BʼANT tuʼn Jehová tuʼn tkubʼ ttzʼibʼin apóstol Pablo qeju bʼeljaj tbʼanel mod in tqʼoʼn xewbʼaj xjan (Gál. 5:22, 23). Kykyaqil jlu in tzaj tqʼoʼn xewbʼaj xjan, * ex at toklen tukʼil akʼaj qten (Col. 3:10). Ik tzeʼn jun tzeʼ, in che el tbʼanel twitz qa xqʼuqin taʼ. Axju in bʼaj tiʼj jun xjal, qa bʼaʼn taʼ toj tkyaqil, kbʼel tyekʼin qa in naqʼunan xewbʼaj xjan toj tumel toj tanqʼibʼil (Sal. 1:1-3).

Aju tnejel mod tqʼama Pablo, aju kʼujlabʼil. ¿Jniʼ toklen mod lu? Tqʼama Pablo qa mintiʼ qkʼujlabʼil, «mintiʼ qajbʼen» (1 Cor. 13:2). Noqtzun tuʼnj, ¿tiʼ aju kʼujlabʼil, tzeʼn jaku ten ex alkye tten jaku kubʼ qyekʼin tkyaqil qʼij?

Kwest tuʼn t-xi qqʼamaʼn kyuʼn yol tiʼ aju kʼujlabʼil, noqtzun tuʼnj, in tzaj tqʼamaʼn Tyol Dios alkye tten in kubʼ qyekʼin mod lu. Jun techel, in tzaj tqʼamaʼn qa aju kʼujlabʼil «at tpasens ex in tzʼeʼy tkʼuʼj tiʼj tukʼil», «in tzalaj tiʼj ju yol ax tok» ex «tkyaqil nnikʼx tuʼn, tkyaqil niman tuʼn, ex tuj tkyaqil ayoʼn tuʼn, ex at tpasens tuj tkyaqil». Nya oʼkxju, aju xjal at axix tok tkʼujlabʼil kyiʼj txqantl in nok te jun tbʼanel amiw. Qatzun nya ikju, aju xjal mintiʼ tkʼujlabʼil, in tzaj lochʼj tkʼuʼj, in jaw tnimsan tibʼ, in kubʼ tbʼinchaʼn junjun tiʼchaq nya toj tumel, oʼkx in ximen tiʼjx, in kuʼx tkʼuʼn qʼoj ex mintiʼ in kubʼ tnajsaʼn kyil txqantl. Aju tuʼn tbʼant quʼn twitzju tuʼn tkubʼ qyekʼin qe nya bʼaʼn mod lu, aju tuʼn tten qkʼujlabʼil «mya noq oʼkx tiʼjx tok tkʼuʼj» (1 Cor. 13:4-8).

«Ate Dios at tkʼujlalil». Tuʼntzunju, a Jehová in nok te kʼujlabʼil (1 Juan 4:8). In tzaj kyyekʼin qe tbʼinchbʼen ex aju in bʼant tuʼn qa ax tok jlu. Aju yekʼbʼil mas matij tiʼj tkʼujlabʼil, aju tej ttzaj tsamaʼn Jesús tzalu twitz Txʼotxʼ tuʼn tikʼx nya bʼaʼn tuʼn ex tuʼn tkyim tuʼn qpaj. Kubʼ ttzʼibʼin apóstol Juan jlu: «Tuʼn jlu ma tzaj tyekʼun Dios tkʼujlalil qiʼj; tuʼnju tzaj t-samaʼn Dios oʼkxku jun Tkʼwaʼl, ul tzalu twitz txʼotxʼ tuʼntzun tten qchwinqlal noq tuʼn. Tuʼn jlu nneʼl qnikʼ tiʼj ju tkʼujlalil: Mya aqeqoʼ ma qo kʼujlante Dios, noq oʼkx ate Dios ma qo tkʼujla ex tzaj t-samaʼn aju Tkʼwaʼl tuʼn tok te chojbʼil qil» (1 Juan 4:9, 10). Noq tuʼnju tzaj tyekʼin Jehová tkʼujlabʼil qiʼj, in kubʼ tnajsaʼn qil, at qʼuqbʼil qkʼuʼj ex jaku qo anqʼin te jumajx.

