1. ¿Alkye tten jaku qo nimen te Dios ex kye aj kawil?

IN TZAJ tqʼamaʼn Tyol Dios qa il tiʼj tuʼn t-xi qnimen qe aj kawil, noqtzun tuʼnj, ax ikx in tzaj tqʼamaʼn qa tnejel kxel qnimen Jehová (Hechos 5:29; Tito 3:1). ¿Alkye tten jaku bʼant jlu quʼn? Tzaj tchikʼbʼaʼn Jesús jun nabʼil aju jaku tzʼonin qiʼj tuʼntzun tel qnikʼ tiʼj alqe qo nimel. Tqʼama jlu: «Kyqʼonxe te gobierni aju te gobierni, ex kyqʼonxe te Dios aju te Dios» (Mateo 22:21). In xi qqʼoʼn «aju te gobierni» qa ma txi qnimen qe ley at kyuʼn aj kawil, qa ma tzʼok qqʼoʼn kyoklen qeju aj kawil ex qa ma txi qqʼoʼn chojbʼil in xi qʼet te gobierni (Romanos 13:7). ¿Yajtzun qa ma tzaj kyqʼamaʼn aj kawil tuʼn tkubʼ qbʼinchaʼn jun tiʼ aju nya bʼaʼn toj twitz Jehová? Mintiʼ tuʼn t-xi qnimen. Ex aj t-xi qqʼamaʼn tiquʼn, toj tumel kxel qqʼamaʼn kye.

2. ¿Alkye tten in kubʼ qyekʼun qa mintiʼ in qo onin kyiʼj kykawbʼil xjal?

² Jun tten tuʼn t-xi qqʼoʼn «te Dios aju te Dios» aju qa mintiʼ in nokx qqʼoʼn qibʼ kyxol aj kawil ateʼ twitz txʼotxʼ. In nel qpan qibʼ tiʼj tkyaqil jlu (Isaías 2:4). Mintiʼ in qo qʼojin kyiʼj aj kawil, tuʼnju ojtzqiʼn quʼn qa a Jehová in xi qʼonte ambʼil kye tuʼn kykawin. Ax ikx mintiʼ in nokx qqʼon qibʼ kyoj qe tiʼchaq at toklen in bʼant kyuʼn xjal  tukʼeju qa mas nim toklen qtnam (Romanos 13:1, 2). Mintiʼ in nok tilil quʼn tuʼn tel qchʼixpuʼn qeju aj kawil nix in qo onin tiʼj jun aj kawil. Ex mintiʼ in qoʼx votaril kyiʼj aj kyjaw skʼoʼn ex mintiʼ in ten qajbʼil tuʼn qok ik tzeʼn kye.

3. ¿Tiquʼn mintiʼ in nokx qqʼon qibʼ tojju in bʼant kyuʼn xjal?

³ At nim tiquʼn in tzaj tqʼamaʼn Jehová qe tuʼn tel qpan qibʼ tiʼjju in bʼant kyuʼn xjal. Jun kyxol qe jlu, tuʼnju in qo ok lepeʼ tiʼj Jesús. Tqʼama jlu: «Mya te twitz txʼotxʼ qine». Tuʼntzunju, mintiʼ onin kyiʼj aj kawil ex tiʼj qʼoj (Juan 6:15; 17:16). Aju juntl tiquʼn mintiʼ in nokx qqʼon qibʼ kyxol aj kawil, tuʼnju oʼkx in qo onin tiʼj Tkawbʼil Dios. Tuʼnju mintiʼ in qo onin tiʼj kykawbʼil xjal, at jun tbʼanel qnabʼil aj qyolin kyukʼil xjal qa oʼkx Tkawbʼil Dios kʼelel qʼinte tkyaqil nya bʼaʼn in tzaj qiʼj. Tuʼnju in nokx kyqʼon kyibʼ okslabʼil nya ax tok kyxol aj kawil, mintiʼ mujbʼabʼil kyxol xjal. Atzun qe, at mujbʼabʼil qxol kyukʼil kykyaqil qerman ateʼ twitz tkyaqil Txʼotxʼ tuʼnju mintiʼ in nokx qqʼoʼn qibʼ kyxol aj kawil (1 Pedro 2:17).

