XIMANA tiʼj qa in keʼyina tiʼj jun película aju in yolin tiʼj tanqʼibʼil jun xjal ojtzqiʼnxix twitz, bʼalo jun aj bʼitzil. In xi tzyet tyolin video tiʼj tanqʼibʼil tej tzmatoq kʼwaʼlx, tej t-xi qʼoʼn xnaqʼtzbʼil te tiʼj bʼitz ex tej t-xnaqʼtzan nim or. Yajxitl in qʼon concierto, in bʼet kyoj nim lugar ex in nok ojtzqiʼn twitz kyuʼn xjal twitz tkyaqil Txʼotxʼ. Noqtzun tuʼnj, yajxitl in netz yekʼin qe mankbʼil abʼqʼi te tanqʼibʼil ex in kyim aj tkubʼ bʼaj video.

Ax tok aju o bʼaj toj tanqʼibʼil xjal, noqtzun tuʼnj, ya o kyim. Noqwit ma yolin jlu tiʼj tanqʼibʼil jun científico, jun xjal in ojqelan moqa juntl xjal ojtzqiʼnxix twitz kyuʼn txqantl, axju jaku bʼaj tiʼj tanqʼibʼil. Maske in che kambʼet tbʼanel tiʼchaq tuʼn toj tanqʼibʼil, jakulo kubʼ qxjelin tiʼwtlo mas ma bʼant tuʼn noqwit mintiʼ ma tijen ex mintiʼ ma kyim.

Bʼisbʼajilxix tuʼnju qkyaqilx qo ikʼel toj jlu (Eclesiastés 9:5). Maske tzʼok tilil quʼn tuʼn miʼn tbʼaj jlu qiʼj, qkyaqilx qo tijel ex qo kyimel. Axpe ikx jaku qo kyim tuʼn tpaj jun aksident moqa tuʼn jun yabʼil. Ik tzeʼn in tzaj tqʼamaʼn Tyol Dios, ik qten «ik tzaʼn chʼin muj noq chʼin in ten, ex jurat in kubʼ naj» (Santiago 4:14).

Tuʼnju jaku qo kyim toj alkyexku ambʼil, ateʼ junjun xjal in tzaj kyqʼamaʼn jlu: «Qo waʼn ex qo kʼan, porke nchiʼj qo kyim» (1 Corintios 15:32). Aj ttzaj kyqʼamaʼn xjal lu, in tzaj tyekʼin qa ojtzqiʼn kyuʼn qa che kymel. Kpol jun ambʼil, qkyaqilx kbʼel qxjelin tiquʼn in qo anqʼin, mas ik tzeʼn aj ttzaj jun kʼixkʼoj qiʼj. ¿Jatumel jaku kanet tzaqʼwebʼil quʼn?

Nim xjal in nok qeʼ kykʼuʼj kyiʼj científico. O kanet junjun tumel kyuʼn científico ex kyuʼn doctor tuʼn kyanqʼin xjal mas ambʼil, ex in nok tilil kyuʼn txqantl tuʼn tkanet juntl tumel tzeʼn tuʼn qanqʼin mas ambʼil. Noq tzeʼnxku bʼaj, at nim xjel naʼmx tkanet tzaqʼwebʼil kyiʼj, ik tzeʼn tiquʼn in qo tijen ex in qo kyim, ex kpolpe jun qʼij miʼn tentl kyimen. Che kbʼel xnaqʼtzet xjel lu kyoj xnaqʼtzbʼil che ul ex ktzaqʼwetil xjel lu: ¿Oʼkxpe qanqʼibʼil jlu at?