NAʼMX tchʼexpaj t-ximbʼetz Dios at kyiʼj xjal maske kyaj qʼoʼn il ex kamik qibʼaj kyuʼn tnejel qtat tej mintiʼ e nimen te Dios. Kukx in tzaj tqʼamaʼn toj Tyol qa naʼmx tchʼexpaj t-ximbʼetz.

• «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29).

• «Te jumajx knajel kamik tuʼn Qman, kʼelel t-suʼn taʼl kywitz kykyaqil» (Isaías 25:8).

• «Aju mankbʼil aj qʼoj tuʼn tkubʼ xitj, ate kamik» (1 Corintios 15:26).

• «Ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj» (Apocalipsis 21:4).

¿Tiʼ kbʼantel tuʼn Dios tuʼn tkubʼ tnajsaʼn kamik te jumajx? Ik tzeʼn ma tzʼel qnikʼ tiʼj, in tzaj tqʼamaʼn Tyol Dios qa aʼyeju «xjal bʼaʼn ok che etzal tiʼj ju txʼotxʼ [...] te jumajx». Noqtzun tuʼnj, ax ikx in tzaj tqʼamaʼn qa «mi aʼl jun xjal at twitz txʼotxʼ tzʼaqlxix wen in tbʼinchaʼn aju bʼaʼn ex bʼajx bʼinchan il» (Eclesiastés 7:20). ¿Ape t-xilen jlu qa miʼn tzʼok tqʼoʼn Dios toklen qe tkawbʼil tuʼntzun qanqʼin te jumajx? Nya a t-xilen. Mlayx bʼant aju tuʼn, tuʼnju «mibʼan te Dios nikʼan yol» (Tito 1:2). ¿Tiʼtzun kbʼantel tuʼn tuʼn tjapun twiʼ t-ximbʼetz attoq kyiʼj xjal?

Onin tkʼujlabʼil Jehová tiʼj tuʼn ttzaj tqʼoʼn chojbʼil tuʼntzun qklet tiʼj kamik. Aj tyolin Tyol Dios tiʼj chojbʼil, in xi qʼet jlu tuʼn tchjet jun nya bʼaʼn otoq bʼant moqa tuʼn tkyaj jun tiʼ toj ttxolil. Ikx chojbʼil tuʼn t-xi qʼet ik tzeʼnx aju otoq naj. Tuʼnju qkyaqilx aj il qoʼ ex atoʼ tjaqʼ kamik, in tzaj tqʼamaʼn Tyol Dios jlu: «Mi jun xjal jaku bʼant tklonte jun tukʼil ex mlay bʼant t-xi tchjoʼn te Dios tuʼn tklet. Maske at nim tpwaq, pero mlay laqʼet tchwinqlal tukʼil tuʼn» (Salmo 49:7, 8).

At tkyim jun xjal aj il, oʼkx te til in chjet. Mlay bʼant tuʼn tklet tuʼnx tibʼ ex mlay chjet til juntl xjal tuʼn (Romanos 6:7). Tuʼntzunju iltoq tiʼj tuʼn tbʼant chojbʼil tuʼn jun xjal tzʼaqli, nya tuʼn tchjet til sino aju qe qil (Hebreos 10:1-4).

Atzun jlu bʼant tuʼn Dios. Tzaj tsamaʼn Jesús, aju Tkʼwaʼl, tzalu twitz Txʼotxʼ tuʼntzun tok te jun xjal tzʼaqli (1 Pedro 2:22). Tqʼama Jesús qa ul tuʼn t-xi tqʼoʼn tibʼ tuʼn tkyim tuʼntzun kykolpet nimku xjal (Marcos 10:45). Kyim tuʼn tkubʼ tiʼj kamik tuʼn ex tuʼn ttzaj tqʼoʼn ambʼil qe tuʼn tten qchwinqlal te jumajx (Juan 3:16).

Tuʼnju kwest anqʼibʼil toj ambʼil jaʼlo, in nel qnikʼ tiʼj qa in japun kywiʼ yol e kyaj qʼamaʼn toj Tyol Dios, qa in qo anqʼin «tuj mankbʼil tqʼijlalil» (2 Timoteo 3:1). Kbʼel bʼaj mankbʼil tqʼijlalil «tuj tqʼijlalil jwisi ex tuj tqʼijlalil ok kynaj qe xjal mya nimal Dios qe» (2 Pedro 3:3, 7). Aʼyetzun xjal kʼujlaʼn Dios kyuʼn ok che kjel anqʼin ex che tzalajel tiʼj «chwinqlal te jumajx» (Mateo 25:46).

Aj kyjaw anqʼin nim millón xjal kxel qʼoʼn ambʼil kye tuʼn kyanqʼin te jumajx. Jaku che jaw anqʼin xjal tuʼn Jesús. Tej tikʼ toj tnam Naín, tuʼnju tzaj qʼaqʼin tkʼuʼj tiʼj jun mebʼa xuʼj jaw anqʼin tal tuʼn (Lucas 7:11-15). Ax ikx tqʼama apóstol Pablo jlu: «Ex qʼuql nkʼuʼje tiʼj Dios, [...] qa ok che jawil anqʼin qe kyimni, tzaʼnx qeju tzʼaqlxix, ax ikx qeju mya tzʼaqlxix». Aju qʼuqbʼil qkʼuʼj lu atzun jun yekʼbʼil tiʼj tkʼujlabʼil Dios at kyiʼj xjal (Hechos 24:15).

 Nim millón xjal kxel qʼoʼn ambʼil kye tuʼn kyanqʼin te jumajx. In tzaj ttziyen Tyol Dios jlu: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29). Iktzun tten tukʼil tzalajbʼil kxel kyqʼamaʼn aʼyex yol tqʼama apóstol Pablo ma tzikʼ junlo kabʼe mil abʼqʼi: «Aya kamik, ¿jatumtzun ma pon tipumala tuʼn qkʼixbʼisanjtze tuʼna? Aya kamik, ¿jatum taʼ tipumala tuʼn tkubʼ qiʼje tuʼna?» (1 Corintios 15:55). ¡Toj ambʼil lu otoq kubʼ tiʼj matij aj qʼoj kyiʼj xjal!