4. a) ¿Tiquʼn ojtzqiʼn quʼn qa mas kwest tuʼn tel qpan qibʼ tiʼj kybʼinchbʼen xjal toj ambʼil tzul? b) ¿Tiquʼn il tiʼj tuʼn tbʼaj qbʼinchaʼn qten jaʼlo tuʼn miʼn tokx qqʼon qibʼ toj kybʼinchbʼen xjal?

⁴ In qo anqʼinlo toj jun najbʼil jatumel mintiʼ in che yon xjal tuʼn qonin kyiʼj aj kawil. Noqtzun tuʼnj, ya chʼinx tkubʼ najsaʼn tkyaqilju at tjaqʼ tkawbʼil Satanás ex tuʼntzunju mas kwest kʼelel te qe tuʼn tel qpan qibʼ tiʼj kybʼinchbʼen xjal. Aqeju xjal ateʼ jaʼlo ya «mintiʼ in chewix kykʼuʼj» ex «txʼuʼj kywi», ex mas mintiʼtl mujbʼabʼil kyxol (2 Timoteo 3:3, 4). Ateʼ junjun erman ya in tzaj junjun nya bʼaʼn kyiʼj tuʼnju noq minabʼen in chʼexpaj kyximbʼetz aj kawil toj kytnam. Tuʼntzun jlu, il tiʼj tuʼn tkubʼ qbʼinchaʼn qten toj ambʼil jaʼlo tuʼn miʼn tokx qqʼon qibʼ toj kybʼinchbʼen xjal axpe ikx kyoj ambʼil nya bʼaʼn. Qo xnaqʼtzan tiʼj kyaje tiʼchaq jaku bʼant quʼn tuʼntzun tbʼaj qbʼinchaʼn qten.

5. ¿Tiʼ t-ximbʼetz Jehová at tiʼj kykawbʼil xjal?

⁵ Qa ma ten qximbʼetz kyiʼj aj kawil ik tzeʼn te Jehová t-ximbʼetz at kyiʼj, atzun jun tten in bʼaj qbʼinchaʼn qten jaʼlo tuʼn miʼn tokx qqʼon qibʼ kyxol xjal. Mintiʼ xi tqʼoʼn Jehová ambʼil kye xjal tuʼn kykawin kyibʼaj txqantl tej e kubʼ tbʼinchaʼn (Jeremías 10:23). Ik kyten xjal toj twitz Jehová ik tzeʼn jun ja xjal. Atzun kye aj kawil in nel kypaʼn xjal tuʼnju in kyqʼamaʼn qa mas tbʼanel kytnam kywitz txqantl tnam. Maske tbʼanel qe aj kawil, mlay bʼant tuʼn t-xi kybʼinchaʼn tiʼj tkyaqil nya bʼaʼn. Ax ikx, in che ok aj kawil te aj qʼoj tiʼj Tkawbʼil Dios, aju xi tzyet tuʼn tkawin toj 1914. Toj chʼintl ambʼil kʼelel tiʼn Tkawbʼil Dios kykyaqil kykawbʼil xjal (kjawil uʼjit Salmo 2:2, 7-9).

6. ¿Alkye qmod kbʼel qyekʼun kyukʼil qeju at kyoklen toj jun kawbʼil?

⁶ O tzaj tqʼoʼn Jehová ambʼil kye xjal tuʼn kykawin tuʼnju in che onin tuʼn tten chʼin mujbʼabʼil ex tuʼn tten ttxolil kyxol xjal. In nonin jlu qiʼj tuʼn qpakbʼan tiʼj tbʼanel tqanil tiʼj Tkawbʼil Dios (Romanos 13:3, 4). Nya oʼkxju, ax ikx in tzaj tqʼamaʼn Jehová qe tuʼn qnaʼn Dios kyiʼj qeju at jun kyoklen tuʼntzun qkʼulin te toj txubʼtxaj (1 Timoteo 2:1, 2). Qa in nok bʼinchaʼn  junjun tiʼchaq nya toj tumel qiʼj, jaku qoʼx qanil onbʼil kye aj kawil tuʼn kyonin qiʼj, ik tzeʼn bʼant tuʼn apóstol Pablo (Hechos 25:11). Ax tok, in tzaj tqʼamaʼn Tyol Dios qa a Tajaw il in nonin tiʼj tkyaqil kykawbʼil xjal, noqtzun tuʼnj, mintiʼ in tzaj tqʼamaʼn qa in nonin tiʼj teyele junjun xjal at toklen toj jun kawbʼil (Lucas 4:5, 6). Tuʼntzunju, mintiʼ tuʼn tkubʼ qximen qa a Tajaw il in nonin tiʼj jun xjal at toklen toj jun kawbʼil. Ax ikx in tzaj tqʼamaʼn Tyol Dios qa mintiʼ tuʼn qyolin nya bʼaʼn kyiʼj aj kawil (Tito 3:1, 2).

