1, 2. a) ¿Tiquʼn jaku txi qqʼamaʼn qa chʼixmi junx taʼ aju twitz txʼotxʼ tukʼil jun xjal ma txi qʼamaʼn te tuʼn tkubʼ bʼyoʼn? (Qʼonka twitza tiʼj tnejel tilbʼilal). b) Aj tkubʼ xiten tkyaqilju at twitz txʼotxʼ ¿tiʼ kbʼel kynaʼn qeju ateʼ toj kyaʼj ex twitz Txʼotxʼ?

QO XIMEN tiʼj techel lu. Ma tzaj qʼamaʼn te jun nya bʼaʼn xjal tokx toj cárcel tuʼn tkubʼ bʼyoʼn. Atzun jaʼlo qʼiʼn kyuʼn polisiy tuʼn tkubʼ bʼyoʼn. Maske naʼmx tkyim xjal lu ex mintiʼ yabʼil tiʼj, pero ya chʼix tkyim tuʼnju atzun ma tzaj qʼamaʼn te. Toj ambʼil lu ma tzʼok ik tzeʼn ya ma kyim.

² Ik tten twitz txʼotxʼ jatumel in qo anqʼin toj ambʼil jaʼlo ik tzeʼnju xjal chʼixtoq tkubʼ bʼyoʼn. In tzaj tqʼamaʼn Tyol Dios qa kbʼel najsaʼn tkyaqilju at twitz txʼotxʼ (1 Juan 2:17). O kubʼ t-ximen Jehová tuʼn tkubʼ tnajsaʼn aju at twitz txʼotxʼ toj chʼintl ambʼil, ex atzun lu kbʼantel tuʼn. Noqtzun tuʼnj, junxitl aju tuʼn tkubʼ xiten tkyaqilju at twitz txʼotxʼ twitzju tuʼn tkubʼ bʼyoʼn nya bʼaʼn xjal. ¿Tiquʼn? Tuʼnju jakulo kubʼ kyximen junjun xjal qa mintiʼ ma tzʼok qanin xjel toj tumel te ex jaku che ok ten qʼamalte tuʼn miʼn tkubʼ bʼyoʼn. Mlay bʼaj jlu tiʼj Jehová tuʼnju a jwes tzʼaqli ex toj tumel aju o kubʼ t-ximen tuʼn tkubʼ najset aju at twitz txʼotxʼ (Deuteronomio 32:4). Ya noq chʼintl  ambʼil atx taj tuʼn tul xitbʼil tiʼjju at twitz txʼotxʼ. Aj tpon ambʼil lu, ok kyqʼama qeju ateʼ toj kyaʼj ex twitz Txʼotxʼ qa tzʼaqli aju otoq bʼant tuʼn Jehová. Kbʼel kynaʼn nim tzalajbʼil.

3. ¿Alkye kyaje tiʼchaq che kbʼel tnajsaʼn Tkawbʼil Dios?

³ ¿Alkyeqe tiʼchaq che kbʼel najsaʼn aj tkubʼ xiten tkyaqilju at twitz txʼotxʼ? Kykyaqil tiʼchaq nya bʼaʼn in che tzaj toj qchwinqlal. Aju tqanil lu at toklen tukʼil «tqanil bʼaʼn [...] tiʼj tkawbʼil Dios» (Mateo 24:14). Toj xnaqʼtzbʼil lu qo xnaqʼtzal tiʼj kyaje tiʼchaq che kbʼel najsaʼn aj tul Tkawbʼil Dios. Che kbʼel najsaʼn nya bʼaʼn xjal, qe kʼloj xjal in che sbʼun, aju nya bʼaʼn ex aju yajbʼil in tzaj toj qanqʼibʼil. Aj qxnaqʼtzan tiʼj teyele junjun nya bʼaʼn, kʼelel qnikʼ tiʼj tiʼ in tzaj qiʼj kyuʼn, tiʼ kbʼantel tuʼn Jehová tuʼn tbʼant kyiʼj ex tiʼ kʼokel te kyxel.

4. ¿Tiʼ in kubʼ qnaʼn aj tkubʼ kybʼinchaʼn xjal nya bʼaʼn?

