1, 2. ¿Tiʼ e ok weʼ Jefté twitz tukʼil tmeʼjel?

IN MELTZʼAJTOQ jun xinaq, moqa ichan, tja tej otoqxi kambʼan toj jun qʼoj. Tej tok tqʼoʼn twitz tmeʼjel, moqa tmyal tiʼj, nimxix jaw tzalaj, tuʼntzunju, in bʼitzin ex in bʼixin tej tetz kʼamol tman. Noqtzun tuʼnj, kubʼ tbʼinchaʼn tman jun tiʼ aju jaw labʼin tmeʼjel tiʼj. El tlichʼin t-xbʼalun tuʼntzun tkubʼ tyekʼun qa nim in bʼisintoq ex tqʼama jlu: «Ay nmeʼjel». Xitzun tqʼamaʼn te tmeʼjel qa otoq t-xi ttziyen jun tyol te Jehová ex tuʼn jlu, melayxtoq kubʼ mojeʼ nix tuʼn tul jun tal. ¿Tiʼ xi ttzaqʼweʼn tmeʼjel xinaq lu te? Jun rat naj xi tqʼamaʼn te qa iltoq tiʼj tuʼn tjapun twiʼ tyol tuʼn. Tukʼilju ttzaqʼwebʼil txin lu, kubʼ tyekʼun qa attoq nim qʼuqbʼil tkʼuʼj tiʼj Jehová ex qa mlaytoq txi tqanin jun nya bʼaʼn te (Jueces 11:34-37). Tej tok tqʼoʼn twitz xinaq tiʼj qa attoq nim qʼuqbʼil tkʼuʼj tmeʼjel, nimxix jaw tzalaj tiʼj. Ojtzqiʼntoq tuʼn qa kjawil tzalajxix Jehová tiʼj tuʼnju tbʼanel t-ximbʼetz.

 ² Jefté tbʼi aju xinaq lu. Ten nimxix qʼuqbʼil tkʼuʼj Jefté tukʼil tmeʼjel tiʼj Jehová ex tiʼjju alkye tten in bʼanttoq qe tiʼchaq tuʼn. Axpe ikx, tej e ok weʼ twitz nya bʼaʼn toj kyanqʼibʼil, kubʼ kyyekʼun qa at qʼuqbʼil kykʼuʼj. Kubʼ kybʼinchaʼn alkyexku tiʼ tuʼnju kyajbʼiltoq tuʼn kytzaj kʼiwlaʼn tuʼn Jehová.

3. ¿Tiquʼn jaku tzʼonin techel kyaj tqʼoʼn Jefté tukʼil tmeʼjel qiʼj?

³ At maj kwest tuʼn tten nim qʼuqbʼil qkʼuʼj tiʼj Jehová. Qa qajbʼil tuʼn kukx tten, il tiʼj tuʼn tok tilel quʼn tuʼntzun miʼn tnaj qʼuqbʼil qkʼuʼj (Judas 3). Tuʼntzunju, qo xnaqʼtzal tiʼj techel kyaj tqʼoʼn Jefté tukʼil tmeʼjel toj xnaqʼtzbʼil lu. ¿Alkye tten kubʼ kyyekʼun qa at qʼuqbʼil kykʼuʼj tej ttzaj nya bʼaʼn kyiʼj?

4, 5. a) ¿Tiʼ xi tqʼamaʼn Jehová tuʼn tbʼant kyuʼn aj Israel aj kyokxtoq toj Txʼotxʼ otoq tzaj Tziyen kye? b) Ik tzeʼn in tzaj tyekʼun Salmo 106, ¿tiʼ tzaj kyiʼj aj Israel tuʼnju mintiʼ e nimen te Jehová?

⁴ Tkyaqil qʼij, in noktoq kyqʼoʼn kywitz Jefté tukʼil tmeʼjel tiʼjju nya bʼaʼn in tzaj tuʼnju mintiʼtoq in xi kynimen aj Israel Jehová. Otoqxi tzikʼ 300 abʼqʼi, xi tqʼamaʼn Jehová kye aj Israel tuʼn tkubʼ kybʼyoʼn qe xjal in che kʼulun kywitz nya ax tok dios, aʼyeju in che anqʼintoq toj Txʼotxʼ otoq tzaj Tziyen kye. Noqtzun tuʼnj, mintiʼ xi kybʼiʼn (Deuteronomio 7:1-4). Ax ikx e ok ten nim aj Israel kʼulul kywitz qe nya ax tok dios ex e yaẍin ik tzeʼn kye xjal in che anqʼintoq tojju Txʼotxʼ otoq tzaj Tziyen kye (kjawil uʼjit Salmo 106:34-39).