7. ¿Alkye ximbʼetz il tiʼj tuʼn tel qikʼun?

⁷ Tuʼnju qaj tuʼn qnimen te Jehová, mintiʼ in qo onin tiʼj jun aj kawil nix tiʼj jun kʼloj aj kawil. A jlu kwest jaku tzʼela te qe, mas qa jaku tzʼonin kyximbʼetz qiʼj moqa aʼyeju tiʼchaq kbʼantel kyuʼn. Jun techel, noqwit mintiʼ in xi kynimen xjal jun aj kawil jatumel najliya aju otoq tzʼok tbʼinchaʼn nim nya bʼaʼn, axpe ikx kyiʼj testigos de Jehová. Ax tok, mlaylo tzʼok tmojbʼan tibʼa kyukʼil xjal lu, noqtzun tuʼnj, ¿jakupe kubʼ t-ximana qa bʼaʼn aju in bʼant kyuʼn xjal lu ex jakupe ten tajbʼila tuʼn tel tbʼanel aju in bʼant kyuʼn? (Efesios 2:2). Qa qajbʼil tuʼn miʼn tokx qqʼon qibʼ toj kybʼinchbʼen xjal, mintiʼ tuʼn tkubʼ qximen qa at jun kʼloj xjal tbʼanel aju in bʼant kyuʼn kywitz juntl kʼloj. A jlu kbʼel qyekʼun tukʼilju in bʼant quʼn ex tukʼilju in xi qqʼamaʼn.

8. Aj qok weʼ twitz nya bʼaʼn tuʼn miʼn tokx qqʼon qibʼ kyxol xjal, ¿alkye tten jaku ten qnabʼil ex tuʼn qok te mans?

⁸ Aju tkabʼin tten tuʼn miʼn tokx qqʼon qibʼ kyxol xjal, aju qa ma txi qbʼiʼn nabʼil lu: «Tenx kynabʼle ik tzaʼn lobʼaj, ex yalnix tiʼj kynabʼle ik tzaʼn paloma» (kjawil uʼjit Mateo 10:16, 17). At qnabʼil qa ma qo ximen kyiʼj nya bʼaʼn naʼmxtoq qok weʼ kywitz. Ex in qo ok te «yalnix», moqa te mans, qa mintiʼ in nokx qqʼon qibʼ kyxol xjal aj kytzaj nya bʼaʼn. Qo xnaqʼtzan tiʼj alkye junjun nya bʼaʼn jaku che tzaj ex tiʼ kʼonil qiʼj tuʼn miʼn tokx qqʼon qibʼ toj kybʼinchbʼen xjal.

9. ¿Tiquʼn il tiʼj tuʼn tok qxqʼuqin qibʼ aj qyolin kyukʼe txqantl?

