NIMXIX toklen qpakbʼabʼil, noqtzun tuʼnj, ateʼ xjal junxitl kyximbʼetz tiʼj. Maske ateʼ xjal kyajbʼil tuʼn tel kynikʼ tiʼj tiʼ in tzaj tqʼamaʼn Tyol Dios, in kubʼ kynaʼn qa nya il tiʼj tuʼn kyxnaqʼtzaʼn qukʼil tiʼj Tyol Dios.

Qo ximen tiʼj jun xjal aju Gavin tbʼi. In bʼettoq Gavin kyoj chmabʼil, noqtzun tuʼnj, nyatoq taj tuʼn t-xnaqʼtzan tiʼj Tyol Dios. ¿Tiquʼn? In tzaj tqʼamaʼn Gavin qa nyatoq nim tojtzqibʼil at tiʼj Tyol Dios ex nyatoq tajbʼil tuʼn tok kybʼiʼn txqantl jlu. In tzaj xobʼtoq tuʼn t-xi qʼamaʼn te qa il tiʼj tuʼn tok tchmon tibʼ toj jun okslabʼil ex nya tajbʼiltoq tuʼn tkubʼ sbʼuʼn. ¿Tiʼ teya in kubʼ t-ximen tiʼjju ikʼ tiʼj Gavin? ¿In kubʼpe t-ximana qa attoq jun tumel tuʼn t-xi onit? Aju in tzaj t-xnaqʼtzaʼn Tyol Dios jaku tzʼonin nim kyiʼj xjal. Xi tqʼamaʼn Jehová jlu kye aj Israel: «Ik kʼokel nyole ik tzaʼn tqʼabʼ cheʼw, ik tzaʼn xmuʼs in kubʼ tibʼaj chʼim» (Deuteronomio 31:19, 30; 32:2). Qo xnaqʼtzan tiʼj kyaje tiʼchaq tiʼj taʼl cheʼw aju jaku tzʼel qkanoʼn aj qpakbʼan kye «kykyaqil xjal» (1 Timoteo 2:3, 4).

Tbʼanel aju taʼl cheʼw. Chebʼe chebʼe in bʼant taʼl cheʼw ex in nok te jun txut aʼ. ¿Tiquʼn in tzaj tqʼamaʼn Xjan Uʼj qa iktoq tten tyol Jehová «ik tzaʼn tqʼabʼ cheʼw», moqa taʼl cheʼw? Tuʼnju in tzaj yolintoq kye tmajen toj tbʼanel ex tukʼil kʼujlabʼil. Ax ikx qe, jaku tzʼel qkanoʼn tiʼj qa mintiʼ in qo yolin jun yol nya toj tumel tiʼjju in xi kynimen xjal. Jaku qo onin kyiʼj tuʼn tel kynikʼ kyuʼnx kyibʼ tiʼjju axix tok ex tuʼn tkubʼ kyximen tiʼ kbʼantel kyuʼn. Qa ma kubʼ qyekʼun qa in qo ximen kyiʼj xjal, jaku tzʼok kyqʼoʼn xjal mas kywiʼ tiʼjju in xi qqʼamaʼn kye ex tuʼn jlu tzul tiʼn nim tbʼanel qe toj qpakbʼabʼil.

In tqʼoʼn taʼl cheʼw chewsabʼil. Jaku tzʼok qpakbʼabʼil te chewsabʼil kye txqantl, toj juntl yol, jaku kynaʼn bʼaʼn tuʼn. ¿Alkye tten in bʼant jlu? Qo ximen tiʼj junjun tumel tuʼn qonin kyiʼj xjal tuʼn tel mas kynikʼ tiʼjju axix tok. Qo ximen juntl maj tiʼjju ikʼ tiʼj Gavin. Tnejel, jun erman Chris tbʼi xi tqʼamaʼn te Gavin tuʼn t-xi tkʼamoʼn jun t-xnaqʼtzbʼil tiʼj Tyol Dios, noqtzun tuʼnj, mintiʼ ok tobligarin tuʼn t-xi tkʼamoʼn. Aju bʼant tuʼn, ok ten jyol junjuntl tumel tuʼntzun tkubʼ tnaʼn Gavin tbʼanel aj kyyolin junjun maj tiʼj Tyol Dios. Xi tqʼamaʼn Chris te Gavin qa at jun xnaqʼtzbʼil nim toklen tkuʼx toj Tyol Dios ex qa ma tzʼeltoq tnikʼ tiʼj tqanil lu, jakutoq tzʼonin tiʼj tuʼn telxix tnikʼ tiʼjju in nok tbʼiʼn kyoj chmabʼil. Yajxitl, xi tqʼamaʼn Chris te Gavin qa aʼyeju yol e kyaj tziyen toj Tyol Dios onin tiʼj tuʼn tok qeʼ tkʼuʼj qa ax tok Tyol Dios. E yolin nim maj tiʼj alkye tten o che japun kywiʼ qeju yol tziyen maj tuʼn Dios. Kubʼ tnaʼn Gavin txubʼtxaj tuʼn jlu ex xitzun tkʼamoʼn jun xnaqʼtzbʼil tiʼj Tyol Dios.

