Qnimsaʼnktz Jehová tukʼil tkyaqil qgan
«Kynimsaʼnktze tbʼi Qman kykyaqile, porque [...] qe tnam xjal kyuʼnx in xi kyqʼon kyibʼ tuʼn kyxiʼ tuj qʼoj» (JUECES 5:2).
1, 2. a) ¿Tiʼ kyqʼama Elifaz ex Bildad tiʼj t-ximbʼetz Jehová at tiʼj qajbʼebʼil te? b) ¿Tiʼ tzaj tqʼamaʼn Jehová tiʼjju otoq kyqʼama xjal lu?
MA TZIKʼ nim ambʼil, i eʼx oxe xjal yolil tukʼil jun tmajen Jehová Job tbʼi. Jun kyxol qe xjal lu, ten Elifaz. Xi tqanin Elifaz qe xjel lu, aqeju nim kyoklen: «¿Chipetzuna qa tuʼnju at nimxix tnabʼl xjal at tajbʼen te Dios? ¿Ti tajbʼen te Dios aju at tipumal tuʼn tbʼant tkyaqil tuʼn qa aya puro tzʼaqlxix ex mintiʼ tpaltila?» (Job 22:1-3). Qʼuqlixix tkʼuʼj Elifaz qa aju tzaqʼwebʼil kyiʼj xjel lu, aju qa mintiʼ. Bildad tbʼi juntl xjal yolin tukʼil Job. Xi tqʼamaʼn Bildad te Job qa mlayx ten jun xjal tzʼaqli toj twitz Dios (kjawil uʼjit Job 25:4).
2 Ok tilil tuʼn Elifaz ex Bildad tuʼn tkubʼ t-ximen Job qa mintiʼ tajbʼen aj tok tilil tuʼn tuʼn tajbʼen te Jehová. Kyajbʼiltoq tuʼn tkubʼ t-ximen Job qa ik qten toj twitz Dios ik tzeʼn qe puʼt, moqa ik tzeʼn jun ẍchuqʼ (Job 4:19; 25:6). Jakulo kubʼ qximen qa kyqʼama jlu tuʼnju mintiʼ in jawtoq kynimsan kyibʼ (Job 22:29). Ax tok, mlay tzʼok qmojbʼaʼn qoklen tukʼil Jehová tuʼnju mas nim te toklen qwitz. Aj qjapun twiʼ jun witz matij moqa aj tetz qkeʼyin ttzi tventan jun avión, in nel qnikʼ tiʼj qa nya nim qoklen. Noqtzun tuʼnj, ¿ikpe t-ximbʼetz Jehová ik tzeʼn jlu aj tok tqʼoʼn twitz tiʼj qa in nok tilil quʼn tuʼn qajbʼen te ex tuʼn qonin tiʼj Tkawbʼil? Miʼn. Xi tqʼamaʼn Jehová te Elifaz, Bildad ex te juntl kyukʼil aju Zofar tbʼi qa nya ax tok aju otoq kyqʼama. Yajxitl tqʼama qa in tzalaj tiʼj Job ex ok tqʼoʼn tbʼi te «nmajene» (Job 42:7, 8). Tuʼntzunju jaku tzʼok qeʼ qkʼuʼj tiʼj qa jaku qo ajbʼen te Jehová maske aj il qoʼ.
¿TIʼ IN XI QQʼOʼN TE DIOS?