⁹ Aj qyolin kyukʼe junjuntl xjal. Il tiʼj tuʼn tok qxqʼuqin qibʼ aj kyyolin xjal kyiʼj aj kawil. Jun techel, aj qyolin tukʼil jun xjal tiʼj Tkawbʼil Dios, mintiʼ tuʼn qyolin bʼaʼn nix nya bʼaʼn tiʼj t-ximbʼetz jun nejenel moqa jun aj kawil. Qa at jun xjal tajbʼil tuʼn tyolin tiʼjju kyajbʼil xjal tuʼn t-xi kybʼinchaʼn kyiʼj nya bʼaʼn in che tzaj, tzʼajbʼenx Tyol Dios quʼn tuʼn t-xi qyekʼun te alkye tten kxel tbʼinchaʼn Tkawbʼil Dios tiʼj tkyaqil nya bʼaʼn. Qatzun kyaj xjal tuʼn kyyolin tiʼj jun xnaqʼtzbʼil ik tzeʼn aj tkubʼ mojeʼ jun xinaq tukʼil juntl xinaq, moqa ichan, ex jun xuʼj tukʼil juntl xuʼj, moqa qya, ex tiʼjju aj tel kyiʼn xuʼj kyal, bʼaʼn tuʼn t-xi qqʼamaʼn kye aju in tzaj tqʼamaʼn Tyol Dios ex alkye tten in kubʼ qqʼoʼn toj xnaqʼtzbʼil toj qanqʼibʼil. Ex qa ma tzaj tqʼamaʼn jun xjal qa il tiʼj tuʼn tel qiʼn jun ley moqa tuʼn tkubʼ chʼixpet, mintiʼ tuʼn t-xi qqʼamaʼn jun qyol tiʼj jlu ex mintiʼ tuʼn tok tilel quʼn tuʼn tkubʼ tchʼixpuʼn xjal t-ximbʼetz.

10. ¿Alkye tten jaku tzʼel qnikʼ tiʼj qa mintiʼ in nokx qqʼoʼn qibʼ kyxol xjal aj tok qqʼoʼn qwitz moqa aj tkubʼ quʼjin alkyexku tqanil?

¹⁰ Aj tkubʼ quʼjin qe tqanil moqa aj kyok qbʼiʼn. Jaku che ajbʼen junjun akʼaj tqanil kyuʼn xjal tuʼn kyonin oʼkx tiʼj jun kʼloj xjal. In bʼaj jlu mas kyoj qeju tnam jatumel aʼye aj kawil at kyoklen kyibʼaj qeju qʼol tqanil. Qa at jun ja qʼol tqanil moqa jun xjal qʼol tqanil in nonin tiʼj jun kʼloj xjal, il tiʼj tuʼn tok qxqʼuqin qibʼ tuʼn miʼn tten qximbʼetz ik tzeʼn kye. Jun techel, qxjelinku jlu: «¿Ngane tuʼn tok nbʼiʼne jun xjal qʼol tqanil tuʼnju ax t-ximbʼetz at kyiʼj aj kawil ik tzeʼn weye?». Qa qajbʼil tuʼn miʼn tokx qqʼon qibʼ toj  kybʼinchbʼen xjal, mintiʼ tuʼn kukx tok qqʼoʼn qwitz tiʼj nix tuʼn tkubʼ quʼjin qe tqanil aʼyeju in che onin tiʼj jun aj kawil. Tzʼokx tilil quʼn tuʼn kykanet tqanil mintiʼ toklen tukʼil tkyaqil jlu. Ex aj tok qqʼoʼn qwitz kyiʼj tqanil moqa aj kyjaw quʼjin, kukx qnaʼntz aju in tzaj tqʼamaʼn Tyol Dios (2 Timoteo 1:13).

11. Qa nim toklen pwaq toj qwitz, ¿tiquʼn kwest jaku tzʼela toj qwitz tuʼn miʼn tokx qqʼon qibʼ kyxol xjal?

¹¹ Aju qʼinumabʼil. Qa ma tzʼok qqʼoʼn nim toklen pwaq ex qeju tiʼchaq at qe, mas kwest kʼelel toj qwitz tuʼn tel qpan qibʼ tiʼj kybʼinchbʼen xjal. Qo xnaqʼtzaʼn tiʼj jun techel. Toj tnam Malaui, tej otoqxi tzikʼ abʼqʼi 1970 nim testigos de Jehová kyaj kykolin qe tiʼchaq at kye tuʼnju mintiʼ ok kymojbʼan kyibʼ kyukʼil jun kʼloj xjal in che onin tiʼj jun aj kawil. Bʼisbʼajil tuʼnju ateʼ junjun mintiʼ kyaj kytzaqpiʼn qeju tiʼchaq attoq kye. At jun ermana Ruth tbʼi naʼnx tuʼn aju ikʼ, tqʼama jlu: «Ateʼ junjun otoq che etz oq qukʼile, yajxitl ok kymojbʼan kyibʼ kyukʼil kʼloj xjal in che onintoq tiʼj aj kawil tuʼn kymeltzʼaj kyja, tuʼnju nya bʼaʼn ela toj kywitz aju anqʼibʼil at jatumel o pone klol qibʼe». Noqtzun tuʼnj, chʼixme kykyaqil qeju tmajen Jehová, mintiʼ okx kyqʼon kyibʼ kyxol xjal maske mintiʼxixtoq kypwaq at ex maske otoq naj tkyaqilju tiʼchaq at kye (Hebreos 10:34).