⁴ ¿Tiʼ in tzaj qiʼj kyuʼn? Tqʼama apóstol Pablo qa kyoj bʼajsbʼil tqʼijlalil tzul «nim yajbʼil» ex kwest tuʼn qex kyoj. Ex tqʼamatl qa junjun qʼij mas che okel xjal te nya bʼaʼn (2 Timoteo 3:1-5, 13). Jaku tzʼok qqʼoʼn qwitz tiʼj qa in japun kywiʼ yol e kyaj qʼamaʼn. Qkyaqilx in tzaj nya bʼaʼn qiʼj tuʼn kypaj eleqʼ, kyuʼn xjal in nok kybʼinchaʼn nya bʼaʼn kyiʼj txqantl moqa in neʼl kyikʼen txqantl. Ateʼ junjun mintiʼ in kubʼ kyewin aju nya bʼaʼn in kubʼ kybʼinchaʼn. Ex junjuntl in kubʼ kyyekʼun mer ik tzeʼn in che onin kyiʼj txqantl, noqtzun tuʼnj at nya bʼaʼn kyximbʼetz. In kubʼ qnaʼn bʼis kyuʼn tiʼchaq in kubʼ kybʼinchaʼn nya bʼaʼn xjal maske nya qiʼj o tzʼok bʼinchaʼn jun nya bʼaʼn. In tzaj qbʼis aj tok bʼinchaʼn nya bʼaʼn kyiʼj junjun kʼwaʼl, kyiʼj tij xjal ex kyiʼj qe mintiʼ in bʼant kykolin kyibʼ. Ateʼ qe xjal ik kymod ik tzeʼn jun txkup ex ik tzeʼn qe juʼẍ (Santiago 3:15). Tuʼntzunju in kubʼ qnaʼn tzalajbʼil aj ttzaj tqʼuqbʼaʼn Tyol Dios qkʼuʼj.

5. a) ¿Alkye ambʼil in xi qʼoʼn kye nya bʼaʼn xjal? b) ¿Tiʼ kbʼajel kyiʼj xjal nya kyajbʼil tuʼn tkubʼ kychʼixpuʼn kymod?

⁵ ¿Tiʼ kbʼantel tuʼn Jehová? Toj ambʼil jaʼlo, in xi tqʼoʼn Jehová ambʼil kye nya bʼaʼn xjal tuʼn tkubʼ kychʼixpuʼn kymod (Isaías 55:7). Maske noq chʼintl ambʼil atx taj tuʼn tkubʼ xiten aju at twitz txʼotxʼ, naʼmx t-xi bʼinchet kyiʼj nya bʼaʼn xjal. Noqtzun tuʼnj, ¿tiʼ kbʼajel kyiʼj xjal nya kyajbʼil tuʼn tkubʼ kychʼixpuʼn kymod ex kukx in che onin tiʼjju at twitz txʼotxʼ ajxi t-xi tzyet nimxix yajbʼil? O tzaj ttziyen Jehová qa che kbʼel tnajsaʼn te jumajx (kjawil uʼjit Salmo 37:10). Nim xjal in bʼant tuʼn tkubʼ kyewin nya bʼaʼn in bʼant kyuʼn ex mintiʼ in nel toj qʼanchaʼl (Job 21:6, 8). In tzaj tqʼamaʼn Xjan Uʼj qa «tok twitz Dios tiʼj tzaʼn in che bʼet xjal ex tok twitz tiʼj jatum in che bʼet. Mintiʼ jun qlolj qxopinxix jatum jaku txi tewan tibʼ jun xjal bʼinchal mya bʼaʼn» (Job 34:21, 22). Tuʼntzunju, mi jun jaku kubʼ tewin tibʼ twitz Jehová, tuʼnju in nok tqʼoʼn twitz tiʼj tkyaqil nya bʼaʼn in bʼant kyuʼn xjal. Aj tbʼaj Armagedón, otoq che naj kykyaqil. Mi juntl maj kʼokel qqʼoʼn qwitz kyiʼj (Salmo 37:12-15).

6. ¿Alkyeqe xjal che kyjel anqʼin aj kykubʼ naj nya bʼaʼn xjal, ex tiquʼn jun tbʼanel tqanil lu?