⁵ Tuʼnju mintiʼ e nimen aj Israel te Jehová, mintiʼ kolin kyiʼj tej kyok tzoqpaj qe aj qʼoj kyiʼj (Jueces 2:1-3, 11-15; Salmo 106:40-43). Ax tok, kwestlo tuʼn tten qʼuqbʼil kykʼuʼj qe ja xjal kʼujlaʼn Jehová kyuʼn toj ambʼil aju. Noqtzun tuʼnj, in yolin Tyol Dios kyiʼj junjun aj Israel kukx e ajbʼen te Jehová. Kyxol qe jlu ten Jefté tukʼil tmeʼjel, ten Elqaná, Ana ex Samuel (1 Samuel 1:20-28; 2:26).

6. ¿Tiʼ in bʼant kyuʼn xjal toj ambʼil jaʼlo ex tiʼ il tiʼj tuʼn tok tilel quʼn?

⁶ Toj ambʼil jaʼlo, nim xjal oʼkx in che ximen tiʼj nya bʼaʼn ik tzeʼn qe xjal e anqʼin toj Canaán. In che ximen tiʼj yaẍbʼil, tiʼj qʼoj ex tiʼj pwaq. Noqtzun tuʼnj, in tzaj tqʼamaʼn Jehová tuʼn tok qxqʼuqin qibʼ. Taj Jehová tuʼn qok t-xqʼuqin kyiʼj nya bʼaʼn ik tzeʼn tajbʼiltoq tuʼn kyok t-xqʼuqin qe aj Israel. ¿Tiʼ xnaqʼtzbʼil jaku tzeʼl qiʼn tiʼj nya bʼaʼn bʼant kyuʼn aj Israel? (1 Corintios 10:6-11). Qqʼonk tilil tuʼn miʼn tel qkanoʼn aju nya bʼaʼn in bʼant kyuʼn xjal (Romanos 12:2).

7. a) ¿Ti ok kybʼinchbʼen qeju t-xjalil Jefté tiʼj? b) ¿Alkye tmod Jefté kubʼ tyekʼun kyukʼil?

⁷ Toj ambʼil tej tanqʼin Jefté, tzaj nya bʼaʼn kyiʼj aj Israel kyuʼn aj qʼoj tuʼnju mintiʼ e nimen te Jehová (Jueces 10:7, 8). Nya oʼkx ikʼx tuʼn Jefté aju nya bʼaʼn ok kybʼinchaʼn qe aj qʼoj tiʼj, ax ikx ok bʼinchaʼn nya bʼaʼn tiʼj kyuʼn qe terman ex qe nejenel te tnam Israel. El ikʼun Jefté kyuʼn ex tzaj loʼchj kykʼuʼj tiʼj. Tuʼntzunju, xi kyqʼamaʼn te tuʼn tex ex tuʼn tkyaj tkolin ttxʼotxʼ (Jueces 11:1-3). Noqtzun tuʼnj, mintiʼ ok tqʼoʼn Jefté twiʼ tiʼjju nya bʼaʼn ok bʼinchaʼn tiʼj. ¿Tiquʼn ojtzqiʼn jlu quʼn? Tuʼnju tej e kubʼsan qe nejenel te tnam Israel tuʼn tonin kyiʼj, i ex tonin Jefté tuʼn tkyaqil tkʼuʼj (Jueces 11:4-11). ¿Tiquʼn bʼant jlu tuʼn?

8, 9. a) ¿Alkyeqe nabʼil tkuʼx toj Tley Moisés onin tiʼj Jefté? b) ¿Alkyetoq mas nim toklen toj twitz Jefté?