Nim toklen taʼl cheʼw te qchwinqlal. Aj tpon ambʼil te qʼijel toj tnam Israel, jakutoq tzikʼ nim xjaw ex mintiʼ jbʼal. Qa mintiʼ taʼl cheʼw, in che tzqij qeju awal ex in che kyim. Kyaj tqʼamaʼn Tyol Dios qa toj ambʼil jaʼlo kyajbʼiltoq xjal «tuʼn kybʼinte [...] tyol Dios» (Amós 8:11). Ik tten jlu ik tzeʼn at nim kʼaj kyiʼj xjal, noqtzun tuʼnj, tiʼj Tyol Dios. Tuʼntzunju, in tzaj tqʼamaʼn Tyol Dios qa aqeju skʼoʼn maj che okeltoq «ik tzaʼn tqʼabʼ cheʼw in tzaj t-samaʼn» aj kypakbʼan tiʼj tbʼanel tqanil tiʼj Tkawbʼil, ex aʼye «txqantl» ẍneʼl in che onin kyiʼj (Miqueas 5:7; Juan 10:16). Aju tqanil in qo pakbʼan tiʼj, atzun in tzaj tqʼoʼn Jehová tuʼntzun tten kychwinqlal qeju kyajbʼil tuʼn tel kynikʼ tiʼjju axix tok. ¿In nokpe tqʼoʼn teya toklen aju tqanil lu?

Jun kʼiwlabʼil aju taʼl cheʼw tuʼn Jehová. (Deuteronomio 33:13). Jaku tzʼok qpakbʼabʼil te jun kʼiwlabʼil moqa te jun oyaj kye qeju kyajbʼil tuʼn tok kybʼiʼn. Ok aju xnaqʼtzbʼil tiʼj Tyol Dios te jun kʼiwlabʼil te Gavin tuʼnju onin jlu tiʼj tuʼn kykanet tzaqʼwebʼil kyiʼj kykyaqil t-xjel. Tej tikʼ chʼin ambʼil jaw aʼ twiʼ ex toj ambʼil jaʼlo in tzalaj tuʼnju in pakbʼaʼn tiʼj tbʼanel tqanil tiʼj Tkawbʼil Dios tukʼil t-xuʼjil, aju Joyce tbʼi.

Qa ma tzʼok qmojbʼaʼn qpakbʼabʼil tukʼil taʼl cheʼw, jaku tzʼel qnikʼ tiʼj qa nim toklen tuʼn tok tilil tuʼn teyele junjun qe toj pakbʼabʼil. ¿Tiquʼn? Tuʼnju noq chʼin jaku tzʼonin jun tal txut aʼ, noqtzun tuʼnj, qa at nim millón txut aʼ tuʼn taʼl cheʼw, jaku tzʼex tʼoq, moqa akʼ, twitz Txʼotxʼ tuʼn. Chʼixme axju in bʼaj qa ma qo ximen tiʼjju in bʼant quʼn toj pakbʼabʼil, nya nim jaku bʼant quʼn qjunalx. Noqtzun tuʼnj, at nim millón testigos de Jehová, qkyaqilx in bʼant quʼn tuʼn tpon aju tqanil in xi qqʼamaʼn «kye kykyaqil nasyon» (Mateo 24:14). ¿In nokpe qpakbʼabʼil te jun kʼiwlabʼil tuʼn Jehová kye txqantl? In nok, tuʼnju ik tten qpakbʼabʼil ik tzeʼn tbʼanel taʼl cheʼw, in tqʼoʼn chewsabʼil ex chwinqlal.