3. Aj tok tilil quʼn tuʼn qajbʼen te Jehová, ¿tiʼ tqʼama Elihú tiʼj jlu ex tiʼ tajbʼiltoq tuʼn ttzaj tqʼamaʼn tuʼn jlu?
3 In bʼiʼntoq kuʼxun Elihú tiʼj kyyol oxe xjal tukʼil Job. Tej kybʼaj yolin, tqʼama Elihú jlu tiʼj Jehová te Job: «Ex qa bʼaʼn in tbʼinchaʼna, mintiʼ jun in xi tqʼoʼna te tuʼn jlu, mintiʼ jun bʼaʼn in tbʼinchaʼna te» (Job 35:7). ¿Tajbʼiltoq Elihú tuʼn ttzaj tqʼamaʼn qa mintiʼ tajbʼen aj tok tilil quʼn tuʼn qajbʼen te Jehová? Miʼn. Mintiʼ xi tkawin Jehová Elihú ik tzeʼn qeju oxetl xjal. Aju tajtoq Elihú tuʼn ttzaj tqʼamaʼn, aju qa toj twitz Jehová nya il tiʼj tuʼn qkʼulin te. ¿Tiquʼn? Tuʼnju mintiʼ jun tiʼ atx taj te Jehová tuʼn t-xi qqʼoʼn te. Mlay ten mas tipumal Jehová ex mlay tzʼok te qʼinun tuʼn jun tiʼ in bʼant quʼn. Nya oʼkxju, kykyaqil tbʼanel qmod ex aju qipumal at tuʼn kybʼant junjun tiʼ quʼn, a Jehová in tzaj qʼonte ex in nok tqʼoʼn twitz tiʼj alkye tten in najbʼen quʼn.
4. ¿Tiʼ in kubʼ tnaʼn Jehová aj t-xi qbʼinchaʼn jun xtalbʼil kye txqantl?
4 Aj tkubʼ qyekʼun qkʼujlabʼil kyiʼj tmajen Jehová, in nok tqʼoʼn twitz tiʼj. Aj tkubʼ qbʼinchaʼn tbʼanel tiʼchaq kyiʼj, in nok tqʼoʼn Jehová ik tzeʼn te otoq txi qbʼinchaʼn. In tzaj tqʼamaʼn Proverbios 19:17 jlu: «Aju xjal in xi tqʼoʼn tkotz jun xjal mebʼa, mer ik tzaʼn tchʼex Qman in xi tqʼoʼn, ex tuʼnx Qman kʼajel tqʼoʼn t-xel te». Tkyaqil maj aj tkubʼ qyekʼun qʼaqʼbʼil qkʼuʼj tiʼj jun xjal, in nok tkeʼyin Jehová. Maske a Bʼinchal tkyaqil, in kubʼ tnaʼn qa at tkʼas qukʼil aj t-xi qbʼinchaʼn jun xtalbʼil kye txqantl ex in tzaj tqʼoʼn t-xel qe tukʼil nim kʼiwlabʼil. Ax Tkʼwaʼl Jehová kyaj qʼamante qa ik tten jlu (kjawil uʼjit Lucas 14:13, 14).
5. ¿Alkyeqe xjel che xel qtzaqʼweʼn kyoj junjuntl taqikʼ?
5 Toj ambʼil ojtxe, xi tqʼoʼn Jehová txokbʼil tiʼj tsanjel Isaías tuʼntzun tok te t-xel ex tuʼn tajbʼen te toj jun tbʼanel tten (Isaías 6:8-10). Tuʼn tkyaqil tkʼuʼj Isaías xi tkʼamoʼn txokbʼil ex tqʼama jlu: «Lu qine lu, chin t-samanxa». Toj ambʼil jaʼlo, in xi tqʼoʼn Jehová ambʼil kye tmajen tuʼn kyonin tukʼil. At nim mil in kubʼ kyyekʼun kymod ik tzeʼn te Isaías. Kyajbʼil tuʼn kyajbʼen toj junxichaq tten te Jehová noq jaxku tumel, axpe ikx qa kwest tuʼn tbʼant. Maske ikju, atlo junjun o kubʼ kyximen ik tzeʼn jlu: «In xi nqʼoʼne chjonte te Jehová tuʼnju in tzaj tqʼoʼn ambʼil weye tuʼn wajbʼene te. Noqtzun tuʼnj, ¿nimpe toklen aju kbʼantel wuʼne? ¿Mlaype txi tjyoʼn Jehová juntl tumel tuʼn tbʼant aqʼuntl?». Che xel qtzaqʼweʼn xjel lu kyoj junjuntl taqikʼ aj qxnaqʼtzan tiʼjju bʼaj kyiʼj kabʼe tmajen Jehová e ten toj ambʼil ojtxe, aju Débora ex Barac.