⁶ ¿Alkyeqe che kyjel anqʼin aj kykubʼ naj nya bʼaʼn xjal? In tzaj ttziyen Jehová jlu: «Atzun qe xjal mans che okel etzal  teju txʼotxʼ, ex puro tuj txubʼtxaj che tel». Ax ik in tzaj tqʼamaʼn: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:11, 29). ¿Alkyeqe in che ok te «xjal mans» ex te «xjal bʼaʼn»? Qe xjal mans atzun in yolin kyiʼj xjal in kubʼ kyin kyibʼ ex kyaj tuʼn tel kynikʼ tiʼj Jehová, ex in xi kybʼiʼn te. Ax ikx in che ok te xjal bʼaʼn tuʼnju kyaj tuʼn tkubʼ kybʼinchaʼn aju bʼaʼn in nel toj twitz Jehová. Toj ambʼil jaʼlo, at mas nya bʼaʼn xjal kywitz xjal bʼaʼn. Noqtzun tuʼnj, toj akʼaj twitz txʼotxʼ in tzaj ttziyen Jehová qa oʼkx che tel xjal mans ex bʼaʼn. Kʼokel twitz Txʼotxʼ te jun tbʼanel najbʼil kyuʼn xjal lu.

7. ¿Alkye tten in tzaj nya bʼaʼn qiʼj noq tuʼn kypaj kʼloj xjal in che sbʼun?

⁷ ¿Tiʼ in tzaj qiʼj kyuʼn? Nya oʼkx tuʼn kypaj junjun xjal ntzaj nim nya bʼaʼn twitz txʼotxʼ, sino tuʼn kypaj kʼloj xjal in che sbʼun. Kyxol kʼloj xjal lu ateʼ okslabʼil nya ax tok, aʼyeju in che sbʼun kyiʼj nim millón xjal. Mintiʼ in xi kyqʼamaʼn axix tok tiʼj Dios ex in kyqʼamaʼn qa mlay tzʼok qeʼ qkʼuʼj tiʼj Tyol. In tzaj kybʼis xjal kyuʼn tuʼnju mintiʼ in xi kyqʼamaʼn alkye t-ximbʼetz Dios at kyiʼj toj ambʼil tzul. Nya oʼkxju, ax ikx ateʼ nya bʼaʼn aj kawil, aʼyeju in che onin tuʼn kyok nimaq qʼoj ex bʼiybʼel kyiʼj xjal te junxitl kyyajil. In che sbʼun kyiʼj prow xjal aqeju mintiʼ in bʼant kykolin kyibʼ. In che ok te qʼinun ex in nok mas kyipumal tuʼnju oʼkx in che kolin kyiʼj junjun xjal aj t-xi kykʼamoʼn pwaq te sbʼubʼil. Ax ikx ateʼ nimaq kʼaybʼil, aʼyeju oʼkx in che ximen tuʼn tkambʼet mas pwaq kyuʼn, mintiʼ in che ximen kyiʼj tbʼanel tiʼchaq in tzaj tqʼoʼn txʼotxʼ qe ex in bʼaj kynajsaʼn. In che sbʼun kyiʼj xjal noq tuʼn kyok te qʼinun. Tuʼntzunju, jaku txi qqʼamaʼn qa kyuʼn kʼloj xjal in che sbʼun at nim yajbʼil toj ambʼil jaʼlo.

