1, 2. a) ¿Tiʼ jaku tzʼel qkanoʼn tiʼj Gedeón tej tikʼx tuʼn kyukʼix qe ox syent xinaq attoq tukʼil? (Qʼonka twitza tiʼj tnejel tilbʼilal). b) Ik tzeʼn in tzaj tqʼamaʼn Lucas 21:19, ¿tiquʼn nim toklen tuʼn tikʼx quʼn?

QʼOJIN jwes Gedeón tiʼj jun qʼoj kyuwxix kyukʼil qe t-soldad ex kwest tuʼn tkubʼ tiʼj qʼoj. E bʼet junlo 32 kilómetros tuʼnju ex jun qonikʼan kyuʼn lepchiqeʼk kyiʼj aj qʼoj. ¿Tiʼ bʼaj yajxitl? In tzaj tqʼamaʼn Tyol Dios jlu: «Pontzun Gedeón ttzi nima Jordán kyukʼix ox syent xinaq tukʼil, ex e ikʼx tuj nima maske otoq che sikt wen». Noqtzun tuʼnj, naʼmxtoq tkubʼ tiʼj qʼoj kyuʼn tuʼnju itzʼxtoq 15,000 soldad aj qʼoj kyiʼj. Aqeju soldad lu otoq tzʼok kybʼinchaʼn nim nya bʼaʼn kyiʼj aj Israel kyoj nim abʼqʼi. Tuʼntzunju, mintiʼtoq tuʼn t-xi tqʼoʼn Gedeón ex qe t-soldad ambʼil tuʼn kykubʼ numj. Kukx e ok lepeʼ kyiʼj aj qʼoj tuʼntzun tkubʼ kyiʼj kyuʼn (Jueces 7:22; 8:4, 10, 28).

² Ax ikx qe, in qo qʼojin tiʼj jun qʼoj kyuw ex kwest tuʼn tkubʼ tiʼj. A Satanás aj qʼoj qiʼj tukʼix tkyaqilju tokx tjaqʼ tkawbʼil, ex aju il tok qiʼj. At junjun qeʼ ma tzikʼ nim abʼqʼi in qo qʼojin kyiʼj.  Ex tuʼn tonbʼil Jehová nim maj o kubʼ kyiʼj quʼn. Noqtzun tuʼnj, naʼmx qkambʼan tiʼj qʼoj. Atlo maj jaku qo sikt tuʼnju in nok tilil quʼn moqa tuʼnju in qo yon tiʼj tuʼn tul xitbʼil tiʼj tkyaqil nya bʼaʼn. Kyaj tqʼamaʼn Jesús qa qo ikʼel toj kʼixkʼoj ex yajbʼil kyoj mankbʼil tqʼijlalil. Noqtzun tuʼnj, ax ikx tqʼama qa ma tzikʼx quʼn, jaku qo kambʼan tiʼj qʼoj (kjawil uʼjit Lucas 21:19). ¿Tiʼtzun t-xilen tuʼn tikʼx quʼn? ¿Tiʼ kʼonil qiʼj tuʼn tikʼx quʼn? ¿Tiʼ jaku tzʼel qkanoʼn kyiʼj xjal aʼyeju o tzikʼx kyuʼn? Ex aj tikʼx quʼn, ¿alkye tten in bʼant aqʼuntl «kabʼalxix» tuʼn qiʼj? (Santiago 1:4).

3. ¿Tiʼ t-xilen aju tuʼn tikʼx quʼn?

³ Toj Tyol Dios, aj tyolin tiʼj tuʼn tikʼx quʼn, nya oʼkx in yolin tiʼj tuʼn qex twitz jun nya bʼaʼn. Tuʼnju at toklen jlu tukʼil alkye qximbʼetz ktel aj qok weʼ twitz nya bʼaʼn. Qa ma tzikʼx quʼn, a t-xilen qa mintiʼ tuʼn qtzaj xobʼ, tuʼn kukx qajbʼen te Jehová ex tuʼn tten qpasens. In tzaj tqʼamaʼn jun uʼj qa aju tuʼn tikʼx quʼn, a t-xilen tuʼn tten nim qʼuqbʼil qkʼuʼj ex tuʼn miʼn qkubʼ numj aj qok weʼ twitz nya bʼaʼn. Ax ikx, in yolin tiʼj tuʼn qkubʼ weʼ kywitz nya bʼaʼn kyuwxix. Qa ma tzikʼx quʼn, in qo kambʼan kyiʼj nya bʼaʼn. Mintiʼ in nok qqʼoʼn qwiʼ tiʼj kʼixkʼoj in tzaj qiʼj, aju in bʼant quʼn, in nok qqʼoʼn qwiʼ tiʼjju qajbʼil tuʼn tbʼant.