ONIN JEHOVÁ KYIʼJ TUʼN MIʼN KYTZAJ XOBʼ
6. ¿Tiquʼn jakutoq kubʼ ximet qa nya kwest tuʼn tkubʼ kyiʼj aj Israel kyuʼn tsoldad Jabín?
6 Ok Barac te jun nejenel kyxol soldad te tnam Israel, atzunte Débora jun tsanjel Dios. Otoq kubʼ tyajin aj kawil Jabín te tnam Canaán qe xjal te tnam Israel kyoj 20 abʼqʼi. Puro txʼuʼj kywiʼ tsoldad Jabín ex nya bʼaʼn xjal qe, mintiʼtoq in che etz qe aj Israel tiʼjxi kyja tuʼnju in che xobʼtoq. Attoq 900 kar in che ajbʼen toj qʼoj kyukʼil tsoldad Jabín ex tok cortador kʼuxbʼil kyiʼj. Atzun kye aj Israel, mintiʼ tbʼanel tiʼchaq tuʼn tajbʼen toj qʼoj kyukʼil nix qe tiʼchaq tuʼn tok kyxqʼuqin kyibʼ (Jueces 4:1-3, 13; 5:6-8) * (qʼonka twitza tiʼj tqanil).
7, 8. a) ¿Alkyeqe tnejel tqanil xi tqʼoʼn Jehová te Barac? b) ¿Alkye tten kubʼ kyiʼj kysoldad Jabín kyuʼn aj Israel? (Qʼonka twitza tiʼj tnejel tilbʼilal).
7 Qa ma tzʼok qmojbʼaʼn kysoldad Jabín kyukʼil qe aj Israel, jaku txi qqʼamaʼn qa mintiʼtoq kyipun ex nya kwesttoq tuʼn tkubʼ kyiʼj. Noqtzun tuʼnj, ajbʼen aj sanjel Débora tuʼn Jehová tuʼntzun t-xi tqʼamaʼn qe tqanil lu te Barac: «Kyxiʼtzune twi witz Tabor. Wuʼne ktzajel wiʼne Sísara aju nejenel kye t-soldad Jabín, tuʼn tul tuj tqʼabʼ xaq Cisón, kyukʼix qe tkarwaj ex qe t-soldad, tuʼntzun tok tzoqpaj qʼojlel tiʼja. Pero che tzajel nqʼoʼne tuj tqʼabʼa tuʼn tkubʼ kyiʼj tuʼna, chi Dios teya» (Jueces 4:4-7).
8 Ex qʼoʼn tqanil qa il tiʼj tuʼn kyonin xjal. Ex tuʼn jlu ok kychmon kyibʼ 10,000 xjal twiʼ witz Tabor. Iktzun tten xiʼ Barac kyukʼix qeju 10,000 xjal qʼojil toj jun lugar Taanac tbʼi (kjawil uʼjit Jueces 4:14-16). ¿Oninpe Jehová kyiʼj aj Israel? Onin. Noq minabʼen, kubʼ nim jbʼal ex kubʼ nim xoqʼl tojju lugar jatumel in che qʼojintoq. Tuʼn jlu tzaj tiʼn tbʼanel kye aj Israel. Oktzun lepeʼ Barac kyiʼj tsoldad Sísara tzmaxi tej kypon toj jun lugar Haróset tbʼi, aju in xi tiʼn 24 kilómetros tuʼn qpon toj. Tojlo tmij bʼe kyaj qʼet tkar Sísara toj xoqʼl. Tuʼntzunju, kuʼtz Sísara toj tkar ex xi ojqelan tuʼn tqan tzmax tej tpon Zaananim. Atztzu, okx tewin tibʼ toj tja Jael. Tuʼnju otoq sikt, jun rat naj ikʼ jtan. Akux in jtantoq, ten tipumal Jael ex kubʼ tbʼyoʼn (Jueces 4:17-21). Otoq tzʼonin Jehová kyiʼj aj Israel tuʼn tkubʼ kyiʼj aj qʼoj kyuʼn * (qʼonka twitza tiʼj tqanil).