Kubʼ tyekʼin Jesús tkʼujlabʼil qiʼj tej tul tzalu twitz Txʼotxʼ tuʼntzun tbʼant tajbʼil Dios. Tzaj tchikʼbʼaʼn Pablo jlu: «Ex tuʼnju tbʼincha Crist tajbʼil Dios, ma qo el tpaʼn tuʼn qajbʼen oʼkx te, tuʼnju noq junx maj xi tqʼon tibʼ Jesucrist tuʼn tkyim te chojbʼil il» (Heb. 10:9, 10). Atzun jlu jun matij yekʼbʼil jaku bʼant tiʼj kʼujlabʼil tuʼn jun xjal. Tqʼama Jesús jlu: «Qa at jun xjal ma txi tqʼon tibʼ tuʼn tkyim tuʼn kyklet qe tamiw, mas maʼ tkʼujlalil, mlay  pon tkʼujlalil juntl ik tzaʼn jlu» (Juan 15:13). ¿Jaku tzʼel qkanoʼn tiʼj tkʼujlabʼil Jehová ex Jesús maske aj il qoʼ? Jaku. Qo xnaqʼtzan tiʼj alkye tten jaku bʼant quʼn.

Tqʼama Pablo tuʼn tbʼant jlu quʼn: «Kykanoʼmile tiʼj Dios, porque tkʼwaʼl Dios qeye, kʼujlaʼnxix qeye tuʼn» (Efes. 5:1, 2). Tuʼn kukx tok qkʼujlan qibʼ, il tiʼj tuʼn tkubʼ qyekʼin toj tkyaqil qanqʼibʼil. Kyuʼn qbʼinchbʼen in kubʼ qyekʼin qa at qkʼujlabʼil ex nya noq oʼkx kyuʼn qyol. Kubʼ ttzʼibʼin Juan jlu: «Aqeye tal nkʼwaʼle, miʼn qkʼujla qibʼ noq tuʼn qyol ex tuʼn qtziʼ; noq oʼkx qkʼujlam qibʼ tuʼn qbʼinchbʼen ex ax tokwit qkʼujlalil» (1 Juan 3:18). Jun techel, kʼonil qkʼujlabʼil at tiʼj Jehová ex kyiʼj xjal tuʼn qxiʼ pakbʼal tiʼj «tqanil bʼaʼn [...] tiʼj tkawbʼil Dios» (Mat. 24:14; Luc. 10:27). Ax ikx in kubʼ qyekʼin qkʼujlabʼil qa at qpasens, qa in qo bʼinchan xtalbʼil ex qa in kubʼ qnajsaʼn kyil txqantl. Tuʼntzunju, in tzaj tqʼoʼn Tyol Dios nabʼil lu qe: «Kynajsame kyile kyxolxe ik tzaʼn te Dios kubʼ tnajsaʼn kyile noq tuʼn Crist» (Efes. 4:32).

Noqtzun tuʼnj, mintiʼ tuʼn qel tzpet tiʼjju kʼujlabʼil axix tok tukʼilju tuʼn t-xi qʼet ambʼil te tkyaqil. Jun techel, jaku txi kyqʼoʼn mambʼaj ambʼil kye kykʼwaʼl tuʼn tkubʼ kybʼinchaʼn tkyaqil aju kyajbʼil noq tuʼn miʼn kyjaw oqʼ. Atzun kye mambʼaj at axix tok kykʼujlabʼil kyiʼj kykʼwaʼl, mlay txi kyqʼoʼn ambʼil tuʼn tkubʼ kybʼinchaʼn tkyaqil ex che xel kykawin qa il tiʼj. Axju in bʼant tuʼn Jehová, tuʼnju at tkʼujlabʼil «in che kubʼ tkawin qeju kʼujlaʼn qe tuʼn» (Heb. 12:6). Tuʼntzunju, qa il tiʼj tuʼn t-xi qʼet jun kawbʼil te jun xjal, jun yekʼbʼil tiʼj kʼujlabʼil jlu (Prov. 3:11, 12). Ax ikx bʼaʼn tuʼn ttzaj qnaʼn qa aj il qoʼ, tuʼntzunju nya toj tkyaqil ambʼil jaku kubʼ qyekʼin qkʼujlabʼil. At jatumel jaku tzʼok tilil quʼn tuʼn qok te mas tbʼanel. Qo xnaqʼtzan tiʼj oxe tumel alkye tten jaku bʼant quʼn.