12, 13. a) ¿Tiʼ t-ximbʼetz Jehová at kyiʼj xjal? b) ¿Alkye tten jaku jaw qnimsan qibʼ tiʼj qtnam?

¹² Aju nimsabʼil. Ateʼ nim xjal in jaw kynimsan kyibʼ tiʼj kyyajil, moqa kyiyjil, tiʼj kyxjalil, tiʼjju kykostumbr ex tiʼj kytnam. Atzun te Jehová, mintiʼ in kubʼ t-ximen qa at jun kʼloj xjal mas nim toklen twitz juntl kʼloj xjal. Junx in che ela kykyaqil xjal toj twitz. Ax tok, tej e kubʼ tbʼinchaʼn Jehová xjal, nya junx che keʼyin kykyaqil, ex in qo tzalaj aj tok qqʼoʼn qwitz tiʼj alkye tten bʼinchaʼn maj qoʼ tuʼn. Nya tajbʼil Jehová tuʼn tkyaj qtzaqpiʼn qkostumbr. Noqtzun tuʼnj, ax ikx nya tajbʼil tuʼn tkubʼ qximen qa mas tbʼanel qoʼ kywitz txqantl (Romanos 10:12).

¹³ Mintiʼ tuʼn tjaw qnimsan qibʼ tiʼj qtnam tuʼn tkubʼ qximen qa mas tbʼanel kywitz txqantl. Qa in jaw qnimsan qibʼ, mas kwest jaku tzʼela toj qwitz tuʼn miʼn tokx qqʼon qibʼ toj kybʼinchbʼen xjal. Atzun jlu bʼaj toj tnejel syent abʼqʼi. Ateʼ junjun okslal aj Hebreo mintiʼ kubʼ kyyekʼun tbʼanel kymod kyukʼil xuʼj mintiʼ kychmil te tnam Grecia (Hechos 6:1). ¿Alkye tten jaku tzʼel qnikʼ tiʼj qa o txi tzyet tuʼn tjaw qnimsan qibʼ? Qo ximen tiʼj jlu: «¿Tiʼ nbʼant wuʼne aj ttzaj tqʼoʼn jun erman te juntl tnam jun nabʼil weye? ¿In nelpe wikʼune tuʼnju in kubʼ nximane qa mas tbʼanel in che bʼant qe tiʼchaq toj ntname?». Qa ikju, bʼan tuʼn t-xi qbʼiʼn aju kawbʼil lu: «Kymansin kyibʼe, teyle junjun bʼaʼn tuʼn t-ximan kyiʼj txqantl okslal qa at mas kyoklen twitz» (Filipenses 2:3).

14. ¿Alkye tten jaku tzʼonin naʼj Dios qiʼj, ex alkye techel at toj Tyol Dios tiʼj jlu?