JUN KʼLOJ XJAL E ONIN EX JUNTL KʼLOJ MINTIʼ ONIN
9. ¿Alkye xnaqʼtzbʼil in tzaj tqʼoʼn qe aju txʼolbʼabʼil tiʼj qʼoj tkuʼx toj Jueces 5:20, 21?
9 In tzaj tqʼoʼn capítulo 5 te uʼj te Jueces mas tqanil tiʼjju in tzaj tqʼamaʼn capítulo 4. In tzaj tqʼamaʼn Jueces 5:20, 21 jlu: «Max twitz kyaʼj ex max jatum in che bʼet qe cheʼw twitz kyaʼj, e ok ten qe cheʼw qʼojlel tiʼj Sísara; kykyaqil aj qʼoj e bʼaj naj tuʼn tqʼabʼ xaq Cisón». ¿In yolinpe jlu tiʼj qa e onin anjel kyiʼj aj Israel toj qʼoj, moqa in yolin tiʼj qa e tzaj tzʼaq nim cheʼw? Mintiʼ in tzaj tqʼamaʼn Tyol Dios. Noqtzun tuʼnj, qʼanchaʼlxix qa a Jehová kolin kyiʼj tmajen tej ttzaj tqʼoʼn jun nintz jbʼal tojxix ambʼil at tajbʼen ex tojxix lugar jatumel tuʼn tkubʼ. Iktzun tten ya kwest tuʼn kybʼet qe 900 kar. In tzaj tyekʼun Jueces 4:14, 15 qa a Jehová onin kyiʼj aj Israel tuʼn kykambʼan kyoj oxe qʼoj. Mlaytoq tqʼama ni jun kyxol qeju 10,000 xjal otoq txi kyqʼon kyibʼ tuʼn kyqʼojin qa kyuʼn otoq che kambʼan tiʼj qʼoj.
10, 11. ¿Tiʼ in nok te Meroz ex tiquʼn kubʼ qʼoʼn tkastiw?
10 Qo xnaqʼtzan tiʼj jun tqanil nim toklen tiʼj txʼolbʼabʼil lu. Tej otoqxi che kambʼan aj Israel, xi tbʼitzin Débora ex Barac jun bʼitz te nimsabʼil Jehová. In tzaj tqʼamaʼn chʼin bʼitz qe yol lu: «E tkubʼ tzʼaq jun nintz kastiw tibʼaj [...] Meroz ex kyibʼaj qe xjal najlqe tuj, tuʼnju mintiʼ e tzaj onil te Qman tuʼn tqʼojin kyiʼj qe xjal kyuw kykʼuʼj tuj qʼoj» (Jueces 5:23).
11 ¿Tiʼ in nok te Meroz? Mintiʼxix ojtzqiʼn quʼn. Noqtzun tuʼnj, aju kastiw kubʼ qʼon tibʼaj, tzaj tiʼn nya bʼaʼn tiʼj ex bʼiʼx kubʼ naj. Bʼalo jun tnam Meroz aju mintiʼ ten tajbʼil tuʼn tonin tiʼj Barac toj qʼoj. Bʼaʼn tuʼn ttzaj qnaʼn qa xi kyqʼon kyibʼ 10,000 xjal tuʼn kyqʼojin kyiʼj xjal te Canaán. Tuʼntzunju, jaku txi qqʼamaʼn qa ok kybʼiʼn xjal te Meroz tqanil qa il tiʼj tuʼn kypon xjal onil toj qʼoj. Ax ikx, oklo Meroz te jun tnam jatumel ikʼ Sísara akux in nel oq twitz Barac. Xilo qʼoʼn ambʼil kye xjal te Meroz tuʼn ttzaj kytzyuʼn Sísara ex mintiʼ bʼant kyuʼn. Noq oʼkx jaku qo ximen tiʼj tej tok kyqʼoʼn xjal kywitz tiʼj jun aj qʼoj nim tipun, aju in ojqelintoq toj tbʼe tuʼntzun tklet. Mintiʼ jun tiʼ bʼant kyuʼn xjal tuʼn kyonin tiʼjju t-ximbʼetz Jehová. Noqwit e onin, e tzajlo kʼiwlaʼn tuʼn Jehová. Noqtzun tuʼnj, mintiʼ ajbʼen ambʼil lu kyuʼn. Junxitl kymod xjal te Meroz kubʼ kyyekʼun ik tzeʼn te Jael, aju mintiʼ tzaj xobʼ (Jueces 5:24-27).