4. ¿Tiquʼn in xi qqʼamaʼn qa in nonin kʼujlabʼil qiʼj tuʼn tikʼx quʼn?

⁴ In nonin kʼujlabʼil qiʼj tuʼn tikʼx quʼn (kjawil uʼjit 1 Corintios 13:4, 7). ¿Tiquʼn? Tuʼnju qa at qkʼujlabʼil tiʼj Jehová, in nonin qiʼj tuʼn tikʼx quʼn alkyexku tiʼchaq in tzaj tqʼoʼn ambʼil te tuʼn tikʼ (Lucas 22:41, 42). Aju qkʼujlabʼil at kyiʼj erman, in nonin qiʼj tuʼn tikʼx junjun kypaltil quʼn (1 Pedro 4:8). Ex aju kʼujlabʼil at kyxol mejebʼleʼn, in nonin kyiʼj tuʼn tikʼx qe nya bʼaʼn in che tzaj kyiʼj, axpe ikx kyiʼj qeju mas in che tzalaj. A jlu in nonin kyiʼj tuʼn tchʼiy mas kʼujlabʼil kyxol (1 Corintios 7:28).

5. ¿Tiquʼn oʼkx Jehová mas jaku tzʼonin qiʼj tuʼn tikʼx quʼn?

⁵ Qqaninx te Jehová tuʼn ttzaj tqʼoʼn qipun. A Jehová in nonin qiʼj «tuʼn tiy’x kyqilka quʼn» ex a «nnimsan qkʼuʼj tuʼnj tyol» (Romanos 15:5, Ac’aj Testamento). Oʼkx Jehová mas jaku tzʼonin qiʼj. ¿Tiquʼn? Tuʼnju oʼkx te in nel tnikʼ tiʼj tkyaqil in nikʼ qiʼj, il nel tnikʼ tiʼj qximbʼetz ex tiʼjju o tzikʼ qiʼj. Tuʼntzunju, ojtzqiʼn tuʼn alkyexix at tajbʼen qe tuʼn tikʼx quʼn. In tzaj tqʼamaʼn Xjan Uʼj qa kjapunel twiʼ tyol Jehová tuʼn t-xi «tqʼoʼn aju in kyqanin qeju in che niman te, ex ok t-xi kyqanin onbʼil te in che tzaj tbʼiʼn ex in che klet tuʼn» (Salmo 145:19). Noqtzun tuʼnj, ¿alkye tten in qo tzaj ttzaqʼweʼn Jehová aj t-xi qqanin tuʼn ttzaj tqʼoʼn qipumal tuʼn tikʼx quʼn?

6. Aj in qo ok weʼ twitz jun nya bʼaʼn, ¿alkye tten in japun twiʼ tyol Jehová tuʼn ttzaj tyekʼun «jun tumel» qe tuʼn qex twitz?

⁶ Qa ma txi qqanin te Jehová tuʼn tonin qiʼj tuʼn tikʼx quʼn, in tzaj ttziyen qe qa ktzajel tyekʼun «jun tumel» qe tuʼn qex twitz (kjawil uʼjit 1 Corintios 10:13). ¿Alkye tten in japun twiʼ tyol lu tuʼn? At maj, aj tel tiʼn nya  bʼaʼn qiʼj. Noqtzun tuʼnj, chʼixmi tkyaqil maj in tzaj tyekʼun jun tumel tuʼn qex twitz nya bʼaʼn aj ttzaj tqʼoʼn qipumal tuʼn tikʼx quʼn tukʼil pasens ex tzalajbʼil (Colosenses 1:11). Nya oʼkxju, ax ikx ojtzqiʼnxix tuʼn Jehová jniʼ jaku tzikʼx quʼn. Mlay tzaj tqʼoʼn ambʼil te jun nya bʼaʼn mlayx tzikʼx quʼn aju jaku qo kubʼ numj tuʼn.

