1-3. a) ¿Alkye tten o kubʼ kyyekʼun okslal qa kygan tuʼn kyxiʼ kyoj chmabʼil? (Qʼonka twitza tiʼj tnejel tilbʼilal). b) ¿Tiʼ qo xnaqʼtzal tiʼj toj xnaqʼtzbʼil lu?

QʼIʼNTOQ 17 abʼqʼi tuʼn Corinna tej t-xi qʼiʼn ttxuʼ najchaq jatumel taʼtoq tja tuʼntzun tokx qʼoʼn toj cárcel ex tuʼn tkubʼ tbʼinchaʼn junjun aqʼuntl kyuw. Tej tikʼ mas ambʼil, ax ikx xi qʼiʼn Corinna toj Siberia aju tok nim mil kilómetros tiʼj tja tuʼntzun tokx qʼoʼn toj cárcel. Atztzun ok qʼoʼn aqʼunal tuʼn t-xqʼuqin kyiʼj alumaj ex ok qʼoʼn ik tzeʼn jun majen in bʼaj yajin. At maj ok qʼoʼn aqʼunal toj nim cheʼw ex nya nimtoq t-xbʼalun te cheʼw tok. Maske ikju, kubʼ t-ximen Corinna tukʼil juntl ermana tuʼn tok tilel kyuʼn tuʼn kyxiʼ toj jun chmabʼil aju najchaq taʼ jatumel in che xqʼuqintoq kyiʼj alumaj.

² Kykabʼil i eʼx toj jun qale ex xi kybʼetin 25 kilómetros tzmaxi jatumel in che weʼ tren. Tqʼama Corinna jlu: «Ex tren a las 2 de la mañana ex xi tiʼn qaq or tbʼe. Tej qkuʼtze toj tren, xi qbʼetine juntl 10 kilómetros tzmaxi tej qpone toj chmabʼil». Mintiʼ tzaj tbʼis Corinna tej bʼant jlu tuʼn. Tqʼamatl Corinna jlu: «Toj  chmabʼil, kubʼ qxnaqʼtzaʼne uʼj Aju Xqʼuqil ex xi qbʼitzine qe bʼitz. Tbʼanel aju ikʼ qiʼje tuʼnju chʼiy qʼuqbʼil qkʼuʼje tuʼn». Tej tikʼtl oxe qʼij, e meltzʼaj jatumel in che xqʼuqin kyiʼj alumaj. Mintiʼx ok tbʼiʼn aju tajaw qe alumaj qa i eʼx toj chmabʼil.

³ Atxix ojtxi ex toj ambʼil jaʼlo, nim kyoklen chmabʼil kye tmajen Jehová. Jun techel, kygantoq qe tnejel okslal tuʼn tok kychmon kyibʼ tuʼntzun kykʼulin te Jehová ex tuʼn tel kynikʼ tiʼj (Hechos 2:42). Ax ikx qe, qgan tuʼn qxiʼ kyoj chmabʼil. Noqtzun tuʼnj, at maj kwest tuʼn t-xiʼ junjun qe kyoj kykyaqil chmabʼil. Atlo maj tuʼnju in qo aqʼunan nim or, moqa tuʼn nim qaqʼun, moqa tuʼnju nim in qo sikt. ¿Tiʼ jaku tzʼonin qiʼj tuʼn qxiʼ kyoj kykyaqil chmabʼil? ^[1] (Tqanil jun). ¿Alkye tten jaku qo onin kyiʼj qe xjal in che xnaqʼtzan tiʼj Tyol Dios qukʼil ex kyiʼj txqantl tuʼn kyxiʼ kyoj chmabʼil? Toj xnaqʼtzbʼil lu qo xnaqʼtzal tiʼj oxe tiʼ. Tnejel, ¿tiquʼn tbʼanel qa ma qoʼx kyoj chmabʼil? Tkabʼ, ¿tiquʼn jaku tzaj tiʼn tbʼanel kye txqantl qa ma qoʼx kyoj chmabʼil? Ex toxin, ¿tiquʼn tgan Jehová qa ma qoʼx kyoj chmabʼil? ^[2] (Tqanil kabʼe).

4. ¿Alkye tten in che onin chmabʼil qiʼj tuʼn tel mas qnikʼ tiʼj Jehová?