12. a) ¿Alkye kabʼe mod junxitl in tzaj qʼamaʼn toj Jueces 5:9, 10? b) ¿Tiʼ xnaqʼtzbʼil in tzaj tqʼoʼn txʼolbʼabʼil lu qe?
12 Toj Jueces 5:9, 10 jaku tzʼok qqʼoʼn qwitz tiʼj qa junxitl kymod qeju 10,000 xjal i eʼx qʼojil kywitz qeju mintiʼ i eʼx. Ok tqʼoʼn Débora ex Barac kyoklen «qe nejenel ateʼ kyxol aj Israel, ex [...] qeju kyuʼnx in xi kyqʼon kyibʼ tuʼn kyxiʼ tuj qʼoj». Mintiʼ e ok qe jlu ik tzeʼn qeju in che bʼet «kyibʼaj qe ttxuʼ bur» kyaq keʼyin kyiʼj, aqeju in kubʼ kyximen qa nim kyoklen tuʼn kyxiʼ toj qʼoj. In tzaj tqʼamaʼn Tyol Dios qa in che kubʼtoq qeʼ «tibʼaj jun xbʼalun tbʼanilxix» ex qa noq in che bʼettoq. Toj juntl yol, in che tzalajtoq tiʼj jun tbʼanel kyanqʼibʼil. Atzun qeju xjal xi kyqʼon kyibʼ tuʼn kyqʼojin junx tukʼil Barac, e qʼojin toj xaq twi witz Tabor ex tojju chqʼajlaj xobʼajil te Cisón. Aqeju kyajtoq tuʼn tten jun tbʼanel kyanqʼibʼil, xi qʼamaʼn jlu kye: «Che ximane tiʼj jlu». A jlu in yolin tiʼj qa iltoq tiʼj tuʼn kyximen tiʼj ambʼil xi qʼoʼn kye tuʼn kyaqʼunan tukʼil Jehová ex mintiʼ ajbʼen kyuʼn toj tumel. Toj ambʼil jaʼlo, ax ikx qe il tiʼj tuʼn qximen tiʼj tiʼ qmod in kubʼ qyekʼun aj qajbʼen te Jehová.
13. ¿Tiquʼn junxitl kymod kʼloj xjal te Rubén, Dan ex Aser kubʼ kyyekʼun kywitz qeju kʼloj xjal te Zabulón ex Neftalí?
13 Aʼyeju 10,000 xjal xi kyqʼon kyibʼ tuʼn kyxiʼ qʼojil, ok kyqʼoʼn kywitz tiʼj qa a Jehová in Kawin tibʼaj tkyaqil. Jakutoq Jueces 5:11). Atzun qeju kʼloj xjal te Rubén, Dan ex Aser, mas ok kyqʼoʼn kywiʼ tiʼj tuʼn kyxqʼuqin kyalun, kybark ex tuʼn kyten ttzi mar twitzju tuʼn kyajbʼen te Jehová (Jueces 5:15-17). Noqtzun tuʼnj, ik tzeʼn ma tzʼel qnikʼ tiʼj qa nya kykyaqil kʼloj xjal e ok ik tzeʼn kye. Aqeju kʼloj xjal te Zabulón ex Neftalí xi kyqʼon kyibʼ tuʼn kykyim tuʼntzun kyonin tiʼj Débora ex tiʼj Barac (Jueces 5:18). Jaku tzʼel qiʼn tbʼanel xnaqʼtzbʼil tiʼj junxichaq kymod aj Israel kubʼ kyyekʼun tej t-xi qanin onbʼil tuʼn kyajbʼen te Jehová.
txi kyqʼamaʼn kye txqantl qa otoq «kambʼan» Jehová «kyiʼj aj qʼoj» («KYNIMSAʼNKTZE TBʼI QMAN»
14. ¿Alkye tten in kubʼ qyekʼun qa in qo onin tiʼj toklen Jehová toj ambʼil jaʼlo?