8. Ik tzeʼn in tzaj tqʼamaʼn Tyol Dios, ¿tiʼ kbʼajel kyiʼj kʼloj xjal in che sbʼun?

⁸ ¿Tiʼ kbʼantel tuʼn Jehová? Kxel tzyet nimxix yajbʼil aj kyjaw meltzʼaj aj kawil kyiʼj okslabʼil nya ax tok. In nok tqʼoʼn Tyol Dios ik tzeʼn jun xuʼj jawni twitz kyukʼil xinaq ex in nok tqʼoʼn tbʼi te Nintz tnam Babilonia (Apocalipsis 17:1, 2, 16; 18:1-4). Aʼyeju okslabʼil nya ax tok che kbʼel najsaʼn. Yajtzun qe txqantl kʼloj xjal in che sbʼun, ¿tiʼ kbʼajel kyiʼj? In tzaj tqʼamaʼn Tyol Dios qa ik kyten ik tzeʼn qe witz ex ik tzeʼn qe isla tuʼnju at nim kyipumal (kjawil uʼjit Apocalipsis 6:14). Noqtzun tuʼnj, ax ikx in tzaj tqʼamaʼn Tyol Dios qa che kbʼel xiten kykyaqil aj kawil mintiʼ in che onin tiʼj Tkawbʼil Dios ex qe txqantl kʼloj xjal in che sbʼun. Kbʼajel lu toj ambʼil aj tbʼaj nimxix yajbʼil (Jeremías 25:31-33). Iktzun tten ya mlay ten juntl kʼloj xjal in sbʼun.

9. ¿Tiquʼn jaku tzʼok qeʼ qkʼuʼj tij qa ktel akʼaj txʼotxʼ toj mujbʼabʼil?

⁹ ¿Tiʼ kʼokel te kyxel kʼloj xjal in che sbʼun? ¿Atpe jun kʼloj xjal ktel twitz Txʼotxʼ aj tbʼaj Armagedón? In tzaj tqʼamaʼn Tyol Dios jlu: «In qo ayon tiʼj akʼaj kyaʼj ex akʼaj txʼotxʼ jatum kbʼinchetel aju tzʼaqlxix kyuʼn kykyaqil, ik tzaʼn tzaj ttziyan Dios qe» (2 Pedro 3:13). Aju ojtxe kyaʼj atz in yolin kyiʼj nya bʼaʼn aj kawil. Atzunju ojtxe txʼotxʼ atz in yolin kyiʼj xjal ateʼ tjaqʼ kykawbʼil. ¿Alkyetzun kʼokel te kyxel aj kykubʼ xiten? Jun «akʼaj kyaʼj ex akʼaj txʼotxʼ». Aju akʼaj kyaʼj in yolin tiʼj jun akʼaj kawbʼil. Aju kawbʼil lu atzun Tkawbʼil  Dios, jatumel kkawil Jesús kyukʼil qeju 144,000. Atzunju akʼaj txʼotxʼ in yolin kyiʼj xjal che tel tjaqʼ Tkawbʼil Dios. Kbʼel tyekʼun Jesús ex qeju che kawil tukʼil qeju tmod Jehová, aju tgan tuʼn tten tkyaqil toj ttxolil (1 Corintios 14:33). Tuʼntzunju ktel «akʼaj txʼotxʼ» toj mujbʼabʼil. Aqeju xjal che kʼokel qʼoʼn te nejenel tiʼj tkyaqil aqʼuntl tzalu twitz Txʼotxʼ, tbʼanel qeju xjal lu ex che kʼokel lepeʼ tiʼj Jesús ex kyiʼj qeju 144,000 (Salmo 45:16). Nokpe qo ximen tiʼj tzeʼn qanqʼibʼil ktel aj kykubʼ naj kykyaqil kʼloj xjal nya bʼaʼn ex oʼkx ktel jun kʼloj xjal te t-xel, aju ktel toj mujbʼabʼil ex mlay tzʼok te nya bʼaʼn.

10. ¿Tiʼ nya bʼaʼn at jatumel in nanqʼin teya? b) ¿Tiʼ in tzaj tiʼja ex kyiʼj toj tjaya tuʼn kypaj nya bʼaʼn?

¹⁰ ¿Tiʼ in tzaj qiʼj tuʼn? Toj ambʼil jaʼlo nim xjal in che yaẍin, in che sbʼun ex in che bʼiyen. Kyuʼn qeju tiʼchaq in netz kyyekʼun txqantl toj televisión ex kyoj saqchbʼil, in kubʼ kyximen xjal qa tbʼanel qe tiʼchaq lu, noqtzun tuʼnj, in che ok te jun xmaybʼil kyiʼj tkawbʼil Jehová tiʼj alkye bʼaʼn ex alkye nya bʼaʼn (Isaías 5:20). Il tiʼj tuʼn tok kyxqʼuqin mambʼaj kykʼwaʼl kyiʼj tiʼchaq lu. Nya oʼkxku, qkyaqilx il tiʼj tuʼn tok kyxqʼuqin qamiwbʼil tukʼil Jehová toj ambʼil jaʼlo jatumel mintiʼ in che nimen xjal qe tkawbʼil Dios.