⁴ Tuʼnju in qo tzaj xnaqʼtzaʼn kyoj chmabʼil. In che onin chmabʼil qiʼj tuʼn tok qojtzqiʼn mas Jehová. ¿Alkye tten? Jun techel, tej tkubʼ qxnaqʼtzaʼn tojju Chmabʼil tuʼn Qxnaqʼtzan tiʼj Tyol Dios aju uʼj Ax che tenkje tuj tkʼujlalil Dios, ok qbʼiʼn kyyol erman xi kyqʼoʼn tuʼn tkyaqil kykʼuʼj tiʼj alkyeqe tmod Jehová at. ¿Mintiʼpe chʼiy mas qkʼujlabʼil tiʼj Jehová tuʼn jlu? Nya oʼkxju, ax ikx in nel mas qnikʼ tiʼj Tyol Dios aj tok qqʼoʼnxix qwiʼ kyiʼj chikʼbʼabʼil ex kyiʼj yekʼbʼil, ex aj tok qqʼoʼnxix qwiʼ kyiʼj taqikʼ Tyol Dios in che kubʼ uʼjit (Nehemías 8:8). Ex kyoj kykyaqil seman in nel mas qnikʼ kyiʼj junjuntl tiʼchaq nim kyoklen aj in kubʼ qbʼinchaʼn qten kyukʼil taqikʼ Tyol Dios in che kubʼ uʼjit ex aj qpon kyoj chmabʼil, in nok qbʼiʼn kyyol erman.

5. ¿Alkye tten o che onin chmabʼil tiʼja tuʼn tkubʼ tqʼoʼna toj xnaqʼtzbʼil toj tanqʼibʼila ex toj pakbʼabʼil aju o tzʼel tnikʼa tiʼj toj Tyol Dios?

⁵ In che onin chmabʼil qiʼj tuʼn tkubʼ qqʼoʼn toj xnaqʼtzbʼil toj qanqʼibʼil aju in nel qnikʼ tiʼj toj Tyol Dios (1 Tesalonicenses 4:9, 10). Jun techel, akux in qo xnaqʼtzan tiʼj uʼj Aju Xqʼuqil, atlo jun xnaqʼtzbʼil o tzʼonin qiʼj tuʼn qajbʼen mas te Jehová, tuʼn tbʼant-xix qnaʼn Dios moqa tuʼn tkubʼ qnajsaʼn til juntl. Ex kyoj qe chmabʼil in che ok txolekxi qʼij, in nel qnikʼ tiʼj alkye tten qo pakbʼal ex tuʼn t-xi qxnaqʼtzaʼn kye mas xjal tiʼj axix tok tkuʼx toj Tyol Dios (Mateo 28:19, 20).

6. ¿Alkye tten in che onin chmabʼil qiʼj tuʼntzun ttzaj qʼuqbʼaʼn qkʼuʼj?

⁶ Tuʼnju in tzaj kyqʼuqbʼaʼn chmabʼil qkʼuʼj. In nok tilil tuʼn tkyaqilju at tjaqʼ tkawbʼil Satanás tuʼn tchewix qʼuqbʼil qkʼuʼj ex tuʼn ttzaj qbʼis. Atzun qe chmabʼil in qo tzaj kyonin ex in tzaj kyqʼuqbʼaʼn qkʼuʼj tuʼn  kukx qajbʼen te Jehová (kjawil uʼjit Hechos 15:30-32). Nim maj in qo yolin kyoj chmabʼil alkye tten o che japun kywiʼ junjun tyol Jehová tziyen maj toj Tyol. A jlu in nonin qiʼj tuʼn tok qeʼ mas qkʼuʼj tiʼj qa kbʼantel tuʼn Jehová tkyaqilju in tzaj ttziyen. Nya oʼkxju, ax ikx in qo tzaj kyonin erman aj tex kyqʼoʼn jun chikʼbʼabʼil ex junjun yekʼbʼil. Noqtzun tuʼnj, ax ikx aj in xi kyqʼoʼn kyyol kyoj chmabʼil ex aj in che bʼitzin tuʼn tkyaqil kykʼuʼj te Jehová (1 Corintios 14:26). Ax ikx in nonin qiʼj qa ma qo yolin kyukʼil erman naʼmxtoq t-xi tzyet chmabʼil ex aj tkubʼ bʼaj, iktzun tten in nel qnikʼ tiʼj qa ateʼ nim qamiw in che ximen qiʼj (1 Corintios 16:17, 18).

7. ¿Tiquʼn nim toklen tuʼn qten kyoj chmabʼil?