7. Qʼamantza tukʼil jun techel tiquʼn nim toklen tuʼn qxnaqʼtzan tiʼj Tyol Dios tuʼntzun tikʼx quʼn.

⁷ Qkyuwsam qʼuqbʼil qkʼuʼj tuʼn Tyol Dios. ¿Tiquʼn nim toklen tuʼn qxnaqʼtzan tiʼj Tyol Dios? Qqʼonku jun techel. Tuʼn tjax jun xjal twiʼ witz Everest tbʼi, il tiʼj tuʼn twaʼn juntl oxe maj tkyaqil qʼij twitzju twa in xi tkyaqil maj. Qa tajbʼil tuʼn tjapun twi witz ex tuʼn tikʼx tuʼn, il tiʼj tuʼn txi twaʼn nim wabʼj. Ax ikx qe, qa qajbʼil tuʼn tikʼx quʼn tzmaxi aj tul xitbʼil, il tiʼj tuʼn qxnaqʼtzan tiʼj Tyol Dios. Il tiʼj tuʼn tel qpaʼn ambʼil tuʼn qxnaqʼtzan tiʼj Tyol Dios qjunalx ex tuʼn qxiʼ tkyaqil maj kyoj chmabʼil. Iktzun tten kchʼiyil qʼuqbʼil qkʼuʼj (Juan 6:27).

8, 9. a) Ik tzeʼn in tzaj tqʼamaʼn Job 2:4, 5, ¿tiʼ in nok toj malbʼil aj ttzaj jun nya bʼaʼn qiʼj? b) ¿Alqiʼj bʼaʼn tuʼn qximen toj ambʼil aju?

⁸ Bʼaʼn tuʼn ttzaj qnaʼn qa il tiʼj tuʼn kukx qajbʼen te Dios. Ax tok in tzaj nim kʼixkʼoj qiʼj aj qok weʼ kywitz nya bʼaʼn. Noqtzun tuʼnj, bʼaʼn tuʼn ttzaj qnaʼn qa in nok toj malbʼil aju kukx in qo ajbʼen te Dios. Nya tajbʼil Satanás tuʼn tkawin Jehová tibʼaj tkyaqilju at. Yolin Satanás nya bʼaʼn tiʼj Jehová tej tqʼama qa in qo ajbʼen te oʼkx tuʼnju in tzaj tqʼoʼn tbʼanel tiʼchaq qe. Toj ambʼil tej tanqʼin Job, tqʼama Satanás jlu tiʼj: «Qa mya tiʼjku t-ximlal xjal ma tzaj yajbʼil, mlay bʼisun tuʼn tlaj, porque jaku txi tqʼoʼn tkyaqilju at te noq tuʼn kukx tanqʼin». Ex tqʼamatl qa ma tzʼok tkʼixbʼisaʼn Dios t-xmilal Job, oktoq kyolil Job nya bʼaʼn tiʼj Jehová (Job 2:4, 5). Tej tikʼtl mas abʼqʼi, etz lajoʼn Satanás toj kyaʼj ex kukx yolin nya bʼaʼn kyiʼj tmajen Jehová e ajbʼen te (Apocalipsis 12:10). Ax ikx toj ambʼil jaʼlo, kukx in yolin Satanás tiʼj qa in qo ajbʼen te Dios noq oʼkx tuʼnju in tzaj tqʼoʼn tbʼanel tiʼchaq qe. Tuʼntzunju, aj qok weʼ twitz jun nya bʼaʼn, bʼaʼn tuʼn ttzaj qnaʼn qa kbʼel qyekʼun tukʼilju qbʼinchbʼen qa in qo onin tiʼj Jehová, qa oʼkx te at toklen tuʼn tkawin tibʼaj tkyaqilju at.