 ⁸ Kyuwxix tkʼuʼj Jefté toj qʼoj. Nya oʼkxju, ax ikx ojtzqiʼntoq tuʼn tkyaqilju otoq tzikʼ kyiʼj aj Israel ex aju Ley xi qʼoʼn te Moisés. Tej tok ten ximel tiʼj alkye tmod Jehová ten kyukʼil tmajen, el tnikʼ tiʼj alkye bʼaʼn ex alkye nya bʼaʼn (Jueces 11:12-27). Ex e ajbʼen qe nabʼil tuʼn toj tanqʼibʼil aʼyeju ateʼkux kyoj ley tuʼntzun tkubʼ t-ximen tiʼ tuʼn tbʼant tuʼn. Ojtzqiʼntoq tuʼn Jefté qa nya bʼaʼn tuʼn taj kyqʼoʼn tmajen Jehová t-xel nya bʼaʼn tiʼj juntl, sino tuʼn tok kykʼujlan kyibʼ. Ax ikx, el tnikʼ tiʼj toj Ley alkye tmod tuʼn tten kyukʼil txqantl, axpe ikx kyukʼil qeju i el ikʼun te (kjawil uʼjit Éxodo 23:5 ex Levítico 19:17, 18).

⁹ Axlo ikx onin techel kyaj tqʼoʼn José tiʼj Jefté. Ex ojtzqiʼnlo tuʼn qa tzaj qʼaqʼin tkʼuʼj José kyiʼj ttzik maske otoq tzʼel ikʼun kyuʼn (Génesis 37:4; 45:4, 5). Oklo ten Jefté ximel tiʼj techel aju ex a jlu onin tiʼj tuʼn tkubʼ tyekʼun tmod aju bʼaʼn ela toj twitz Jehová. Kubʼlo tnaʼn Jefté nim bʼis tuʼnju ok kybʼinchan terman nya bʼaʼn tiʼj. Noqtzun tuʼnj, mintiʼxix ok tqʼoʼn twiʼ tiʼjju kubʼ tnaʼn. Aju mas nimtoq toklen toj twitz Jefté, aju tuʼn tkolin tiʼj tbʼi Jehová ex kyiʼj tmajen (Jueces 11:9). Tajbʼilxix Jefté tuʼn tkubʼ tyekʼun qʼuqbʼil tkʼuʼj tiʼj Jehová. Tuʼntzunju, tzaj kʼiwlaʼn tuʼn Jehová ex qeju t-xjalil (Hebreos 11:32, 33).

10. ¿Alkye tten in che onin qe nabʼil tkuʼx toj Tyol Dios qiʼj tuʼntzun tel nikʼ qiʼj qa okslal qoʼ?

¹⁰ ¿Alkye tten jaku tzʼel qkanoʼn techel kyaj tqʼoʼn Jefté? Qo ximen tiʼj jlu: ¿tiʼ kbʼantel quʼn qa ma tzaj qbʼis tuʼn jun erman ex qa in nok tbʼinchaʼn jun nya bʼaʼn qiʼj? Bʼaʼn tuʼn kyajbʼen nabʼil tkuʼx toj Tyol Dios quʼn tuʼntzun tel qnikʼ tiʼj tiʼ kbʼantel quʼn. Maske in tzaj qbʼis, mlay kyaj qkolin tuʼn qajbʼen te Jehová. Kukx qo xeʼl kyoj chmabʼil, kukx qo tel kyukʼil qerman ex kxel qnimen Jehová ik tzeʼn te Jefté. A jlu kʼonil qiʼj tuʼn tikʼx nya bʼaʼn quʼn ex tuʼn tkubʼ qqʼoʼn jun tbʼanel techel kywitz txqantl (Romanos 12:20, 21; Colosenses 3:13, TNM).

11, 12. a) ¿Tiʼ xi ttziyen Jefté te Jehová? b) ¿Tiʼtoq tuʼn tbʼant tuʼn, tuʼntzun tjapun twiʼ tyol?

¹¹ Ojtzqiʼntoq tuʼn Jefté qa iltoq tiʼj tuʼn ttzaj onin tuʼn Jehová tuʼn kyklet aj Israel kyiʼj qe aj qʼoj. Tuʼntzunju, xi ttziyen jun tyol te. Xi tqʼamaʼn te Jehová qa ma tzaj onin tuʼn, tuʼn tkubʼ kyiʼj aj qʼoj, ok kxel tqʼoʼntoq aju tnejel xjal kʼeletztoq kʼamolte ik tzeʼn «jun oyaj» aj tmeltzʼaj toj qʼoj (Jueces 11:30, 31). ¿Tiʼ kyxilen qe tyol?