⁷ Tuʼnju in qo tzaj tonin Jehová tuʼn xewbʼaj xjan kyoj chmabʼil. In najbʼen xewbʼaj xjan tuʼn Jesús tuʼn tkubʼ nej kywitz kʼloj okslal. Tqʼama Jesús qa il tiʼj tuʼn t-xi qbʼiʼn «aju in tmaʼn Xewbʼaj Xjan kye kykyaqil okslal» (Apocalipsis 2:7). Jaku tzʼonin xewbʼaj xjan qiʼj tuʼn tkubʼ kyiʼj joybʼil quʼn, tuʼn miʼn qtzaj xobʼ aj qpakbʼan ex tuʼn tjaw qjyoʼn tbʼanel qbʼe. Tuʼntzunju, nim toklen tuʼn tok tilil quʼn tuʼn qxiʼ kyoj kykyaqil chmabʼil. Iktzun tten tzul qkʼamoʼn onbʼil in tzaj tqʼoʼn Dios tuʼn xewbʼaj xjan qe.

8. Aj tok kyqʼoʼn kywitz erman tiʼj qa in qo pon kyoj chmabʼil, qa in xi qqʼoʼn qyol kyoj ex aj in qo bʼitzin, ¿alkye tten in nonin jlu kyiʼj? (Ax ikx qʼonka twitza tiʼj « Tkyaqil maj mas tbʼanel in kubʼ tnaʼn aj tmeltzʼaj tja»).

⁸ Tuʼnju jaku kubʼ qyekʼun kye erman qa at qkʼujlabʼil kyiʼj. Ateʼ nim erman in che ikʼ kyoj junjun nya bʼaʼn. Kubʼ ttzʼibʼin apóstol Pablo jlu: «Qo ximan tiʼj tuʼn qkyuwsante qibʼ qxolx» (Hebreos 10:24, 25). Kyukʼil qeju yol lu, tqʼama apóstol Pablo qa il tiʼj tuʼn qximen kyiʼj txqantl. Jun tumel tuʼn tbʼant jlu quʼn, aju qa ma tzʼok qchmon qibʼ tuʼn tbʼaj qonin qibʼ. Aj in qoʼx kyoj chmabʼil, in kubʼ qyekʼun kye qerman qa qajbʼil tuʼn qten kyukʼil, tuʼn qyolin kyukʼil ex qa qajbʼil tuʼn tok qbʼiʼn tiʼ in kubʼ kynaʼn. Ax ikx in xi qqʼuqbʼaʼn kykʼuʼj qa ma chex qqʼoʼn qyol kyoj chmabʼil ex aj qbʼitzen te Jehová tuʼn tkyaqil qkʼuʼj (Colosenses 3:16).

9, 10. a) Qʼamantza tiquʼn in che onin qiʼj tuʼn qxiʼ kyoj chmabʼil qeju tyol Jesús tkuʼx toj Juan 10:16. b) Qa ma qoʼx kyoj kykyaqil chmabʼil, ¿alkye tten jaku tzʼonin jlu kyiʼj junjun erman o che el ikʼun kyuʼn toj kyja?

 ⁹ Tuʼnju qa ma qoʼx kyoj chmabʼil, in qo onin tuʼn tten mujbʼabʼil kyxol erman (kjawil uʼjit Juan 10:16). Tqʼama Jesús qa ik tten ik tzeʼn jun xqʼuqil ẍneʼl, moqa rit, ex atzun qeju t-xnaqʼtzbʼen ik kyten ik tzeʼn qeju ẍneʼl. Toj jun kʼloj tal ẍneʼl, tkyaqil ambʼil ateʼ ẍneʼl junx ex lepcheqeʼk tiʼjju xqʼuqil kye. Qa ateʼ kabʼe ẍneʼl twiʼ jun witz, kabʼetl ateʼ toj jun chqʼajlaj ex juntl at toj juntl plaj, ¿jakupe txi qqʼamaʼn qa junx kʼloj qeju jweʼ ẍneʼl lu? Mlay. Ax ikx qe, qa qajbʼil tuʼn qok te «jun peʼnx ẍneʼl» aju in nok lepeʼ tiʼj «junx pastor», il tiʼj tuʼn qxiʼ kyoj kykyaqil chmabʼil.

¹⁰ In che onin chmabʼil qiʼj tuʼn tten mujbʼabʼil qxol ik tzeʼn jun ja xjal at kʼujlabʼil kyxol (Salmo 133:1). Ateʼ junjun erman o che el ikʼun kyuʼn kytat moqa kyuʼn kytzik ex qa kyitzʼin tuʼnju o che ok te testigo de Jehová. Noqtzun tuʼnj, xi ttziyen Jesús kye tuʼn t-xi tqʼoʼn kytat, kytzik, kyitzʼin ex junjuntl. Aʼyetzun jlu kʼokel kʼujlante kye ex che okel xqʼuqin kyuʼn (Marcos 10:29, 30). Qa ma qo pon kyoj kykyaqil chmabʼil, qo okel kyqʼoʼn erman lu ik tzeʼn kytat, kytzik moqa te kyitzʼin ex kbʼel kynaʼn qa kʼujlan qe quʼn. Qa ma qo ximen tiʼj jlu, kʼokel tilel quʼn tuʼn qxiʼ kyoj kykyaqil chmabʼil.