⁹ Toj ambʼil aju, jaku kubʼ qximen jlu: toj jun plaj, in che keʼyin Satanás qiʼj kyukʼil qe taqʼunal ex in tzaj kyqʼamaʼn qa kbʼel qiʼj kyuʼn. Atzun toj juntl plaj, at Jehová, at Jesús, aju kkawil qibʼaj, at qeju okslal skʼoʼn maj otoq che jaw anqʼin ex at nim mil kybʼet anjel. Ax ikx kye in che keʼyin qiʼj, noqtzun tuʼnj, in tzaj kyqʼuqbʼaʼn qkʼuʼj tuʼn miʼn tkubʼ qiʼj. In che jaw tzalaj tuʼnju kukx in qo ajbʼen te Jehová ex kukx in nikʼx nim tiʼchaq quʼn. In tzajtzun tqʼamaʼn Jehová jlu qe: «Nkʼwaʼl, toka at tnabʼla, tuʼntzun ntzalaje tiʼja; kyjaʼtzun jaku che tzaqʼwet wuʼne qeju in che yolin mya bʼaʼn wiʼje tuʼn tlaja» (Proverbios 27:11).

10. ¿Alkye tten jaku tzʼel qkanoʼn tiʼj Jesús aj qok weʼ kywitz nya bʼaʼn?

¹⁰ Qo ximen tiʼj tbʼanel tzul qa ma tzikʼx quʼn. Ximana tiʼj qa ata toj jun tbʼeya ex il tiʼj tuʼn tikʼxa toj jun túnel nim tqan, moqa aju bʼe at tjaqʼ Txʼotxʼ. Mintiʼ spikʼun toj bʼe.  Noqtzun tuʼnj, ojtzqiʼn tuʼna qa kukx ma bʼeta, kjel bʼaj bʼe ex kʼokel tqʼoʼna twitza tiʼj spikʼun juntl maj. Aju chwinqlal jaku tzʼok ik tzeʼn bʼe lu. At maj in qo ikʼ kyoj ambʼil kwest ex in tzajlo bʼaj qkʼuʼj. Axpe ikx te Jesús, kubʼlo tnaʼn ikju. Tej tokx qʼoʼn clav toj tqʼabʼ tuʼn tkubʼ bʼyoʼn twitz jun tzeʼ, kubʼ kyqʼoʼn xjal tchʼixwi ex kubʼ tnaʼn nim kʼixkʼoj. Atzun ambʼil mas kwest ikʼ toj tanqʼibʼil Jesús. ¿Tiʼ onin tiʼj tuʼn tikʼx tuʼn? In tzaj tqʼamaʼn Tyol Dios qa onin tiʼj aju «tzalajbʼil otoq tzaj yekʼun te» (Hebreos 12:2, 3). Toj juntl yol, ok tqʼoʼn Jesús twiʼ kyiʼj tbʼanel tiʼchaq tzultoq qa ma tzikʼxtoq tuʼn, aju mas nim toklen, aju tuʼn tonin tuʼn tok tbʼi Jehová te saq ex tuʼn tonin tiʼj toklen tuʼn tkawin. Ojtzqiʼntoq tuʼn qa kbʼel naj joybʼil ok weʼ twitz ex atzun oyaj tzultoq qʼoʼn te toj kyaʼj, kukxtoq ktel te jumajx. Aj qikʼ toj kʼixkʼoj jaku tzʼel qkanoʼn tiʼj Jesús. ¿Alkye tten? Qa ma qo ximen tiʼj tbʼanel tzul qa ma tzikʼx quʼn ex tuʼn ttzaj qnaʼn qa che najel qe nya bʼaʼn.

11. ¿Tiquʼn nim toklen tuʼn tok qojtzqiʼn kyanqʼibʼil qeju o tzikʼx kyuʼn?

