NYATOQ taj Dios tuʼn qanqʼin ik tzeʼn jaʼlo. Tajtoq tuʼn tnoj Txʼotxʼ kyuʼn xjal in nok kyqʼoʼn toklen, in xi kybʼiʼn qe consej in tzaj tqʼoʼn ex in kubʼ kyyekʼin qe tbʼanel tmod. Tajtoq tuʼn kyanqʼin xjal toj mujbʼabʼil, tuʼn kytzalaj kyukʼil toj kyja, tuʼn tel kynikʼ kyiʼj akʼaj tiʼchaq ex tuʼn tok tkyaqil Txʼotxʼ kyuʼn te jun tbʼanel najbʼil.

• «Ma weʼ tkyaqil qʼoj tuʼn tuj tkyaqil twitz txʼotxʼ» (Salmo 46:9).

• «Ma tzul kanun qʼij [...] tuʼn kynaj qeju ma naj twitz txʼotxʼ kyuʼn» (Apocalipsis 11:18).

• «Mi jun xjal najl tuj tnam ok tmaʼ kyjaʼ: Yabʼ qine, chiwt» (Isaías 33:24).

• «Qe xjal skʼoʼmaj wuʼne che tzalajel tiʼj taqʼunbʼen kyqʼabʼ» (Isaías 65:22).

¿Tzeʼn kjapunel kywiʼ yol lu? O txi tqʼoʼn Dios toklen Jesús, aju Tkʼwaʼl, te aj Kawil tuʼn tkawin tzmax toj kyaʼj tibʼaj Txʼotxʼ. In nok tqʼoʼn Xjan Uʼj tbʼi te Tkawbʼil Dios (Daniel 2:44). Ax ikx in tzaj tqʼamaʼn jlu tiʼj Jesús: «Kxel tqʼoʼn Qman Dios toklen tuʼn tok te rey [...] ex aju tkawbʼil mintiʼ bʼajsbʼil te» (Lucas 1:32, 33).

Bʼant nim milagr tuʼn Jesús tej tten twitz Txʼotxʼ, tuʼn jlu kubʼ tyekʼin qa ktel jun tbʼanelxix kyanqʼibʼil xjal aj tkawin.

• El tiʼn tkyaqil wiq yabʼil kyiʼj xjal, iktzun tten kubʼ tyekʼin qa jaku tzʼel tiʼn yabʼil te jumajx (Mateo 9:35).

• Weʼ jun kyqʼiqʼ jbʼal tuʼn, iktzun tten kubʼ tyekʼin qa at tipumal kyibʼaj qe xitbʼil in che tzaj tuʼnx twitz txʼotxʼ (Marcos 4:36-39).

• E waʼn nim mil xjal tuʼn, iktzun tten kubʼ tyekʼin qa jaku tzaj tqʼoʼn aju at tajbʼen qe (Marcos 6:41-44).

• Ok aʼ tuʼn te vin toj jun mejebʼleʼn, iktzun tten kubʼ tyekʼin qa ok qo tzalajel tiʼj qanqʼibʼil aj tkawin (Juan 2:7-11).

¿Tiʼ teya kbʼantel tuʼn tuʼntzun ttzalaja tiʼj tkyaqilju ximen tuʼn Jehová tuʼn ttzaj tqʼoʼn kye xjal at kykʼujlabʼil tiʼj? Bʼaʼn tuʼn tbʼeta toj jun «bʼe». In tzaj tqʼamaʼn Tyol Dios qa aju bʼe lu «in pon tuj chwinqlal», ex qa nya nim xjal in kanet kyuʼn (Mateo 7:14).

¿Tiʼ aju bʼe te chwinqlal? Aju bʼe lu in yolin tiʼjju in tzaj tqanin Dios qe tuʼn tbʼant quʼn. Ax in tzaj qʼamante jlu qe: «Aqine Dios aju Kymane, aqine chin xel xnaqʼtzante ju bʼaʼn tuʼn tajbʼen te kyeye, aqine chin xel ẍaqlunte kyeye tuj bʼe kxel kyiʼne» (Isaías 48:17). Qa ma qo bʼet toj bʼe lu, atzun jun tumel tuʼn tten tbʼanel qanqʼibʼil.

 Tqʼama Jesús jlu: «Aqine ju bʼe, aqine ju yol axix tok, ex aqine qʼol chwinqlal» (Juan 14:6). In qox laqʼeʼ ttxlaj Dios aj t-xi qbʼiʼn qe t-xnaqʼtzbʼil Jesús ex aj tel qkanoʼn tiʼj, iktzun tten in ten tbʼanel qanqʼibʼil.

¿Tzeʼn jaku kanet bʼe lu tuʼna? Maske at nim okslabʼil moqa bʼe, tqʼama Jesús jlu: «Aqeju in kymaʼn weye: Tat, Tat, mya kykyaqil che okex tuj kawbʼil in tzaj tuj kyaʼj; noq oʼkx kʼokex aju in tbʼinchaʼn tajbʼil Nmane aju at tuj kyaʼj» (Mateo 7:21). Tqʼamatl jlu: «Tiʼj kybʼinchbʼen kʼelel kynikʼe kyiʼj» (Mateo 7:16). Jaku tzʼonin Tyol Dios tiʼja tuʼn tel tnikʼa tiʼj alkye okslabʼil axix tok (Juan 17:17).

¿Tiʼ il tiʼj tuʼn tbʼant tuʼna tuʼntzun tbʼeta toj bʼe lu? Il tiʼj tuʼn tok tojtzqiʼna aju o tzaj qʼonte qchwinqlal. Tuʼn tel tnikʼa alkye, tiʼ tbʼi, tzeʼn tmod, tiʼ in bʼant tuʼn ex tiʼ taj tuʼn tbʼant quʼn. *

Nya oʼkx taj Dios tuʼn qaqʼunan, tuʼn qwaʼn, tuʼn qtzalaj chʼin ex tuʼn kyten toj qja. Taj tuʼn tok qojtzqiʼn ex tuʼn qok te tamiw. Aj qnimen te Jehová, in kubʼ qyekʼin qa kʼujlaʼn quʼn. Tqʼama Jesús jlu: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3).

Tuʼn ttzalaj Dios axix tok, bʼalo il tiʼj tuʼn tbʼant junjun chʼixpubʼil tuʼna. Bʼalo kwest jaku tzʼela te teya, noqtzun tuʼnj, qa ma bʼeta toj bʼe lu jaku tzaj tiʼn tbʼanel teya, oʼkx il tiʼj tuʼn t-xi tzyet naj tuʼn tbʼeta. Qa at jun t-xjela at toklen tukʼil Dios, jaku txi tqanina jun t-xnaqʼtzbʼila toj qtembʼile te Internet www.pr418.com. Che tzalajel testigos de Jehová aj kypon visitaril teya jatumel najliya ex toj ambʼil mas bʼaʼn te teya.