¹² Mintiʼ tqʼama Jefté qa kbʼeltoq tbʼyoʼn aju tnejel xjal oktoq kʼeletz kʼamolte. ¿Tiquʼn ojtzqiʼn jlu quʼn? Tuʼnju ojtzqiʼntoq tuʼn qa in nel tikʼun Jehová tuʼn tkubʼ patin jun xjal te oyaj (Deuteronomio 18:9, 10). Toj ambʼil tej kyten aj Israel, jun oyaj patin atzun jun oyaj nim toklen in xi tqʼoʼn jun xjal te Jehová. Tuʼntzunju, aju tqʼama Jefté, a t-xilen oktoq kxel tqʼoʼn jun xjal tuʼn tajbʼen te Jehová toj ja xbʼalun toj tkyaqil  tanqʼibʼil. Bʼaʼn ela toj twitz Jehová aju xi tqʼamaʼn Jefté te ex tuʼntzunju tzaj onin tuʼn, tuʼn tkubʼ kyiʼj aj qʼoj (Jueces 11:32, 33). Noqtzun tuʼnj, ¿alkyetzun xjal kxel tqʼoʼntoq Jefté te oyaj te Dios?

13, 14. ¿Tiʼ xnaqʼtzbʼil in tzaj tqʼoʼn qe aju tkuʼx toj Jueces 11:35 tiʼj qʼuqbʼil tkʼuʼj Jefté?

¹³ Ik tzeʼn ma qo xnaqʼtzan tiʼj toj tnejel taqikʼ, oʼkx attoq jun tmeʼjel Jefté ex kʼujlaʼnxixtoq tuʼn, ex atzun tnejel xjal etz kʼamolte. ¿Tiʼtoq kbʼantel tuʼn Jefté? ¿Okpe kjapunel twiʼ tyol otoq txi ttziyen te Jehová? ¿Okpe kxel tqʼoʼn tmeʼjel tuʼn tajbʼen toj tkyaqil tanqʼibʼil te Jehová toj ja xbʼalun?

¹⁴ Toj ambʼil aju, ax ikx ok lepeʼ Jefté kyiʼj nabʼil otoq tzʼel tnikʼ tiʼj toj tley Dios. Tzajlo tnaʼn qa in tzaj tqʼamaʼntoq Ley kye aj Israel tuʼn t-xi kyqʼoʼn aju mas tbʼanel attoq kye te Jehová (Éxodo 23:19). Ex tzajlo tnaʼn qa at jun in xitoq ttziyen jun tyol te Jehová, in tzaj tqʼamaʼntoq Ley jlu: «Qa at jun xjal ma tzaj ttziyan jun tyol weye, [...] il tiʼj tuʼn tjapun tyol ex tuʼn tbʼinchante tkyaqil aju otoq tzaj ttziyan» (Números 30:2). Tuʼntzunju, iltoq tiʼj tuʼn tbʼant tuʼn Jefté ik tzeʼn te Ana, aju kukx ajbʼen te Jehová ex axlo ambʼil anqʼin tej tten Jefté. Iltoq tiʼj tuʼn tjapun twiʼ tyol Jefté, maske kwesttoq kʼelel te ex te tmeʼjel. Tuʼnju atz tuʼn tajbʼen tmeʼjel Jefté toj tkyaqil tanqʼibʼil toj ja xbʼalun, melayxtoq kubʼ mojeʼ nix tuʼn tul itzʼji tal. Tuʼntzunju, mintiʼ jun toj tja Jefté jakutoq txi kʼamonte aju ttxʼotxʼ nix aju tbʼi (Jueces 11:34). Kyjuʼtzun, tqʼama Jefté jlu: «Ma txi ntziyane jun yol te Qman ex il tiʼj tuʼn tjapun wuʼne» (Jueces 11:35). Kyukʼil qe yol lu in nel qnikʼ tiʼj qa attoq nim qʼuqbʼil tkʼuʼj Jefté. Xi tkʼamoʼn Jehová aju matij chojbʼil xi tqʼoʼn Jefté ex tzaj kʼiwlaʼn tuʼn. Yajtzun qe, ¿tenpewtlo nim qʼuqbʼil qkʼuʼj ik tzeʼn te Jefté?