¹¹ At nim tmajen Jehová o tzikʼx kyuʼn ik tzeʼn qe. Toj ambʼil tej tanqʼin apóstol Pedro, nim okslal ikʼx kyuʼn aju nya bʼaʼn ok tbʼinchaʼn Satanás kyiʼj. Tuʼntzunju, tqʼama Pedro jlu: «Che weʼxixe twitz, kyuw kytene tuj kyokslabʼle, porque bʼaʼn kyuʼne, tuj tkyaqil twitz txʼotxʼ nnikʼx kyuʼn kyermaniye ik tzaʼn kyeye nnikʼx kyuʼne» (1 Pedro 5:9). Nim toklen tuʼn tok qojtzqiʼn kyanqʼibʼil qeju o tzikʼx kyuʼn. ¿Tiquʼn? Tuʼnju jaku tzʼonin qiʼj tuʼn kukx qajbʼen te Jehová, jaku tzʼok qeʼ qkʼuʼj tiʼj qa jaku tzikʼx quʼn ex tuʼn ttzaj qnaʼn qa kukx ma qo ajbʼen te Jehová, tzul tqʼoʼn jun oyaj qe (Santiago 5:11). Qo xnaqʼtzaʼn tiʼj techel kyiʼj junjun tmajen Jehová ^[1] (tqanil jun).

12. ¿Tiʼ xnaqʼtzbʼil jaku tzʼel qiʼn tiʼj techel kyaj kyqʼoʼn querubín tej kyten toj Edén?

¹² Aqeju querubín. Anjel qe jlu ex nim kyoklen. Tej tkubʼ tbʼinchaʼn Adán ex Eva il, xi tqʼoʼn Jehová kyoklen junjun querubín tuʼn kyten tzalu twitz Txʼotxʼ, junxitl aju oklenj jlu ik tzeʼn kyoklen attoq toj kyaʼj. Aju techel kyaj kyqʼoʼn, jaku tzʼel qiʼn xnaqʼtzbʼil tiʼj tuʼn tikʼx quʼn aj ttzaj qʼoʼn jun qoklen kwest tuʼn tbʼant quʼn. In tzaj tqʼamaʼn Tyol Dios qa e kubʼ tqʼoʼn Jehová qe «querubín ttxlaj awal tuj tjawitz qʼij, tukʼix jun spad in kʼanttoq ex in yukchtoq tuj tkyaqil pakʼ, tuʼntzun miʼn kyokx xjal tiʼj ju tzeʼ in tqʼoʼn chwinqlal» (Génesis 3:24) ^[2] (tqanil kabʼe). Mintiʼ in tzaj tqʼamaʼn Tyol Dios qa e ok ten querubín yolil jun yol nya toj tumel moqa e ok ten qʼamal qa nya nim toklen aqʼuntl xi qʼoʼn kye tuʼnju nim kye kyoklen. Ex mintiʼ in tzaj tqʼamaʼn qa bʼaj kygan ex qa kyaj kykolin kyoklen. Aju  kye bʼant kyuʼn, ax e kyaj ten tzmaxi tej tbʼaj twi kyaqʼun. E tenlo mas te 1,6000 abʼqʼi tzmaxi tej tul Nim Jbʼal.

13. ¿Tiʼ onin tiʼj Job tuʼn tikʼx nim kʼixkʼoj tuʼn?

¹³ Kukx ajbʼen Job te Dios. Atlo maj in tzaj qbʼis tuʼnju in tzaj qʼamaʼn jun yol nya toj tumel qe tuʼn jun qamiw moqa jun xjal at qxilen tukʼil. Ex qa in tzaj nim qyabʼ moqa o kyim jun xjal kʼujlaʼnxix quʼn ex tuʼnlo jlu in kubʼ qnaʼn nim kʼixkʼoj. Noq alkyexku tiʼ in qo ikʼ toj, aju techel kyaj tqʼoʼn Job, jaku tzaj tqʼuqbʼaʼn qkʼuʼj (Job 1:18, 19; 2:7, 9; 19:1-3). Mintiʼtoq ojtzqiʼn tuʼn Job tiquʼn noq minabʼen e tzaj nya bʼaʼn tiʼj. Noqtzun tuʼnj, mintiʼ kubʼ numj. ¿Tiʼ onin tiʼj Job tuʼn tikʼx tuʼn? Tnejel, onin tiʼj aju tkʼujlabʼil tiʼj Jehová ex aju tajbʼil tuʼn ttzalaj Jehová tuʼn (Job 1:1). Tajbʼiltoq tuʼn ttzalaj Jehová tuʼn kyoj bʼaʼn ex kyoj nya bʼaʼn ambʼil. Ex tkabʼin, onin tiʼj tej tyolin Jehová kyiʼj tbʼinchbʼen tukʼil tuʼntzun ttzaj tnaʼn Job qa at nim tipumal Jehová. A jlu onin tiʼj Job tuʼn tkubʼ t-ximen qa oktoq kʼelel tiʼn Jehová tkyaqil nya bʼaʼn toktoq tiʼj toj jun ambʼil mas bʼaʼn (Job 42:1, 2). Ex atzun bʼaj. El tiʼn Jehová tkyaqil nya bʼaʼn tzaj tiʼj Job ex xi tqʼoʼn kabʼ maj t-xel te twitzju attoq te tnejel. Iktzun tten tzalaj Job akux anqʼin (Job 42:10, 17).