Tnejel. Il tiʼj tuʼn t-xi qqanin te Dios tuʼn tzaj tqʼoʼn xewbʼaj xjan qe. Tqʼama Jesús qa in «tzaj tqʼoʼn aju Xewbʼaj Xjan kye qeju in che qanin te» (Luc. 11:13). Qa ma txi qqanin xewbʼaj xjan toj qnaʼj Dios ex qa kukx ma tzʼok tilil quʼn tuʼn qbʼet «ik tzaʼn tajbʼil Xewbʼaj Xjan», mas kbʼel qyekʼin qkʼujlabʼil (Gál. 5:16). Jun techel, jaku txi kyqanin ansyan xewbʼaj xjan te Jehová tuʼntzun tonin kyiʼj tuʼn t-xi kyqʼoʼn kawbʼil tukʼil kʼujlabʼil. Ax ikx bʼaʼn tuʼn t-xi kyqanin mambʼaj xewbʼaj xjan te Jehová tuʼntzun t-xi kykawin kykʼwaʼl tukʼil kʼujlabʼil ex nya tukʼil qʼoj.

Tkabʼin. Bʼaʼn tuʼn qximen tiʼj alkye tten kubʼ tyekʼin Jesús tkʼujlabʼil, axpe ikx kyoj ambʼil tej tok bʼinchaʼn nya bʼaʼn tiʼj (1 Ped. 2:21, 23). Jaku tzʼonin qiʼj aju techel kyaj tqʼoʼn aj tok bʼinchaʼn jun nya bʼaʼn qiʼj. Kyoj ambʼil aju, bʼaʼn tuʼn tkubʼ qxjelin jlu: «¿Tiʼwtlo bʼant tuʼn Jesús?». Onin xjel lu tiʼj jun ermana Leigh tbʼi tej naʼmxtoq tkubʼ t-ximen tiʼ tuʼn tbʼant tuʼn. Tqʼama jlu: «Jun maj, xi tsamaʼn jun wukʼile toj aqʼuntl jun correo electrónico kye txqantl jatumel yolin nya bʼaʼn wiʼje ex tiʼj waqʼune. Kubʼ nnaʼne nim bʼis tuʼn jlu. Kubʼtzun nxjeline jlu: ‹¿Tiʼwtlo te Jesús tmod kubʼ tyekʼin?›. Tej otoq chin ximane tiʼjju jakutoq bʼant tuʼn Jesús, kubʼ nximane tuʼn miʼn tok nqʼoʼne nwiʼye tiʼj jlu. Yajxitl, ok nbʼiʼne qa otoq ttzaj jun yabʼil tiʼj wukʼile ex tuʼn jlu, in kubʼtoq tnaʼn nim siktlen. Kubʼ nximane qa mintiʼlo bʼant jlu tuʼn tuʼnju at nya bʼaʼn t-ximbʼetz wiʼje. Tej nximane tiʼj tkʼujlabʼil Jesús ten kyoj ambʼil tej tok bʼinchaʼn nya bʼaʼn tiʼj, onin wiʼje tuʼn tkubʼ nyekʼine nmode ik tzeʼn te ex kubʼ nyekʼine nkʼujlabʼile tiʼj». Qa ma tzʼel qkanoʼn techel kyaj tqʼoʼn Jesús, toj tkyaqil ambʼil kbʼel qyekʼin qkʼujlabʼil.

