maj in nok tene oqʼel. Ax ikx, tej nxnaqʼtzane tiʼj Tyol Dios ex tej nxiʼye toj kychmabʼil testigos de Jehová, o tzʼonin wiʼje tuʼn tok wojtzqiʼne mas Jehová ex tuʼn tel nnikʼe tiʼjju in tnaʼn qiʼj. Jaʼlo ojtzqiʼn wuʼne qa kʼujlaʼn qoʼ tuʼn, taj tuʼn tonin qiʼj ex taj tuʼn qok tkwentin».

¡Tbʼanelxix qe yol lu! Noqtzun tuʼnj, ¿tzeʼn jaku tzʼel tnikʼa tiʼj qa in nel tnikʼ Dios tiʼj t-ximbʼetza? Kkanetel tzaqʼwebʼil tuʼna toj juntl xnaqʼtzbʼil.