11. ¿Tiʼ xnaqʼtzbʼil jaku tzʼel qiʼn tiʼjju bʼant tuʼn Jehová tiʼj tnam Sodoma ex Gomorra?

¹¹ ¿Tiʼ kbʼantel tuʼn Jehová? Qo xnaqʼtzan tiʼjju bʼant tuʼn Jehová tiʼj nya bʼaʼn attoq toj tnam Sodoma ex Gomorra (kjawil uʼjit 2 Pedro 2:6-8). Bʼet Lot toj tumel, noqtzun tuʼnj, tzaj nim nya bʼaʼn tiʼj ex kyiʼj toj tja tuʼnju nya bʼaʼn kybʼinchbʼen xjal in che anqʼin nqayin kytxlaj. Kubʼ tnajsaʼn Jehová kykyaqil xjal najli kyoj tnam aju tuʼntzun tkubʼ naj nya bʼaʼn. Noqtzun tuʼnj, bʼant jlu tuʼn tuʼntzun tok «te jun techal tiʼj ju kastiw ktzajel kyibʼaj qe xjal mya nimal Dios qe» toj ambʼil jaʼlo. Ik tzeʼn bʼant tuʼn Jehová tiʼj yaẍbʼil toj ambʼil ojtxe, axju kbʼantel tuʼn aj tkubʼ tnajsaʼn tkyaqil nya bʼaʼn at toj ambʼil jaʼlo.

12. ¿Tiʼ teya taj tuʼn tbʼant tuʼn aj tkubʼ naj tkyaqil nya bʼaʼn?

¹² ¿Tiʼ kʼokel te t-xel nya bʼaʼn? Toj Tbʼanel Najbʼil kbʼantel nim tbʼanel tiʼchaq quʼn. Jun techel, kʼokel Txʼotxʼ te jun tbʼanel najbʼil quʼn ex kjawel qbʼinchaʼn qja ex kyja qeju kʼujlaʼn quʼn. Ax ikx che ul qkʼamoʼn nim millón xjal che jawil anqʼin. Ex che xel qxnaqʼtzaʼn tiʼj Jehová ex tiʼj tkyaqil tiʼchaq o bʼant tuʼn kyiʼj xjal (Isaías 65:21, 22; Hechos 24:15). At nim tiʼchaq kbʼantel quʼn ex qo tzalajel kyiʼj lu, ex kyjawil nimsaʼn tbʼi Jehová kyuʼn.

13. ¿Tiʼ o tzaj qiʼj tuʼnju el tpan tibʼ Satanás, Adán ex Eva tiʼj Jehová?

¹³ ¿Tiʼ in tzaj qiʼj tuʼn? Toj ambʼil jaʼlo in tzaj nim yajbʼil qiʼj tuʼn tpaj nya bʼaʼn ex kyuʼn kʼloj xjal sbʼul. Qkyaqilx in tzaj bʼaj qkʼuʼj kyuʼn nimaq qʼoj, mebʼayil, ikʼbʼil, yabʼil ex tuʼn kamik. Kykyaqil nya bʼaʼn lu e tzaj tzyet tuʼn tpaj el tpan tibʼ Satanás, Adán ex Eva tiʼj Jehová. Ex qkyaqilx in tzaj yajbʼil qiʼj tuʼnju mintiʼ e nimen te Jehová.

14. ¿Tiʼ kbʼantel tuʼn Jehová tiʼj tkyaqil yajbʼil in tzaj qiʼj toj ambʼil jaʼlo?

¹⁴ ¿Tiʼ kbʼantel tuʼn Jehová? Qo ximen kyiʼj junjun tiʼchaq in tzaj ttziyen  Jehová tuʼntzun tel tiʼn yajbʼil in tzaj toj qanqʼibʼil. Kbʼel tnajsaʼn qʼoj (kjawil uʼjit Salmo 46:8, 9). Ya mlay tentl yabʼil (Isaías 33:24). Kʼelel tiʼn kyimen te jumajx (Isaías 25:8). Ya mlay ten mebʼayil (Salmo 72:12-16). Kʼelel tiʼn Jehová tkyaqilju in tzaj tiʼn yajbʼil qiʼj toj ambʼil jaʼlo. Axpe ikx, kbʼel tnajsaʼn tkyaqilju nya bʼaʼn in nok tbʼinchaʼn Satanás ex qe juʼẍ kyiʼj xjal (Efesios 2:2).

