¿Noqpe kukx in kubʼ qnaʼn jlu? Miʼn. In tzaj tqʼamaʼn Xjan Uʼj qa o kyaj tqʼoʼn Dios jlu toj qanmi (Eclesiastés 3:11). Ax ikx in tzaj tqʼamaʼn qa «ate Dios at tkʼujlalil» (1 Juan 4:8). Qa ma qo ximen tiʼj tkyaqil jlu, ¿jakupe txi tqʼamaʼna qa o qo kubʼ tbʼinchaʼn Dios tukʼil jun tiʼ qgan ex mlay kambʼet quʼn?

Mi jun xjal taj tuʼn tkyim. Axpe ikx in tzaj tqʼamaʼn Tyol Dios qa jun «aj qʼoj» aju kamik (1 Corintios 15:26). At maj in che kyim naj xjal ex at maj yajxi, noqtzun tuʼnj qkyaqilx qo kyimel. Nim xjal nya kygan tuʼn kyximen tiʼj kamik, axpe ikx in che tzaj xobʼ tuʼn. ¿Kpolpe jun qʼij miʼn tentl kamik?

¿Ojtzqiʼn tuʼna qa mintiʼ kubʼ t-ximen Dios tuʼn kykyim xjal? In tzaj tyekʼin uʼj te Génesis qa tajtoq Dios tuʼn qanqʼin te jumajx tzalu twitz Txʼotxʼ. Bʼaj tbʼinchaʼn Jehová * Txʼotxʼ tuʼn tten tkyaqil tiʼchaq twitz. Yajxitl, kubʼ tbʼinchaʼn tnejel xinaq moqa ichan Adán tbʼi ex kubʼ tqʼoʼn toj jun tbʼanel najbʼil, aju attoq toj Edén. Te tibʼajxi, «o til Dios tkyaqilju otoq bʼant tuʼn, tbʼanilxix tkyaqil» (Génesis 1:26, 31).

Kubʼ bʼinchaʼn Adán ik tzeʼnx tilbʼilal Dios; jun xinaq tzʼaqli (Deuteronomio 32:4). Ax ikx te Eva,  aju t-xuʼjil, tzʼaqli t-xmilal ex t-ximbʼetz. Xi tqʼamaʼn Jehová jlu kye: «Che kʼwaʼline, chmet-x kybʼaje, kynojsame twitz txʼotxʼ ex che kawine tibʼaj. Kbʼel ten kykawbʼile kyibʼaj kyiẍ tuj mar, kyibʼaj chyuʼj ex txqantl jil in che lipan twitz kyaʼj, ex kyibʼaj kykyaqil txkup ateʼ twitz txʼotxʼ» (Génesis 1:28).

Oktoq kxel tiʼn ambʼil tuʼn tchmet kybʼet xjal twitz Txʼotxʼ. Tuʼn tjapun twi t-ximbʼetz Dios, iltoq tiʼj tuʼn kyul tal Eva, ex tuʼn tul kykʼwaʼl ex kyal qe tal, ajxi tnoj twitz Txʼotxʼ kyuʼn (Isaías 45:18). Qa mintiʼ tuʼn tok kyyekʼin Adán ex Eva aj tjapun twi t-ximbʼetz Jehová ex qa oʼkx tuʼn kyanqʼin chʼin ambʼil tuʼn tok kykeʼyin kywitz kykʼwaʼl ex kywitz kychman, mintiʼ ttxolil tuʼn t-xi tqʼoʼn Jehová kawbʼil lu kye.

Atzun jaʼlo ximana tiʼjju tuʼn kyxqʼuqin kyiʼj txkup. Iltoq tiʼj tuʼn tok tqʼoʼn Adán kybʼi, ex oktoq kxel tiʼn nim ambʼil tuʼn tbʼant jlu tuʼn (Génesis 2:19). Ax ikx, tuʼn tel tnikʼ tiʼj tzeʼn tuʼn t-xqʼuqin kyiʼj kykyaqil txkup, iltoq tiʼj tuʼn kyok tojtzqiʼn ex jakutoq txi tiʼn jlu mas ambʼil.

Tuʼntzunju, aqeju kabʼe kawbʼil xi tqʼoʼn Dios te Adán ex Eva, tuʼn t-xqʼuqin kyiʼj txkup ex tuʼn tnoj twitz Txʼotxʼ kyuʼn, in tzaj tyekʼin qa e kubʼ tbʼinchaʼn Dios tuʼn kyanqʼin nim ambʼil. Iktzun bʼaj, o tzʼanqʼin Adán nim abʼqʼi.

In tzaj tqʼamaʼn Tyol Dios qa tej naʼmxtoq ttzaj Nim Jbʼal, nim ambʼil in che anqʼintoq xjal ex nya ik tzeʼn toj ambʼil jaʼlo. In jaw quʼjin jlu toj Génesis 5:5: «Ten Adán twitz txʼotxʼ tuʼn tkyaqil 930 abʼqʼi». Ex yajxitl in yolin kyiʼj qaq xjal e anqʼin mas te 900 abʼqʼi: Set, Enós, Quenán, Jared, Matusalén ex Noé, aju qʼiʼntoq 600 abʼqʼi tuʼn tej ttzaj Nim Jbʼal (Génesis 5:6-27; 7:6; 9:29). ¿Tiquʼn e anqʼin nimxix ambʼil?

Kykyaqilx e ul itzʼj tej tzmatoq in nikʼ chʼin ambʼil toklen Adán ex Eva te aj il. Bʼalo tuʼn jlu e anqʼin nim ambʼil. Noqtzun tuʼnj, ¿tiʼ toklen tuʼn qok te tzʼaqli tukʼilju tuʼn qanqʼin nim ambʼil? Ex ¿tzeʼn kbʼel tiʼj kamik? Tuʼn kytzaqʼwet xjel lu, tnejel il tiʼj tuʼn tel qnikʼ tiʼj tiquʼn in qo tijen ex in qo kyim.