14. Ik tzeʼn in tzaj tyekʼun 2 Corintios 1:6, ¿alkye tten onin kyiʼj txqantl aju techel kubʼ tqoʼn Pablo tuʼnju kukx ikʼx tuʼn?

¹⁴ Aju apóstol Pablo. Atlo junjun qe in nok bʼinchaʼn junjun nya bʼaʼn qiʼj moqa in qo el ikʼun tuʼnju in qo ajbʼen te Jehová. Qa ansyan qo moqa at qoklen te ansyan in che bʼet kyoj junjun Ja te Chmabʼil, atlo maj in kubʼ qnaʼn qa nim in qo sikt tuʼnju at nim aqʼuntl tuʼn tbʼant quʼn. Qa ikju, jaku tzʼonin techel kyaj tqʼoʼn Pablo qwitz. Ok weʼ Pablo twitz nimxix ikʼbʼil. Nya oʼkxju, ax ikx tzaj bʼaj tkʼuʼj kyiʼj erman (2 Corintios 11:23-29). Noqtzun tuʼnj, mintiʼ kubʼ numj ex aju tbʼanel techel kubʼ tqʼoʼn onin kyiʼj txqantl tuʼn tikʼx kyuʼn (kjawil uʼjit 2 Corintios 1:6). Ax ikx qe, qa ma tzikʼx quʼn, jaku tzʼonin kyiʼj txqantl tuʼn tikʼx kyuʼn.

15, 16. a) ¿Alkye aqʼuntl il tiʼj tuʼn tbʼant tuʼnju in nikʼx quʼn? b) Qʼamantza junjun techel tiʼj alkye tten in bʼant aqʼuntl tuʼnju in nikʼx quʼn.

¹⁵ Onin Jehová tuʼn tkubʼ ttzʼibʼin Santiago, aju t-xnaqʼtzbʼen Jesús, qeju yol lu: «Tzʼok tililx kyuʼne tuʼn tten kypasense [moqa ‹tuʼn tikʼx kyuʼne› TNM] kabʼalxix, tuʼn tok kynabʼle ex tuʼn kytene mintiʼ kypaltile, ex mintiʼ jun atx taj kyeye» (Santiago 1:4). Qa ma tzikʼx quʼn, in bʼant jun aqʼuntl tuʼn qiʼj. Noqtzun tuʼnj, ¿alkye tten in bʼant aqʼuntl tuʼn qiʼj? Aj in tzaj jun nya bʼaʼn qiʼj, atlo maj in nel qnikʼ tiʼj qa il tiʼj tuʼn tten mas qpasens, tuʼn tbʼant qqʼoʼn mas chjonte moqa tuʼn tten mas qkʼujlabʼil. Qa ma tzikʼx quʼn, kbʼel qyekʼun mas tbʼanel qeju mod lu ex qo okel te mas tbʼanel okslal.

