Xi tqʼamaʼn Dios jlu te Adán: «Qatzun ma txi tloʼna, ax tok kymela» (Génesis 2:17). Noqwit tuʼn ttijen Adán ex tuʼn tkyim, nyawtlo il tiʼj tuʼn t-xi qʼamaʼn jlu te. Ojtzqiʼntoq tuʼn Adán qa mlaytoq kyim qa mintiʼ xi tloʼn twitz tzeʼ.

Nyatoq il tiʼj tuʼn t-xi tloʼn Adán ex Eva twitz tzeʼ lu tuʼntzun kyanqʼin, tuʼnju attoq nim twitz tzeʼ toj tbʼanel najbʼil (Génesis 2:9). Noqwit mintiʼ xi kyloʼn twitz tzeʼ, xiwtlo kybʼiʼn Dios, aju xi qʼonte kychwinqlal, ex tuʼn jlu kubʼwitlo kyyekʼin qa a Dios at toklen tuʼn t-xi tqʼamaʼn kye tiʼ tuʼn tbʼant kyuʼn.

Tuʼn tel qnikʼ tiʼj tiquʼn e kyim Adán ex Eva, il tiʼj tuʼn qxnaqʼtzan tiʼj jun yol, aju kukx in tzaj nya bʼaʼn qiʼj tuʼn toj ambʼil jaʼlo. Ajbʼen moqa ajon jun kan moqa lobʼaj tuʼn Satanás, jun nya bʼaʼn anjel, tuʼn t-xi tqʼamaʼn jun nikʼaj yol. In tzaj tqʼamaʼn Tyol Dios jlu: «Atzunte lobʼaj mastoq jawni twitz kywitz kykyaqil txkup ateʼ tuj kʼul, aqeju otoq che bʼant tuʼn Qman Dios. Xitzun tqanin lobʼaj te xuʼj kyjaʼ: —¿Maj o tzaj tmaʼn Dios kyeye tuʼn miʼn t-xi kyloʼne twitz tkyaqil tzeʼ kyxol awal lu?» (Génesis 3:1).

Xi ttzaqʼweʼn Eva: «Bʼaʼn t-xi qloʼne kywitz tzeʼ kyxol awal lu, atzun tiʼj twitz tzeʼ tkubʼ tuj tmij awal tzaj tmaʼn Dios kyjaʼ: Miʼn txi kyloʼne ex miʼn tzʼok kymakoʼne, tuʼntzun miʼn kykyime». Atzunte kan xi tqʼamaʼn te: «Mlay che kyime. Porke ojtzqiʼn tuʼn Dios, ok t-xi kyloʼne twitz tzeʼ lu, kjaqetel kynabʼle, che okele ik tzaʼn te Dios ex kʼelel kynikʼe tiʼj bʼaʼn ex tiʼj mya bʼaʼn». Kyuʼn yol lu, xi tqʼamaʼn Satanás qa jun nikʼal yol te Jehová ex qa el tiʼn ambʼil kye tiʼj jun tiʼ tbʼanelxix (Génesis 3:2-5).

Kubʼ sbʼuʼn Eva. Ok ten keʼyil tiʼj tzeʼ. Tbʼanel ela toj twitz. Xi tnuqpiʼn tqʼabʼ, el tiʼn twitz tzeʼ ex xi tloʼn. In tzaj tqʼamaʼn Tyol Dios tiʼ bʼaj yajxitl: «Ax ikx xi tqʼoʼn te tchmil. Ax ikx te xi tloʼn» (Génesis 3:6).

Tzajlo nimxix tbʼis Dios tej tok tqʼoʼn twitz kyiʼj tkʼwaʼl tej tkubʼ kyximen tuʼn miʼn kynimen te. ¿Tiʼ bʼant tuʼn Dios? Xi tqʼamaʼn jlu te Adán: «Kʼelel aʼ tiʼj twiʼya tuʼn tknet twaya okxi taj meltzʼaja tuj txʼotxʼ, porke tiʼj txʼotxʼ kubʼ bʼinchaʼna; tquqil txʼotxʼa, ex ax tquqil txʼotxʼ kʼokela ok tkyima» (Génesis 3:17-19). Ex iktzun bʼaj, «ten Adán twitz txʼotxʼ tuʼn tkyaqil 930 abʼqʼi ex kyim» (Génesis 5:5). Tej tkyim Adán, mintiʼ xiʼ toj kyaʼj nix toj juntl lugar. Mintiʼtoq Adán tej naʼmxtoq tkubʼ tbʼinchaʼn Jehová tiʼj tquqil txʼotxʼ, ex tej tkyim, ok te quq juntl maj, toj juntl yol, kubʼ naj. ¡Bʼisbʼajilxix jlu!

Ok Adán ex Eva te aj il tuʼnju kubʼ kyximen tuʼn miʼn kynimen te Jehová ex xi kynajsaʼn ambʼil tuʼn kyanqʼin te jumajx. Tojx ambʼil lu, chʼexpaj kyxmilal ex e ok te aj il. Noqtzun tuʼnj, nya oʼkx kyiʼj tzaj nya bʼaʼn, sino kykyaqil kyxeʼchel moqa kyyajil el kyiqen il. In tzaj tqʼamaʼn Romanos 5:12 jlu: «Kyjaʼtzun, ik tzaʼn noq tuʼn jun xinaq okx il kyxol kykyaqil xjal, ex tuʼnju il tzaj kamik, kyjaʼtzun ilxix tiʼj tuʼn kykyim kykyaqil xjal tuʼnju kykyaqil e bʼinchan il».

In tzaj tqʼamaʼn Tyol Dios qa ik tten il ex kamik ik tzeʼn jun «xbʼalun in maqsinte kyiʼj kykyaqil tnam, tukʼix ju xbʼalun likʼun kyibʼaj kykyaqil nasyon» (Isaías 25:7). A t-xilen jlu qa mi jun jaku tzaqpaj tiʼj il ex tiʼj kamik. Ikju, «in che kyim kykyaqil xjal noq tuʼnju tiyjil Adán qe» (1 Corintios 15:22). Axlo xjel in nul toj qwiʼ ik tzeʼn aju kubʼ t-xjelin apóstol Pablo: «¿Alkye ktzoqpilte weye teju nximlale lu in chinx tiʼn tuj kamik?». ¿Atpe jun xjal jaku qo klet tuʼn? (Romanos 7:24).