¹⁴ Aju toxin tiʼ jaku tzʼonin qiʼj tuʼn miʼn tokx qqʼon qibʼ toj kybʼinchbʼen xjal aju qa ma tzʼok qeʼ qkʼuʼj tiʼj Jehová. Jaku txi qqanin xewbʼaj xjan te tuʼntzun tten qpasens ex tuʼn qjakʼunte qibʼ. A jlu kʼonil qiʼj aj tkubʼ kybʼinchaʼn aj kawil jun nya bʼaʼn. Ax ikx jaku txi qqanin qnabʼil te Jehová tuʼntzun tel qnikʼ tiʼj toj alkye ambʼil in qo ok toj malbʼil tuʼn miʼn tokx qqʼon qibʼ toj  kybʼinchbʼen xjal ex tuʼn ttzaj tqʼoʼn qipumal tuʼn tkubʼ qbʼinchaʼn aju bʼaʼn (Santiago 1:5). Jakulo qoʼx samaʼn toj cárcel moqa jaku kubʼ qʼoʼn alkyexku juntl qkastiw tuʼnju kukx in qo ajbʼen te Jehová. Qa ikju, jaku txi qqanin qipumal te Jehová tuʼntzun t-xi qchikʼbʼaʼn toj tumel kye txqantl tiquʼn mintiʼ in nokx qqʼon qibʼ toj kybʼinchbʼen xjal. Jaku tzʼok qeʼ qkʼuʼj tiʼj qa kʼonil Jehová qiʼj tuʼn qex twitz nya bʼaʼn (kjawil uʼjit Hechos 4:27-31).

15. ¿Alkye tten jaku tzʼonin Tyol Dios qiʼj tuʼn miʼn tokx qqʼon qibʼ toj kybʼinchbʼen xjal? (Qʼonka twitza tiʼj « Onin Tyol Dios kyiʼj tuʼn miʼn tokx kyqʼon kyibʼ toj kybʼinchbʼen xjal»).

¹⁵ O tzaj tqʼoʼn Jehová Tyol qe tuʼn ttzaj tqʼuqbʼaʼn qkʼuʼj. Qa ma qo ximen kyiʼj junjun taqikʼ Tyol Dios, jaku che onin qiʼj tuʼn miʼn tokx qqʼon qibʼ toj kybʼinchbʼen xjal. Qa ma tzʼok tilel quʼn tuʼn kykyaj qeju taqikʼ Tyol Dios lu toj qwiʼ, jaku che onin qiʼj qa ma pon jun ambʼil jatumel mlay ten jun Tyol Dios qukʼil. Ax ikx jaku tzʼonin Tyol Dios qiʼj tuʼn tchʼiy qʼuqbʼil qkʼuʼj tiʼjju in tzaj ttziyen Dios qe toj ambʼil tzul. Il tiʼj tuʼn tten qʼuqbʼil qkʼuʼj lu tuʼn qex twitz ikʼbʼil (Romanos 8:25). Bʼaʼn tuʼn tjaw qjyoʼn junjun taqikʼ Tyol Dios aʼyeju in che yolin kyiʼj qeju tiʼchaq qajbʼil tuʼn qtzalaj kyiʼj toj akʼaj twitz Txʼotxʼ ex tbʼanel qa ma qo ximen qa ya atoʼ toj.

16, 17. ¿Tiʼ jaku tzʼel qkanoʼn kyiʼj tmajen Jehová kukx e ajbʼen te, aʼyeju mintiʼ okx kyqʼon kyibʼ toj kybʼinchbʼen xjal? (Qʼonka twitza tiʼj tnejel tilbʼilal).

¹⁶ Aju tkyajin tiʼ jaku tzʼonin qiʼj tuʼn miʼn tokx qqʼon qibʼ toj kybʼinchbʼen xjal, aju qa ma qo ximen tiʼj techel kyaj kyqʼoʼn tmajen Jehová aʼyeju kukx e ajbʼen te. Toj ambʼil in yolin Tyol Dios tiʼj, nim tmajen Jehová ten nim kyipumal ex jaw kyjyoʼn tbʼanel kybʼe aju onin kyiʼj tuʼn miʼn tokx kyqʼon kyibʼ toj kybʼinchbʼen xjal. Jun techel, ik tzeʼn te Sadrac, Mesac ex Abednego mintiʼ e kʼulin twitz tilbʼilal aju in noktoq te techel tkawil tnam Babilonia (kjawil uʼjit Daniel 3:16-18). Toj ambʼil jaʼlo, aju txʼolbʼabʼil lu in nonin kyiʼj nim testigos de Jehová tuʼn tten kyipumal ex tuʼn miʼn kykʼulin twitz bandera te kytnam. Ax ikx te Jesús,  mintiʼ okx tqʼon tibʼ kyxol aj kawil moqa kyoj junjuntl tiʼchaq aju in neltoq tiʼn mujbʼabʼil kyxol xjal. Ojtzqiʼntoq tuʼn qa jaku tzʼonin techel kyaj tqʼoʼn kyiʼj t-xnaqʼtzbʼen. Tuʼntzunju xi tqʼuqbʼaʼn kykʼuʼj ex xi tqʼamaʼn jlu kye: «Qeʼ kykʼuʼje porque ma kubʼ tiʼj tkyaqil mya bʼaʼn at twitz txʼotxʼ wuʼne» (Juan 16:33).