15. ¿Alkyeqe tiʼchaq ya miʼn che tentl aj tbʼaj Armagedón?

¹⁵ Qo ximen tiʼj tzeʼn qanqʼibʼil ktel toj akʼaj twitz Txʼotxʼ jatumel ya miʼn ten qʼoj, yabʼil ex kamik. Ya miʼn che ten soldad, qe qʼaqʼ in che ajbʼen toj qʼoj nix kyilbʼilal xjal in jaw bʼinchaʼn aj kykyim toj qʼoj. Mlay che ten spital, aj qʼanil, enfermera, muqbʼil nix qe ja jatumel in che pon qʼoʼn kyimni. Ex tuʼnju ya miʼn che ten eleqʼ, mlay che ten polisiy nix qe alarma. Bʼalo ya miʼn che ten tal ja. Tkyaqilju in tzaj bʼaj qkʼuʼj tuʼn jaʼlo, ya otoq che kubʼ naj te jumajx.

16, 17. a) ¿Tiʼ kbʼel kynaʼn qeju che kyjel anqʼin aj tbʼaj Armagedón? Qʼamantza jun techel. b) ¿Tiʼ kbʼantel quʼn tuʼntzun qkyaj anqʼin aj tkubʼ xiten tkyaqil nya bʼaʼn at twitz txʼotxʼ?

¹⁶ ¿Tiʼ kbʼel qnaʼn aj tkubʼ naj tkyaqil yajbʼil in tzaj toj qanqʼibʼil? Kwest tuʼn tpon qximbʼetz tiʼj. O tzikʼ nim ambʼil in qo anqʼin toj yajbʼil ex mintiʼlo in nok qqʼoʼn qwitz tiʼj nya bʼaʼn in kubʼ qnaʼn tuʼn yajbʼil in tzaj qiʼj. Jun techel, ateʼ xjal in che najan nqayin ttzi bʼe jatumel in che bʼet nim kar ex bʼalo o che naqʼet tiʼj nim tqʼajqʼajel kywiʼ. Ex qe xjal in che anqʼin nqayin jatumel in kubʼ patj tzʼis, olo che naqʼet tiʼj ttzuʼwil tzʼis. Noqtzun tuʼnj, qa ma kubʼ naj tqʼajqʼajel kywiʼ kar ex aju ttzuʼwil tzʼis, kbʼel kynaʼn tzalajbʼil. Ik tzeʼn kbʼel qnaʼn aj tkubʼ tnajsaʼn Jehová qe tiʼchaq in tzaj yajbʼil qiʼj kyuʼn.

¹⁷ ¿Tiʼ kʼokel te t-xel nya bʼaʼn in kubʼ qnaʼn toj ambʼil jaʼlo? In tzaj tqʼamaʼn Salmo 37:11 qa toj ambʼil tzul «puro tuj txubʼtxaj che tel» xjal. ¿Mintiʼpe in qo jaw tzalaj tiʼjju tajbʼil Jehová tuʼn tten qe? Kyoj ambʼil jatumel in kubʼ qnaʼn nya bʼaʼn jaʼlo, tzʼok tilil quʼn tuʼn qten nqayin ttxlaj Jehová ex tiʼj ttnam. Nim toklen qʼuqbʼil qkʼuʼj in tzaj ttziyen Jehová toj ambʼil tzul, tuʼntzunju kukx qo ximen tiʼj. Tzʼok tilil quʼn tuʼn tok qqʼoʼn ik tzeʼn jun tiʼ ya qʼanchaʼl ex kukx qo yolin tiʼj kyukʼil txqantl (1 Timoteo 4:15, 16; 1 Pedro 3:15). Qa ma bʼant jlu quʼn, qo kjel anqʼin aj tkubʼ xiten tkyaqilju nya bʼaʼn at twitz txʼotxʼ ex qo tzalajel te jumajx.