Nabʼil toj Tyol Dios: «Miʼn pon kykʼuʼje tiʼj pwaq; che tzalaje tiʼj chʼin at kyeye jaʼlo» (Hebreos 13:5).

Toj ambʼil jaʼlo ateʼ nim tiʼchaq in kyqʼamaʼn xjal qa nim toklen tuʼn tten qe. Noqtzun tuʼn, in tzaj tyekʼin Tyol Dios qa jaku qo tzalaj tiʼj chʼin at qe. ¿Alkye tten jaku bʼant quʼn?

Miʼn tzʼok qkʼujlaʼn pwaq. Tuʼnju in ‹pon kykʼuʼj xjal tiʼj pwaq›, in xi kynajsaʼn kychwinqlal, qe toj kyja, qe kyamiw ex qe tbʼanel kymod (1 Timoteo 6:10). ¡In xi kyqʼoʼn ambʼil tuʼn ttzaj nim nya bʼaʼn kyiʼj! Ex aju xjal in pon tkʼuʼj tiʼj qʼinumabʼil «kukx taj mastl» (Eclesiastés 5:10).

Tuʼn ttzaj qnaʼn qa mas nim kyoklen xjal kywitz tiʼchaq. Ax tok, at kyajbʼen qe tiʼchaq, pero mlay qo ok kʼujlaʼn kyuʼn tiʼchaq lu; oʼkx qe xjal jaku bʼant jlu kyuʼn. Mas jaku qo tzalaj qa ma ten jun tbʼanel qamiw (Proverbios 17:17).

Nabʼil toj Tyol Dios: «Qa at tzalajbʼil tuj tanmi xjal, a jlu mer ik tzaʼn jun qʼanbʼil te te» (Proverbios 17:22).

In nok tzalajbʼil ik tzeʼn jun «qʼanbʼil» aju jaku tzʼonin tuʼn tikʼx yabʼil quʼn. Noqtzun tuʼnj, ¿tzeʼn jaku qo tzalaj maske at yabʼil qiʼj?

Tuʼn qqʼon chjonte. Qa oʼkx in bʼaj qkʼuʼj tiʼj yabʼil tok qiʼj, «kykyaqil qʼij mya bʼaʼn» che elel qe (Proverbios 15:15). Atzunte Tyol Dios in tzaj tqʼamaʼn tuʼn tbʼant jlu quʼn: «Kyqʼonxe chjonte te Dios» (Colosenses 3:15). Bʼaʼn tuʼn t-xi qxnaqʼtzan qibʼ tuʼn qqʼon chjonte kyiʼj tbʼanel tiʼchaq ateʼ toj qanqʼibʼil, maske tal chʼin qe. Jaku qo tzalaj kyuʼn junjun tiʼchaq ik tzeʼn aj tex bʼaj Qʼij, aj tkubʼ chʼin xmuʼs moqa aj tjaw tzeʼn jun xjal kʼujlaʼn quʼn.

Tuʼn qonin kyiʼj txqantl. «Mas at tzalajbʼil kyeye qa at chʼin ma txi kyqʼoʼne te juntl», jaku bʼant jlu quʼn maske at jun yabʼil qiʼj (Hechos 20:35). Aj ttzaj kyqʼoʼn txqantl chjonte qe tiʼj jun tiʼ otoq bʼant quʼn, in kubʼ qnaʼn tzalajbʼil ex in che el naj nya bʼaʼn tiʼj qximbʼetz. Qa ma tzʼok tilil quʼn tuʼn tkubʼ kynaʼn txqantl bʼaʼn, ax ikx qe kbʼel qnaʼn bʼaʼn.

Nabʼil toj Tyol Dios: Bʼaʼn tuʼn tel kynikʼe tiʼj «alkyeju mas bʼaʼn» (Filipenses 1:10).

Jaku tzaj nya bʼaʼn kyxol mejebʼleʼn qa mintiʼ in nel kypaʼn ambʼil tuʼn kyten junx. Tuʼntzunju tbʼanel tuʼn tok kyqʼoʼn chmilbʼaj ex xuʼjilbʼaj toklen kymejebʼleʼn, tuʼn tok kyqʼoʼn te mas nim toklen.

Kybʼinchame qe tiʼchaq junx. In tzaj tqʼamaʼn Tyol Dios qa «mas bʼaʼn kabʼe xjal twitzju noq junx xjal» (Eclesiastés 4:9). Nya oʼkx tuʼn t-ximana tiʼjju jaku bʼant tuʼna tjunalxa, ximana tiʼj tiʼ jaku bʼant kyuʼne junx. Jun techel, jaku kubʼ kybʼinchaʼne wabʼj, jaku che exe bʼetil, jaku che ojlan chʼine akux in xi kykʼaʼne jun vas kykapeye moqa tuʼn tbʼant juntl tiʼ kyuʼne.

Kykʼujlank kyibʼe. In tzaj tqʼamaʼn Tyol Dios qa il tiʼj tuʼn tok kykʼujlan kyibʼ mejebʼleʼn ex tuʼn tok kyqʼoʼn kyoklen (Efesios 5:28, 33). Jaku chʼiy kʼujlabʼil kyxole qa ma che tzeʼne jun rat, qa ma tzaj kychlen kyibʼe moqa ma txi kyqʼoʼne jun oyaj te kyukʼile. Ex bʼaʼn tuʼn ttzaj tnaʼna qa oʼkx jaku kubʼ kuẍeʼya tukʼil t-xuʼjila moqa tchmila (Hebreos 13:4).