¹⁷ Ateʼ nim testigos de Jehová toj ambʼil jaʼlo mintiʼ in nokx kyqʼon kyibʼ toj kybʼinchbʼen xjal. Ateʼ junjun o tzʼok bʼinchan nimxix nya bʼaʼn kyiʼj, o che okx qʼoʼn toj cárcel ex axpe ikx o che kubʼ bʼyoʼn tuʼnju kukx in che ajbʼen te Jehová. Aju techel in kubʼ kyqʼoʼn, jaku tzʼonin qiʼj tuʼn miʼn qtzaj xobʼ. Jun ermano te tnam Turquía tqʼama jlu: «Aju erman Franz Reiter, jun erman kuʼxun, kubʼ bʼyoʼn tuʼnju mintiʼ ok tmojbʼan tibʼ kyukʼil t-soldad Hitler. Atxtoq jun qonikʼen tuʼn tkubʼ bʼyoʼn erman, kubʼ ttzʼibʼen jun uʼj te ttxuʼ jatumel kubʼ tyekʼun aju nimxix qʼuqbʼil tkʼuʼj tiʼj Jehová. Wajtoqe tuʼn tel nkanoʼne techel kyaj tqʼoʼn ajtoq wok weʼye twitz jun nya bʼaʼn ik tzeʼn jlu» ^[1] (tqanil jun).

18, 19. a) ¿Alkye tten jaku che onin erman qiʼj jatumel in nok qchmon qibʼ tuʼn miʼn tokx qqʼon qibʼ toj kybʼinchbʼen xjal? b) ¿Tiʼ tajbʼila tuʼn tbʼant tuʼna?

¹⁸ Jaku che onin qe erman qiʼj tuʼn miʼn tokx qqʼon qibʼ toj kybʼinchbʼen xjal. Qa at jun nya bʼaʼn in qo ok weʼ twitz, qqʼamanx kye ansyan. Jaku tzaj kyqʼoʼn tbʼanel nabʼil qe tukʼil Tyol Dios. Ax ikx, qa ojtzqiʼn kyuʼn junjuntl erman jatumel in nok qchmon qibʼ aju nya bʼaʼn in qo ok weʼ twitz, jaku tzaj kyqʼuqbʼaʼn qkʼuʼj. Jaku t-xi qqʼamaʼn kye tuʼn kynaʼn Dios qiʼj. Noqtzun tuʼnj, ax ikx bʼaʼn tuʼn qonin kyiʼj junjuntl erman ex jaku qo naʼn Dios kyiʼj (Mateo 7:12). Jaku kanet junjun kybʼi erman quʼn aʼyeju ateʼ toj cárcel, toj xnaqʼtzbʼil tkubʼ toj jw.org, aju tok tbʼi, «Testigos de Jehová presos por sus creencias (por países)», jatumel in tqʼamaʼn PRENSA > ASUNTOS LEGALES. Jaku jaw qjyoʼn kybʼi junjun erman lu ex qqaninx te Jehová tuʼn tonin kyiʼj erman tuʼn miʼn kytzaj xobʼ ex tuʼn kukx kyajbʼen te (Efesios 6:19, 20).

¹⁹ Noq chʼintl ambʼil atx taj tuʼn tul xitbʼil, tuʼn jlu jakulo tzʼok tilel kyuʼn aj kawil tuʼn tok qmojbʼan qibʼ kyukʼil. Tuʼntzunju, nim toklen tuʼn tbʼaj qbʼinchaʼn qten toj ambʼil jaʼlo tuʼn miʼn tokx qqʼon qibʼ toj kybʼinchbʼen xjal mintiʼ mujbʼabʼil kyxol.