15. a) ¿Tiʼ xi qtziyen tej t-xi qqʼamaʼn te Jehová tuʼn qajbʼen te? b) ¿Alkye tten kbʼel qyekʼun qa at qʼuqbʼil qkʼuʼj?

 ¹⁵ Tej t-xi qqʼamaʼn te Jehová tuʼn qajbʼen te, xi qtziyen te qa kbʼeltoq qbʼinchaʼn aju tajbʼil. Ojtzqiʼntoq quʼn qa at maj kwest tuʼn tbʼant quʼn. Noqtzun tuʼnj, ¿tiʼ in bʼant quʼn aj ttzaj tqanin jun tiʼ qe aju nya qgan? Qa at qʼuqbʼil qkʼuʼj ik tzeʼn te Jefté, kbʼel qyekʼun aj tjapun twiʼ qyol xi qtziyen te Jehová ex qa ma txi qnimen tuʼn tkyaqil qkʼuʼj. Ojtzqiʼn quʼn qa aju kʼiwlabʼil in tzaj tqʼoʼn Jehová, atzun mas tbʼanel twitz alkyexku juntl tiʼ jaku bʼant quʼn (Malaquías 3:10). ¿Tiʼtzun bʼaj tukʼil tmeʼjel Jefté? ¿Tiʼ bʼant tuʼn tej tok tbʼiʼn aju otoq t-xi ttziyen tman te Jehová?

16. ¿Tiʼ bʼant tuʼn tmeʼjel Jefté tej t-xi qʼoʼn jun toklen aju mintiʼtoq bʼiʼn tuʼn? (Qʼonka twitza tiʼj tnejel tilbʼilal).

¹⁶ Junxitl aju xi ttziyen Jefté te Jehová ik tzeʼn aju xi ttziyen Ana. Xi ttziyen Ana tuʼn t-xi tqʼoʼn Samuel te Jehová tuʼn tajbʼen toj ja xbʼalun ik tzeʼn jun nazareo (1 Samuel 1:11). Aʼyeju nazareo jakutoq che kubʼ mojeʼ ex jakutoq ten kykʼwaʼl. Atzun te tmeʼjel Jefté melaytoq bʼant jlu tuʼn, tuʼnju otoq txi qʼoʼn tuʼn tman ik tzeʼn in xi qʼet tkyaqil «jun oyaj patun» (Jueces 11:37-40). Qo ximen tiʼj jlu: jakutoq kubʼ mojeʼ tmeʼjel Jefté tukʼil jun xjal mas tbʼanel toj tnam, tuʼnju nejeneltoq ttat toj tnam Israel. Noqtzun tuʼnj, nya a jlu bʼant tuʼn, tuʼnju mintiʼtoq tuʼn tjaw tnimsan tibʼ ex ok kʼokeltoq te jun tmajen Dios toj ja xbʼalun. ¿Tiʼ bʼant tuʼn? Kyukʼil qe yol xi tqʼamaʼn te tman, kubʼ tyekʼun qa mas nim toklen toj twitz tuʼn tajbʼen te Jehová. Tqʼama jlu: «Tat, bʼinchama wiʼje aju ma txi ttziyana te Qman» (Jueces 11:36). Noq tuʼn tajbʼen tmeʼjel Jefté te Jehová, mintiʼ ten tchmil nix tal ik tzeʼn kye txqantl txin. ¿Alkye tten jaku tzʼel qkanoʼn tiʼjju tbʼanel bʼant tuʼn?

17. a) ¿Tiʼ jaku bʼant quʼn tuʼn tel qkanoʼn techel kyaj tqʼoʼn Jefté tukʼil tmeʼjel? b) ¿Tzeʼn in che onin yol tkuʼx toj Hebreos 6:10-12 qiʼj tuʼntzun tkubʼ qbʼinchaʼn junjun tiʼ tuʼn qajbʼen te Jehová?