11. ¿Alkye tten in che onin chmabʼil qiʼj tuʼn t-xi qqʼoʼn te Jehová aju at toklen tiʼj?

¹¹ Tuʼnju kyoj chmabʼil in xi qqʼoʼn te Jehová aju at toklen tiʼj. Quʼn a Jehová bʼinchal  qe, at toklen tuʼn t-xi qqʼoʼn chjonte te ex tuʼn tjaw qnimsaʼn (kjawil uʼjit Apocalipsis 7:12). In bʼant jlu quʼn tkyaqil maj kyoj chmabʼil aj qnaʼn Dios, aj qbʼitzin te ex aj qyolin tiʼj. Toj tkyaqil seman, at jun tbʼanel qoklen tuʼn qkʼulin te Jehová.

12. ¿Tiʼ in kubʼ tnaʼn Jehová aj in xi qbʼiʼn kawbʼil tuʼn qxiʼ kyoj chmabʼil?

¹² Ex tuʼnju a Jehová bʼinchal qe, ax ikx at toklen tuʼn t-xi qnimen. In tzaj tqʼamaʼn Jehová qe qa il tiʼj tuʼn qxiʼ kyoj chmabʼil, mas tuʼnju chʼix tul xitbʼil. Nim in jaw tzalaj Jehová aj t-xi qnimen kawbʼil tuʼn qxiʼ kyoj chmabʼil (1 Juan 3:22). Ojtzqiʼn tuʼn Jehová qa in nok tilel quʼn tuʼn qxiʼ kyoj chmabʼil ex in nok tqʼoʼn toklen (Hebreos 6:10).

13, 14. ¿Alkye tten in che onin chmabʼil qiʼj tuʼn qok laqʼeʼ ttxlaj Jehová ex ttxlaj Tkʼwaʼl?

¹³ Tuʼnju aj qxiʼ kyoj chmabʼil, in kubʼ qyekʼun te Jehová qa qajbʼil tuʼn qok laqʼeʼ mas ttxlaj ex ttxlaj Tkʼwaʼl. In qo xnaqʼtzan tiʼj Xjan Uʼj kyoj chmabʼil ex in nel qnikʼ tiʼj tiʼ tajbʼil Jehová tuʼn tbʼant quʼn (Isaías 30:20, 21). Aj in che pon junjun xjal mintiʼ in che ajbʼen te Jehová kyoj chmabʼil, ax ikx kye in nok kyqʼoʼn kywitz tiʼj qa a Jehová in tzaj yekʼunte qbʼe (1 Corintios 14:23-25). In najbʼen xewbʼaj xjan tuʼn Jehová tuʼn kyok chmabʼil, tuʼntzunju, aju in nel qnikʼ tiʼj kyoj chmabʼil atz tzajni tukʼil. Kyjuʼtzun, aj qxiʼ kyoj chmabʼil, jaku tzʼok qbʼiʼn Jehová ex jaku kubʼ qnaʼn aju tkʼujlabʼil at qiʼj. Iktzun tten qo okel laqʼeʼ mas ttxlaj.

¹⁴ A Jesús wibʼaj kyxol kʼloj okslal. Tqʼama Jesús jlu: «Quʼn jama kyb’uyi’ya’ kyibʼ kabʼe mujqa oxe’ toj nb’iye’, chin tenb’ilwe’ kxol» (Mateo 18:20, XT). Ax ikx in tzaj t-xnaqʼtzaʼn Tyol Dios qa «in bʼet» Jesús «kyxol» kʼloj okslal (Apocalipsis 1:20–2:1). Qʼuqli qkʼuʼj tiʼj qa at Jehová ex Jesús qukʼil ex in tzaj kyqʼuqbʼaʼn qkʼuʼj qa atoʼ kyoj chmabʼil. Toj teya twitz, ¿tiʼ in kubʼ tnaʼn Jehová aj in nok tilil tuʼna tuʼn tok laqʼeʼya ttxlaj ex ttxlaj Tkʼwaʼl?

15. ¿Alkye tten in che onin chmabʼil tuʼn tkubʼ qyekʼun te Jehová qa qajbʼil tuʼn qnimen te?