¹⁶ Tuʼnju in nonin qiʼj tuʼn qok te mas tbʼanel okslal qa ma tzikʼx quʼn, mintiʼ in kubʼ qximen tuʼn miʼn qnimentl te Jehová tuʼntzun qex twitz nya bʼaʼn. Qo ximen tiʼj junjun techel. Qa in nok tilel quʼn tuʼn tkubʼ tiʼj jun nya bʼaʼn ximbʼetz quʼn, mintiʼ in xi qqʼoʼn ambʼil tuʼn qkubʼ tuʼn. Aju kʼokel tilel quʼn tuʼn tbʼant, kxel qqanin onbʼil te Jehová tuʼn tel qikʼun aju nya bʼaʼn ximbʼetz. Ex qatzun at jun toj qja in qʼojin tuʼnju testigo de Jehová qoʼ, mintiʼ in xi qqʼoʼn ambʼil te tuʼn qkubʼ tuʼn. Aju in bʼant quʼn, in nok tilel quʼn tuʼn kukx qajbʼen te Jehová. A jlu kʼonil qiʼj tuʼn tok qeʼ mas qkʼuʼj tiʼj Jehová. Mintiʼ tuʼn tikʼ tnaʼl quʼn qa qajbʼil tuʼn qtzaj tkʼiwlaʼn Jehová, il tiʼj tuʼn tikʼx quʼn (Romanos 5:3-5; Santiago 1:12).

17, 18. a) Qʼamantza tukʼil jun techel tiquʼn nim toklen tuʼn tikʼx quʼn. b) Tuʼnju ya chʼix tul xitbʼil, ¿tiʼ jaku tzʼok qeʼ qkʼuʼj tiʼj?

¹⁷ Nim toklen tuʼn kukx tikʼx quʼn, nya oʼkx toj jun ambʼil sino tzmaxi aj tul xitbʼil. Qo ximen tiʼj jun bark aju chʼix tkuʼx mulqʼaj toj aʼ. Qa kyajbʼil xjal tuʼn kykyaj anqʼin, il tiʼj tuʼn kynadarin ex mintiʼ tuʼn kyweʼ jun rat tzmaxi aj kyetz toj aʼ. Chʼixmi ax jlu jaku bʼant quʼn, qa qajbʼil tuʼn qanqʼin toj Tbʼanel Najbʼil, il tiʼj tuʼn tikʼx quʼn tzmaxi aj tul xitbʼil ex mintiʼ tuʼn t-xi qqʼoʼn ambʼil tuʼn qkubʼ numj jun rat. Il tiʼj tuʼn t-xi qqʼamaʼn ik tzeʼn te apóstol Pablo: «Mintiʼ in qo kubʼ numje» (2 Corintios 4:1, 16).

¹⁸ Ik tzeʼn te Pablo, jaku tzʼok qeʼ qkʼuʼj tiʼj qa ax ikx kʼonil Jehová qiʼj tuʼn tikʼx quʼn tzmaxi aj tul xitbʼil. Kubʼ ttzʼibʼin Pablo jlu: «Tuj tkyaqil jlu in kubʼxix kyiʼj quʼn noq tuʼn Crist aju o qo tkʼujla. Kyjaʼtzun qʼuql nkʼuʼje tiʼj, mi aʼl jun bʼaʼn tel paʼnte qe tiʼj tkʼujlalil Dios; mi kamik, mi ju qchwinqlal tzalu twitz txʼotxʼ, mi qe anjel, mi qe nejenel mintiʼ qʼanchaʼl, mi qeju at kyipumal, mi ju at jaʼlo, mi ju tzul, mi qeju ateʼ twitz kyaʼj, mi qeju ateʼ tjaqʼxi txʼotxʼ, ex mi jun tchʼisbʼen Dios jaku qo el kypaʼn tiʼj tkʼujlalil Dios, aju ma tzaj qʼoʼn qe tuʼn Jesucrist aju Qajaw» (Romanos 8:37-39). Ax tok, atlo maj in kubʼ qnaʼn qa in qo sikt. Qa ikju, bʼaʼn tuʼn tel qkanoʼn techel kyaj tqʼoʼn Gedeón ex qeju ox syent xinaq attoq tukʼil. Otoq che sikt, noqtzun tuʼnj, mintiʼ e kubʼ numj (Jueces 8:4). ¿Kʼelel tkanoʼn teya techel kyaj kyqʼoʼn?