Aju qmod tuʼn tkubʼ qqʼon qibʼ te t-xel juntl xjal at toklen tukʼilju in qnaʼn, tuʼn tel qnikʼ ex tuʼn qximen ax ik tzeʼn te. Tqʼama doctor Rick Hanson, jun xnaqʼtzal tiʼj kyximbʼetz xjal, qa aju «qmod lu ya qʼiʼnx quʼn aj qul itzʼj».

XIMANA TIʼJ JLU: ¿Tiquʼn in kubʼ qyekʼin qmod lu atzun kye txkup mintiʼ? In tzaj tqʼamaʼn Xjan Uʼj qa o qo kubʼ tbʼinchaʼn Dios ik tzeʼn te tilbʼilal (Génesis 1:26). A t-xilen jlu qa toj junjun tiʼ jakulo qo ok ik tzeʼn te Dios ex jaku kubʼ qyekʼin qe tbʼanel tmod. Tuʼntzunju, qa at jun xjal in kubʼ tqʼon tibʼ te t-xel juntl xjal, in tzaj tyekʼin qa in nel tkanoʼn tmod Jehová, aju Bʼinchal qe at qʼaqʼbʼil tkʼuʼj (Proverbios 14:31).

In kubʼ tqʼon tibʼ Dios te qxel ex nya tgan aj ttzaj yajbʼil qiʼj. Aj qyolin tiʼj yajbʼil ikʼx kyuʼn aj Israel toj Egipto ex tej kyten 40 abʼqʼi toj tzqij txʼotxʼ, in tzaj tqʼamaʼn Tyol Dios jlu: «Tuj tkyaqil yajbʼil tzaj kyiʼj, ax ikx te o yajlanjtz» (Isaías 63:9). Ma tzʼel tnikʼa tiʼj qa nya oʼkx el tnikʼ Dios tiʼj yajbʼil tzaj kyiʼj sino tnaʼ aju kʼixkʼoj ikʼx kyuʼn. Ax qʼamante jlu: «Bʼaʼn wuʼne nikʼpun in che kʼixbʼisanjtz» (Éxodo 3:7). Ex tqʼamatl: «Alkye ma tzʼok tbʼinchaʼn mya bʼaʼn tiʼj tnam etzan wuʼne junx taʼ ik tzaʼn tiʼj t-santil tbʼaqʼ nwitze nnoʼk tbʼinchaʼn jlu» (Zacarías 2:8). Tuʼn jlu in nel qnikʼ tiʼj qa at jun xjal ma tzʼok bʼinchante nya bʼaʼn qiʼj, in nok jlu mer ik tzeʼn tiʼj Dios in nok bʼinchaʼn.

Maske in qnaʼn nya bʼaʼn toj qanmi moqa in kubʼ qximen qa mintiʼ qoklen tiʼj qʼaqʼbʼil tkʼuʼj Dios, pero in tzaj ttziyen Xjan Uʼj qe, qa «ate Dios maʼ toklen twitz ju qanmi, ex ojtzqiʼn tkyaqil tuʼn» (1 Juan 3:19, 20). Mas ojtzqiʼn qoʼ tuʼn Dios ik tzeʼnx qe. Ojtzqiʼn tuʼn tiʼ in tzaj qiʼj, tiʼ in qo ximen tiʼj ex tiʼ in qnaʼn, ex in kubʼ tqʼon tibʼ te qxel.

In tzaj ttziyen Tyol Dios jlu qe:

• «Qatzun ma chin tzaj kytxkoʼne, ktzajel ntzaqʼweʼne, ex qa ma che jaw schʼine tuʼn kyqanine onbʼil, ok nmaʼye kyeye: Lu qine lu» (ISAÍAS 58:9).

• «Porke bʼaʼn wuʼne alkye nximbʼetze kyiʼje; ximan wuʼne tuʼn nbʼinchanteye bʼaʼn kyiʼje ex mya tuʼn nbʼinchanteye mya bʼaʼn. In xi nmaʼne jlu tuʼntzun tqeʼ kykʼuʼje tiʼj oybʼil, porke mas bʼaʼn che tele te yajxitl. Aqine Dios in chin qʼmante jlu. Che kubʼsaltzune nwitze ex che tzajel yoline wukʼile tuj naʼj Dios, atzun weye che tzajel nbʼiʼne» (JEREMÍAS 29:11, 12).

• «In jaw tiʼna teyle junjun txut taʼl nwitze. ¿Myapetzun tzʼibʼan qe jlu tuʼna tuj uʼj at tukʼila?» (SALMO 56:8).

¿Jakupe tzʼonin qiʼj aj tok qojtzqiʼn qa in nel tnikʼ Dios qiʼj aj qok weʼ twitz nya bʼaʼn? Qo xnaqʼtzan tiʼjju ikʼ tiʼj María.

«Tzaj nim nbʼise tiʼj wale te 18 abʼqʼi aju tzaj cáncer tiʼj ex toj kabʼe abʼqʼi ikʼx kʼixkʼoj tuʼn ex kyim. ¿Tiquʼn puro nya bʼaʼn aju qchwinqlal? Tzaj nqʼoje tiʼj Jehová tuʼnju mintiʼ onin tiʼj wale.

»Kubʼ nximane qa nya kʼujlaʼn qine tuʼn Jehová. Tej tikʼ qaq abʼqʼi, xi nqʼamaʼne qe ximbʼetze te jun wukʼile at tkʼujlabʼil ex in nel tnikʼ qiʼj aju atz taʼ jatumel in nok nchmon wibʼe. Tej otoqxi chin ok bʼiʼne tuʼn toj nimku or, tzaj tnaʼn jun taqikʼ Tyol Dios weye aju tzaj tqʼuqbʼaʼn nkʼuʼje. Aju tkuʼx toj 1 Juan 3:19, 20, ex in tzaj tqʼamaʼn qa ‹ate Dios maʼ toklen twitz ju qanmi, ex ojtzqiʼn tkyaqil tuʼn›. Te tibʼajxi, tzaj tchikʼbʼaʼn weye qa in nel tnikʼ Jehová tiʼj yajbʼil in tzaj qiʼj.

»Maske tzaj tchikʼbʼaʼn jlu weye, kukxtoq in chin qʼojine tukʼil Jehová. Jawtzun wuʼjine Salmo 94:19, aju in tqʼamaʼn: ‹Ok in tzaj nximbʼetze ex in bʼaj nkʼuʼje, in tzaj tqʼuqbʼaʼna nkʼuʼje ex in tzaj tqʼoʼna tzalajbʼil›. Atzunju wajtoqe tuʼn tok nbʼiʼne. Tuʼn jlu, bʼant tuʼn t-xi nqʼamaʼne te Jehová aju kʼixkʼoj in nnaʼne ex qʼuqlitoq nkʼuʼje tiʼj qa in chin tzaj bʼiʼne tuʼn ex qa in nel tnikʼ wiʼje. A jlu tzaj qʼonte mujbʼabʼil toj wanmiye».

¡Nimxix in tzaj tqʼuqbʼaʼn qkʼuʼj aj tok qojtzqiʼn qa in nel tnikʼ Dios qiʼj ex qa in kubʼ tqʼon tibʼ te qxel! Noqtzun tuʼnj, ¿tiquʼn at nim yajbʼil? ¿In kubʼpe tqʼoʼn Dios qkastiw tuʼn tlaj jun qil? ¿Okpetzulo kpol jun qʼij jatumel kʼelel tiʼn yajbʼil? Che tzaqʼwetil xjel lu kyoj xnaqʼtzbʼil che ul.