¹⁷ ¿Alkye tten jaku tzʼel qkanoʼn qʼuqbʼil tkʼuʼj Jefté tukʼil tmeʼjel? Toj ambʼil jaʼlo, ateʼ nim mil testigos de Jehová kuʼxun in kubʼ kyyoʼn jun ambʼil tuʼn miʼn kykubʼ mojeʼ nix tuʼn tten kykʼwaʼl. ¿Tiquʼn? Tuʼnju kyajbʼil tuʼn tok kyqʼoʼn mas kywiʼ tiʼj kyajbʼebʼil te Jehová. Ax ikx qe erman ma  che tijen, at maj in nel kypaʼn ambʼil tuʼn miʼn kyten kyukʼil kykʼwaʼl moqa kyukʼil tal kychman. ¿Tiquʼn? Tuʼnju kyajbʼil tuʼn t-xi kyqʼoʼn ambʼil ex kyipumal te Jehová. Ateʼ junjun in che onin tuʼn kyjaw bʼinchet ja jatumel tuʼn kyok chmabʼil. Ateʼ junjuntl in cheʼx toj Xnaqʼtzbʼil kye Pakbʼal tiʼj Tkawbʼil Dios ex in cheʼx ajbʼel toj jun kʼloj okslal jatumel mintiʼxix pakbʼal. Ex atzun txqantl, in bʼaj kybʼinchaʼn kyten tuʼn kypakbʼan mas toj ambʼil te Nabʼitz Tkyimlen Jesucristo. Mlayx tzʼel naj tiʼj tkʼuʼj Jehová aju in bʼant kyuʼn tmajen kukx in che ajbʼen te tuʼn tkyaqil kykʼuʼj (kjawil uʼjit Hebreos 6:10-12). ¿Yajtzun teya? ¿Tajbʼila tuʼn tbʼant junjun tiʼchaq tuʼna tuʼn tajbʼena mas te Jehová?

18, 19. a) ¿Tiʼ xnaqʼtzbʼil ma tzʼel qiʼn tiʼj techel kyaj tqʼoʼn Jefté ex tmeʼjel? b) ¿Alkye tten jaku tzʼel qkanoʼn kyiʼj?

¹⁸ At nim tiʼ jaku tzʼel qkanoʼn tiʼj techel kyaj tqʼoʼn Jefté tukʼil tmeʼjel. Jun techel, xi tbʼiʼn qe tkawbʼil Jehová tuʼntzun tel tnikʼ tiʼj tiʼ tuʼn tbʼant tuʼn toj tanqʼibʼil. Ok tilel tuʼn, tuʼn miʼn tel tkanoʼn aju nya bʼaʼn bʼant kyuʼn xjal in che anqʼintoq ttxlaj. Kubʼ tyekʼun qa at qʼuqbʼil tkʼuʼj axpe ikx tej ttzaj tbʼis kyuʼn junjun xjal. Ex tej mintiʼ e nimen junjun te Jehová, kubʼ tyekʼun tukʼil tmeʼjel qa at nim qʼuqbʼil kykʼuʼj. Tzaj kʼiwlaʼn Jefté tukʼil tmeʼjel tuʼn Jehová tiʼjju tiʼchaq bʼant kyuʼn. Nya oʼkxju, ax ikx e ajbʼen tuʼn Jehová tuʼntzun kyonin kyiʼj txqantl tuʼn kyajbʼen te.

¹⁹ In tzaj tqʼamaʼn Tyol Dios jlu: «Noq oʼkx tuʼn kyok lpeʼye kyiʼj qeju ma kykʼam aju yol tzaj ttziyan Dios, ma kykʼam tuʼnju at kyokslabʼl ex at kypasens» (Hebreos 6:12). Tuʼntzunju, tzʼok tilel quʼn tuʼn tel qkanoʼn techel kyaj tqʼoʼn Jefté tukʼil tmeʼjel ex tuʼn kukx tkubʼ qyekʼun qa at nim qʼuqbʼil qkʼuʼj. Bʼaʼn tuʼn ttzaj qnaʼn qa in che tzaj tkʼiwlaʼn Jehová qeju in nok qeʼ kykʼuʼj tiʼj.