14 Toj ambʼil jaʼlo, mintiʼ tuʼn qxiʼ toj jun qʼoj tuʼntzun qonin tiʼj Jehová, aju aj kawil qibʼaj. Noqtzun tuʼnj, in qo onin tiʼj aj tok tilil quʼn tuʼn qpakbʼan ex mintiʼ in tzaj t-xobʼil qiʼj. Mas nim toklen toj ambʼil jaʼlo tuʼn tten qgan tuʼn qajbʼen te Jehová. Ateʼ nim millón ermano ex ermana in xi kyqʼon kyibʼ tuʼn kyajbʼen te Jehová toj junxichaq tten toj tkyaqil ambʼil. Jun techel, ateʼ junjun in che ok te precursor, in che ajbʼen toj Betel moqa in che onin tuʼn kyjaw bʼinchet Ja te Chmabʼil. Junjuntl in che onin tiʼj aqʼuntl toj jun nimaq chmabʼil. Ex ateʼ ansyan in che onin kyiʼj Kʼloj Yolil kyukʼil Qʼanil ex in che onin tuʼn kybʼaj nukʼet nimaq chmabʼil. Jaku tzʼok qeʼ qkʼuʼj tiʼj qa nim toklen toj twitz Jehová aj qajbʼen te tuʼn tkyaqil qgan jaxku tumel ex mlayx tzikʼ tnaʼl jlu tuʼn (Hebreos 6:10).
Naʼmxtoq tkubʼ qbʼinchaʼn jun tiʼ, bʼaʼn tuʼn qximen tiʼj tiʼ jaku tzaj kyiʼj toj qja ex kyiʼj erman tuʼn. (Qʼonka twitza tiʼj taqikʼ 15).
15. ¿Alkye tten jaku tzʼel qnikʼ tiʼj qa ya mintiʼ in nok tilil quʼn tuʼn qajbʼen te Jehová?
15 Qkyaqilx bʼaʼn tuʼn qximen tiʼj qa qaj tuʼn qajbʼen tuʼn tkyaqil qgan te Jehová. * (qʼonka twitza tiʼj tqanil).
Jaku kubʼ qxjelin qe xjel lu: «¿In kyajpe nqʼoʼne tkyaqil aqʼuntl toj kykwent txqantl? ¿Maspe in nok tilil wuʼne tuʼn kykanet nim tiʼchaq weye twitzju tuʼn wajbʼene te Jehová? Moqa ik tzeʼn bʼant tuʼn Barac, Débora, Jael ex qeju 10,000 xjal, ¿in kubʼpe nyekʼune qʼuqbʼil nkʼuʼje ex wipune aj tajbʼen tkyaqil wuʼne tuʼn wajbʼene te Jehová? ¿In chin ximane tiʼj tuʼn nxiʼye toj juntl tnam tuʼntzun tkanet mas npwaqe ex tuʼn tten jun wanqʼibʼile mas tbʼanel? Qa ikju, ¿in xi nqanine onbʼil te Jehová tuʼn tel nnikʼe tiʼj tiʼ jaku tzaj kyiʼj toj njaye ex kyiʼj erman tuʼn chʼixpubʼil lu?»16. Maske at tkyaqil tiʼchaq tukʼil Jehová, ¿tiʼ jaku txi qqʼoʼn te?