¹⁵ Tuʼnju aj qxiʼ kyoj chmabʼil, in xi qyekʼun te Jehová qa qajbʼil tuʼn qnimen te. Mintiʼ in nok ten Jehová obligaril qe tuʼn t-xi qnimen aju in tzaj tqʼamaʼn qe (Isaías 43:23). Aju te in bʼant tuʼn, in tzaj tqʼoʼn ambʼil qe tuʼn tkubʼ qximen tiʼ kbʼantel quʼn. Jun techel, ¿tiʼ kbʼantel quʼn qa ma tzaj tqʼamaʼn qpatron tuʼn qaqʼunan nim ex mlay bʼant tuʼn qxiʼ kyoj chmabʼil? ¿Tiʼ kbʼantel quʼn qa ma tzaj tqʼamaʼn jun aj kawil qa ma tzʼok qchmon qibʼ, il tiʼj tuʼn t-xi qchjoʼn qmulta, jaku qoʼx toj cárcel moqa kbʼel nim qkastiw? ¿Tiʼ kbʼantel quʼn qa ma kubʼ qnaʼn tuʼn miʼn qxiʼ jun maj toj chmabʼil tuʼnju qajbʼil tuʼn tbʼant juntl tiʼ quʼn? Qa ma jaw qjyoʼn tuʼn qnimen te Jehová, kbʼel qyekʼun qa kʼujlan quʼn ex qa in nel qnikʼ tiʼj qa at toklen Jehová tuʼn ttzaj tqʼamaʼn qe tiʼ kbʼantel quʼn (Hechos 5:29; Romanos 6:17). Tuʼn jlu, ktzalajel Jehová (Proverbios 27:11).

16, 17. a) ¿Alkye tten in nel qnikʼ tiʼj qa nim kyoklen qeju chmabʼil toj kywitz tnejel okslal? b) ¿Tiʼ kubʼ tnaʼn ermano George Gangas kyiʼj chmabʼil?

¹⁶ Tej otoq bʼaj ninqʼij Pentecostés toj abʼqʼi 33, kukx e kyaj ten okslal «tuj xnaqʼtzbʼil kyuʼn apostl, ex at kymojbʼabʼl kyibʼ» (Hechos 2:42). Toj juntl yol, kukx ok kychmon kyibʼ tuʼn kykʼulin te Jehová. Ex mintiʼ kyaj kykolin tuʼn tok kychmon kyibʼ maske i el ikʼun kyuʼn aj kawil te tnam Roma ex kyuʼn nejenel kye okslabʼil judiy. Kwest ela jlu te kye, noqtzun tuʼnj, kukx ok tilil kyuʼn tuʼn tok kychmon kyibʼ.

¹⁷ Ax ikx toj ambʼil jaʼlo, nim in xi qqʼoʼn chjonte tuʼnju in tzaj qʼoʼn ambʼil qe tuʼn tok qchmon qibʼ. Qo ximen tiʼj ermano George Gangas tbʼi, aju ten mas te 22 abʼqʼi kyxol K’loj Xjal Q’il Twitz Aq’untl. Tqʼama ermano George qa nim in nok qʼuqbʼaʼn tkʼuʼj aj in noktoq tchmon tibʼ kyukʼil erman ex tqʼama qa «atzun jun tiʼ mas in tzalaj tiʼj toj tanqʼibʼil». Qa jakutoq bʼant, tgantoq tuʼn tpon tnejel toj Ja te Chmabʼil ex tgantoq tuʼn tetz mankbʼil. Nimxix tzalaj tej tyolin kyukʼil erman ex tuʼntzunju tqʼama jlu: «Aj at qiʼne kyukʼil erman, in kubʼ nnaʼne qa atz atine kyukʼil toj njaye tojju mujbʼabʼil in tzaj tqʼoʼn Jehová te ttnam». Ex tqʼamatl qa aju mas tajbʼil tuʼn tbʼant, aju tuʼn tok tchmon tibʼ kyukʼil erman.

18. a) ¿Tiʼ teya in kubʼ tnaʼn kyiʼj chmabʼil? b) ¿Tiʼ in kubʼ t-ximana tuʼn tbʼant tuʼna?

¹⁸ Yajtzun teya, ¿in kubʼ tnaʼna ik tzeʼn te ermano Gangas? Qa ikju, kukx tzʼok tilil tuʼna tuʼn ttena kyukʼil erman toj chmabʼil, maske at maj kwest tuʼn tbʼant. Yekʼunxa te Jehová qa in kubʼ tnaʼna ik tzeʼn te aj kawil David tej tqʼama qa kʼujlaʼntoq tuʼn aju lugar jatumel in kʼulintoq te Jehová (Salmo 26:8).