Toxin. Bʼaʼn tuʼn t-xi qxnaqʼtzan qibʼ tuʼn t-xi qbʼinchaʼn aju mas bʼaʼn kye txqantl. Tuʼn kʼujlabʼil lu in nel nikʼbʼaj kyiʼj axix tok okslal (Juan 13:34, 35). In onin Tyol Dios qiʼj tuʼn  tten qximbʼetz ik tzeʼn t-ximbʼetz Jesús. Tej tkyaj tqʼoʼn tanqʼibʼil toj kyaʼj, kyaj tkolin aju at te noq tuʼn qpaj ex xi tqʼoʼn tchwinqlal tuʼn tkyim (Filip. 2:5-8). Qa ma tzʼel qkanoʼn aju bʼant tuʼn kyiʼj txqantl ex tiʼj tkʼujlabʼil, mas ktel qximbʼetz ex aju in kubʼ qnaʼn ik tzeʼn te, ex tnejel qo ximel tiʼjju at tajbʼen kye txqantl. ¿Tiʼ tbʼanel jaku tzaj qa ma ten qkʼujlabʼil?

Aj in kubʼ qyekʼin kʼujlabʼil, in tzaj tiʼn nim tbʼanel qe. Qo xnaqʼtzan oʼkx tiʼj kabʼe.

• ATEʼ QERMAN TWITZ TKYAQIL TXʼOTXʼ. Tuʼnju at qkʼujlabʼil qxolx, ojtzqiʼn quʼn qa qo okex kykʼamoʼn erman tukʼil kʼujlabʼil noq jaxku tumel. A jlu, jun kʼiwlabʼil tuʼnju jaku kubʼ kyyekʼin erman twitz tkyaqil Txʼotxʼ kykʼujlabʼil qiʼj (1 Ped. 5:9). Aju kʼujlabʼil lu, oʼkx jaku kanet quʼn toj ttnam Jehová.

• MUJBʼABʼIL. Qa ma tzikʼx kypaltil txqantl quʼn tukʼil kʼujlabʼil, jaku qo tzalaj tiʼj mujbʼabʼil jaku ten qxol (Efes. 4:2, 3). Qkyaqilx in kubʼ qnaʼn mujbʼabʼil lu aj qpon kyoj chmabʼil ex kyoj nimaq chmabʼil, mintiʼ in bʼaj jlu kyxol xjal toj ambʼil jaʼlo tuʼnju at ikʼbʼil kyxol (Sal. 119:165; Is. 54:13). Aj tok tilil quʼn tuʼn tten tbʼanel qxol kyukʼil txqantl, in kubʼ qyekʼin qa at qkʼujlabʼil kyiʼj ex in jaw tzalaj Qtat toj kyaʼj tuʼn jlu (Sal. 133:1-3; Mat. 5:9).

Tqʼama Pablo jlu: «Atzunju kʼujlalil in qo chʼiy tuʼn» (1 Cor. 8:1). ¿Tiʼ kyxilen qe yol lu? Toj capítulo 13 te uʼj te Corintios, aju in nok kyqʼoʼn nim xjal tbʼi te «tbʼanel yol tiʼj kʼujlabʼil», tzaj tchikʼbʼaʼn Pablo tiʼ kyxilen qe yol lu. Tuʼn t-xi tzyet, aju kʼujlabʼil, in jyon tiʼjju mas tbʼanel kye txqantl (1 Cor. 10:24; 13:5). Nya oʼkxju, aju xjal at tkʼujlabʼil, in ten tpasens, in ximen kyiʼj txqantl ex in ten tbʼanel tmod, tuʼn jlu at kʼujlabʼil toj tja ex mujbʼabʼil kyxol erman (Col. 3:14).

Mintiʼ juntl kʼujlabʼil mas tbʼanel twitzju jaku kubʼ qnaʼn tiʼj Jehová. Noq tuʼn kʼujlabʼil lu, in che kʼulin xjal junxitl kykostumbr, kyyajil ex kyyol junx te Jehová tukʼil tzalajbʼil, ex in bʼaj kyonin kyibʼ tuʼn kyajbʼen te (Sof. 3:9). Tzʼok tililxix quʼn tuʼn tkubʼ qyekʼin aju tbʼanel mod lu tkyaqil qʼij, aju in tqʼoʼn xewbʼaj xjan.