16 In tzaj tqʼoʼn Jehová jun tbʼanel qoklen tuʼn qonin tiʼj tkawbʼil. Atxix toj ambʼil tej tten Adán ex Eva, o tzʼok tilil tuʼn Satanás tuʼn tel kypan kyibʼ xjal tiʼj Jehová. Noqtzun tuʼnj, aj in qo onin tiʼj tkawbʼil, in kubʼ qyekʼun te Satanás qa atz in qo onin tiʼj Jehová. Qa kukx in qo ajbʼen te Jehová ex at qʼuqbʼil qkʼuʼj, kʼonil jlu qiʼj tuʼn t-xi qqʼon qibʼ tuʼn qajbʼen te ex ktzalajel quʼn (Proverbios 23:15, 16). Aj qonin ex aj qnimen te Jehová, jaku che ajbʼen jlu tuʼn tuʼntzun t-xi tqʼoʼn tzaqʼwebʼil te Satanás aj in xmayin (Proverbios 27:11). Aj qnimen te Jehová in xi qqʼoʼn jun tiʼ te aju nim toklen toj twitz ex nim in jaw tzalaj tuʼn.
17. ¿Tiʼ xnaqʼtzbʼil in tzaj tqʼoʼn Jueces 5:31 qe tiʼjju kbʼajel toj ambʼil tzul?
17 Toj chʼintl ambʼil, knojel twitz Txʼotxʼ kyuʼn xjal oʼkx in che onin tiʼj tkawbʼil Jehová. Qajxix tuʼn tpon ambʼil lu. In kubʼ qnaʼn ik tzeʼn te Débora ex Barac tej t-xi kybʼitzin jlu: «Kyjaʼwt che tenbʼa kykyaqil qe aj qʼoj tiʼja Nman; atzun qeju in che kʼujlan teya, ikwit che ok ik tzaʼn tqan qʼij ok in jawil qoptzʼaj» (Jueces 5:31). Kjapunel kywiʼ yol lu aj tkubʼ t-xiten Jehová tkyaqilju tokx tjaqʼ tkawbʼil Satanás. Aj t-xi tzyet Armagedón, mlay tzaj tqanin Jehová onbʼil qe tuʼn tkubʼ kyiʼj qe aj qʼoj. Aju kbʼantel quʼn, noq qo kjel txuleʼ ex kʼokel qqʼoʼn qwitz tiʼj alkye tten qo kletel tuʼn Jehová (2 Crónicas 20:17). Akux in pon ambʼil aju, in tzaj qʼoʼn tbʼanel ambʼil qe jaʼlo tuʼn qonin tiʼj tkawbʼil Jehová tuʼn tkyaqil qipun ex tuʼn kukx tok tilil quʼn.
18. ¿Alkye tten jaku tzʼonin kyiʼj txqantl qa ma txi qqʼon qibʼ tuʼn qajbʼen te Jehová?
18 Tej tbʼaj qʼoj, tzyet tbʼitzin Débora ex Barac tuʼn tjaw kynimsaʼn Jehová ex nya qeju xjal. Xi kybʼitzin jlu: «Kynimsaʼnktze tbʼi Qman kykyaqile, porque [...] qe tnam xjal kyuʼnx in xi kyqʼon kyibʼ tuʼn kyxiʼ tuj qʼoj» (Jueces 5:1, 2). Ax ikx qe jaku txi qqʼon qibʼ tuʼn qajbʼen te Jehová ik tzeʼn te tajbʼil. Qa ma bʼant jlu quʼn, jaku tzʼonin kyiʼj txqantl tuʼn tok tilil kyuʼn tuʼn tjaw kynimsaʼn Jehová.
^ taqik' 6 Jun cortador, moqa jun hoz, a jlu jun kuchiy matij tqan ex at maj ẍok tiʼj. Atzlo in che ok qʼoʼn cortador toj kymij kyyantil kar in che ajbʼentoq toj qʼoj. Kyiʼjxi yant in che ok qʼoʼn cortador, tuʼntzunju in che ok kar te jun xitbʼil kyuʼn.
^ taqik' 8 Jaku jaw tuʼjina mas tqanil tiʼjju ikʼ toj qʼoj lu toj xnaqʼtzbʼil «Me levanté como madre en Israel» toj uʼj La Atalaya te 1 te agosto te 2015.
^ taqik' 15 Bʼaʼn tuʼn tok tqʼoʼna twitza tiʼj xnaqʼtzbʼil «Ansiedad por la economía» toj uʼj La Atalaya te 1 te julio te 2015.